Lesona 7 Anomea a le Faiaoga

O Le Mana Faamalosi o Iesu Keriso

O le Tusi a Mamona e faalautelea o tatou malamalamaaga i le lautele ma le loloto o le Togiola a le Faaola. Tatou te aoao mai ai e le gata ina tuuina mai e Iesu Keriso ia i tatou le avanoa ina ia faamamaina ai mai agasala, ae e mafai foi ona Ia faamafanafana ma fesoasoani ia i tatou i o tatou le atoatoa ma vaivaiga. I lenei lesona, o le a maua ai e tagata aoga le avanoa e faamatala ma molimau atu ai e uiga i lenei aoaoga faavae. O le a tuu atu foi i tagata aoga se avanoa e faailoa ai mea e mafai ona latou faia e valaaulia atili ai le alofa tunoa o le Alii i o latou olaga.

Fautuaga mo le Aoao Atu

Faaleleia o Lo Tatou Aoao Atu ma le Aoao Mai

Amata i le mafaufau ai i tagata aoga. E o mai tagata aoga i le vasega ma aafiaga, malamalama, ma ni fesili sa i ai muamua. E mafai ona tatou faataga malamalamaaga o loo i ai nei o tagata aoga e avea ma vaega amata a o tatou taiala i latou e ala atu i le faagasologa o le aoaoina. I lenei aoaoga atoa, a o e amatalia le vasega pe amata foi ona talanoa atu e uiga i ni autu faapitoa, mafaufau pe mafai faapefea ona e iloa po o a fesili ma malamalamaaga loloto o loo faamoemoe tagata aoga e talanoaina, ona fetuunai lea o au fuafuaga e pei ona taitaiina ai e le Agaga.

Ua aoao e Alema le Itiiti le nuu o Kitiona o le a fesoasoani le Alii i Lona nuu.

Mafaufau e faaali atu ni ata e pei o nei ma fesili atu, “O a ni tauiviga, tiga, po o ni puapuaga atonu tatou te oo i ai e le o ni taunuuga o ni filifiliga amioleaga?” (Lisi tali a tagata aoga i le laupapa.)

tamaitai o loo tagi

alii talavou o loo taoto i le moega o le falemai

tamaitai talavou foliga faanoanoa

alii i luga o se nofoa faataavalevale

Tuu atu i tagata aoga se minute e mafaufau loloto ai (ma atonu e tusitusi ai) nisi o luitau na mafua ai le tiga po o le mafatia mo i latou pe mo i latou latou te alolofa i ai.

Faamanatu i tagata aoga ina ua auauna atu Alema le Itiiti i tagata faamaoni i Kitiona, sa ia aoaoina i latou i le ala e mafai ai e puapuaga o le Faaola ona fesoasoani ia i tatou i tiga ma puapuaga e le mafua mai i agasala. Valaaulia tagata aoga e toe faamanatu le Alema 7:11–12 ma vaavaai mo ni fuaitau e tulaga ese ia i latou. Valaaulia i latou e faamatala le uiga o le fuaitau na latou maua ma pe aisea e taua ai ia i latou.

Ina ia fesoasoani e faaloloto malamalamaaga o tagata aoga e uiga i le silafia e le Faaola ona fesoasoani i Lona nuu, e mafai ona e faasoa atu i ai le saunoaga lenei a Elder Jeffrey R. Holland o le Korama a Aposetolo e Toasefululua:

Elder Jeffrey R. Holland

Ua ta’ua soo le[Fesoaoani] i tusitusiga paia e faamatala ai le popole ma le manatu mai o Keriso ia i tatou. O lona uiga moni lava o le ‘taufetuli agai i ai.’ Oka se auala ina a maoae le matagofie e faamatala ai le taumafaiga faanatinati a le Faaola mo i tatou. E tusa lava pe ua ia valaau mai ia i tatou e o mai ia te ia ma mulimuli ia te ia, o loo ia faaauau pea ona tamoe mai e fesoasoani ia i tatou. (“OMai ia te A’u” [faeasaite a le Ofisa o Aoga a le Ekalesia mo le autalavou matutua, Mar. 2, 1997], 9, speeches.byu.edu)

A uma ona talanoa i aoaoga mai le Alema 7:11–12, fesoasoani i tagata aoga e faailoa mai se mataupu faavae e talitutusa ma lenei: Na tauave e le Faaola i Ona luga o tatou tiga, ma’i, ma faaosoosoga ina ia mafai ona fesoasoani o Ia ia i tatou a o tatou feagai ma luitau o le olaga nei.

• Aisea e taua ai le malamalama i lenei tulaga o le aoaoga faavae o le Togiola a le Faaola?

• O le a le mea ua aoao mai e lenei upumoni ia te oe e uiga i le natura ma le uiga o Iesu Keriso?

• E mafai faapefea e le i ai o le faatuatua i lenei upumoni ona fesoasoani ia te oe po o e pele ia te oe i taimi o luitau faaletagata lava ia?

Faitau o se vasega po o ni vaega toalaiti le saunoaga a Elder Bednar mai le vaega 1 o le anomea mo sauniuniga, ma talanoaina le fesili lenei mai le anomea mo sauniuniga:

• O anafea na e lagonaina ai le aapa atu o le Faaola, e faamafanafana, pe faamalosi oe a o e i ai i luitau i lou olaga?

