“Lesona 7 Anomea mo Sauniuniga o le Vasega: O Le Mana Faamalosi o Iesu Keriso,” Anomea a le Faiaoga o Aoaoga ma Aoaoga Faavae o le Tusi a Mamona (2021)
“Lesona 7 Anomea mo le Sauniuniga o le Vasega,” Anomea a le Faiaoga o Aoaoga ma Aoaoga Faavae o le Tusi a Mamona
Lesona 7 Anomea mo le Sauniuniga o le Vasega
O Le Mana Faamalosi o Iesu Keriso
Mafaufau mo se minute i se taimi na e tauivi ai faaletino, faalemafaufau, faalelagona, pe faaleagaga. Mafaufau i auala e te lagona ai le vaivai po o le le atoatoa. Sa saunoa Peresitene Dallin H. Oaks o le Au Peresitene Sili, “Ona o Lana Togiola, o loo i ai i le Faaola le mana e lagolago ai—e fesoasoani ai—i tiga ma mafatiaga uma faaletino” (“Faamalosia e ala i le Togiola a Iesu Keriso,” Liahona, Nov. 2015, 62). A o e suesue atili i le Togiola a Iesu Keriso, mafaufau i auala ua fesoasoani ai le Alii ma o le a faaauau ona fesoasoani ai ia te oe ia onosaia puapuaga ma faatoilalo vaivaiga i lou olaga.
Vaega 1
E mafai faapefea ona fesoasoani le Faaola ia te au i o’u puapuaga ma lē atoatoa?
Na saunoa Peresitene Tad R. Callister, sa avea ma Peresitene Aoao o le Aoga Sa, i le loloto o le Togiola a le Faaola i le ala lenei:
O le Togiola a Iesu Keriso … [ua] mafai ai e i tatou ona toefoi atu i le afio’aga o le Atua, ia avea atili e faapei o Ia, ma maua se atoaga o le olioli. Na faia lenei mea e ala i le faatoilaloina o faafitauli e fa:
Oti faaletino
Oti faaleagaga ona o Atamu ma a tatou agasala
O o tatou mafatiaga ma faaletonu
O o tatou vaivaiga ma lē atoatoa
(“O Le Togiola a Iesu Keriso,” Liahona, Me 2019, 85)
I le lesona 6, “O Le Togiola e Le I’u a Iesu Keriso,” tatou te talanoaina ai mea faalavefau muamua e lua. O lea, sei o tatou mafaufau la i le ala na faatoilalo ai e le Togiola a le Faaola ia mea faalavefau lona tolu ma le fa.
Pe tusa o le 83 TLM, na faamavae ai Alema le Itiiti mai le avea ma faamasino sili ina ia mafai ona ia aoao atu le afioga a le Atua i le laueleele atoa. I le aai o Kitiona, na vavalo atu ai Alema o le a fanau mai le Togiola i le lalolagi ma ola faatasi ma Lona nuu ma o le a Ia oo i tiga, puapuaga, ma faaosoosoga uma o le olaga nei.
Suesue e Sauniuni ai mo le Vasega
Faitau le Alema 7:11–12, ma vaavaai mo mafuaaga na talia ai e Iesu Keriso nei aafiaga faaleolaga nei i Ona luga.
