Lesona 19 Anomea a le Faiaoga

Ola Amiotonu i Aso o le Amioleaga

Sa saunoa Peresitene Russell M. Nelson, “O loo faamanino uma e le Tusi a Mamona aoaoga a le Matai ma faailoa atu ai togafiti a le fili” (“O Le Tusi a Mamona: Faamata e Faape’ī Lou Olaga e Aunoa Ma Ia?” Ensign po o le Liahona, Nov. 2017, 62; tagai foi 2 Nifae 26–33). O leIunite 6 o le a fesoasoani i tamaiti aoga e iloa lelei ai togafiti a le fili ma iloilo ai mea e mafai ona latou faia e faamalolosi ai i latou lava e faasaga i ana faamoemoega amioleaga. I le lesona lenei, o le a faailoa ai e tamaiti aoga mea e mafai ona latou faia ia tumau malolosi ai pe a latou fetaiai ma sauaga ma mea e mafai ona latou faia e ola amiotonu ai i se lalolagi ua tumu i le amioleaga.

Fautuaga mo le Aoaoina Atu

Faaleleia o lo Tatou Aoao Atu ma le Aoaoina

Faaaoga ata faataitai moni. A vaai tamaiti aoga i le sootaga i le va o o latou lava olaga ma mea o loo latou suesueina i tusitusiga paia, e sili atu ona saunia i latou e talisapaia le talafeagai o le upu a le Atua ma iloa ai le ala e mafai ona taitai atu ai i amioga faamanuiaina ma amiotonu. O ata faataitai e tuuina atu ai tulaga moni o le olaga ma tautalagia ai fesili, atugaluga, ma luitau moni e fetaiai ma tamaiti aoga e mafai ona fesoasoani ia i latou e faafesootai o latou olaga i le aoaoga faavae ma mataupu faavae o loo maua i le upu a le Atua. O ata faataitai moni e mafai foi ona fesoasoani i tamaiti aoga ia iloa ai mo i latou lava o nisi taimi e faigata ai le olaga ma e le o taimi uma e faigofie ai ona maua ia tali.

E faamalosia soo amiotonu o Iesu Kerso i le lotolotoi o sauaga.

Ina ia amata le vasega, mafaufau e faasoa atu le ata faataitai lenei po o se isi ata faataitai talafeagai e te mafaufau i ai.

O Akari o se tagata fou na faatoa papatisoina o le Ekalesia. Na faatō o ia e ona matua ina ua papatiso o ia. I le taimi muamua, sa faauo tagata uma o lana uarota. Ae peitai, talu ai nei na lafo atu ai e nisi o tagata o le au paia ni upu faalealofa e uiga i le olaga ua tuanai o Akari, ma faapea foi ona ulagiaina o ia ona o lona naunau e ola i le talalelei. E manao o ia e avea o se tagata faamaoni o le Ekalesia ae ua lagona lava le matuai lotovaivai.

• Aisea atonu e matuai luitauina ai mo Akari le sauaina e uso a tagata o le Ekalesia?

• A faapea e liliu atu Akari ia te oe mo se fesoasoani, o le a sau tala e fai atu ia te ia po o se mea e te faia?

Faamanatu i tamaiti aoga e faapea, i le Helamana 3:24–34 tatou te faitau ai e faitau fia sefulu afe o tagata na auai i le Ekalesia ma sa matuai tele le faamanuiaina o le nuu. Ae peitai, mulimuli ane, na sosolo atu le faamaualuga i totonu o loto o nisi o tagata o le Ekalesia, o e sa amata ona sauaina i latou o e sa tumau i le lotomaualalo ma le faamaoni.

Valaaulia tamaiti aoga e toe iloilo le Helamana 3:33–35 ma vaavaai mo le mea na fesoasoani i tagata lotomaualalalo o le Ekalesia e tutu malosi ai ao feagai ai ma sauaga. Mafaufau po o le fea o fesili nei e te ono fesiligia ia sili ona uunaia ai le aoaoina mo au tamaiti aoga:

• O a ni aoaoga o loo i nei fuaiupu e mafai ona fesoasoani ia Akari po o se isi e i ai i se tulaga faapenei? (Atonu e te lisiina nisi o upumoni e maua e tamaiti aoga, e pei o lenei: Pe a tatou anapogi, tatalo, ma uai atu o tatou loto i le Atua, o le a tupu malosi lo tatou lotomaualalo ma le faatuatua ia Iesu Keriso, ma o le a faapaiaina o tatou loto—e tusa lava po o a amioga faatiga a isi.)

• O a ni auala na aafia ai lou faatuatua ia Iesu Keriso ona o le anapogi, tatalo, ma le uai atu o lou loto i le Atua? (tagai Helamana 3:35). Na faapefea ona fesoasoani nei faatinoga amiotonu ia te oe ao e fetaiai ma amioga faatiga a isi?

