Lesson 4

Pagsasalin ng Aklat ni Mormon

Pambungad at Timeline

Matapos matanggap ni Joseph Smith ang mga laminang ginto noong Setyembre 1827, hinarap niya ang mahirap na gawain ng pagsasalin at paglalahatla sa talaan. Noong Disyembre 1827, sina Joseph at Emma ay lumipat mula Manchester, New York, patungong Harmony, Pennsylvania, upang matakasan ng mag-asawa ang umiigting na pang-uusig at nang sa gayon si Emma, na noon ay nagdadalantao, ay makapagsilang nang mas malapit sa kanyang pamilya. Noong Pebrero 1828, dumating si Martin Harris sa Harmony upang tulungan ang Propeta. Noong Hunyo, ang Propeta ay nakapagsalin ng 116 na pahina kasama si Martin Harris bilang kanyang tagasulat. Hiniling ni Martin ang pahintulot ni Joseph na bumalik sa New York at ipakita ang mga pahina ng manuskrito sa kanyang asawa at ilan pang iba, subalit ipinagbawal iyon ng Panginoon. Dahil sa patuloy na paghiling ni Martin, tinanong ni Joseph ang Panginoon nang dalawa pang beses, at ang Panginoon ay pumayag na dalhin ni Martin ang manuskrito kung papayag siya sa mga partikular na kondisyon. Gayunman, dahil sa kapabayaan ni Martin, ang mga pahina ng manuskrito ay kinuha ng “masasamang tao” (D at T 10:8). Dahil sa pagkakamaling ito, pansamantalang nawala ang kaloob ni Joseph na magsalin. Matapos maipanumbalik ang kaloob ng Propeta, pinadala ng Panginoon si Oliver Cowdery upang tulungan siya sa pagsasalin.

Setyembre 22, 1827Natanggap ni Joseph Smith ang mga laminang ginto mula sa anghel na si Moroni.

Disyembre 1827Sina Joseph at Emma Smith ay lumipat sa Harmony, Pennsylvania, kung saan nagsimula si Joseph sa masugid na pagsasalin ng Aklat ni Mormon.

Pebrero 1828Dinala ni Martin Harris sa mga iskolar sa Lunsod ng New York ang kopya ng ilang titik na kinopya mula sa mga laminang ginto.

Hunyo–Hulyo 1828Naiwala ni Martin Harris ang 116 na pahinang isinalin ni Joseph Smith mula sa Aklat ni Mormon.

Abril 5, 1829Si Oliver Cowdery ay dumating sa Harmony, Pennsylvania, upang tulungan si Joseph Smith sa pagsasalin ng mga laminang ginto.

Mga Babasahin ng mga Estudyante

Mga Banal: Ang Kuwento ng Simbahan ni Jesucristo sa mga Huling Araw, Tomo 1, Ang Pamantayan ng Katotohanan, 1815–1846 (2018), mga kabanata 5–6

Mga Mungkahi sa Pagtuturo

Ituro ang lesson sa tamang pacing o bilis

Ituro ang lesson sa tamang pacing o bilis para may sapat na oras ka na maituro ang pinakamahalagang bahagi ng lesson. Kung mag-uukol ka ng maraming oras sa unang bahagi ng lesson, maaaring mapilitan kang madaliin ang huling bahagi. Kapag naghahanda ka para magturo, kalkulahin mo kung gaano karaming oras ang kailangan upang epektibo mong maituro ang bawat bahagi ng lesson. Alamin kung aling mga bahagi ang kailangan ng mas maraming oras para matalakay ng mga estudyante ang doktrina at mga alituntunin at makapagbahagi ng mga karanasang may kaugnayan sa lesson.

Tinulungan ni Martin Harris si Joseph Smith sa pagsasalin ng Aklat ni Mormon

Natanggap ni Joseph Smith ang pangangalaga sa mga lamina

Ipakita ang kalakip na larawan. Ipaliwanag na ang larawang ito ay isang paglalarawan ng pagtanggap ni Joseph Smith sa mga laminang gintong noong kinaumagahan ng Setyembre 22, 1827.

