Lesona 22 Anomea a le Faiaoga

Puipuia I Tatou Lava mai Aoaoga Faavae Sese o Aso e Gata Ai

Na aoao mai Peresitene Ezra Taft Benson e faapea, “O le Tusi a Mamona e faailoa ai fili o Keriso [ma] ta’useseina mataupu sese” (Aoaoga a Peresitene o le Ekalesia: Ezra Taft Benson [2014], 132). I le lesona lenei, o le a faailoa ai e tamaiti aoga faiga e faaaoga e le fili e faaumatia ai le faatuatua ia Iesu Keriso ma Lana talalelei. O le a iloilo ai foi e tamaiti aoga auala e mafai ona latou maua ai le fesoasoani a le Faaola e faamalosia ai i latou lava e faasaga i faiga faapena.

Fautuaga mo le Aoaoina Atu

Ua valoia e Nifae aoaoga sese i aso e gata ai.

Fai atu i tamaiti aoga e mafaufau i se taimi na latou, (pe o se tasi latou te iloa) faalogo ai i ni manatu po o ni aoaoga na faavaivaia pe luitauina ai o latou faatuatua ia Iesu Keriso ma Lana talalelei toefuataiina. Valaaulia se tamaitiiti se toatasi pe toalua e faasoa mai o laua aafiaga.

• O a ni auala e te manatu e mafai ai e le Tusi a Mamona ona puipuia i tatou e faasaga i manatu po o aoaoga e mafai ona faavaivaia o tatou faatuatua ia Iesu Keriso ma Lana talalelei? (Mafaufau e toe iloilo saunoaga a Peresitene Benson ma Peresitene Russell M. Nelson i le vaega 1 o anomea mo sauniuniga.)

Tusi le fuaitau Aoaoga Sese i le laupapa. Valaaulia tamaiti aoga e toe iloilo le 2 Nifae 28:7–9, 20–22, 29–30 ma vaavaai mo aoaoga e mafai ona fetaui i lalo o le ulutala lenei. Ona tusi lea o tali a tamaiti aoga i lalo o ulutala o loo i le laupapa.

• O a nisi o faataitaiga o nei aoaoga e mafai ona e iloa i o tatou aso? O a ni auala e taumafai ai nei aoaoga e faavaivai le faatuatua ia Iesu Keriso ma Lana talalelei?

• O le a se mea ua e faia e puipui ai oe lava e faasaga i nei manatu sese?

Sa taumafai Serema, Neoa ma Korioa e faaumatia le faatuatua ia Iesu Keriso.

Faailoa atu faatasi ai ma i latou o loo i le Tusi a Mamona o e na aoaoina atu aoaoga faavae sese o ni anetikeriso se toatolu: o Serema, Neoa ma Korioa. Sa taumafai i latou taitoatasi e faaumatia le faatuatua o i latou o e sa talitonu ia Iesu Keriso.

Tuu atu i tamaiti aoga ni nai minute e toe iloilo ai le tala ua latou taulai atu i ai i le vaega 2 o anomea mo sauniuniga. Valaaulia tamaiti aoga sa le’i suesueina se tasi o nei tala ia faia loa i le taimi lenei.

A ua lava loa se taimi, valaaulia tamaiti aoga e fai ni vaega toalaiti ma i latou sa suesueina lea lava tala. Fai atu i vaega taitasi e tofi se tagata e toatasi o le vaega e fai ma taitai o le vaega. Tuu atu i taitai o vaega taitasi se kopi o le tufaaga o loo avatu ai i le lesona, “Faailoaina o Faiga a Satani.”

Faailoaina o Faiga a Satani

Anomea a le Faiaoga o Aoaoga ma Aoaoga Faavae o le Tusi a Mamona—Lesona 22

Faatonuga mo le taitai o le vaega: Taitai lau vaega i le talanoaina o fesili nei. Valaaulia tagata o le vaega e utuvai mai tusitusiga paia ma saunoaga a taitai o le Ekalesia i le vaega 2 o anomea mo sauniuniga. Faamalosiau i tagata uma o lau vaega ina ia auai. E ui i lea, e le tatau ona lagona e se tasi le faamalosia e faasoa o latou manatu.

