Lesona 9 Anomea a le Faiaoga

Faatuatua ia Iesu Keriso

O le aoaoga faavae a Keriso e mafai ai ona tatou suia, e avea e pei o lo tatou Faaola, ma maua faamanuiaga uma ua Ia faaavanoaina mai e ala i Lana Togiola. I lenei lesona o le a talanoaina ai e tagata aoga le elemene muamua o le aoaoga faavae a le Alii: faatuatua ia Iesu Keriso. O le a latou maua le avanoa e faailoa ai faamanuiaga o le faatuatua ma faamatala ai pe faapefea ona atina’e le faatuatua ia Iesu Keriso. O le a filifili foi tagata aoga po o a mea e mafai ona latou faia e faamalolosia ai o latou faatuatua i le Alii.

Fautuaga mo le Aoao Atu

Ua aoao e Alema ia sa Sorama i le ala e faatupulaia ai lo latou faatuatua ia Iesu Keriso.

Atonu e te amataina le lesona lenei i le faaali atu o le parakalafa tomua i le anomea mo sauniuniga ma fai atu i se tagata aoga e faitau leotele. E mafai ona e molimau atu o le faatuatua, salamo, papatisoga, le meaalofa o le Agaga Paia, ma le tumau seia oo i le iuga, e mafai ona matala ai le faitotoa mo Iesu Keriso ia suia moni ai i tatou ia avea o ni tagata paia ma sili atu le fiafia. I le taimi o le talanoaga a le vasega, valaaulia tagata aoga e mafaufau pe mafai faapefea ona faateleina lo latou faatuatua ia Iesu Keriso ma Lona mana e suia, faamalolo, ma fesoasoani ai ia i latou.

Valaaulia se tagata aoga naunautai e faasoa mai pe o le a faapefea ona ia faamatala po o le a le faatuatua ma pe aisea ua taua tele ai le faatuatua ia Iesu Keriso.

Faaali atu ma faitau faatasi le vaaiga faataitai lenei:

O la’u uo o Vitolia i le kolisi, sa ola a’e i se aiga Kerisiano. Na te le’i fesiligia lava le paia o Iesu Keriso, seia oo ina ua faamasalosaloina ia e se tasi o ana polofesa i le moni o Ana vavega, Togiola ma le Toetu. Sa faateia Vitolia i mea sa ia faalogoina. Ona na te iloa o oe o se tagata lotu ma talitonu ia Iesu Keriso, ua fesili atu ai pe faapefea ona e iloa o Iesu o le Alo moni o le Atua ma le Faaola o le lalolagi. Sa fesili atu foi o ia pe faapefea ona ia maua le faatuatua faateleina ia te Ia.

• E faapefea ona e tali atu i fesili a Vitolia?

A o tali mai tagata aoga, mafaufau e faaaoga mau ma fesili nei e fesoasoani e faaloloto ai le talanoaga, e tusa ai ma manaoga o au tagata aoga.

Faaleleia o Lo Tatou Aoao Atu ma le Aoao Mai

Matau, faalogo ma iloatino. E leai ni tagata aoga se toalua po o ni vasega e tutusa lelei. A o e matau ma faalogo i au tagata aoga, saili ia iloatino mea e fiafia i ai ma o latou manaoga moni faaleagaga. Fai atu fesili e fetaui ma talafeagai ma e taitai atu ai i faatinoga amiotonu. O fesili i lenei lesona atoa e mafai ona faaosofia, taiala ma musuia ai oe a o e taitaia talanoaga a le vasega. O nisi o au fesili e sili ona o’oo’o atonu o fesili ia e oo atu i lou mafaufau a o e aoao atu. Ae ia manatua foi, e le o faamoemoeina e te fai atua fesili uma. E mafai foi e tagata aoga ona fai ni fesili o’oo’o e faaalia ai malamalamaaga loloto i upumoni o le talalelei.

Afai e manaomia, faamanatu i tagata aoga na aoao e Alema se vaega o tagata sa Sorama matitiva i le ala e mafai ai ona fesoasoani le faatino o le faatuatua i le afioga a le Atua e faamalosia ai o tatou faatuatua. Atonu e te valaaulia tagata aoga e toe faamanatu le Alema 32:21, 27–30, 41–43, ma vaavaai mo mataupu faavae e mafai ona fesoasoani ai ia Vitolia. A o faasoa mai e tagata aoga ia mataupu faavae na aoao atu e Alema, mafaufau e fai atu nisi o fesili nei:

• O le a faapefea ona e faamatala atu le uiga o le faauigaga a Alema o le faatuatua i se auala e mafai ai foi e se tamaitiiti ona malamalama? (Tagai i le Alema 32:21.)