• Batay sa nabasa ninyo sa kabanata 5 ng Mga Banal: Tomo 1, ano ang ilan sa mga hamong naranasan ni Joseph Smith matapos niyang matanggap ang mga lamina mula kay Moroni? (Ang pang-uusig na naranasan ni Joseph ay “higit na naging mapait at matindi kaysa noong una,” at maraming tao ang nagtangkang nakawin ang mga lamina sa kanya [Joseph Smith—Kasaysayn 1:60].)

Ipaliwanag na dahil sa pang-uusig at panggugulo na ito, sina Joseph at Emma ay lumipat mula Manchester, New York, patungong Harmony, Pennsylvania, noong Disyembre 1827 (tingnan sa Joseph Smith—Kasaysayan 1:60–61). Ang paglipat na ito ay pinahintulutan din si Emma, na malapit nang ipanganak ang kanyang unang sanggol, na maging malapit sa kanyang pamilya.

Martin Harris

Ipakita ang larawan ni Martin Harris. Ipaliwanag na si Martin Harris ay isang iginagalang at mayamang magsasaka mula sa Palmyra, New York, na 22 taong mas matanda kay Joseph Smith. Noong una ay nagdadalawang-isip si Martin sa narinig niya tungkol kay Joseph Smith at sa mga laminang ginto.

Ipakita ang sumusunod na pahayag, at ipabasa ito nang malakas sa isang estudyante. Sabihin sa klase na tahimik na sumabay sa pagbasa, na inaalam ang naranasan ni Martin Harris na naghikayat sa kanya na tumulong sa gawain ng Panginoon.

Martin Harris

“Nagtungo ako sa aking silid at nanalangin sa Diyos na ipakita sa akin ang tungkol sa mga bagay na ito, at ako ay nangako na kung gawain niya ito at ipakikita niya sa akin na gayon, ibibigay ko ang lahat ng aking makakaya upang ilabas ito sa daigdig. Pagkatapos ay ipinakita niya sa akin na gawain niya ito. … Kanya itong ipinakita sa akin sa pamamagitan ng marahan at banayad na tinig na winiwika ng kaluluwa” (Martin Harris, sa “Mormonism—No. II,” Tiffany’s Monthly, Ago. 1859, 170).

• Ano ang ilan sa mga paraan na si Martin ay tumulong sa gawain ng Panginoon? (Tiyakin na mababanggit ang sumusunod: nagbigay siya ng pinansyal na tulong para matulungang lumipat sina Joseph at Emma sa Pennsylvania, dinala niya sa mga iskolar sa Lunsod ng New York ang kopya ng ilang titik na kinopya mula sa mga laminang ginto , at naglingkod siya bilang tagasulat nang isinalin ng Propeta ang isang bahagi ng Aklat ni Mormon noong Abril–Hunyo 1828.)

Sabihin sa mga estudyante na buklatin ang kabanata 5 ng Mga Banal: Tomo 1. Sabihin sa ilang estudyante na magsalitan sa pagbasa nang malakas mula sa pahina 58, simula sa talata na nag-uumpisa sa “Isang araw, humingi si Martin …” at nagtatapos sa talatang nag-uumpisa sa “Pagkaalis ni Martin, …” Sabihin sa klase na tahimik na sumabay sa pagbasa, na inaalam ang hiling ni Martin kay Joseph.

• Sa palagay ninyo, bakit inulit-ulit ni Joseph ang pagtatanong sa Panginoon kahit na nakatanggap na siya ng sagot?

