Lesona 3 Anomea a le Faiaoga

O Le Miti a Liae i le Laau o le Ola

O le miti a Liae i le laau o le ola e fesoasoani tatou te iloa ai le ala e iloa ai le alofa o le Atua ma olioli ai i faamanuiaga o le Togiola a le Faaola. I le lesona lenei, o le a faailoa mai ai e tagata aoga mea e mafai ona fesoasoani pe faalavefau foi i a latou taumafaiga e o mai ia Keriso. O le a latou maua se avanoa e iloilo mea e mafai ona latou faia e avea ai le afioga a le Atua o se faamuamua maualuga i o latou olaga.

Fautuaga mo le Aoaoina Atu

Faaleleia o lo Tatou Aoao Atu ma le Aoaoina

Saili ina ia avea ma se tagata aoao e taulai atu [i le aoaoga]. Sa ta’ua e Peresitene Dallin H. Oaks, “O se faiaoga o le talalelei, e pei o le Matai o loo tatou auauna i ai, o le a matua ua’i atu atoatoa ia i latou o loo aoaoina.” (“Gospel Teaching,” Ensign, Nov. 1999, 79). A o e taumafai e avea o se tagata aoao e taulai atu [i le aoaoga], ia fesili ifo ia te oe lava i fesili nei: O le a se mea e mafai ona ou faia ia ou malamalama lelei ai i siosiomaga, aafiaga, luitau, ma manaoga o a’u tagata aoga? E mafai faapefea ona ou fesoasoani ia i latou ia tuputupu ae i mea ua uma ona latou iloa? E mafai faapefea ona ou fesoasoani ia i latou ia avea ma ni tagata aoao mataalia ma ia saofagā i le aoaoina o isi? O le a se mea e mafai ona ou faia e valaaulia ai i latou e faalatalata atili mai i le Faaola?

Ua maua e Liae se faaaliga vaaia e uiga i le laau o le ola

Faaali atu le ata o loo i ai i le [lesona] o le faaaliga a Liae i le laau o le ola, ma fai atu i tagata aoga e faasoa puupuu mai ni mea latou te iloa e uiga i le faaaliga vaaia. Atonu e te fai atu i se tagata aoga e aotele faapuupuu mai le tala i le miti a Liae.

Valaaulia tagata aoga e toevaavaai i le 1 Nifae 8:10–12 ma le 1 Nifae 11:21–22, ua faasinoina i anomea mo sauniuniga, ma vaai pe na faapefea ona faamatala e Liae ma Nifae le laau ma ona fua.

E faavae i malamalamaaga o tagata aoga e uiga i le miti a Liae, atonu e te fai atua nisi o fesili nei:

• O le a le mea e faatusa i ai le laau ma ona fua? (Tagai vaega 1 o anomea mo sauniuniga.)

• O le a se mea ua aoao mai ia i tatou e le faamatalaga e Liae o le laau ma ona fua, e uiga i le alofa o le Atua ma le Togiola a le Faaola?

• O a ni mea ua aoao mai e nei fuaiupu ia i tatou e uiga i le mauaina o le olioli? (Atonu e faailoa mai e tagata aoga se upumoni e talitutusa ma lenei: O le o mai ia Keriso ma tofo i faamanuiaga o Lana Togiola e aumai ai ia i tatou le olioli.)

• O a ni auala ua “sili atu ona manaomia nai lo isi fua uma” ia faamanuiaga o le Togiola a le Faaola? (1 Nifae 8:12; 11:22).

Faaali atu le saunoaga lenei a Peresitene Russell M. Nelson.

O o’u uso e ma tuafafine pele, o le olioli o tatou lagonaina e itiiti lava se mea e faatatau i tulaga o tatou olaga ao mea uma o loo faatatau i le taulaiga o o tatou olaga.

Afai [tatou] te taulai atu … [ia] Iesu Keriso ma Lana talalelei, e mafai ona tatou lagona le olioli e tusa lava po o a mea o tutupu—pe le o tutupu foi—i o tatou olaga. O le olioli e sau mai [ia te Ia] ma ona o Ia. … O Iesu Keriso o le olioli! (“O Le Olioli ma le Ola Ai Faaleagaga,” Liahona, Nov. 2016, 82)

• O le a se mea o le a e faia e avea ai Iesu Keriso o se taulaiga sili atu i lou olaga ina ia mafai ona e maua le olioli sili atu? (Tuu atu i tagata aoga se taimi e mafaufau loloto ma tusifaamaumau ai o latou lagona uunai.)

Na aoao e Liae ma Nifae o le afioga a le Atua e tau atu ai i le Faaola ma Lana Togiola.

Vaevae le vasega i ni vaega toalaiti, ma tuu atu i tagata aoga taitoatasi le pepa e tufa atu lenei.

