Lesona 23 Anomea a le Faiaoga

Usiusitai i Poloaiga a le Atua

O le iunite lenei o le a tuu atu ai i tamaiti aoga le avanoa e mafaufau ai i mea e mafai ona latou faia e faaali ai le faalagolago tele atu i le Alii ao latou feagai ma luitau o le olaga. I le lesona lenei, o le a mafai ai e tamaiti aoga ona faamalamalama le ala na faaalia ai e Iesu Keriso le faalagolago atoatoa i le Tama Faalelagi e ala i le tausia o Ana poloaiga uma. O le a iloa ai foi e tamaiti aoga faamanuiaga o le usiusitai ma mafaufau i mea e mafai ona latou faia e faamalosia atoatoa ai le faataitaiga a Iesu Keriso o le usiusitai.

Fautuaga mo le Aoaoina Atu

E usitai Iesu Keriso i le finagalo o le Tama Faalelagi i mea uma.

Faaali atu ata o Iesu Keriso o loo i ai i le lesona, pe faaali le vitio “Special Witness—Elder Hales” (2:49). I le vitio, o loo talanoaina ai e Elder Robert D. Hales o le Korama a Aposetolo e Toasefululua, le usiusitai atoatoa o le Faaola i le Tama Faalelagi. Ona valaaulia lea o tamaiti aoga e toe iloilo le 2 Nifae 31:6–7, 10; 3 Nifae 11:11; 27:13 ma vaai mo mea e mafai ona tatou aoao ai e uiga i le usiusitai mai le faataitaiga a le Faaola.

• O le a se mea e mafai ona tatou aoao mai e uiga i le usiusitai mai le faataitaiga a Iesu Keriso? (E mafai e tamaiti aoga ona faailoa mai ni upumoni e tali tutusa ma lenei: O le uai atu ma le lotomaualalo i le finagalo o le Tama Faalelagi i mea uma, na faia ai e Iesu Keriso le faataitaiga atoatoa o le usiusitai mo i tatou ia mulimuli ai.)

• Aisea e te manatu ai o le naunau o Iesu Keriso e usitai i le Tama sa taua i le manuia o Lana misiona i le lalolagi? E faapefea ona taua le usiusitai i lou manuia i lenei olaga ma le isi?

• E mafai faapefea e le faataitaiga a le Faaola o le usiusitai ona musuia ma faamalosia ai oe ina ia e uai atili atu i le finagalo o le Tama Faalelagi?

Ina ia fesoasoani i tamaiti aoga ia malamalama lelei i mea e mafai ona latou ausia e ala i lo latou lava usiusitai, atonu e te manao e faasoa atu le saunoaga lenei mai ia Elder Von G. Keetch o le Fitugafulu:

O le usiusitai moni … o le tuuina atu o i tatou lava atoa i le [Tama Faalelagi], ma faatagaina o Ia e faataoto lo tatou ala e le gata i le malū o le tai ae faapea foi pe a sou, ma le malamalama e mafai ona Ia faia i tatou ma tagata e sili atu nai lo le mea e mafai ona tatou faia e i tatou lava. …

… [O poloaiga] ua faailoga ai le ala e tatau ona tatou galulue ai—ma le mea e sili atu ona taua, e faasusulu atu ai poo ai e tatau ona avea ai tatou. (“E Manuia ma Fiafia i Latou o E Tausi i Poloaiga a le Atua,” Liahona, Nov. 2015, 117)

• O le a se mea e mafai ona e faia e mulimuli atoatoa atili ai i le faataitaiga a le Faaola o le usiusitai? (Atonu e aoga le tuu atu i tamaiti aoga o se taimi e mafaufau loloto ai ma tusifaamaumau o latou manatu ma lagona.)

Valaaulia tamaiti aoga e faitau le 1 Nifae 2:20–21, ma mafaufau e faasoa atu le ata faataitai lenei:

Ua le fiafia Maselo i le folafolaga o le Tusi a Mamona e faapea, o le a manuia i latou o e tausia poloaiga a le Alii. Ua ia tausia ma le maelega poloaiga ae o loo utiuti pea ana tupe ma faigata ona totogi ana pili i masina taitasi. Na te le’o lagonaina se faamanuiaina tele.

Valaaulia tamaiti aoga e toe iloilo mea na latou aoaoina i le vaega 2 o anomea mo sauniuniga e mafai ona fesoasoani ia Maselo e faalautele ai lona malamalama e uiga i auala eseese e mafai ona faamanuia ai e le Alii i latou o e tausia Ana poloaiga.

• O le a se mea e mafai ona e faasoa atu ia Maselo e fesoasoani ai ia te ia e faalautele lona malamalama e uiga i auala eseese e mafai ona manuia ai ma ia faamanuiaina ai ao ia tausia poloaiga a le Atua?

Ina ia faaloloto lau talanoaga, atonu e te manao e faaali atu fuaitau nei ma valaaulia tamaiti aoga e filifili se tasi pe lua e suesue i ai: 1 Nifae 3:7; 1 Nifae 17:3; 1 Nifae 20:18; 1 Nifae 22:31; Mosaea 2:41; Alema 12:9–10; Alema 50:22–23; 3 Nifae 14:24–25.