Nawala ni Martin Harris ang manuskrito, at kinagalitan ng Panginoon si Joseph Smith

Ipaliwanag na matapos lisanin ni Martin Harris ang Harmony, nagsilang si Emma ng isang anak na lalaki, na namatay kaagad pagkapanganak. Muntik na ring mamatay si Emma, at dalawang linggo siyang inalagaan ni Joseph. Matapos magsimulang bumuti ang kanyang kalusugan, ipinaabot ni Emma ang kanyang pag-aalala tungkol sa manuskrito. Hinimok niya si Joseph na bumalik sa Palmyra at kumustahin si Martin.

Sabihin sa mga estudyante na buklatin ang kabanata 5 ng Mga Banal: Tomo 1. Sabihin sa mga estudyante na magsalitan sa pagbasa nang malakas mula sa pahina 60–61, simula sa talata na nag-uumpisa sa “Sumakay si Joseph sa isang karwahe …” hanggang sa dulo ng kabanata. Sabihin sa klase na tahimik na sumabay sa pagbasa, na inaalam ang nalaman ni Joseph tungkol sa manuskrito at kung paano ito nakaapekto sa kanya.

Sa halip na magbasa mula sa kabanata 5 ng Mga Banal: Tomo 1, maaari mong ipalabas ang video na “The Work of God,” na itinatanghal ang mga reaksyon nina Martin Harris at Joseph Smith matapos mawala ang 116 na pahina ng manuskrito. Ipalabas ang video mula sa time code 6:52 hanggang 8:35. Ang video na ito ay makukuha sa ChurchofJesusChrist.org.

• Sa palagay ninyo, bakit nadama ni Joseph na nawala na ang lahat?

Ipaliwanag na kinabukasan, si Joseph ay nagpaalam sa kanyang mga magulang at umalis patungong Harmony. Sa sumunod na dalawang buwan, si Joseph ay hindi nakipag-ugnayan sa kanyang mga magulang. Tumindi ang kanilang pag-aalala tungkol sa kanyang kapakanan at nagpasiyang maglakbay patungong Harmony upang kumustahin siya.

Ipabasa nang malakas sa isang estudyante ang sumusunod na pahayag ni Propetang Joseph Smith (1805–44). Ipaliwanag na ito ay tala na ibinahagi ni Joseph Smith sa kanyang ina tungkol sa kanyang pagbalik sa kanyang tahanan matapos mawala ang manuskrito.

Joseph Smith

“Pagkaalis ko … Nagsimula akong magpakumbaba sa taos na dalangin sa harapan ng Panginoon, … na kung maaari ay makamit ko ang [Kanyang] awa at mapatawad ako sa lahat ng nagawa kong salungat sa kanyang kalooban” (Joseph Smith, sa Lucy Mack Smith, “Lucy Mack Smith, History, 1844–1845,” book 7, pages 8–9, josephsmithpapers.org; isinunod sa pamantayan ang pagsusulat ng malalaking titik at pagbabantas).

• Ano ang matututuhan natin tungkol kay Joseph Smith mula sa pahayag na ito?

Ipaliwanag na sa panahong ito ng pagsisisi, natanggap ni Joseph Smith ang paghahayag na nakatala sa Doktrina at mga Tipan 3. Ipabasa nang malakas sa isang estudyante ang Doktrina at mga Tipan 3:5–8. Sabihin sa klase na tahimik na sumabay sa pagbasa, na inaalam ang sinabi ng Panginoon kay Joseph Smith.

• Aling mga salita o mga kataga sa mga talatang ito ang kapansin-pansin sa inyo? (Sa pagsagot ng mga estudyante, anyayahan sila na ipaliwanag kung bakit kapansin-pansin sa kanila ang mga salita o mga katagang iyon.)

• Ayon sa mga talata 6–7, ano ang nagdulot kay Joseph Smith na labagin “ang mga kautusan at ang mga batas ng Diyos”? (Pagkatapos sumagot ng mga estudyante, isulat sa pisara ang sumusunod na alituntunin: Ang katakutan ang iba nang higit pa sa katakutan ang Diyos ay magdudulot sa atin na magkasala. Kung kinakailangan, ipaliwanag sa mga estudyante na ang takot sa kontekstong ito ay maaaring mangahulugang pagpapahalaga o respeto.)