E uiga i lenei aoaoga tulagaese o le Tusi a Mamona, na saunoa mai ai le Epikopo Pulefaamalumalu o Gérald Caussé:
E faaopoopo atu i le tauaveina o a tatou agasala, na ave ai e Keriso i Ona lava luga o tatou faanoanoaga, vaivaiga, puapuaga, ma’i, faapea ai ma mafatiaga uma e tupu i tulaga faaletino o le tagata. E leai se mafatia, tiga, po o faanoanoaga Na te le’i mafatia ai mo i tatou [tagai i le Alema 7:11–12]. (“O Se Molimau Ola o le Keriso Soifua,” Liahona, Me 2020, 39)
Na aoao mai foi Elder David A. Bednar o le Korama Aposetolo e Toasefululua:
I se taimi o le vaivai tatou te ono tagi atu ai, “E leai se tasi na te iloaina pe faape’i. E leai se tasi e malamalama i ai.” Ae ua silafia ma malamalama atoa i ai le Alo o le Atua, aua sa Ia lagonaina ma tauave a tatou avega taitoatasi. Ma ona o Lana taulaga le iu ma faavavau (tagai i le Alema 34:14), ua ia te Ia le tiga-alofa atoatoa ma e mafai ona Ia faaloaloa mai Lona aao o le alofa mutimutivale ia i tatou. E mafai ona ia aapa mai, pa’i mai, fesoasoani, faamalolo, ma faamalosia i tatou ina ia sili atu nai lo le mea e mafai ona tatou faia ma fesoasoani ai ia i tatou e faia le mea e le mafai ona tatou faia i le na o lo tatou faalagolago atu i lo tatou lava malosi. (“Tauave ma le Faigofie a Latou Avega,” Liahona, Me 2014, 90)
Tusifaamaumau Ou Lagona Uunaia
E faapefea ona fesoasoani ia te oe le iloa e malamalama lelei le Faaola i o tatou puapuaga ma lē atoatoa uma? O anafea na e lagonaina ai Lona aapa atu, faamafanafana, po o le faamalosia o oe a o e i ai i luitau i lou olaga?
Vaega 2
E mafai faapefea ona fesoasoani le Faaola ia te a’u i o’u vaivaiga ma lē atoatoa?
I le avea ai ma tusitala mulimuli i le Tusi a Mamona, na faaaofia ai e Moronae se otootoga o papatusi a Eteru, lea o loo i ai le tala ia sa Iareto ma tusitusiga a le uso o Iareto. Sa maofa Moronae i le mana o tusitusiga a le uso o Iareto ma faailoa lona popole e uiga i vaivaiga na ia vaaia i ana lava tusitusiga ma i tusitusiga a isi perofeta o le Tusi a Mamona.
Suesue e Sauniuni ai mo le Vasega
Faitau le Eteru 12:23–27, ma mafaufau pe na faapeī lagona o Moronae e uiga i lona le atoatoa. Mafaufau loloto pe mafai faapefea e le tali a le Alii ona faamanuia ai lou olaga.
O le tuu o o tatou vaivaiga ma le atoatoa i se vaaiga e faavavau, na aoao mai ai Sister Michelle Craig, o le Fesoasoani Muamua i le Au Peresitene Aoao o Tamaitai Talavou:
Ioe, o le a le atoatoa i tatou uma mo lo tatou gafatia faalelagi, ma o loo i ai se upumoni i le iloaina e faapea, a tuua na o i tatou ona le lava lea mo i tatou. Ae o le tala fiafia o le talalelei e faapea o le alofa tunoa o le Atua, e lava ai mo i tatou. …
O le upumoni e faate’ia ai e faapea, o o tatou vaivaiga e mafai ona avea ma o tatou faamanuiaga pe a latou faalotomaualaloina i tatou ma liliu atu i tatou ia Keriso. …
O le mea moni, o vavega a Iesu e tele ina amata i se faailoaga o le manao, mea e manaomia, toilalo, po o ni lē atoatoa. (“Lē Faamalieina Faaleagaga,” Liahona, Nov. 2018, 54)
Mafaufau Loloto i Sauniuniga mo le Vasega
O anafea na e vaaia ai, faatasi ma le fesoasoani a le Faaola, i le avea o se vaivaiga o se faamanuiaga i lou olaga pe i le olaga o se tasi e te iloa?
Vaega 3
E mafai faapefea ona ou valaaulia le faateleina o le atoatoa o le alofa tunoa o le Alii i lo’u olaga?
