Lesona 28 Anomea a le Faiaoga

O Mai ia Keriso

A o le’i faai’uina ana faamaumauga, na valaaulia ai e le perofeta o Moronae le au faitau ia “o mai ia Keriso, ma ia faa’ato’atoaina ia te ia” (Moronae 10:32). I le lesona lenei, o le a maua ai e tamaiti a’oga le avanoa e faamatala ai le pogai e taua ai ona atiina’e o latou olaga i le faavae o Iesu Keriso ma ia mafaufau i mea e mafai ona latou faia ia o mai atoatoa ai ia te Ia. O le a latou maua foi le avanoa e faasoa atu ai pe ua faapefea ona fesoasoani a latou suesuega o le Tusi a Mamona i le kosi lenei ia i latou ia o mai ia Iesu Keriso.

Fautuaga mo le Aoao Atu

Faaleleia o Lo Tatou Aoao Atu ma le Aoaoina

Faamalosi’au i tamaiti a’oga ia faaauau pea ona auai i le inisitituti. I se faigalotu i le lalolagi atoa mo talavou matutua, na saunoa ai Elder D. Todd Christofferson, “Ou te fiafia i le inisitituti. Ou te faamoemoe o outou uma e maua le avanoa e le gata ua lesitala, ae o loo auai ma le malosi i le Inisitituti. O se tasi lea o mea silisili tatou te faia i le Ekalesia” (“Choice and Commitment” [Jan. 12, 2020], broadcasts.ChurchofJesusChrist.org). Faamalosi’au i tamaiti a’oga ia faamae’a tulaga manaomia mo le kosi lenei ma ia faaauau atu e auai i le inisitituti.

Ua aoao e Helamana ona atalii ia atiina’e i luga o le faavae o Iesu Keriso.

Matamata i le vitio “Spiritual Whirlwinds” (se’ia oo i le taimi 1:25), pe faaali atu ma faitau le saunoaga lenei a Elder Neil L. Andersen. Valaaulia tamaiti a’oga e mafaufau i auala e faatatau ai aoaoga a Elder Andersen i o latou lava tulaga uiga ese.

Elder Neil L. Andersen

Au uo talavou, o le a le avea le lalolagi ma se nofoaga to’afimalie a o tatou tulalata atu i le Afio Mai Faalua o le Faaola. Ua folafola mai e tusitusiga paia e faapea “o le a vāvāō mea uma” [Mataupu Faavae ma Feagaiga 88:91]. …

E sili atu le faapopoleina nai lo o mafuie ma taua ua valoiaina [tagai Dallin H. Oaks, “Sauniuniga mo le Afio Mai Faalua,” Ensign po o le Liahona, Me 2004, 7–10] ia asiosio faaleagaga ia e mafai ona se’ia ma le a’a oe mai ou faavae faaleagaga ma tuu ai lou agaga i nofoaga e te le’i mafaufauina e mafai ona oo i ai, o nisi taimi e te tau le iloaina ua siita’i ai oe.

O asiosio sili ona leaga o faaosoosoga ia a le fili. E avea pea le agasala ma se vaega o le lalolagi, ae e lei matua faigofie lava ona oo i ai, faigofie tele ona faamalieina, ma ua matua taliaina lava. (“OAsiosio Faaleagaga,” Ensign po o le Liahona, Me 2014, 18)

• O a nisi o asiosio faaleagaga o feagai ma le autalavou matutua i aso nei? (Atonu e te manao e lisi tali a tamaiti aoga i luga o le laupapa.)

• E mafai faapefea ona e saunia lelei mo asiosio faaleagaga o le a tou fetaiai? (Atonu e te manao e ta’u atu e faapea, na fesiligia e Elder Andersen se fesili faapena i lana lauga ona ia sii mai lea o le Helamana 5:12.)

Faitau faatasi le Helamana 5:12 , ma valaaulia tamaiti aoga e faailoa mai se mataupu faavae e mafai ona fesoasoani ia i latou e tetee atu ai i o latou asiosio faaleagaga. (O le faaaoga ai o tali a tamaiti aoga, atonu e te manao e tusi se mataupu faavae e pei o lenei i luga o le laupapa: Afai tatou te atiina ae o tatou faavae i luga o Iesu Keriso, o le a le i ai ia Satani se mana e faaumatia ai i tatou.)

• E ono faapefea ona aafia tagata o e ua atinae o latou olaga i mea e faatauaina po o manatu o le lalolagi i asiosio faaleagaga?

