Folasaga i Anomea a le Faiaoga o Aoaoga ma Aoaoga Faavae o le Tusi a Mamona Mataupu Faalelotu 275)

Afio mai i le Mataupu o Aoaoga ma Aoaoga Faavae o le Tusi a Mamona! Faafetai atu mo le taliaina o le avanoa e fesoasoani ai i tagata a’oga o le inisituti e o mai ia Keriso e ala i le suesueina o le Tusi a Mamona. O lenei mataupu aoaoina ua mamanuina e fesoasoani ai ia te oe ia avea ma faiaoga e faatotonugalemu ia Keriso ma taulai i le tagata aoao.

O a ni sini faamoemoeina o lenei vasega?

O loo faapea mai le Sini Faamoemoeina o Seminare ma Inisitituti o Mataupu Faalelotu:

O lo tatou faamoemoega o le fesoasoani lea i le autalavou ma talavou matutua ia malamalama ma faalagolago i aoaoga ma le Togiola a Iesu Keriso, ia agavaa mo faamanuiaga o le malumalu, ma ia saunia i latou lava, o latou aiga, ma isi mo le ola e faavavau faatasi ma lo latou Tama o i le Lagi. (Aoao Atu ma le Aoao Mai o le Talalelei: O Se Tusitaulima mo Faiaoga ma Taitai i le Seminare ma Inisitituti o Mataupu Faalelotu [2012], 1)

O lenei kosi ua mamanuina e fesoasoani ai ia te oe ma au tagata aoga e faataunuu Faamoemoega o Seminare ma Inisitituti e ala i le:

• Fatuina o aafiaga aoaoina e fesoasoani ai i faiaoga ma tagata aoga e lagonaina le alofa o le Tama Faalelagi ma faamalosia ai a latou sootaga ma Ia.

• Saunia o avanoa e faateleina ai le faatuatua ia Iesu Keriso ma Lana Togiola.

• Fesoasoani i tagata aoga e faailoa ma faamatala aoaoga iloga ma aoaoga faavae autu o le Tusi a Mamona, mafaufau i auala e talafeagai ai nei aoaoga i lo latou lava tuputupu a’e faaletagata lava ia, ma fuafua pe faapefea ona faaaoga mea latou te aoaoina i o latou olaga.

• Fausia o se siosiomaga o aoaoga alofa ma faaaloalo e valaaulia ai tagata aoga e fai fesili, faaali o latou atugaluga, talanoaina o latou aafiaga, ma faasoa mai a latou molimau.

O faapefea ona faatulagaina nei anomea?

Ua vaevaeina lenei kosi i ni iunite se 8, ma lesona e 28. O iunite taitasi o le a aofia ai se autu taua o aoaoga faavae autu o le Tusi a Mamona. O lesona i totonu o iunite taitasi e faavae i autu ma e fesootai ma le autu o aoaoga faavae.

Ua fuafuaina lesona taitasi mo le periota e 50 minute o le vasega. Mo vasega e feiloai taitasi i le vaiaso mo le 90 minute, e mafai e faiaoga ona tuufaatasi ni lesona se lua, talu ai o lesona i totonu o iunite taitasi e fesootai vavalalata lava i le autu o le iunite.

O lesona taitasi ua i ai anomea o le tapenaga mo le vasega ma anomea mo le faiaoga. Ua mamanuina lenei anomea e valaaulia ai tapenaga magafagafa, faamalosiau ai tagata aoga e punouai i se aoaoga loloto, ma aumaia ai faatinoga e fesoasoani ia i latou ia avea atili e pei o le Tama Faalelagi.

Ina ia iloa le auala e faafoe ai le mea aupito sili o lenei mataupu aoaoina ina ia manuia ai olaga o au tagata aoga o le a manaomia ai ona e suesueina anomea o tapenaga mo le vasega ma anomea a le faiaoga a o e sauniuni mo talanoaga a le vasega.

A o e suesue i le mataupu aoaoina, tatalo mo le fesoasoani a le Alii ia e malamalama i manaoga o au tagata aoga. Na aoao mai Elder Jeffrey R. Holland o le Korama a Aposetolo e Toasefululua:

Elder Jeffrey R. Holland

Ia gauai atu—ia gauai atu lou loto aemaise lava i le Agaga. Tuu sina avanoa i le fuafuaga o lau lesona. Afai e te manao e faapuupuu se lesona ina ia mafai ona tuuina atu lau molimau ma faamalosia ai se talanoaga i se mataupu faaonapo nei, faamolemole ia faia pe a musuia e le Agaga ma pe a faatonuina e talafeagai.