I ana tusitusiga, sa molimau mai Nifae na taitai atu e Mose le fanauga a Isaraelu mai le faatagataotauaina e ala i le mana ma le alofa tunoa o le Atua. Sa tusia e Nifae, “E pei ona soifua le Alii le Atua, e leai se isi lava suafa ua tuuina mai i lalo o le lagi vagana ai Iesu Keriso lenei … e mafai ona faaolaina ai le tagata” (2 Nifae 25:20). Na aoao atu Nifae i lona nuu e na’o le alofa tunoa o Iesu Keriso, ae e le na’o le usiusitai i le tulafono a Mose, e mafai ona faaolaina ai i latou. O le alofa tunoa o se “auala paia o le fesoasoani po o le malosiaga, e tuuina mai e ala i le anoanoai o le alofa mutimutivale ma le alofa o Iesu Keriso” (Bible Dictionary, “Grace”).
Suesue e Sauniuni ai mo le Vasega
Faitau le 2 Nifae 25:23, 29, ma vaavaai mo lau matafaioi i le valaauliaina o le alofa tunoa o le Alii i lou olaga.
O le fuaitau “pe a uma mea uma e mafai ona tatou faia” (2 Nifae 25:23) e mafai ona lofituina. Mafaufau pe mafai faapefea ona fesoasoani saunoaga nei mai sui e toalua o le Korama a Aposetolo e Toasefululua, tatou te malamalama ai i le uiga o lenei fuaitau.
Tatou te le manaomia ona ausia nisi o tulaga o tomai po o ni lelei ao lei fesoasoani mai le Atua—e mafai ona avea fesoasoaniga faalelagi mo tatou i itula uma o aso uma, e tusa lava po o fea o tatou i ai i le ala o le usiusitai. Ae ou te iloa, e sili atu nai lo le manao i Lana fesoasoani, e tatau ona galulue i tatou lava, salamo, ma filifili le Atua mo Ia ina ia mafai ona Ia galue pea i o tatou olaga ma le faamasinotonu ma le filifiliga saoloto. (D. Todd Christofferson, “Saoloto e Faavavau, e Galue mo i Latou Lava,” Liahona, Nov. 2014, 19)
O le Alii, e ala i Lona alofa tunoa, o le a fesoasoani ia i tatou taitoatasi e tauave o tatou satauro ma faamāmā a tatou avega. … Faamolemole aua lava nei e fiu pe a mavae ni toilalo faifai pea, ma mafaufau ia te oe lava ia, e le mafai ona lafoaia agasala ma faatoilaloina le vaisu. E le tatau ona tuu lou taumafai ma faaauau pea i vaivaiga ma le agasala! Taumafai pea lava pea e fai le mea sili e te mafaia, ma faaali atu i au galuega le manao e faamamā totonu o le ipu, e pei ona aoao mai e le Faaola. O nisi taimi o tali i ni luitau patino e oo mai pe a mavae le tele o masina o taumafaiga faifai pea. O le folafolaga o loo maua i le Tusi a Mamona e faapea “e faaolaina i tatou i le alofa tunoa, pe a uma mea uma e mafai ona tatou faia” [2 Nifae 25:23] e faatatau i nei tulaga. Faamolemole ia manatua o le meaalofa o le alofa tunoa o le Faaola “e le faapea ua faatapulaaina i se taimi ‘pe a uma’ mea uma e mafai ona tatou faia. E mafai ona tatou maua Lona alofa tunoa a o lei faia, a o faagasolo, ma le mavae ai o le taimi tatou te faia ai a tatou lava taumafaiga” [tagai i le Bruce C. Hafen, The Broken Heart: Applying the Atonement to Life’s Experiences (1989), 155–56]. (Ulisses Soares, “Ave Lo Tatou Satauro,” Liahona, Nov. 2019, 113–14)
Faasoa Mea ua E Aoaoina
Mafaufau e faasoa i se uo po o se tagata o le aiga mea ua e aoaoina e uiga i le fuaitau, “e faaolaina i tatou i le alofa tunoa, pe a uma mea uma e mafai ona tatou faia” (2 Nifae 25:23). O le a sou manatu e mafai faapefea ona e valaaulia atili le mana faamalosi o le Faaola i lou olaga ia fesoasoani i nisi o ou vaivaiga po o lē atoatoa o i ai nei?