Ua aoao e le Alii ia Moronae e uiga i le mana o Lona alofa tunoa.

Faaali atu le ata o loo avatu i le lesona, ma valaaulia se tagata aoga e faamatala pe na faapeī lagona o Moronae e uiga i lona tomai e tusitusi ai tusitusiga paia. (Afai e manaomia, toe faamanatu faatasi ma tagata aoga le Eteru 12:23–25 .)

Ua Nanā e Moronae ia Papatusi i le Mauga o Kumora, saunia e Tom Lovell

Atonu e te valaaulia tagata aoga e faaalu se minute e tusi ai e uiga iai, pe mafaufau loloto ai i ni nai o latou le atoatoa ma vaivaiga.

Faitau faatasi le Eteru 12:27 ma valaaulia tagata aoga e vaavaai mo aoaoga faavae e mafai ona fesoasoani ia i tatou e taulimaina ai o tatou vaivaiga i ala a le Alii. Atonu e mafai ona faailoa mai e tagata aoga ni upumoni e talitutusa ma lenei: Pe a tatou o mai i le Alii, e fesoasoani o Ia ina ia tatou iloa o tatou vaivaiga. O le iloaina o o tatou vaivaiga e mafai ona fesoasoani ia tatou lotomaualalalo ai. A tatou faamaulalo i tatou lava ma faatuatua i le Faaola, e mafai e Lona alofa tunoa ona faia o tatou vaivaiga o ni malosiaga.. Faaali atu upumoni na faailoa mai e tagata aoga ina ia mafai ona latou faasino atu i ai i le gaoioiga o loo mulimuli mai.

Faaleleia o Lo Tatou Aoao Atu ma le Aoao Mai

Fesoasoani i tagata aoga ia iloa ma malamalama i aoaoga ma mataupu faavae. A uma ona faailoa mai e tagata aoga ia aoaoga ma mataupu faavae mai tusitusiga paia ma saunoaga a perofeta, fesoasoani ia latou malamalama i uiga ma faauigaga eseese o nei upumoni ma pe faapefea ona aafia o latou olaga i nei upumoni. O lenei poto ma le malamalama e mafai ona oo mai a o faamatala e tagata aoga se faamatalaga o mataupu po o se aoaoga faavae ma faasoa mai ni faataitaiga ma ni aafiaga e faatatau i ai. Tatalo mo le fesoasoani e fai atu ai fesili e tatala ai mafaufau ma loto o tagata aoga i le talafeagai ma le taua o mataupu faavae latou te faailoa mai.

Valaaulia tagata aoga e faamatala, o se vasega po o ni vaega toalaiti, po o le a le uiga o nei mataupu faavae ia i latou.

Ina ia fesoasoani i tagata aoga ia mafaufau ma lagona le loloto atili e uiga i nei mataupu faavae, atonu e te faaali atu nisi o fesili nei ma tuu atu i tagata aoga e filifili po o le fea o fesili e talanoaina faatasi. Atonu o le a le lava se taimi e talanoaina uma ai.

• O a ni auala e mafai ai ona avea se vaivaiga o se faamanuiaga i se tagata? (Pe a manao ai, ia ta’ua le saunoaga a Sister Michelle D. Craig i le vaega 2 o le anomea mo sauniuniga.)

• O le a faapefea ona e faamatala atu le alofa tunoa o le Alii i se tasi na manatu sa le mafai ona latou lafoaia se agasala po o se vaisu?

• O a ni mea ua e aoaoina e uiga i le Faaola e ala i le uia o le faagasologa o le faalotomaualaloina o oe lava ma faalagolago i Lona alofa tunoa i lou olaga?

• O le a se mea e mafai ona tatou faia e atili valaaulia atoatoa ai le alofa tunoa o le Alii i o tatou olaga? (Mafaufau e toe faamanatu le 2 Nifae 25:23, 29 ma saunoaga mai taitai o le Ekalesia i vaega 3 o anomea mo sauniuniga.)

Molimau atu (pe valaaulia se tagata aoga e molimau) e uiga i le Togiola a le Faaola, ae maise lava o Lona mana e fesoasoani ai ia i tatou e faatoilalo puapuaga, faanoanoaga, vaivaiga, ma lē atoatoa.

Tuu atu i tagata aoga le taimi e mafaufau loloto ai pe tusifaamaumau ai ni uunaiga patino na latou lagonaina i le taimi o le lesona i le asō. E mafai ona e valaaulia i latou e mafaufau i fesili nei: O le a sou manatu i se mea e finagalo le Alii e te faia ia mafai ona maua atili ai Lona alofa tunoa? O le a se mea e mafai ona e faia e taulima ai se vaivaiga o loo feagai ma oe i le taimi nei ma le lotomaulalo sili atu ma le faatuatua ia Keriso?

Mo Le Isi Taimi

Fai atu i tagata aoga e mafaufau po o a ni a latou fesili o i ai e uiga i le lalolagi o agaga, Toetutu, po o le Faamasinoga Mulimuli. A o latou sauniuni mo le isi vasega e sosoo ai, valaaulia i latou e mafaufau i mea o loo latou faia e sauniuni ai mo le olaga pe a mavae le oti.