• Sa paanong mga paraan mas kinatakutan ni Joseph Smith si Martin Harris kaysa kinatakutan niya ang Diyos?

• Ano ang ilang halimbawa ng kung paano nagdudulot sa atin na magkasala ang mas katakutan ang iba kaysa katakutan ang Diyos?

Ipabasa nang malakas sa isang estudyante ang Doktrina at mga Tipan 3:10. Sabihin sa klase na tahimik na sumabay sa pagbasa, na inaalam kung ano pa ang sinabi ng Panginoon kay Joseph nang maghangad siya ng kapatawaran.

• Kung kayo ang nasa sitwasyon ni Joseph, ano kaya ang madarama ninyo kapag inihayag ng Panginoon ang mga salitang iyan sa inyo?

• Ano ang alituntunin na matututuhan natin mula sa payo ng Panginoon kay Joseph sa talata 10? (Dapat matukoy ng mga estudyante ang alituntuning katulad ng sumusunod: Ang Diyos ay maawain at patatawarin tayo kung magsisisi tayo.)

• Sa palagay ninyo, bakit mahalaga para sa atin na maunawaan ang alituntuning ito?

Patotohanan na kapag nagkakasala tayo, hindi pa huli ang lahat dahil ang Diyos ay maawain at handang patawarin tayo kung magsisisi tayo.

Ipinadala ng Panginoon si Oliver Cowdery upang tulungan ang Propeta sa pagsasalin ng Aklat ni Mormon

Oliver Cowdery

Ipaliwanag na matapos magsisi si Joseph Smith, ibinalik ni Moroni sa Propeta ang mga laminang ginto at ang Urim at Tummim at sinabi sa kanya na makapagsasalin siyang muli. Sa halip na tulungan si Joseph bilang tagasulat, si Martin Harris ay nanatili sa kanyang tahanan sa Palmyra, balisa dahil sa kanyang pagkakamali at sa ginawa ng kanyang asawa upang siraan ang Propeta. Tinulungan ni Emma si Joseph bilang tagasulat nang nagpatuloy siya sa pagsasalin. Gayunman, si Moroni ay nangako kay Joseph na padadalhan siya ng Panginoon ng isa pang tagasulat.

Ipakita ang kalakip na larawan, at ipaliwanag na ito ay isang larawan ni Oliver Cowdery. Ipaalala sa mga estudyante na si Oliver ay isang titser na nalaman ang tungkol sa mga laminang ginto habang naninirahan kasama ang mga magulang ni Joseph sa Manchester.

Ipabasa nang malakas sa isang estudyante ang sumusunod na mga talata:

“Nanalangin nang sarilinan si Oliver upang malaman kung ang mga narinig niya tungkol sa mga laminang ginto ay totoo. Ipinakita sa kanya ng Panginoon ang isang pangitain tungkol sa mga gintong lamina at ang mga pagsusumikap ni Joseph na maisalin ang mga ito. Isang mapayapang damdamin ang nanahan sa kanya, at noon niya nalaman na dapat siyang magprisinta na maging tagasulat ni Joseph.

“Walang sinabihan si Oliver tungkol sa kanyang panalangin. Ngunit sa pagtatapos ng pasukan, siya at ang kapatid ni Joseph na si Samuel ay umalis nang naglalakad papunta sa Harmony, mahigit isang daang milya ang layo” (Mga Banal: Ang Kuwento ng Simbahan ni Jesucristo sa mga Huling Araw, Tomo 1, Ang Pamantayan ng Katotohanan, 1815–1846 [2018], 68).

• Ano ang kapansin-pansin sa inyo tungkol sa kung paano isinakatuparan ng Panginoon ang Kanyang pangako na magpadala kay Joseph ng isang tagasulat?

