Lesona 16 Anomea mo Sauniuniga o le Vasega

E Auauna Atu Iesu Keriso i le Ta’i Toatasi

Ta’i Toatasi, saunia e Walter Rane

O le auaunaga a le Keriso toetu i tagata i le laueleele o Nuumau, ua tuuina mai ai ia i tatou se molimau mamana i le paia o Iesu Keriso ma se faataitaiga o’oo’o o le ala e auauna atu ai i isi. A o e suesue i le anomea lenei, mafaufau loloto i mea e mafai ona e faia e faamalosia ai lau molimau o Iesu Keriso o lou Faaola. A o e tomanatu i auala na Ia auauna ai, mafaufau ma le agaga tatalo po o ai o ono manaomia ona lagona le alofa o le Faaola e tauala atu ia te oe.

Vaega 1

E mafai faapefea ona ou faamalosia la’u molimau o Iesu Keriso o lo’u Faaola?

Ina ua mavae le faatafunaga tele ma aso e tolu o le pouliuli lea na faailo atu ai i tagata ua maliu le Faaola, pe tusa ma le 2,500 tamaloloa, fafine, ma tamaiti na faapotopoto i tala ane o le malumalu i le laueleele o Nuumau. Na o latou faalogo i se leo, lea sa latou le malamalama i ai i le taimi muamua. Ao faaauau ona latou faalogologo, na o latou malamalama ai o le siufofoga lava o le Tama Faalelagi o loo faailoa mai Lona Alo, o Iesu Keriso. (Tagai 3 Nifae 11:1–10.) Ona afio ese lea o le Faaola mai le lagi ma tautino atu: “Faauta, o Au o Iesu Keriso, o le na molimau i ai perofeta o le a sau i le lalolagi” (3 Nifae 11:10).

Ua Faaali Mai Iesu Keriso ia sa Nifae, saunia e Arnold Friberg

Sa saunoa Elder Jeffrey R. Holland o le Korama a Aposetolo e Toasefululua e uiga i lea taimi:

Elder Jeffrey R. Holland

O lena faaaliga ma le tautinoga na fatuina ai le manatu autu, le taimi silisili, i le talafaasolopito atoa o le Tusi a Mamona. O le faaaliga ma le folafolaga lea na faapea ona faailoaina ma musuiaina ai perofeta uma o sa Nifae mo le ono selau tausaga na mavae atu. …

Sa talanoa tagata uma e uiga ia te ia, pepese e uiga ia te ia, fai miti e uiga ia te ia, ma tatalo mo lona afio mai—ae, o lea ua i ai moni lava o ia. O le aso o aso! O le Atua, o lē na te faaliliu po pogisa uma i taeao malamalama, ua taunuu mai. (Christ and the New Covenant: The Messianic Message of the Book of Mormon [1997], 250–51)

aikona, suesue

Suesue mo Sauniuniga mo le Vasega

Faitau le 3 Nifae 11:13–17, ma vaavaai mo mea na faia e tagata e faamalolosia ai a latou molimau o Iesu o le Keriso toetu.

O Keriso i le Laueleele o Nuumau, saunia e Simon Dewey

aikona, mafaufau loloto

Mafaufau Loloto i Sauniuniga mo le Vasega

O le a se mea e mafai ona e aoao mai e uiga i uiga o Iesu Keriso mai Ana fegalegaleaiga ma sa Nifae ma sa Lamana?

Na aoao mai e Elder Walter F. Gonzalez o le Fitugafulu le mea lenei e uiga i le aafiaga o tagata i le molimauina o le Keriso toetu:

Elder Walter F. González

“O mai ia te au, ina ia outou tagotago ma vaai” [3 Nifae 18:25]. O se poloaiga lea na tuuina mai e le Faaola i nei tagata sa nofoia ia Amerika anamua. Sa latou tagotago i o latou lima ma vaai i o latou mata i a Iesu o le Keriso. O lenei poloaiga e tutusa lava le taua mo i tatou i lenei vaitaimi e pei foi o lo latou vaitaimi. Ao tatou o mai ia Keriso, e mafai ona tatou tagotago ma “iloa mautinoa ai” [3 Nifae 11:15]—e le mo o tatou lima ma mata ae ma o tatou loto ma mafaufau atoa—o Iesu o le Keriso.

O se tasi o auala e o mai ai ia Keriso o le saili lea e aoao ia upumoni taua mai o tatou loto. A tatou faia lea mea, o le a aumaia e uunaiga mai le Atua se malamalama e le mafai ona tatou maua mai se isi lava mea. (“Aoao Faatasi ma o Tatou Loto,” Ensign po o le Liahona, Nov. 2012, 81)

aikona, tusifaamaumau

Tusifaamaumau Ou Lagona Uunaia

Ao e tomanatu i lau molimau ia Iesu Keriso, tusifaamaumau i lau apitalaaga patino se aafiaga ua faamalosia ai lau molimau ia te Ia. A le o lena, e mafai ona e suea se viiga e atagia ai ou lagona e uiga i le Faaola ma tusifaamaumau ou lagona e maua pe a e faalogo pe usuina lenei viiga.

Vaega 2

O le a se mea e mafai ona ou aoao mai e uiga i auaunaga mai le faataitaiga a le Faaola?