… Manatua o se tagata aoao e le o se koneteina e faatumuina; o se tagata a’oa’o o se afi e faamumuina. ( “Angels and Astonishment”[address given at the Church Educational System training broadcast, June 12, 2019], broadcasts.ChurchofJesusChrist.org)

Anomea mo le Tapenaga a le Vasega

O anomea mo le tapenaina o le vasega e aofia ai fuaitau mai le Tusi a Mamona, matalalaga mo na fuaitau, saunoaga a taitai o le Ekalesia, ata, vitio, ma le vaega o le “E Te Fia Aoao Atili?” lea e maua ai punaoa faaopoopo e fesootai i le autu o le lesona.

O anomea mo tapenaga o le vasega o loo i ai foi fesili ma gaoioiga e faamalosiau ai tagata aoao e faaloloto lo latou aoaoina ma ia sauniuni e fetufaai i le vasega. Mo se faataitaiga, i le anomea mo le tapenaga a le vasega mo le lesona 4, “Saili Tusitusiga Paia,” e valaaulia tagata aoga e suesue auala e mafai ona faatatau pe faatusatusa i le Liahona. Ona valaaulia ai loa lea o i latou e fai le gaoioiga lenei:

kalafi o talatalanoaga

Na aoao mai Elder Kim B. Clark o le Fitugafulu i mea e tatau i se tagata aoao (ma le faiaoga) ona fai ina ia aoao loloto ai:

Elder Kim B. Clark

Afai e te manao moni lava e aoao loloto i ai, afai o lou loto ma lou mafaufau ua matala i le aoaoina, ma afai e te galue ai i lena manao, o le a faamanuiaina oe e le Alii. Pe a e faia lau vaega—tatalo ma le faatuatua, saunia, suesue, auai ma le naunautai, ma faia le mea sili—o le a aoaoina oe e le Agaga Paia, faalauteleina lou malosi e faatino ai mea ua e aoaoina, ma fesoasoani ia te oe e avea ma tagata e finagalo le Alii ia avea ai oe. (“Aoaoina mo le Agaga Atoa,” Liahona, Aug. 2017, 27)

Anomea a le Faiaoga

I le folasaga o anomea a le faiaoga mo lesona taitasi, o le a e maua ai se faamatalaga o taunuuga faamoemoeina o le tagata aoao. O lenei folasaga e mulimuli mai ai ma ni manatu fautuaina mo le aoao atu o loo tuuina mai ai le faavasegaina o lesona, anotusi, fesoasoani mo talanoaga, ma manatu mo le faaaogaina.

A o e suesue i anomea a le faiaoga, ia ua’i atu i auala e mafai ona utuvai mai ai i tapenaga a tagata aoga. O le masani ona faalagolago pea i sauniuniga a tagata aoga, o le a fesoasoani ai ia i latou e lagona ai le taua o le saunia mo vasega uma lava. O faatonuga o loo i lalo mai le lesona 4 o se faataitaiga i auala e mafai ona utuvai mai i anomea a le faiaoga i tapenaga a tagata aoga.

kalafi o faatonuga o le aoao atu

aikona, mafaufau loloto

Mafaufau Loloto i Tapenaga mo le Vasega

E talitutusa i mea tou te faia ma au tagata aoga a o lei amataina le vasega, faaaoga se minute e mafaufau loloto ai a o e sauniuni e aoao atu lenei mataupu. Muamua, tagai solo i se lesona se tasi pe lua ina ia faamasani ai i auala o loo mamanuina ai anomea o tapenaga a le faiaoga ina ia faaaoga faatasi a o e sauniuni e aoao atu. Ona mafaufau loloto lea i fesili nei: O a ni auala e mafai ona e faamalosiauina ai tagata aoga ia sauniuni ina ia mafai ai ona latou maua se aafiaga sili atu i le vasega? O a ni mea e mafai ona e faia e faaaofia ai tagata aoga o e atonu e le’i suesuea i anomea mo tapenaga?

Manatua: A saunia tagata aoga mo talanoaga i le vasega, o le a e matauina le vave oo atu o le vasega i ni talanoaga loloto ma anoa i le autu. O lea faiga e ao ona tele ai le taimi i totonu o le vasega e suesue ai i auala e mafai ai e oe ma au tagata aoga ona fuafua mo ma ni faatinoga aoga, ma le amiotonu.

E mafai faapefea ona ou saunia lelei e aoao atu?

O le a fesoasoani le Tama Faalelagi ia te oe a o e saunia e aoao Ana fanau. O au taumafaiga e ola ma le maelega i le talalelei o le a fesoasoani e te agavaa ai mo le taitaiga a le Agaga i au sauniuniga e aoao atu.

