Lesona 16 Anomea a le Faiaoga

E Auauna Atu Iesu Keriso i le Ta’i Toatasi

O le faaali atu o Iesu Keriso i sa Nifae ma sa Lamana ua tuuina mai ai se molimau mamana i Lona paia. A o auauna atu Iesu i le ta’i toatasi, sa Ia faaalia atu le agalelei ma le agaalofa. I le lesona lenei, o le a valaaulia ai tamaiti aoga e faailoa mai ni auala eseese e mafai ona latou o mai ai ia Keriso ma maua se molimau patino loloto atili o Ia o lo latou Faaola. O le a iloilo ai foi e tamaiti aoga mea e mafai ona latou faia e faataitai ai i le ala na auauna atu ai le Faaola.

Fautuaga mo le Aoaoina Atu

Na faaali atu le Keriso toetu ia sa Nifae ma sa Lamana ma valaaulia i latou e tagotago i manu’a i Ona lima ma vae.

Atonu e te manao e amata le lesona i le faaali atu o le ata o loo avatu ai i le lesona ma fai atu i se tamaitiiti aoga e toe faamatala mea na tutupu na tau atu i le faaali atu o Iesu Keriso ia sa Nifae ma sa Lamana.

Ta’i Toatasi, saunia e Walter Rane

Valaaulia tamaiti aoga e toe iloilo le upusii a Elder Jeffrey R. Holland i le vaega 1 o anomea mo sauniuniga, ma fesili i ai pe aisea ua avea ai le faaali atu o Iesu Keriso i tagata ma mea aupito taua na tupu i le Tusi a Mamona.

Fai atu i tamaiti aoga e toe iloilo le 3 Nifae 11:13–17, vaavaai mo ni lesona e mafai ona tatou aoao mai i lenei tala i fegalegaleaiga a Keriso ma tagata. Mafaufau po o le fea o fesili nei e te ono fesiligia e fesoasoani ai i au tamaiti aoga ia malamalama ma faaaoga mea ua latou aoaoina.

• O a ni mea tatou te aoao mai i nei fuaiupu e faatatau i le uiga o Iesu Keriso?

• E faapei ni ou lagona pe ana valaaulia oe e tagotago i manu’a i lima ma vae o le Faaola?

• O le a se mea e mafai ona tatou aoao e uiga i le Faaola mai Lana valaaulia i tagata e o atu ta’i toatasi e tagotago i manu’a i Ona lima ma vae? (Afai e manaomia, faamanatu atu i tamaiti aoga e 2,500 tagata na i ai.)

• E faapefea ona faaalia i lenei aafiaga le mea o loo finagalo Iesu Keriso e valaaulia i tatou taitoatasi e fai? (I le faaaoga ai o tali a tamaiti aoga, faailoa atu se upumoni e talitutusa ma lenei: Ua valaaulia i tatou e Iesu Keriso e o mai ia te Ia ma maua se molimau patino o Ia o lo tatou Faaola.)

• O le a se mea e mafai ona tatou faia e o mai ai ia Iesu Keriso ma maua a tatou lava molimau patino o Ia o lo tatou Faaola? (Mo ni malamalamaaga loloto faaopoopo, atonu e aoga le toe iloilo e tamaiti aoga o le saunoaga a Elder Walter F. González o loo i le vaega 1 o anomea mo sauniuniga.)

Valaaulia tamaiti aoga e toe iloilo le gaoioiga “Tusifaamaumau Ou Manatu” o loo i le vaega 1 o anomea mo sauniuniga. Tuu atu i tamaiti aoga ni nai minute e toe iloilo ai mea na latou saunia, ona valaaulia lea o ni nai tamaiti aoga e faasoa mai mea sa latou tusia. A lava le taimi, atonu e te manao e valaaulia se tamaitiiti aoga se toatasi pe toalua e tau mai se fuaiupu mai le viiga na latou filifilia ma faasoa mai pe aisea e anoa ai ia i latou. E mafai foi ona outou usuina faatasi le viiga.

Mafaufau e faaali atu fesili nei ma uunai tamaiti aoga e mafaufau loloto i ai ma tusifaamaumau o latou manatu ma lagona:

• O le a se mea e mafai ona ou faia e faamalosia ai lau molimau o Iesu Keriso o lo’u Faaola?

Ua auauna atu tai toatasi Iesu Keriso i le motu o tagata.

Faamanatu i tamaiti aoga, ina ua lata ina uma Lona aso muamua i tagata, sa valaaulia e le Faaola le aofia e toe foi atu i o latou aiga ma sauniuni mo Lona toe foi mai i le isi aso na sosoo ai (tagai 3 Nifae 17:1–3).