Ipaliwanag na sina Joseph at Oliver ay nagsimula sa kanilang pagsasalin noong Abril 7, 1829, dalawang araw matapos ang pagdating ni Oliver sa Harmony. Sina Joseph at Oliver ay nagsalin nang may mahimalang bilis, natapos ang pagsasalin noong katapusan ng Hunyo 1829. Tinatayang natapos ni Joseph Smith ang pagsasalin sa loob ng “animnapu’t lima o mas kaunti pang araw ng pagtatrabaho,” nagsasalin “ng karaniwang walong pahina kada araw” (Russell M. Nelson, “A Treasured Testament,” Ensign, Hulyo 1993, 61).

Ipakita ang sumusunod na pahayag ni Propetang Joseph Smith, at ipabasa ito nang tahimik sa mga estudyante:

Joseph Smith

“Ipinaaalam ko sa inyo na aking isinalin [ang aklat], sa pamamagitan ng kaloob at kapangyarihan ng Diyos” (paunang salita sa Aklat ni Mormon [1830], iii).

• Ano ang pinatotohanan ni Joseph Smith tungkol sa pagsasalin ng Aklat ni Mormon? (Matapos sumagot ng mga estudyante, isulat sa pisara ang sumusunod na katotohanan: Isinalin ni Joseph Smith ang Aklat ni Mormon sa pamamagitan ng kaloob at kapangyarihan ng Diyos.)

Ipakita ang sumusunod na pahayag ni Elder Neal A. Maxwell (1926–2004) ng Korum ng Labindalawang Apostol, at ipabasa ito nang malakas sa isang estudyante:

Neal A. Maxwell

“Nauunawaan natin na marami sa mga nagbasa ng Aklat ni Mormon ang nagnanais na mas malaman kung paano ito lumabas, kabilang na ang aktuwal na proseso ng pagsasalin. Ito rin ang nais na malaman ng matapat na si Hyrum Smith. Sa kanyang pagtatanong, sinabi ni Propetang Joseph kay Hyrum na ‘hindi nilalayon na malaman ng mundo ang lahat ng detalye ng paglabas ng Aklat ni Mormon’ at ‘hindi niya minarapat na ibahagi ang mga bagay na ito’ [sa “Minutes, 25–26 October 1831,” Minute Book 2, 13, josephsmithpapers.org; isinunod sa pamantayan ang pagsusulat sa malalaking titik]. Kaya nga, sapat na ang mga nalalaman natin tungkol sa paglabas ng Aklat ni Mormon, ngunit hindi ito detalyado. …

“Anuman ang mga detalye sa proseso ng pagsasalin, nangailangan ito ng matinding pagsisikap ni Joseph na may tulong ng mga kasangkapan ng paghahayag” (Neal A. Maxwell, “By the Gift and Power of God,” Ensign, Ene. 1997, 39).

Ipabasa nang malakas sa isang estudyante ang Joseph Smith—Kasaysayan 1:34–35. Sabihin sa klase na tahimik na sumabay sa pagbasa, na inaalam ang itinuro ni Moroni kay Joseph Smith tungkol sa mga gamit na kasama ng mga laminang ginto.

• Ano ang itinuro ni Moroni kay Joseph Smith tungkol sa mga gamit na kasama ng mga laminang ginto? (Inihanda ng Diyos ang Urim at Tummim para sa layuning isalin ang mga lamina. Ipaliwanag na tinutukoy ng Aklat ni Mormon ang Urim at Tummim bilang “mga kasangkapan sa pagsasalin” [Alma 37:21, 24] o mga pansalin.)

