Lesona 26 Anomea a le Faiaoga

Se’ia Uma ona Tofotofoina o lo Outou Faatuatua

O loo faamaumau i le Tusi a Mamona le tele o faataitaiga o tagata o e na faaalia le faatuatua ia Iesu Keriso i taimi o tofotofoga ma maua ai ni molimau na faamautuina ai o latou faatuatua. O le lesona lenei o le a tuu atu ai i tamaiti a’oga le avanoa e faamalamalama ai le mafuaaga e muamua ai ona faaali le faatuatua ia Iesu Keriso ona maua lea o se molimau faaleagaga ma ia iloa ai auala e mafai ona faaalia le faatuatua malosi atu ia te Ia i taimi tatou te feagai ai ma tofotofoga. O le a mafaufau foi tamaiti a’oga po o a ni faatinoga e uuna’ia ai le faatuatua e mafai ona latou faia ia maua ai pe faaloloto ai o latou molimau o le Tusi a Mamona.

Fautuaga mo le Aoao Atu

Faaleleia o Lo Tatou Aoao Atu ma le Aoaoina

Faasoa atu tala ma faamatalaga moni. Ina ia faateleina le fiafia o tamaiti a’oga e aoao, mafaufau e faasoa atu tala po o faamatalaga moni mai soifuaga o perofeta, talafaasolopito o le Ekalesia, lauga o konafesi aoao, mekasini a le Ekalesia, po o lou lava olaga pe valaaulia tamaiti a’oga e faasoa mai o latou aafiaga. O tala faapena e mafai ona faaalia ai mataupu faavae o le talalelei ma fesoasoani ai i tamaiti a’oga ia lagona lo latou moni ma le taua.

Ua aoao mai e Moronae le taua o le faatino o le faatuatua.

Faaali atu le tala lenei mai ia Elder D. Todd Christofferson (atonu e te manao e ta’u atu i tamaiti a’oga e faitau i le aafiaga lenei i le vaega 1 o anomea mo sauniuniga):

O se taimi a o lei valaauina a’u e avea ma se Pulega Aoao, na ou feagai ai ma se lu’itau patino faaletamaoaiga na faifai pea mo ni nai tausaga. E i ai taimi na faamata’uina ai e lenei lu’itau le manuia o lo’u aiga, ma a’u, ma sa ou manatu matou te ono feagai ma se mala tautupe. Sa ou tatalo mo se faalavefau faavavega e lavea’i ai i matou. E ui ina sa ou faia lena tatalo i le tele o taimi ma le faamaoni tele ma le mana’o faatauanau, o le tali i le iuga o le “Leai.” (“Look to God Each Day,” New Era, Apr. 2015, 3–4)

• O a ni auala e mafai ai e se aafiaga faapenei ona lu’iina ai le faatuatua o se tagata ia Iesu Keriso?

• O a ni isi faataitaiga moni o le olaga o auala e mafai ona tofotofoina pe su’eina ai faatuatua o tagata?

Valaaulia tamaiti aoga e toe faamanatu aoaoga a Moronae e faatatau i le faatuatua o loo i le Eteru 12:3–7, 12, 18, ona fai atu lea o fesili nei:

• O a ni mea e mafai ona tatou aoao mai ia Eteru ma Moronae e uiga i le faaaoga o le faatuatua? (Faatasi ai ma isi upumoni, e mafai ona faailoa mai e tamaiti aoga se mea e pei o lenei: E leai se molimau faaleagaga tatou te maua seia uma ona tofotofoina o tatou faatuatua.)

• Aisea e te manatu ai, ua faamoemoe ia tatou faatinoina muamua le faatuatua ona faatoa tatou maua lea o se molimau faaleagaga mai le Atua?

• O a ni auala ua faamanuiaina ai i tatou ao tatou tumau faamaoni ia Iesu Keriso i le taimi o o tatou tofotofoga? (Atonu e te manao e toe faamanatu le saunoaga a Elder Christofferson i le vaega 1 o le anomea mo sauniuniga.)

Valaaulia tagata aoga e mafaufau i faataitaiga i le Tusi a Mamona o tagata o e na faaalia le faatuatua ia Iesu Keriso i taimi na feagai ai ma tofotofoga po o mea faafeagai. Afai e manaomia, tuu atu i ai ni nai minute e suesue ai tala e uiga i tagata na latou mafaufau i ai. (O tamaiti aoga o e ua faamaeaina le gaoioiga e suesue ai i le vaega 2 o anoea mo suesuega e mafai ona toe faamanatu mea ua uma ona latou suesueina.)