• O le a le mea ua avea ai Iesu Keriso ma faavae mautinoa e tasi lea e tatau ona atinae ai i o tatou olaga? (Atonu e te manao e valaaulia tamaiti aoga e toe faamanatu le faamatalaga a Sister Sheri L. Dew i le vaega 1 o le anomea mo sauniuniga.)

• O a ni mea e ono taofia i tatou mai le atinaeina po o le faatumauina o o tatou faavae i luga o Iesu Keriso? E mafai faapefea ona tatou faatoilaloina nei luitau?

Valaaulia tamaiti aoga e faasoa mai ni faatinoga patino ua latou faia e atinae ai o latou olaga i luga o Iesu Keriso. (Atonu e te manao e lisi a latou tali i luga o le laupapa.) A uma ona faasoa e tamaiti o latou aafiaga, tuu atu ia i latou se taimi e tusifaamaumau ai se faatinoga e mafai ona latou faia ia atili atinae atoatoa ai o latou olaga i luga o le Alii.

Na faaiu e Moronae le Tusi a Mamona i le valaaulia o tagata uma e o mai ia Iesu Keriso.

Mafaufau e faaali atu le vitio “Come unto Christ” (3:54), lea o loo faasoa mai ai e Elder Richard G. Scott o le Korama a Aposetolo e Toasefululua ni auala na suia ai nisi o tagata i Polivia a o latou o mai ia Iesu Keriso. Nai lo o lena, atonu e te faasoa atu se aafiaga e ese e uiga i le ala na suia ai le olaga o se tagata a o ia filifili e sau ia Keriso. Valaaulia tamaiti aoga e talatalanoa i mea e mafai ona latou aoao mai le aafiaga.

Faitau faatasi le Moronae 10:32–33 , ma valaaulia tamaiti aoga e talanoa pe aisea ua talafeagai ai lenei valaaulia mo le mataupu mulimuli o le Tusi a Mamona. Fesoasoani i tamaiti aoga e faailoa mai nei fuaiupu se mataupu faavae e tutusa ma lenei: A o tatou o mai ia Iesu Keriso, e mafai ona faamamaina ma faaatoatoaina i tatou e ala i Lona alofa tunoa.

• O le a faapefea ona e faamalamalama atu le uiga o le “o mai ia Keriso” i se tagata faatoa faalogo i lenei valaaulia mo le taimi muamua? (Atonu e aoga le fesili i tamaiti aoga e toe faamanatu le saunoaga a Elder D. Todd Christofferson i le vaega 2 o le anomea mo sauniuniga.)

• O le a le uiga o le “faafiti [tatou] lava mai mea uma e le faaleatua”? (Moronae 10:32).

• Aisea tatou te manaomia ai le alofa tunoa o Iesu Keriso ina ia faaatoatoaina ai? O le a se mea e mafai ona tatou faia e valaaulia ai le mana gafatia, po o le alofa tunoa o le Alii i o tatou olaga? (Faamalosiau i tamaiti aoga e toe faamanatu le saunoaga a Peresitene Tad R. Callister i le vaega 2 o le anomea mo sauniuniga.)

Faamalosiau i ni nai tamaiti aoga e faasoa mai ni auala na fesoasoani ai le alofa tunoa o le Alii ia i latou ia o mai ia Iesu Keriso.

Faitau faatasi le valaaulia a Moronae i le Eteru 12:41 , ma faamanatu i tamaiti aoga na valaaulia i latou e mafaufau loloto i auala na latou tali atu ai i lenei valaaulia. Valaaulia tamaiti aoga e susue i le vaega 3 o anomea mo sauniunga ma toe faamanatu filifiliga e tolu o loo i lalo o le ulutala “Tusifaamaumau Ou Manatu.” Tuu atu i tamaiti aoga le taimi e toe faamanatu ai mea na latou tusiaina, po o le, afai e lei i ai so latou taimi e sauniuni ai, faamalosiau ia i latou e filifili se tasi o filifiliga ma ia saunia ni manatu e faasoa mai.

A ua lava loa le taimi, valaaulia tamaiti aoga e faasoa mai mea ua latou tusia. (Afai e toatele lau vasega, atonu e te manao e vaevae tamaiti aoga i ni vaega ina ia tofu maua e tagata uma se avanoa e faasoa mai ai.)

A o e faaiuina lenei lesona ma le kosi, mafaufau e molimau atu i le ala ua fesoasoani ai le Tusi a Mamona ia te oe e te sau ia Keriso. Faamalosiau i tamaiti aoga ia faaauau pea ona o mai ia Keriso e ala i le suesue i aso uma i le Tusi a Mamona.