1. O a ni faiga sa faaaoga e lenei anetikeriso e faatamaia ai le faatuatua o tagata ia Iesu Keriso ma Lana talalelei?

2. O a nisi o faataitaiga i aso nei o manatu sese na aoaoina po o faiga na faaaoga e le anetikeriso o loo i le tala lenei? O faapefea ona faasalalau e Satani nei manatu i o tatou aso?

Ia saunia e faasoa atu i le vasega atoa se faiga se tasi ma se faataitaiga i aso nei o lena faiga.

© 2021 Puletaofia e le Intellectual Reserve, Inc. Ua taofia aia tatau uma.

Faailoaina o Faiga a Satani

tufaaga a le faiaoga

A uma ona talanoaina e tamaiti aoga ia fesili o loo i le pepa o tufaaga, valaaulia taitai o vaega taitasi e tusi i le laupapa se faiga se tasi pe sili atu a Satani na faailoaina ma talanoaina e le latou vaega. Faamalosiau i taitai o vaega taitasi ia faasoa puupuu mai se faataitaiga i aso nei o se tasi o nei faiga. E mafai ona tatou tusia nisi o upumoni e pei o lenei:

• E faaaoga e Satani le faaviivii ma le malosi o le lelei o upu e taitai ese ai tagata mai le faaaogaina o le faatuatua ia Iesu Keriso ma le mulimuli i Ana perofeta (tagai Iakopo 7:4). (E ono fesoasoani le faailoa atu e faapea, o masani a i latou o e osofaia lo tatou faatuatua, latou te faia ma upumoni afaafa, i gagana faatiga, finauga pitotasi, faamatalaga taufaasese, ma le aveesea o mea moni mai anofaamatalaga. O nei finauga e masani ona faateia ai tagata e faalogo i ai ma pei ai e talafeagai ae na fuafuaina ia faatupu ai le masalosalo. [See Dallin H. Oaks, “Reading Church History” (lauga i faiaoga o le Ofisa o Aoga a le Ekalesia, Aok. 16, 1985), 1 -27.])

• E faaaoga e Satani ia pepelo e palu faatasi ma mea moni e faasese ai tagata (tagai Alema 1:4; tagai foi Iakopo 7:7).

• E faaaoga e Satani aoaoga faavae sese e faatosina ai i tatou ia le ano i le Atua ma tauamiotonu ai le soli o le agasala (tagai Alema 1:4; 30:17–18).

• E taumafai Satani e aveese le faatuatua o tagata ia Iesu Keriso e ala i le ulagia o o latou atamai po o o latou talitonuga (tagai Alema 30:13–16, 27–28).

Faamatalaga: Afai e faasoa mai e tamaiti aoga ni faataitaiga i aso nei e ono tupu ai le le malamalama po o finauga, ia mulimuli i le Agaga i le faamalamalamaina o soo se faamatalaga le sa’o ma toe tatai atu le talanoaga i upumoni o loo aoaoina i le lesona lenei.

A uma ona talanoa mai taitai o vaega, mafaufau e fesili atu:

• O a ni mea sa tulaga ese ia te outou i auala na tali atu ai Iakopo, Kitiona, ma Alema i upu ma faatinoga a anetikeriso?

Mafaufau e tusi le faamatalaga le uma lenei i luga o le laupapa: E mafai ona tatou faatoilaloina luitau i lo tatou faatuatua ia Iesu Keriso ma Lana talalelei e ala i le …

Faaleleia o lo Tatou Aoao Atu ma le Aoaoina

O le iloaina ma le malamalama i mataupu faavae ma aoaoga faavae. Tuu atu i tamaiti aoga e faailoa mai ni upumoni mai tusitusiga paia ma upu a perofeta. Valaaulia i latou e faamalamalama mai pe aisea na tulaga ese ai ni upumoni faapitoa ia i latou. Fai atu i tamaiti aoga e mafaufau po o a ni mataupu faavae ma ni aoaoga faavae e aoao atu ia i latou e uiga i le Alii o Iesu Keriso. O le faia faapea o le a fesoasoani latou te malamalama ai i le taua o upumoni ma le lagonaina o le musuia e faaaoga ia mea.

