“Lesona 14 Anomea mo Sauniuniga o le Vasega: Avea ma Meafaigaluega i Aao o le Atua,” Tusi Lesona a le Faiaoga o Aoaoga ma Aoaoga Faavae o le Tusi a Mamona (2021)
“Lesona 14 Anomea mo le Sauniuniga o le Vasega,” Anomea a le Faiaoga o Aoaoga ma Aoaoga Faavae o le Tusi a Mamona
Lesona 14 Anomea mo le Sauniuniga o le Vasega
Avea ma Meafaigaluega i Aao o le Atua
Mafaufau pe toafia tagata e te vaai i ai i aso uma e le o fiafia i le taimi nei i faamanuiaga o le talalelei a Iesu Keriso. E faapefea ona suia o latou olaga pe afai latou te aoao atili e uiga i le fuafuaga a le Tama Faʻalelagi mo lo latou fiafia? A o e suesueina ni faataitaiga a faifeautalai i le Tusi a Mamona, mafaufau ma le agaga tatalo i se tasi e mafai ona e faasoa atu i ai le talalelei. Manatua a o e faasoa atu le talalelei i isi, ua e auai i le faapotopotoina o Isaraelu.
Vaega 1
E faapefea e le faalolotoina o loʻu liua ona faʻateleina loʻu manao e faasoa atu le talalelei?
O atalii e toafa o Mosaea (Amona, Arona, Ominea, ma Himinae) sa faatasi ma Alema le Itiiti ina ua faaali mai se agelu ma valaauina o ia e salamo. O alii talavou uma e toalima na lagona le loloto o le faanoanoa mo a latou amioga, salamo ia latou agasala, ma na liliu atu i le Alii. Ina ua mavae lo latou liuga, na “avea i latou ma meafaigaluega i aao o le Atua, i le aumaia o le toatele i le malamalama o le upumoni, ioe, i le malamalama o lo latou Togiola” (Mosaea 27:36).
Suesue e Sauniuni ai mo le Vasega
Faitau le Mosaea 28: 1–3, vaavaai pe faapefea e le liuga o atalii o Mosaea ona faatosinaina lo latou manao e faasoa le talalelei ma avea ma meafaigaluega i aao o le Atua.
Ina ua mavae tausaga o le galuega faafaifeautalai i sa Lamana, na fai atu Amona i mea nei i ona uso: “Ma o le faamanuiaga lenei ua faaee mai i o tatou luga, lea ua avea ai i tatou o ni meafaigaluega i aao o le Atua e faataunuu ai lenei galuega tele. (Alema 26:3).
Na aoao mai e Peresitene Dallin H.Oaks o le Au Peresitene Sili le mea lenei e uiga i le auala e tosina ai lo tatou manao e faasoa atu le talalelei ona o lo tatou liuga:
O le faasoaina atu o le talalelei e le o se avega ae o se fiafiaga. O le mea ua tatou ta’ua o le “galuega faafaifeautalai a tagata o le au paia” e le o se polokalama ae o se uiga o le alofa ma le aapa atu e fesoasoani ia i latou o siomiaina i tatou. O se avanoa foi e molimau ai po o a ni o tatou lagona e uiga i le talalelei toefuataiina a lo tatou Faaola. E pei ona aoao mai Elder Ballard, “O se faamaoniga sili ona taua o lo tatou liuga atoa ai ma o tatou lagona e uiga i le talalelei i o tatou lava olaga, o lo tatou naunautaiga lea e faasoa atu i isi” [M. Russell Ballard, “O le Taimi Lenei,” Liahona, Ian. 2001, 89]. (“Faasoaina Atu o le Talalelei Toefuataiina,” Liahona, Nov. 2016, 60)
Mafaufau Loloto i Sauniuniga mo le Vasega
Faailoa se faataitaiga mai tusitusiga paia poo talafaasolopito a le Ekalesia i auala na faateleina ai le manao o se tasi ma le naunautaiga e avea ma meafaigaluega i aao o le Atua ma faasoa le talalelei. Sau saunia i le vasega e faasoa atu lau faataitaiga.
Vaega 2
E faapefea ona avea aʻu ma meafaigaluega e sili atu ona aoga i aao o le Atua?
O atalii o Mosaea ma i latou na o atu ma i latou na fetaiaʻi ma ni “tagata aivao ma le maaa ma le feʻai” a o latou o atu e aoao tagata Sa Lamana (Alema 17:8, 14). A o latou galulue ai, o nei faifeautalai sa “mafatia tele, i le tino ma le mafaufau, e pei o le fia aai, fia inu ma le le lavavā, ma le tele foi o tauiviga i la le agaga” (Alema 17:5).