Mafaufau e faaali atu fesili nei ma tuu atu i tamaiti aoga ni taimi patino e iloilo ai se tasi pe sili atu o ia fesili, ma fai se fuafuaga mo le auala o le a latou tali atu ai i soo se uunaiga latou te maua:

• O faapefea mai oe i le taliaina ma le faaaumeaina o isi i le Ekalesia a Iesu Keriso?

• O faapefea mai oe i le uai atu o lou loto i le Atua?

• E ono mafai faapefea ona e faateleina lou faatuatua ia Iesu Keriso, e ui lava i ni amioga faatiga a isi?

Faasoa atu lau molimau pe valaaulia se tamaitiiti aoga e molimau e uiga i le mana e oo mai a o tatou galulue i le faatuatua ma uai atu o tatou loto i le Atua.

Ao faateteleina le amioleaga o sa Nifae, sa tumau lava le faamaoni o Mamona ma Moronae i le Alii.

Valaaulia tamaiti aoga e faasoa mai ni faataitaiga o ni tala fou, tu faaleaganuu, ma autu o talanoaga i luga o ala o faasalalauga faaagafesootai e mafai ona luitauina ai le ola i le talalelei i o tatou aso.

• O a ni tulaga na luitauina ai le ola i le talalelei i aso o Mamona ma lona atalii o Moronae? (Afai e manaomia, valaaulia tamaiti aoga e toe iloilo le vaega 2 o anomea mo sauniuniga pe vaai faavavevave i ulutala o mataupu o le Mamona 1–6 ma le Moronae 9.)

• O le a se mea e te vaai faalemafaufau i ai pe na faapeī le ola ai i le taimi o Mamona ma Moronae?

Valaaulia tamaiti aoga e toe iloilo le Mamona 1:1–2, 15 ma le Moronae 9:25–26, ma vaavaai mo ni mafuaaga na mafai ai e Mamona ma Moronae ona tumau faamaoni i le Alii a o la fetaiai ma se nuu sa tifato i le amioleaga.

• O le a le mataupu faavae e mafai ona tatou aoao mai nei fuaiupu e uiga i le ala e tumau faamaoni ai i le Alii i taimi o le amioleaga? (Fesoasoani i tamaiti aoga e faailoa se mataupu faavae e tutusa ma lenei: E mafai ona tatou faatoilaloina le amioleaga o lenei lalolagi a o tatou iloa le agalelei o Iesu Keriso ma tumau faamaoni ia te Ia.)

• O le a sou manatu i le uiga o le iloa o le agalelei o Iesu Keriso?

• E mafai faapefea e le vaai atu ia Iesu Keriso ma le iloa o Lona agalelei ona fesoasoani tatou te tumau ai i le amiotonu pe a siomia i tatou e le amioleaga? (Atonu e te manao e valaaulia tamaiti aoga e toe iloilo saunoaga a Peresitene Joy D. Jones ma Elder Neil L. Andersen i le vaega 2 o anomea mo sauniuniga.)

• Na faapefea ona fesoasoani lau molimau i le agalelei o Iesu Keriso ma lou faatuatua ia te Ia e fai ai filifiliga amiotonu ao e faafetauia le amioleaga?

Faamanatu i tamati aoga e faapea, i le vaega 2 o anomea mo sauniuniga, sa valaaulia ai i latou e faailoa mai se tagata po o se vaega o tagata i le Tusi a Mamona po o se tasi latou te iloa lelei o le sa fetaiai ma le amioleaga ae sa tumau faamaoni. (Afai e talafeagai, tuu atu i tamaiti aoga se taimi e toe iloilo ai mea na latou tusia.) E fuafua i le toatele o lau vasega, filifili se auala e tali atu ai lea o le a tuu atu ai i tamaiti aoga taitasi le avanoa e faasoa mai ai lana faataitaiga.

Faaali atu le fesili lenei:

• E faavae i mea ua e aoaoina ma lagonaina i le aso, o le a se mea o le a e faia e faateleina ai lou gafatia e tu malosi atu i lau tautinoga i le Alii a o e fetaiai ma le amioleaga o le lalolagi? (Faamalosiau i tamaiti aoga e tusifaamaumau soo se uunaiga latou te maua mai le Agaga Paia ma galue loa i ai.)

Mo Le Isi Taimi

Faasoa atu le upusii lenei mai le Perofeta o Iosefa Samita: “O le alofa o le saolotoga lea e musuia lo’u agaga—o saolotoga faaletagata ma le faalelotu o tagata uma lava” (Aoaoga a Peresitene o le Ekalesia: Iosefa Samita [2007],345). Ao suesue e tamaiti aoga anomea mo sauniuniga mo le isi vasega e sosoo ai, valaaulia i latou e mafaufau loloto po o le a le uiga ia i latou o le saoloto o tapuaiga ma ia o mai saunia e talanoa po o a ni mea e mafai ona latou faia e faalauiloa ai pe faasao ai lena saolotoga.