Atonu e aoga le fesili ifo ia te oe lava ia fesili nei o se vaega o au sauniuniga e aoao atu:

• Pe na ou tatalo ina ia ou mauaina le taitaiga a le Agaga Paia, ma ia malamalama i manaoga o a’u tagata aoga? E mafai faapefea ona ou iloiloina mea e sili ona talafeagai mo i latou?

• Pe o o’u lagona le mausali lelei i anomea mo le tapenaga ma anomea a le faiaoga? O i ai se isi mea e tatau ona ou fetuunaia e taulima ai manaoga o a’u tagata aoga?

• E mafai faapefea ona ou fesoasoani i a’u tagata aoga ia faateleina lo latou faatuatua i le Tama Faalelagi ma Iesu Keriso a o matou suesueina lenei lesona? E mafai faapefea ona ou fesoasoani i tagata aoga e saili e aoao e ala i le Agaga Paia?

• E mafai faapefea ona ou fesoasoani i a’u tagata aoga taitasi ia auai atoatoa i le lesona? E mafai faapefea ona ou faamautinoa o loo i ai lo latou avanoa latou te manaomia e faia ai fuafuaga a le tagata lava ia e faaaoga ai mea latou te aoaoina?

• E mafai faapefea ona ou fatuina se siosiomaga o aoaoga e lagona ai e tagata aoga lo latou taua, taliaina, ma le saogalemu e faasoa mai ma aoao mai le tasi ma le isi? (Tagai Mataupu Faavae ma Feagaiga 88:78, 122

E mafai faapefea ona ou fetuunaia lesona mo i latou e i ai manaoga faapitoa?

A o e saunia e aoao atu, ia manatua tagata aoga e i ai manaoga faapitoa. Fetuunai gaoioiga ma faamoemoega ina ia lagona ai e nei tagata aoga o loo faaaofia ai i latou ma fesoasoani ai foi ina ia faamanuiaina i latou. Mo nisi faamatalaga, tagai i punaoa i luga o le itulau mo Manaoga Faapitoa i le disabilities.ChurchofJesusChrist.org.

O le a se mea ua faamoemoeina mai i tagata aoga ia maua ai ni togi?

Ina ia maua ni togi mo le faauuga o le inisitituti, o tagata aoga e manaomia ona:

1. Suesue i anomea mo sauniuniga ia le itiiti ifo ma le 75 pasene o lesona.

2. Auai i le 75 pasene o vasega e faia.

3. Faamae’a se tasi o aafiaga e tolu e aoao ai: tausia se api talaaga o suesuega, tusi tali i fesili e tolu o le tala, pe mamanuina ma faamae’aina sa latou lava galuega faatino e aoao ai (faatasi ai ma le faamaoniga a le faiaoga) e faatatau i le anotusi o le mataupu Sue nisi faamatalaga i luga o le “Institute Elevate Learning Experiences,” oloo maua i le institute.ChurchofJesusChrist.org.

Afai e faamaumau e tagata aoga ni tali i fesili uma ma gaoioiga i le anomea mo sauniuniga, o lenei mea o le a faamalieina ai foi mea e manaomia o le aafiaga e aoao ai. E le manaomia ona auina atu e tagata aoga a latou tali ia te oe. I le faaiuga o le semesa, e tau lava o le manaomia ona latou faaali atu ia te oe mea ua latou faamae’aina.

aikona, tusi faamaumau

Faamaumau Ou Manatu

Mafaufau i le ituaiga o aafiaga e te faamoemoe o le a maua e au tagata aoga i le mataupu lenei. Lisi ni nai ou manatu e uiga i le ala ua e fuafua ai e fesoasoani ia i latou ia maua se aafiaga anoa o le aoaoina.

E Te Fia Aoao Atili? (Tuu i le faitalia)

O a isi punaoa e mafai ona fesoasoani ia te a’u ia avea ma faiaoga e finagalo le Alii ia ou avea ai?

O le tusitaulima o Punaoa mo le Aoaoina o Faiaoga Fou e mafai ona fesoasoani e te malamalama ai i le faamoemoega ma le filosofia faafaiaoga o Seminare ma Inisitituti faapea foi ma le fesoasoani e te faata’ita’ia ai tomai faafaiaoga.

O le tusitaulima o le Aoao Atu ma le Aoaoina Mai o le Talalelei o se punaoa taua mo le malamalama ma le faagasologa o le aoaoina atu ma le ala e faamanuiaina ai i le potuaoga.

O le punaoa Aoao Atu i le Ala a le Faaola o loo faasoa mai ai ni mataupu faavae e fesoasoani i faiaoga o le talalelei ia aoao atu atili e pei o le Faaola.