Suesue e Sauniuni ai mo le Vasega
Faitau le Alema 17:2–3, 9–11, saili mo mea na faia e atalii o Mosaea ina ia maua ai le agaga o faaaliga ma saunia ai e avea ma mea faigaluega aoga i aao o le Atua. Mafaufau e faailoga mea e te mauaina.
Mafaufau Loloto i Sauniuniga mo le Vasega
O a ni faatinoga ua sili ona fesoasoani ia te oe e agavaa ai mo le Agaga ina ia avea ma se meafaigaluega sili atu ona lelei i aao o le Atua?
Vaega 3
E faapefea ona fesoasoani le Agaga ia te au ia faaleleia lo’u auauna atu i isi ma faasoa atu le talalelei?
O atalii o Mosaea na avea ma meafaigaluega i aao o le Atua, i le fesoasoani e aumai le toatele o sa Lamana i le Faaola. Sa faimalaga atu na o Amona i le laueleele o Isamaeli ma sa saisai ma ave i luma o le Tupu o Lamonae. Na fesili le tupu ia Amona e uiga i ana fuafuaga, ma sa fai atu Amona e manao e nofo faatasi ma sa Lamana, atonu mo lona olaga atoa. Sa fiafia le tupu i lenei mea, ma sa avea Amona ma se tasi o ana auauna. (Tagai i le Alema 17:19–25.)
Na auina atu Amona e leoleo le lafu a le tupu. Ina ua taumafai tagata gaoi e faataape le lafu, sa taofia e Amona a latou taumafaiga i lana ma’ata ma le pelu. Na maofa le au gaoi i le mana o Amona ma sosola ese ai. (Tagai i le Alema 17:25, 33–38.)
Ina ua iloa e le Tupu o Lamonae le manuia o taumafaiga a Amona i le puipuia o ana lafu manu, sa ofo o ia ma mafaufau pe o Amona o le “Agaga Sili o le na te aumaia faasalaga tetele faapea i luga o lenei nuu” (Alema 18:2). “Amona, na faatumuina i le Agaga o le Atua” (fuaiupu 16), na mafai ona iloa mafaufauga o le tupu, tautala atu i ona atugaluga, ma amata aoao ia te ia le talalelei (tagai Alema 18:15–24).
Suesue e Sauniuni ai mo le Vasega
Faitau le Alema 18:33–35, ma mafaufau po o le a le mea e mafai ona e aoao mai ia Amona e uiga i le avea ma meafaigaluega i aao o le Atua.
Na talitonu le Tupu o Lamonae i upu a Amona ma na liua i le talalelei a Iesu Keriso. Sa mafai foi e Amona ona aoao le avā a Lamonae ma auauna a le tupu. O le toatele o i latou na talitonu i aoaoga a Amona ma molimau mai “ua liua o latou loto” (Alema 19:33). Talu ai ona ua avea Amona ma meafaigaluega i aao o le Atua, “na amata le galuega a le Alii i [lena vaega o] sa Lamana” (Alema 19:36).
E ui atonu e le maoaʻe o tatou aafiaga e pei o Amona, ae mafai ona tatou faia se eseesega i olaga o isi pe a tatou saunia i tatou lava e avea ma meafaigaluega i aao o le Atua.
Na faamatala e Elder Dieter F.Uchtdorf o le Korama a Aposetolo e Toasefululua le ala e mafai ai ona tatou faasoa atu le talalelei i isi:
Po o fea lava o e i ai i lenei lalolagi, e anoanoai avanoa e faasoa atu ai le tala fiafia o le talalelei a Iesu Keriso i tagata tou te feiloai i ai, aooga faatasi, ma nonofo faatasi pe faigaluega ma tafafao faatasi. …
Po o a lava auala e foliga mai e tupu fua ma masani ai ia te oe, faasoa atu i tagata pe aisea e taua ai Iesu Keriso ma Lana Ekalesia ia te oe. …
Aua le tatalo mo na o faifeautalai ia mauaina ē filifilia. Tatalo i aso uma ma lou loto atoa ina ia e maua i latou o e o le a o mai inā matamata, o mai ma fesoasoani, ma o mai ma nonofo. (“Galuega Faafaifeautalai: Faasoaina atu o Mea o Loo i Totonu o Lou Loto,” Liahona, Me 2019, 15, 17)
Mafaufau Loloto i Sauniuniga mo le Vasega
O a nisi o mea na e faia e faasoa ai le talalelei i auala “e faigofie ma masani ai”? O ai e sau i lou mafaufau pe a e mafaufau e valaaulia se tasi e faalatalata atu i le Faaola? O le a se mea e te ono faia e avea ai ma meafaigaluega i le aao o le Alii e fesoasoani ai ia i latou e te mafaufau i ai?