A uma ona filifili e tamaiti aoga a latou mau filifilia, faaali atu le faamatalaga le uma lenei ma fai atu i tamaiti e faasoa mai pe o le a faapefea ona latou faaumaina: Ao ou tausia poloaiga a le Atua, …

Faaleleia o lo Tatou Aoao Atu ma le Aoaoina

Tuu atu lau molimau. Matamata i le vitio “Bearing Testimony” (1:57), ma mafaufau i le matafaioi e faia e le molimau i lau vasega. E maua soo e au tamaiti aoga le avanoa e molimau ai i le ala na aafia ai o latou olaga ona o upumoni o le talalelei a Iesu Keriso? Pe ua latou faalogo ma lagona lau molimau o le talalelei a le Alii? O a nisi mea e mafai ona e faia e uunaia ai se siosiomaga lea e fai ai le faasoaina o molimau o se vaega masani ma natura o le aafiaga o le aoaoina?

• O anafea na e maua ai pe maua ai foi e se tasi e te iloa soo se faamanuiga o loo ta’ua i nei fuaitau e ala i le tausia o poloaiga a le Atua? (Atonu e te uunaia tamaiti aoga e faasoa mai mea na latou aoaoina ao latou talanoaina lenei fesili ma se uo po o se tagata o le aiga i sauniuniga mo le vasega.)

Ua usitai a’ia’i le autau talavou.

Atonu e te manao e faaali atu le ata o loo i le lesona ma valaaulia se tamaitiiti aoga e toe faamatala le tala i autau talavou (tagai i le vaega 3 o anomea mo sauniuniga).

Valaaulia tamaiti aoga e toe iloilo le Alema 57:21, 27; 58:40 ma vaai mo mea o loo aoao mai e nei fuaitau e uiga i le usiusitai. Mafaufau po o le fea o fesili nei e mafai ona e fesiligia e fesoasoani ai i au tamaiti aoga ia iloa mea e tatau ona latou aoao mai mai le faataitaiga a le autau talavou.

• O le a se mea e mafai ona tatou aoaoina e uiga i le usiusitai mai le autau talavou? (E ono faailoa mai e tamaiti aoga se upumoni e tutusa ma lenei: Ao tatou taumafai e usitai a’ia’i i poloaiga a le Atua ma faaauau pea ona tuu atu lo tatou faatuatuaga ia te Ia, o le a Ia faamanuia ia i tatou.)

• O le a sou manatu o le a le uiga o le taumafai mo le usiusitai a’ia’i? E faapefea ona ese le usiusitai a’ia’i mai le usiusitai masani? (Atonu e te manao e toe iloilo le saunoaga mai ia Peresitene Russell M. Nelson i le vaega 3 o anomea mo sauniuniga. E faavae i le tou talanoaga, atonu foi e te mafaufau e faasoa atu le saunoaga lenei mai ia Peresitene Nelson: “O le usiusitai e aumai ai manuia; ae o le usiusitai a’ia’i e aumai ai vavega” [i le R. Scott Lloyd, “Elder Nelson Delivers Spiritual Thanksgiving Feast to MTCs,” Church News, Tes. 4, 2013, ChurchofJesusChrist.org].)

• O le a se aoaoga po o se poloaiga e tatau ona e taulimaina ma le atoatoa sili atu? (Valaaulia tamaiti aoga e mafaufau loloto filemu i le fesili lenei ma mafaufau e tusi se fuafuaga mo mea e mafai ona latou faia ia ausia ai lenei suiga.)

• Aisea e taua ai le faalagolago i le mana gafatia o le Togiola a le Faaola ao tatou taumafai e usitai a’ia’i i poloaiga a le Atua? (Atonu e aoga le toe iloilo o le faamatalaga lona lua mai ia Elder David A. Bednar i le vaega 3 o anomea mo sauniuniga.) O le a se taimi na e lagonaina ai le mana gafatia o le Faaola o fesoasoani ia te oe ina ia e usitai atili i poloaiga a le Atua?

Ina ia fesoasoani i tamaiti aoga e iloilo mea na latou aoaoina e uiga i le usiusitai, mafaufau e talanoa i le ata faataitai lenei:

O Maria ma Falaniko e le’i leva ona faamau ma ua faatulaga se aso e faaipoipo ai. O lenei la ua la faia se tautinoga e faaipoipo, ua faateteleina ai lo la le ano i le tausiga o le tulafono o le ola mama. Ua la lagona le tauamiotonuina i le “faapipioina o tulafono” ona ua laua alolofa i le tasi ma le isi ma ua faia le tautinoga ina ia faaipoipoina.

• E faavae i mea ua e aoaoina e uiga i le usiusitai i poloaiga a le Atua, o le a se fautuaga o le a e avatua ia Maria ma Falaniko?

• O le a faapefea ona faamanuia, taiala, ma puipuia e le usiusitai a’ia’i ia Maria ma Falaniko a o la sauniuni mo le la faaipoipoga o loo loma?

Mo Le Isi Taimi

Ia faailoa atu, i le taimi o le isi vasega e sosoo ai, o le a tatou aoao ai e uiga i le nofopologa o le nuu o Limae ma le nuu o Alema. Faamalosiau i tamaiti aoga e faamaea anomea mo sauniuniga mo le vasega o le a sosoo ai ma vaavaai i le ala na laveaiina ai nei nuu i le na’o le tuu o lo latou faalagolago atoa i le Alii.