Lesona 24 Anomea a le Faiaoga

O Le Mana Laveai o le Alii

O aafiaga o le nuu o Limae ma le nuu o Alema ua faaalia ai le gafatia e le Alii ona lagolago ma laveai i latou o e liliu atu ia te Ia i o latou tofotofoga. I le lesona lenei, o le a faaloloto ai e tamaiti o latou malamalamaaga o le ala e mafai ona latou atinae ai se vaaiga e faavavau o le mana o le Alii e laveai ai. O le a valaaulia foi tamaiti aoga e iloilo mea e mafai ona latou faia ia maua ai le mana o le Alii a o latou feagai ma o latou lava tofotofoga.

Fautuaga mo le Aoaoina Atu

Ua faapologa e sa Lamana le nuu o Alema ma le nuu o Limae.

Valaaulia tamaiti aoga e faasoa mai ni faataitaiga o tofotofoga o loo feagai i le taimi lenei ma i latou po o ni tagata latou te iloa.

• O a nisi o mafuaaga eseese mo o tatou tofotofoga? (Atonu e aoga le iloilo o faataitaiga o loo i le vaega 1 o anomea mo sauniuniga.)

• O a ni fesili, popolega, po o lagona masani e ono i ai i tagata pe a latou feagai ma tofotofoga?

Faaleleia o lo Tatou Aoao Atu ma le Aoaoina

Iloilo manatu faavae ma fesili ma se vaaiga e faavavau. Atonu e mafaufau tamaiti aoga i faafitauli ma fesili e faaaoga ai manatu latou te faalogo i ai i le aoga po o le galuega po o luga o ala o faasalalauga faaagafesootai. E masani lava ona tuuina mai e nei punavai na’o se vaaiga faalelalolagi, lea e le amanaia ai aoaoga o le talalelei. Vaavaai mo ni avanoa e fesoasoani ai i tamaiti aoga e faataitai ona mafaufau i faafitauli ma fesili “i le tulaga o le ata o le faaolataga ma aoaoga a le Faaola” (Doctrinal Mastery Core Document [2018], “Mauaina o le Malamalama Faaleagaga,” parakalafa 8).

Nuu o Alema

Iloilo mo sina taimi ia tulaga na taitai atu ai le nuu o Alema i le faapologaina e sa Lamana. Atonu e te valaaulia tamaiti aoga e vaai faalemafaufau pe faamata e faapei mo le nuu o Alema o e sa ola amiotonu, ae na faafuasei ona aveesea lo latou saolotoga ae faamalosia ona tautua ia sa Lamana.

Valaaulia tamaiti aoga e toe iloilo le Mosaea 23:21–24, ma vaavaai mo ni mafuaaga atonu na faatagaina ai e le Alii le nuu o Alema ia oo i tofotofoga.

• E tusa ai ma nei fuaiupu, o le a le faamoemoega o le Alii i le tuuina o le nuu o Alema ia oo atu i nei tofotofoga?

• O a ni auala e mafai ona fesoasoani ai le saili ia malamalama i le vaaiga e faavavau a le Alii i tofotofoga, tatou te toe mafaufau ai i o tatou lava tofotofoga ma se vaaiga ese? (Atonu e te manao e faaali le vitio “Examining Questions with an Eternal Perspective” [2:56], o loo faapupula ai le ala e toe mafaufau ai i fesili e faaaoga ai aoaoga o le talalelei.)

Faamalosiau i tamaiti aoga e vaavaai mo upumoni i le lesona lenei e mafai ona fesoasoani ia i latou ia maua se vaaiga e faavavau i o latou tofotofoga.

Nuu o Limae

Faamanatu i tamaiti aoga o le nuu o Limae sa faapologaina foi. Aotele tulaga e faatatau i lo latou faatagataotauaina. Valaaulia tamaiti aoga e vaavaai faatopetope i le Mosaea 21:6–12, ma vaai mo auala na taumafai ai le nuu o Limae e sosola ese mai le nofo pologa. Mafaufau e fai atu fesili nei:

• O le a le mea na tupu i le nuu o Limae a o latou taumafai e laveai i latou lava mai le nofo pologa?

• O a ni faafitauli e mafai ona tatou oo i ai a o tatou taumafai e faatoilalo o tatou tofotofoga e aunoa ma le sailia o le fesoasoani a le Alii? O a ni mea e ono taofia i tatou mai le liliu atu i le Alii i o tatou tofotofoga?

Valaaulia tamaiti aoga e iloilo le Mosaea 21:13–16, pe fai i se tamaitiiti aoga e aotele le mea na fai e le nuu o Limae ina ua latou iloa e le mafai ona latou laveaia i latou lava mai le nofo pologa. Ona valaaulia lea o se tamaitiiti aoga e aotele le ala na iu ina laveaiina ai le nuu o Limae. Fuafua e fai atu se fesili e tasi pe sili atu foi o fesili nei e fesoasoani ai i tamaiti aoga e atinae se vaaiga e faavavau i o latou tofotofoga:

• O le a se mea na e aoao mai le aafiaga o le nuu o Limae e uiga i le ala e lagolago ai e le Atua pe laveai ai i latou o e liliu atu ia te Ia i o latou tofotofoga? (E faaopoopo atu i upumoni e faasoa mai e tamaiti aoga, fesoasoani ia latou faailoa mai se upumoni e tutusa ma lenei: A tatou faamaualalo i tatou lava ma valaau atu i le Atua, o le a Ia faafofoga i a tatou tatalo ma laveai i tatou mai o tatou tofotofoga i Lana lava taimi.)