Ipaliwanag na sinabi ni Oliver na sa pamamagitan ng “pag[tingin]” sa Urim at Tummim, nagawa ni Joseph “na mabasa sa Ingles, ang nakasulat sa binagong wikang Ehipto, na nakaukit sa mga lamina” (“Book of Mormon Translation,” Gospel Topics, topics.ChurchofJesusChrist.org). Tinukoy ng ilang kalaunang salaysay ng mga indibiduwal na naroon noong nagsalin si Joseph Smith, kabilang sina Emma Smith at Martin Harris, na minsan ay gumamit si Joseph ng isa pang kasangkapan sa pagsasalin ng Aklat ni Mormon. Ang kasangkapang ito ay isang maliit na hugis-itlog na bato, na tinawag na bato ng tagakita, na natagpuan ni Joseph ilang taon bago niya makuha ang mga laminang ginto. Tinutukoy ng mga salaysay na ito na ilalagay ni Joseph ang mga pansalin o ang bato ng tagakita sa isang sumbrero upang matakpan ang mga ito mula sa ilaw, na nagtutulot sa kanya na makita nang mas maayos ang mga salitang lumilitaw sa kasangkapan. (Tingnan sa “Book of Mormon Translation,” topics.ChurchofJesusChrist.org; tingnan din sa Richard E. Turley Jr., Robin S. Jensen, at Mark Ashurst-McGee, “Si Joseph na Tagakita,” Liahona, Okt. 2015, 10.)

Ipabasa nang malakas sa isang estudyante ang sumusunod na pahayag ni Elder Neal A. Maxwell:

Neal A. Maxwell

“Mangyari pa, ang tunay na proseso ng paghahayag ay kinabilangan ng isip at pananampalataya ni Joseph, na hindi nakikita ng iba sa anumang pagkakataon. …

“Bakit wala tayong gaanong impormasyon tungkol sa proseso ng pagsasalin ng Aklat ni Mormon? Marahil hindi inihayag ang buong proseso dahil hindi pa tayo handang maunawaan ito, kahit ibigay pa ito. Marahil din, nais ng Panginoon na ang paniniwala natin sa Aklat ni Mormon ay batay sa pananampalataya, kahit pa puno ito ng totoong ebidensya. Bukod pa riyan, tinagubilinan ni Cristo si Mormon, na binabasang muli ang mga itinuro mismo ng Tagapagligtas sa mga Nephita, na huwag itala ang lahat ng ito sa mga lamina dahil ‘Susubukin ko ang pananampalataya ng aking mga tao’ (3 Ne. 26:11). Marahil ang mga detalye ng pagsasalin ay ipinagkait din dahil ang nararapat na pagtuunan natin ay ang nilalaman ng aklat sa halip na labis na alalahanin ang proseso kung paano natin tinanggap ito” (Neal A. Maxwell, “By the Gift and Power of God,” Ensign, Jan. 1997, 40–41).

• Sa palagay ninyo, bakit mas mahalagang malaman na ang Aklat ni Mormon ay isinalin sa pamamagitan ng kaloob at kapangyarihan ng Diyos kaysa malaman ang mga partikular na detalye tungkol sa proseso ng pagsasalin?

Iwasang magbigay ng haka-haka

Tayo ay dapat umiwas sa pagbibigay ng haka-haka tungkol sa mga detalye na hindi inihayag ng Panginoon o na hindi sinusuportahan ng mga mapagkakatiwalaang source na pangkasaysayan. Kung hangad ng mga estudyante na matuto pa tungkol sa pagsasalin ng Aklat ni Mormon, naaangkop na ituro sa kanila ang mapagkakatiwalaang source ng impormasyon, kabilang ang mga sumusunod: Russell M. Nelson, “A Treasured Testament,” Ensign, Hulyo 1993, 61–65; Neal A. Maxwell, “By the Gift and Power of God,” Ensign, Ene. 1997, 36–41; Richard E. Turley Jr., Robin S. Jensen, at Mark Ashurst-McGee, “Si Joseph na Tagakita,” Liahona, Okt. 2015; “Book of Mormon Translation,” Gospel Topics, topics.ChurchofJesusChrist.org.

Bigyan ang bawat estudyante ng kalakip na handout, “Ang Aklat ni Mormon ay Isinalin sa pamamagitan ng Kaloob at Kapangyarihan ng Diyos.” Sabihin sa mga estudyante na basahin nang malakas ang mga talata sa handout nang magkakapares o sa mga maliliit na grupo at pagkatapos ay talakayin nila ang kanilang mga sagot sa mga tanong na nasa handout.