Valaaulia tamaiti aoga e faauma le faamatalaga lenei e faaaoga ai mea ua latou aoaoina mai upu ma faatinoga a Iakopo, Kitiona, ma Alema. Atonu e faauma e tamaiti aoga le faamatalaga i nisi o aulala nei:

• … manatuaina o aafiaga ua mavae ua faamalosia ai lo tatou faatuatua ia te Ia (tagai Iakopo 7:5).

• … faalagolago i le taitaiga mai le Agaga Paia (tagai Iakopo 7:8).

• … faalagolago i upu a perofeta ma faasoa atu a tatou molimau e uiga ia Iesu Keriso ma Lana talalelei (tagai Iakopo 7:9–12; Alema 1:7; 30:39–44).

• … faalagolago i le Atua ma taatia atu le faaiuga i Ona aao (tagai Iakopo 7:13–14).

Fai atu i tamaiti aoga e mafaufau loloto po o le fea o nei faamatalaga ua mae’a o loo i le laupapa na tupu ia i latou. Valaaulia ni tamaiti aoga e faasoa mai mea ua latou iloa ma lagona e uiga i a latou faamatalaga na filifilia.

Ina ia faamalosiau i tamaiti aoga e fai le faatinoga amiotonu, mafaufau e faaali atu fesili nei ma valaaulia tamaiti aoga e manatunatu i fesili latou te manatu e sili ona fetaui i o latou tulaga. E mafai foi ona e valaaulia tamaiti aoga e tusifaamaumau o latou manatu ma lagona.

• E i ai se tagata, poloka, po o se upega tafailagi o loo o’u mulimuli ai o loo faavaivaia lo’u faatuatua ia Iesu Keriso ma Lana talalelei toefuataiina? Mafaufau i mea ua ou aoaoina ma lagonaina i le aso, o le a se mea e tatau ona ou faia e puipuia lelei ai lo’u faatuatua e faasaga ia i latou o e taumafai e faavaivaia?

• O ai o o’u iloa o loo tauivi ma lona faatuatua ona o faatosinaga a savali po o tagata o e tetee ia Iesu Keriso ma Lana talalelei toefuataiina? Mafaufau i mea ua ou aoaoina ma lagonaina i le aso, o le a se mea e mafai ona ou fai atu ai pe faia e fesoasoani ai i lenei tagata e faamalosi ai lona faatuatua?

• E mafai faapefea e se suesuega atili faamaoni o le Tusi a Mamona ona faateleina lo’u malosi e tetee ai tagata po o savali e taumafai e faavaivai lo’u faatuatua? O le a se mea e mafai ona ou faia e faaleleia atili ai la’u faiga o loo fai nei o le suesueina o le Tusi a Mamona?

• O a nisi o auala fitoitonu e mafai ona ou valaaulia ai le Faaola e fesoasoani ia te a’u i le atinaeina po o le faamalosia o lo’u faatuatua ia te Ia ma Lana talalelei?

Mo Le Isi Taimi

Valaaulia tamaiti aoga e mafaufau po o le a le tofotofoga aupito sili ona faigata mo i latou o le usiusitai i o latou olaga i le taimi nei. Ona faaali atu lea i ai o se ata o le Faaola i Ketesemane, ma valaaulia i latou e suesue i anomea mo sauniuniga mo le lesona o le a sosoo ai faatasi ma le sini o le aoao mai ia Iesu Keriso e uiga i ala e faalagolago ma usitai ai i faatonuga mai le Tama Faalelagi.