• E tusa ai ma le Alema 32:27–30, e mafai faapefea e le faaalia o le faatuatua ona taitai atu ai i se faateleina o le faatuatua? (Atonu e mafai ona faailoa mai e tagata aoga se aoaoga faavae e pei o lea: A o tatou faaalia le faatuatua ma faamasani i le afioga a le Atua, o le a tatou maua se faamautinoaga faaleagaga ma o le a faamalolosia ai o tatou faatuatua. Mafaufau e tusi le mataupu faavae lenei, po o se aoaoga faavae e talitutusa e faaaoga ai upu a tagata aoga, i luga o le laupapa.) O anafea na e faaaogaina ai lenei mataupu faavae ma lagonaina ai le faamalosia o lou faatuatua? O le a se fautuaga e te ono tuu atu i se tasi ua lotovaivai ona sa galue o ia ma le faatuatua ae ua manatu na te le’i maua lava ni fua o lona faatuatua? (Atonu e aoga le toe faamanatu o le saunoaga a Peresitene Dieter F. Uchtdorf i le vaega 1 o le anomea mo sauniuniga.)

• E tusa ai ma le Alema 32:28, e mafai faapefea ona tatou iloa pe o lelei le upu i le faataitaia o lo tatou faatuatua? (Atonu e faailoa mai e tagata aoga ni fuaitau e pei o le “amata ona malena a’e,” “faalauteleina ai lo’u agaga,” “faamalamalama ai lou malamalamaaga,” ma le “e suamalie ia te au.”) Afai na e oo i soo se tasi o nei aafiaga, o le a faapefea ona e faamatalaina lou aafiaga i se isi tagata?

• O le a le mea na aoao mai e Elder Jeffrey R. Holland e uiga ia Iesu Keriso ma Lana faatatauga i le fatu, le fua, ma le laau? (Tagai vaega 2 o anomea mo saunuiuniga.) Na faapefea ona faatosinaina e le faatinoga o le faatuatua ma le totoina o Iesu Keriso ma Lana talalelei i lou loto ia lau molimau ma le liuga? O le a se mea e mafai ona e faia e fafaga ai le laau ma le alofa faateleina ina ia mauaa loloto ai i lou loto?

• O le a se mea ua e iloa e uiga i le Faaola ua faateleina ai lou talitonuina ma lou faatuatuaina o Ia?

Ua aoao mai Mamona e uiga i le mana ma faamanuiaga o le faaalia o le faatuatua ia Iesu Keriso.

Valaaulia tagata aoga e toe faamanatu le Moronae 7:25–26, 33, ma molimau atu a tatou faaalia le faatuatua ia Iesu Keriso, o le a tatou maua le mana e fai ai le mea e tatau ai ia Keriso. (Atonu e te manao e faamalamalama o le uiga lenei o le upu tatau ai o loo faamatala ai se mea o le a faamanuia ai i tatou e o faatasi ma le finagalo o le Atua.) Faamanatu i tagata aoga na valaaulia i latou i anomea mo sauniuniga e faailoa mai ni tagata i le Tusi a Mamona o e na maua ni faamanuaiga pe na oo i ai ni vavega a o latou faaalia le faatuatua ia Iesu Keriso (tagai vaega 3). Valaaulia tagata aoga e faasoa mai a latou faataitaiga, o se vasega po o ni vaega toalaiti. E mafai ona fesoasoani fesili nei e faaloloto ai a latou talanoaga:

• Na faapefea ona faaalia e nei tagata lo latou faatuatua ia Iesu Keriso?

• O a nisi o faamanuiaga po o vavega na latou maua i le faaalia o le faatuatua ia Iesu Keriso?

• O a ni faamanuiaga po o ni vavega na tou maua i le faaalia o le faatuatua ia Iesu Keriso? (Atonu e te manao e toe faamanatu le saunoaga a Elder Richard G. Scott i le vaega 3 o le anomea mo sauniuniga.)

Tuu atu i tagata aoga se taimi e mafaufau loloto ai i o latou lava faatuatua ia Iesu Keriso ma mafaufau po o a ni mea e tatau ona latou faia e faamalolosia ma faaalia ai le faatuatua ia te Ia.

Mo Le Isi Taimi

Faamatala atu o lo tatou faatuatua ia Iesu Keriso e taitai atu ai i le salamo, o le mataupu faavae autu lona lua o le aoaoga faavae a Keriso (tagai i le Helamana 14:13). Valaaulia tagata aoga e suesue i anomea mo sauniuniga ma mafaufau loloto pe aisea e tatau ai ona vaai atu i le salamo o se meaalofa paia e tatau ona taliaina ma e le o se avega matautia foi e tatau ona alofia.