Ang Aklat ni Mormon ay Isinalin sa pamamagitan ng Kaloob at Kapangyarihan ng Diyos

Ibinigay ni Emma Smith, na tumulong kay Joseph bilang tagasulat noong isinalin niya ang Aklat ni Mormon, ang sumusunod na pahayag sa isang panayam kasama ang kanyang anak na si Joseph Smith III bago siya mamatay. Habang binabasa mo ang pahayag na ito, maghanap ng ebidensya na naniniwala si Emma na ang Aklat ni Mormon ay isinalin sa pamamagitan ng kaloob at kapangyarihan ng Diyos.

Emma Smith

“[Si Joseph Smith] ay walang manuskrito o aklat na mababasa [noong nagsasalin siya]. …

“Kung mayroon man siyang kahit anong tulad nito, hindi niya ito maitatago mula sa akin. …

“Si Joseph ay … ni hindi nga makasulat ni makadikta ng malinaw at maayos na liham; makadikta pa kaya siya ng isang aklat na gaya ng Aklat ni Mormon. At, bagamat ako ay kasama sa naganap na mga pangyayari, … kagila-gilalas ito sa akin, ‘isang kababalaghan at isang himala,’ maging sa kahit kanino. …

“Naniniwala ako na ang Aklat ni Mormon ay totoo—wala akong kahit kaunting pagdududa tungkol dito. Naniniwala ako na walang sinumang makapagdidikta ng nakasulat sa mga manuskrito maliban kung siya ay binigyang-inspirasyon; sapagkat, noong [ako ang] kanyang tagasulat, dinidiktahan ako [ni Joseph] nang ilang oras; at pagbalik namin mula sa pagkain, o matapos ang mga panggagambala, agad siyang nagsisimula kung saan siya tumigil, nang hindi tinitingnan ang manuskrito o ipinapabasa ang anumang bahagi. Isa itong di-pangkaraniwang bagay para gawin niya. Imposible itong magawa ng isang matalino at nag-aral na tao; at, para sa isang taong walang alam at hindi nakapag-aral tulad niya, talagang imposible ito” (Emma Smith, sa “Last Testimony of Sister Emma,” Saints’ Herald, Okt. 1, 1879, 289–90; tingnan din sa “Book of Mormon Translation,” Gospel Topics, topics.ChurchofJesusChrist.org).

• Ano ang mga salita o mga kataga mula sa pahayag ni Emma na sumusuporta sa patotoo ni Joseph Smith na ang Aklat ni Mormon ay isinalin sa pamamagitan ng kaloob at kapangyarihan ng Diyos?

• Paano maiimpluwensyahan ng kaalaman na ang Aklat ni Mormon ay isinalin sa pamamagitan ng kaloob at kapangyarihan ng Diyos ang paraan ng ating pagtingin at pag-aaral sa aklat?

• Paano ninyo nalaman na ang Aklat ni Mormon ay isinalin sa pamamagitan ng kaloob at kapangyarihan ng Diyos?

Handout: Ang Aklat ni Mormon ay Isinalin sa pamamagitan ng Kaloob at Kapangyarihan ng Diyos

Tapusin ang lesson sa pagbabahagi ng iyong patotoo tungkol sa katotohanan ng Aklat ni Mormon. Anyayahan ang mga estudyante na ipakita ang kanilang pasasalamat sa Diyos para sa Aklat ni Mormon sa pamamagitan ng pag-aaral nito araw-araw at pagsasabuhay sa mga turo nito.

Sabihin sa mga estudyante na maghanda para sa susunod na klase sa pamamagitan ng pagbabasa ng kabanata 7 ng Mga Banal: Tomo 1.

Handout: Ang Aklat ni Mormon ay Isinalin sa pamamagitan ng Kaloob at Kapangyarihan ng Diyos