Mea e Faalavefau i le Mauaina o le Fua o le Laau o le Ola

Anomea a le Faiaoga o Aoaoga ma Aoaoga Faavae o le Tusi a Mamona—Lesona 3

Faitau o se vaega le parakalafa lenei: I le faaaliga vaaia a Liae o le laau o le ola, o le vai eleelea, “puao o le pogisa” (1 Nifae 12:17), ma le “fale tele ma le ateatea” (1 Nifae 8:26) sa atili faigata ai i tagata ona taunuu pe tumau i le laau ma aai i ona fua. I le anomea mo sauniuniga a le vasega, atonu na e faailoaina ai nisi o faataitaiga i onaponei o nei lamatiaga po o mea faalavefau e taofia ai tagata mai le Faaola. Faatasi ai ma tagata o lau vaega, ia talanoa i auala e aafia ai le autalavou matutua i tulaga nei:

Eleelea po o le agasala (vaitafe eleelea: 1 Nifae 8:13; 12:16; 15:27)

Taufaasese ma faaosoosoga (“puao o le pogisa”: 1 Nifae 8:23; 12:17)

Faamaualuga ma tauemuga a le lalolagi (o le “fale tele ma le ateatea”: 1 Nifae 8:25–28; 12:18)

Talanoa: O a ni auala e mafai e faataitaiga na outou talanoaina ona taofia se talavou matua mai le sau ia Iesu Keriso ma olioli i faamanuiaga o Lana Togiola? Na faapefea ona e taumafai e faatoilalo nei mea faalavefau i lou lava olaga?

© 2021 Puletaofia e le Intellectual Reserve, Inc. Ua taofia aia tatau uma.

Mea e Faalavefau i le Mauaina o le Fua o le Laau o le Ola

A uma se taimi talafeagai, ona valaaulia lea o ni tagata aoga e faasoa mai i le vasega mea na latou talanoaina i a latou vaega.

Valaaulia tagata aoga e toe faamanatu mea na latou aoaoina e uiga i vaega e toafa o tagata na vaai i ai Liae i lana faaaliga vaaia (tagai i le vaega 3 o anomea mo sauniuniga). Tusi i le laupapa ia autu nei: Vaega 1 (1 Nifae 8:21–23), Vaega 2 (1 Nifae 8:24–28), Vaega 3 (1 Nifae 8:30, 33), Vaega 4 (1 Nifae 8:31–32).

• O le a le matafaioi na faia e le ai uamea, po o le afioga a le Atua, mo vaega taitasi? (Tusi tali a tagata aoga i lalo o le autu talafeagai.)

• O le a le mea e taua ai le fuaitau sa latou “le amanaiaina i latou” o loo i le 1 Nifae 8:33? Mata e faapeī foliga o lenei mea i o tatou taimi?

• O le a se faamoemoe o i ai mo i latou o e ua faamamulua le ai uamea ma ua se ese mai le ala? (Atonu e te manao e fai atu i tagata aoga e toe faamanatu le saunoaga mai ia Sister Ann M. Dibb o loo i le anomea mo sauniuniga.)

Ia faamatala atu, a o tatalo Nifae ina ia malamalama i le miti a lona tamā, sa faaali mai ia te ia se faaaliga vaaia ma aoao ai i le uiga o le miti. Ina ua uma lea, sa ia aoaoina ona uso i le mea na faatusa i ai le ai uamea. Valaaulia se tagata aoga e faitau leotele le 1 Nifae 15:23–24 . Ona fesili atu lea:

• O le a se mea e te aoao mai i le faamalamalamaga ma le valaaulia a Nifae i ona uso? (Faatasi ai ma isi upumoni, atonu e mafai ona faailoa mai e tagata aoga se mataupu faavae e talitutusa ma lenei: O le pipiimau i le afioga a le Atua, e mafai ai ona tatou talitalia taumafaiga a Satani e taitai ese i tatou mai ia Iesu Keriso.)

• O le a sou manatu i le uiga o le “pipii [mau] pea” i le afioga a le Atua? (1 Nifae 8:30).

Faaali atu le saunoaga lenei a Elder Kevin W. Pearson o le Fitugafulu.

Vagana ua tatou “piimau pea” [1 Nifae 8:30] i le afioga a le Atua ma ola ai, o le a oo ina tatou tauaso faaleagaga nai lo le mafaufau faaleagaga. Sailiili i le Tusi a Mamona ma upu a perofeta soifua i aso uma, i aso uma, i aso uma! O le ki lea i le ola faaleagaga ma aloese ai mai le faaseseina. A aunoa ma lena, tatou te leiloloa faaleagaga. ( “Tumau i le Laau,” Liahona, Me 2015, 115)

Fai i tagata aoga e faasoa mai pe na faapefea ona fesoasoani le pipiimau i le afioga a le Atua latou te ola ai faaleagaga pe aloese ai mai le faaseseina. Valaaulia i latou e faasoa mai foi pe na faapefea ona fesoasoani le afioga a le Atua ia i latou e latalata atili ai ia Iesu Keriso ma Lona mana togiola.

Ina ia fesoasoani i tagata aoga e faatino mea ua latou aoaoina ma lagonaina, atonu e te faaali atu fesili nei, ma valaaulia tagata aoga e mafaufau loloto ma tusifaamaumau a latou tali.

• O le a le mea e mafai ona ou faia, ia lelei atili ai la’u pipiimau i le afioga a le Atua?

• O ai e mafai ona faamanuiaina e ala i le faalogologo i la’u molimau i le taua o le pipiimau i le afioga a le Atua?

Mafaufau e fai atu i ni nai tagata aoga e faasoa mai ni mea na latou tusia.

Mo Le Isi Taimi

A mafaufau atu i le talanoaga i le ai uamaea, atonu e te valaaulia tagata aoga e mafaufau pe na faapeī lo latou maelega i le suesueina lata mai nei o tusitusiga paia. Ao latou suesue i le anomea mo suesuega mo le isi vasega e sosoo ai, ia faamalosiau ia i latou e mafaufau pe o a ni auala e mafai ai e le faamuamua o le suesueina patino o tusitusiga paia ona tata’i latalata atili atu ai i latou i le Faaola.