Ina ua uma ona tuuina atu e le Faaola i tagata taitoatasi se avanoa e tagotago ai i manu’a i Ona aao, sa Ia tofia aposetolo e toasefululua ma aoao atu i le aofia le tele o upumoni taua (tagai 3 Nifae 11–16). Ao sauni Iesu e maliu ese atu, sa fetalai atu o Ia, “Ua ou iloa … ua le mafai ona outou malamalama i au upu uma,” ma Ia valaauliaina tagata e toe foi atu i o latou aiga, mafaufau loloto i mea sa Ia aoaoina ai i latou, ma saunia i latou lava mo Lona toe foi mai i le aso na sosoo ai (3 Nifae 17:1–3).

aikona, suesue

Suesue mo Sauniuniga mo le Vasega

Faitau le 3 Nifae 17:5–10, ma vaavaai mo auala na faaalia ai e le Alii le agalelei ma le agaalofa ao Ia auauna atu i tagata.

Ina ua uma ona faamaloloina e le Faaola le motu o tagata, sa Ia poloai atu ina ia “avatu a latou fanau laiti” uma ia te Ia (3 Nifae 17:11) ae e tatau i isi tagata uma ona tootutuli. Ona Ia faia lea o se tatalo mo i latou sa faapea ona “tetele ma ofoofogia” (fuaiupu 16–17) sa faapea ona lofituina ai le motu o tagata i le olioli. (Tagai 3 Nifae 17:10–19.)

Keriso ma Tamaiti o le Tusi a Mamona, na saunia e Del Parson

aikona, suesue

Suesue mo Sauniuniga mo le Vasega

Faitau le 3 Nifae 17:19–24 pe matamata le vitio “My Joy Is Full” (4:04), ma mafaufau loloto pe aisea na aumaia ai e auaunaga le olioli i le Faaola.

Na aoao mai Peresitene Jean B. Bingham, Peresitene Aoao o le Aualofa, e uiga i le taua o le mulimuli i le faataitaiga a le Faaola a o tatou auauna atu:

Peresitene Jean B. Bingham

A uma ona talanoaina ma faia mea uma, o le auaunaga moni lava e ausiaina taitoatasi faatasi ma le alofa e fai ma uunaiga. O le tau ma le taua ma le ofoofogia o auaunaga faamaoni e suia moni ai olaga! A tatala o tatou loto ma naunau ia alolofa atu ma faaaofia ai, faamalosiau ma faamafanafana, o le a sili atu ona mamana a tatou auaunaga. Faatasi ai ma le alofa e fai ma uunaiga, o le a tutupu vavega. …

O le Faaola o lo tatou faataitaiga i mea uma—e le gata i mea e tatau ona tatou faia ae pe aisea foi e tatau ai ona tatou faia [tagai Efeso 5:2]. (“Auauna Atu e pei ona Faia e le Faaola,” Ensign po o le Liahona, Me 2018, 106)

aikona, mafaufau loloto

Mafaufau Loloto i Sauniuniga mo le Vasega

Mafaufau i se tasi o loo ono manaomia lau fesoasoani. E mafai faapefea ona e mulimuli i le faataitaiga a le Faaola ma faaali atu le agalelei ma le alofa i lenei tagata?

Manao Pea i Nisi Mea? (Tuu i le faitalia)

O a ni mea e mafai ona ou faia e faaloloto ai lou talisapaia o le valaaulia a le Faaola e o mai ia te Ia ta’i toatasi?

Sa tusia e Elder David A. Bednar o le Korama a Aposetolo e Toasefululua upu o le pese ua faaautuina “One By One (Taitoatasi)” (tagai music.ChurchofJesusChrist.org). O loo ia faasoa mai ai se savali e uiga i le alofa o le Faaola mo i tatou taitoatasi. E mafai ona e faalogologo i le pese na usuina e Nathan Pacheco and the Lyceum Philharmonic (6:44).

O a ni mea e mafai ona ou faia e nofouta atili ai i manaoga o isi?

I le tautalaga “Muamua Matau, Ona Auauna Atu ai Lea” (Ensign po o le Liahona, Nov. 2012, 78–80), na faamalamalama ai e Peresitene Linda K. Burton, o lē sa avea muamua ma Peresitene Aoao o le Aualofa, mea e mafai ona tatou faia ia nofouta atili ai i manaoga o isi.

O a ni faataitaiga o auaunaga i le ala a le Alii?

Ina ia aoao i le ala na auauna tai toatasi atu ai le Alii i Ona soo e sefululua i totonu o sa Nifae ma sa Lamana, faitau le 3 Nifae 18:36–39; 28:1–12.

I le vitio “Focus on the One” (2:32), o loo saunoa ai Peresitene Bingham i auala e faatamaoaigaina ai o tatou olaga pe a tatou tuu ese o tatou manatu e muai fafau ae faasafua atu le lima o le faaaumea ia i latou o e ese mai ia i tatou.

I le vitio “Ministering as the Savior Does” (6:08), ua tuuina mai ai e tamaitai o le Ekalesia ni faataitaiga o auala laiti ma faigofie e mafai ona tatou auauna atu ai i isi.