• E mafai faapefea ona tatou faalagolago i le taimi faatulagaina a le Alii nai lo o tatou lava taimi a o tatou feagai ma tofotofoga? (Atonu e aoga le toe iloilo o le saunoaga a Peresitene Dallin H. Oaks i le vaega 2 o le anomea mo sauniuniga.)

• O a ni faamanuiaga ua e maua ao e mulimuli i le finagalo o le Alii ma faalagolago i Lana taimi mo lou olaga?

Atonu e te manao e tuu atu i tamaiti ni nai minute e tomanatu ai i se tofotofoga o loo latou feagai nei ma iloilo pe faapefea ona latou toe mafaufau i ai faatasi ma se vaaiga e faavavau.

Ua faamalosi e le Alii le nuu o Alema ma laveai i latou mai le nofo pologa.

Faamanatu i tamaiti aoga o le nuu o Alema sa nofo pologa foi ia sa Lamana. Tuu atu i tamaiti aoga ni nai minute e toe iloilo ai le Mosaea 24:10–16, ma vaavaai mo ni mea e tutusa ma eseese ai i le va o tofotofoga na oo i ai le nuu o Alema ma le nuu o Limae.

• O a ni mea e tutusa ai na e maua? Na faapefea ona eseese ia aafiaga a vaega e lua? (O tali e mafai ona i ai e aofia ai tali nei: O vaega uma o nuu e lua sa lagolagoina e le Alii ma sa iu ina laveaiina; o le nofo pologa o le nuu o Alema sa oo mai o se tofotofoga o lo latou faatuatua ao latou taumafai e mulimuli i le Alii, ae o le nofo pologa o le nuu o Limae na oo mai ona o le agasala; sa vave ona liliu atu le nuu o Alema i le Atua, ae o le nuu o Limae sa liliu atu ia te Ia ina ua uma ona latou taumafai i latou lava e laveai i latou.)

• O le a se faamaoniga o e vaai i ai i le alofa o le Alii i nei tala e lua?

• O a ni lesona faaopoopo e mafai ona tatou aoao mai le aafiaga o le nuu o Alema e uiga i le ala e lagolago pe laveai ai e le Atua i latou o e liliu atu ia te Ia i o latou tofotofoga? (Ao faasoa mai e tamaiti aoga upumoni ua latou iloa, fesoasoani ia latou faailoa se mataupu faavae e tutusa ma lenei: A faaali lo tatou faatuatua ma le onosai i o tatou tofotofoga ma valaau atu i le Atua, e mafai ona Ia faamalosia i tatou ina ia tauave lelei ia avega. Faamatalaga: O loo aoao mai e Alema le Itiiti se mataupu faavae faapena i le Alema 36:3, 27.)

Vaevae le vasega i vaega taitoalua pe taitoatolu tamaiti aoga, ma valaaulia i latou e iloilo le saunoaga a Elder David A. Bednar i le vaega 3 o le anomea mo sauniuniga. Faaali atu fesili nei, ma valaaulia tamaiti aoga e talanoa ai i a latou vaega:

• E mafai faapefea ona aoga le iloa e le o taimi uma e aveese vave ai e le Alii o tatou tofotofoga?

• E tusa ai ma le saunoaga a Elder Bednar, e mafai faapefea e le tausia o a tatou feagaiga ona tuu mai ai ia i tatou le malosi faaopoopo ao tatou feagai ma tofotofoga?

• Na faapefea ona lagolagoina ma faamalosia oe e le Alii, po o se tasi e te iloa, ao e onosaia se tofotofoga pe tauaveina se avega? O a ni faamanuiaga na oo mai mai le le vave laveaiina mai le tofotofoga?

Valaaulia se toatasi pe toalua o tamaiti aoga e faasoa mai se mea na tulaga ese ia i latou i le talanoaga a le latou vaega. Tuu atu i tamaiti aoga ni nai minute e tusifaamaumau ai soo se uunaiga na latou maua e faatatau i le ala e mafai ona faateleina ai lo latou faalagolago i le Alii ao latou feagai ma luitau.

Mo Le Isi Taimi

Fesili i tamaiti aoga pe i ai ni a latou fesili latou te mananao e tali mai e le Alii. Faamalosiau ia i latou e suesue ma le totoa le Tusi a Mamona ma anomea mo sauniuniga mo le isi vasega e sosoo ai e iloa ai mea e mafai ona latou aoao i ai e uiga i le maua o tali mai le Alii.