Faaleleia o lo Tatou Aoao Atu ma le Aoaoina

Faamalosiau i tamaiti aoga e suesue ma faataitai i le faataitaiga a le Faaola. Sa saunoa mai Peresitene Dieter F. Uchtdorf, ao i ai i le Au Peresitene Sili, i faiaoga o le seminare ma le inisitituti “E mananao o tatou tagata talavou e talitonu; latou te faananau ia aoao atili e uiga i le Faaola” (“A Teacher of God’s Children,” Religious Educator, vol. 12, no. 3 [2011], 7). O se tasi o auala e mafai ai e tamaiti aoga ona iloa atili e uiga i le Faaola o le taulai atu lea i Lana faataitai atoatoa. Ao suesue e tamaiti aoga le faataitaiga a Iesu Keriso, valaaulia i latou e mafaufau i se mea e mafai ona latou faia e faataitai ai ia te Ia. Sa saunoa Elder Neal A. Maxwell o le Korama a Aposetolo e Toasefulua, “O lenei faataitaiga e faaleleia tonu ai lava lo tatou faamemeloga o Iesu” (“Becoming a Disciple,” Ensign, Iuni 1996, 12).

Vaevae tamaiti aoga i ni vaega toalaiti. Valaaulia i latou e toe iloilo le 3 Nifae 17:5–9, 20–24 ma ia talanoa pe na faapefea ona auauna atu le Faaola i tagata. I le taimi o le latou talanoaga, faamalosiau i tamaiti aoga e mafaufau i ni auala eseese e mafai ona latou faauma ai le faamatalaga lenei: “Tatou te auauna atu e pei o le Faaola pe a …”

A ua lava se taimi o tamaiti aoga e aoao ai mai le tasi ma le isi, fai atu ia i latou e faasoa mai ni auala ua latou faaumaina ai le faamatalaga le uma na muamua atu. A o faasoa mai e tamaiti aoga a latou faamatalaga, mafaufau e fai atu nisi o fesili lenei e fesoasoani e faaloloto ai le talanoaga:

• O le a le matafaioi a le alofa e faia i auaunaga? (Atonu e te manao e toe iloilo le upusii mai ia Peresitene Jean B. Bingham i le vaega 2 o le anomea mo sauniuniga.)

• Aisea tou te manatu na aumaia ai e auaunaga le olioli i le Faaola? O le a se taimi na e lagonaina ai le olioli a o [e] auauna atu i se tasi na manaomia le fesoasoani?

• Aisea e avea ai le lagona o le agaalofa ma se vaega taua o le auaunaga? O anafea na e lagonaina ai le agaalofa o le Faaola e ala i taumafaiga o auaunaga a se isi tagata? Na mafai faapefea ona e momoli atua le agaalofa o Keriso mo isi e ala i au oe lava taumafaiga o auaunaga?

• E mafai faapefea ona tatou fesoasoani i se tasi ia maua le mana faamalolo o le Alii a o tatou auauna atu?

Ina ia fesoasoani i tamaiti aoga e faaaoga mea sa latou aoaoina e uiga i le auaunaga, mafaufau e faasoa atu le ata faataitai lenei:

O Aleano o se talavou nofofua. Sa ia maua se valaaulia e auauna atu ai ia Papolo ma Iose. Sa talanoa o ia ia Papolo i ni nai taimi i le taimi o le lotu ae lei feiloai lava ia Iose. Ina ua uma ona talanoa ma le peresitene o le korama a le au toeaina, sa iloa ai e Aleano o loo tauivi Papolo ma se faafitauli o le soifua maloloina, ma na tau atu e Iose i le epikopo ua le o toe fiafia o ia i le taimi nei e auai i le lotu. Sa manao Aleano e faataunuu lona valaauga ae e le mautinoa po o fea e amata ai.

Valaaulia tamaiti aoga e vaai mo le faataitaiga a le Faaola ma faasoa mai se fautuaga latou te ono tuuina atu ia Aleano. Ia faamalosiau foi i tamaiti aoga e faasoa mai o latou lava aafiaga patino i auaunaga.

Faamanatu i tamaiti aoga, o sauniuniga mo le lesona lenei, sa valaaulia ai i latou e mafaufau i se tasi e mafai ona latou auauna i ai (tagai vaega 2 o anomea mo sauniuniga). Valaaulia tamaiti aoga e mafaufau i le tulaga o lenei tagata. Ona tuu atu lea i tamaiti aoga ni nai minute e mafaufau loloto ma tusifaamaumau ai o latou lagona e uiga i le fesili lenei:

• O le a se mea o le a e faia e mulimuli ai i le faataitaiga a le Faaola ma auauna atu ma le agalelei ma le agaalofa i lenei tagata?

Mo Le Isi Taimi

Valaaulia tamaiti aoga e mafaufau i luitau o loo feagai ma tagata o le Ekalesia po o tagata sailiili pe a latou lagonaina le le taliaina e isi tagata o le Ekalesia. Faamalosiau i au tamaiti aoga e suesue i le anomea mo sauniuniga mo le isi vasega o le a sosoo ai, ia vaavaai mo auala e mafai ona latou fesoasoani ai ia lagona e isi o loo i ai se avanoa mo tatou uma i le Ekalesia a Iesu Keriso.