A lava loa le taimi, vaevae le vasega i ni vaega toalaiti e talanoa ai fesili nei (faamanatu i tamaiti aoga na latou taliina ni fesili i le vaega 2 o anomea mo sauniuniga):

1. Na faapefea ona faaali e le tagata po o tagata le faatuatua ia Iesu Keriso? O a faamanuiaga ma le mana faalelagi na tuuina mai e le Alii ina ua uma ona latou faaalia le faatuatua ia te Ia? (Atonu e fesoasoani le faailoa atu o nisi o faamanuiaga e le mafai ona oo mai seia oo i le olaga a sau.)

2. O a ni mataupu faavae po o ni faiga masani e mafai ona e aoao mai i lenei tala? E mafai faapefea ona e faaaogaina i lou olaga?

Atonu foi e te valaaulia tamaiti aoga e mafaufau loloto i mataupu faavae na latou talanoaina ma tusifaamaumau o latou manatu ma uunaiga patino e uiga i ai.

O loo valaaulia e Moronae le au faitau e saili se molimau o le Tusi a Mamona.

Faaali atu le tulaga faataitai lenei:

Vaai faalemafaufau e faapea, na faatoa uma lava ona e tuuina atu i se uo lelei lava se kopi o le Tusi a Mamona ma molimau atu i ai i lona moni. O le tali mai na fai mai ai lau uo, “Faafetai lava mo le faasoa mai o lenei mea ia te au. E tele ni manatu eseese na ou faalogo i ai e uiga i le Tusi a Mamona. Sa faapea foi ona lapataiina au e se tagata e aua nei ou faitau i ai, ona e tumu i pepelo.

• Mata e faapefea ona e tali atu i lagona le mautinoa a lau uo e uiga i le Tusi a Mamona?

• E mafai faapefea ona e faaaogaina aoaoga o loo i le Eteru 12:6 i lenei tulaga?

Valaaulia se tamaitiiti aoga e faitau leotele le Moronae 10:3–5 . Fai atu i le vasega e mulimuli i le faitauga, ma vaavaai pe mafai faapefea ona tatou maua se molimau o le Tusi a Mamona.

• O a mea e tatau ona tatou faia pe a tatou mananao e maua se molimau o le Tusi a Mamona? (E mafai ona faailoa mai e tamaiti aoga le mataupu faavae lenei po o se mataupu faavae e talitutusa ma lenei: Ina ia maua se molimau o le Tusi a Mamona, e tatau ona tatou manatua ma mafaufau loloto i le alofa mutimutivale o le Alii ao tatou faitaua le tusi ona ole atu lea i le Atua pe ua moni faatasi ma le faamaoni, ma le manatu tonu i ai, ma le faatuatua ia Iesu Keriso.)

• O a ni auala e faaalia ai i le taliaina o le valaaulia a Moronae ia mea ua tatou aoaoina e uiga i le faatino i le faatuatua? (Atonu e fesoasoani le toe iloilo o le faamatalaga a Elder Gene R. Cook i le vaega 3 o anomea mo sauniuniga

Faamanatu atu i tamaiti aoga e faapea, i le vaega 3 o anomea mo sauniuniga sa valaaulia i latou e manatunatu ma tusifaamaumau o latou aafiaga i le mauaina o se molimau faaleagaga e faapea, e moni le Tusi a Mamona. Valaaulia ni nai tamaiti aoga e faasoa mai ni mea na latou oo i ai ma aoaoina i le sailia ma le mauaina o se molimau faaleagaga e uiga i le Tusi a Mamona.

Mafaufau e faasoa atu le faamatalaga lenei e uiga i le folafolaga a Moronae mai ia Peresitene Henry B. Eyring o le Au Peresitene Sili:

Ou te faamoemoe ua outou faamaonia uma lena folafolaga mo oe lava ia, pe o le a e faia foi i se taimi lata mai. Atonu o le a le oo mai le tali i se aafiaga se tasi ma le mamana faaleagaga. Ia te au lava ia na oo filemu mai muamua. Ae o taimi taitasi ou te faitau ai ma tatalo e uiga i le Tusi a Mamona, ua atili ai ona oo mai ma le malosi naua.

Ou te le faalagolago i le mea na tupu i aso ua mavae. Ina ia tausi maluina la’u molimau ola o le Tusi a Mamona, e tele ina ou tāpā le folafolaga a Moronae. Ou te le faataigamalieina lena faamanuiaga o se molimau faapea o se aia tatau e tumau. (“O Se Molimau Ola,” Liahona, Me 2011, 127)

• O le a se mea o loo e faia, pe o le a se mea e mafai ona e faia, e faamalosia ai lau molimau o le Tusi a Mamona?

Mo Le Isi Taimi

Valaaulia tamaiti aoga e mafaufau pe mata o le a faapeī o latou olaga pe ana faapea e leai ni o latou faatuatua, faamoemoe, po o le alofa mama. A o latou sauni mo le vasega e sosoo ai, valaaulia i latou e mafaufau loloto i mea e mafai ona latou faia e faaaofia atoa ai nei uiga auaumama faaKeriso i o latou olaga.