Lesona 1 Anomea a le Faiaoga: O Le Tusi a Mamona: O Se Tasi Molimau ia Iesu Keriso
“Lesona 1 Anomea a le Faiaoga: O Le Tusi a Mamona: O Se Tasi Molimau ia Iesu Keriso,” Anomea a le Faiaoga o Aoaoga ma Aoaoga Faavae o le Tusi a Mamona (2021)
“Lesona 1 Anomea a le Faiaoga,” Anomea a le Faiaoga o Aoaoga ma Aoaoga Faavae o le Tusi a Mamona
Lesona 1 Anomea a le Faiaoga
O Le Tusi a Mamona: O Se Tasi Molimau ia Iesu Keriso
Na molimau mai Epikopo Gérald Caussé, le Epikopo Pulefaamalumalu, “O le savali autu o le Tusi a Mamona o le toefuatai maia lea o le iloa moni o le matafaioi taua a Iesu Keriso i le faaolataga ma le faaeaga o tagata” (“O Se Molimau Ola o le Keriso Soifua,” Liahona, Me 2020, 39).
O le Tusi a Mamona e faatauanaua i tatou ia talitonu ia Iesu Keriso ma musuia i tatou ina ia faia le lelei. O se taunuuga o le lesona lenei, o le a faailoa ai e tagata aoga ia faamanuiaga taua e mafai ona latou maua e ala i a latou suesuega o le Tusi a Mamona, faamatala mea e mafai ona latou faia ia latalata atili ai ia Iesu Keriso, ma fuafua pe faapefea ona mafai ona avea i latou o ni tagata aoao maelega sili atu.
Faamatalaga: Afai e mafai, ia faafesootai tamaiti aoga o e ua lesitala mo le kosi lenei a o le’i oo i le latou aso muamua o le vasega ma valaaulia i latou e suesue anomea mo sauniuniga mo le lesona muamua a o le’i faia le vasega. Ia mautinoa ua tofu uma isi tagata aoga ma se kopi o le anomea mo sauniuniga mo le lesona 1 i le amataga o le vasega muamua. Faaaoga anomea mo sauniuniga i le taimi o le talanoaga a lau vasega ina ia mafai ona vaai tagata aoga mai lava i le amataga, i le ala o le a fesoasoani ai ia i latou e saunia mo le vasega ma faatamaoaigaina ai o latou aafiaga i le taimi o le vasega.
Fautuaga mo le Aoaoina Atu
O le Tusi a Mamona o le a suia ai lou olaga.
A uma ona faafeiloai tagata aoga ma faamasani puupuu ia i latou, ia mautinoa e mafai ona latou faaaogaina anomea mo sauniuniga a le vasega mo le lesona lenei. Ona faaali atu lea ma faitau le saunoaga lenei a Peresitene Russell M. Nelson:
Ata
Peresitene Russell M. Nelson
E tupu se mea mamana pe a saili atu se atalii o le Atua ia iloa atili e uiga ia te Ia ma Lona Alo Pele. E leai ma se isi mea o loo manino ma mamana atili ai le aoaoina o na upumoni nai lo le Tusi a Mamona. …
O le a se mea ua e iloa e uiga i le savali o le Tusi a Mamona mai ia Peresitene Nelson? (Ao faasoa mai tagata aoga, atonu e te manao e tusi i luga o le laupapa ia upumoni e talitutusa ma lenei: O le suesueina o le Tusi a Mamona o le a fesoasoani ou te iloa ai le Tama Faalelagi ma Iesu Keriso. O le a suia ai lo’u olaga.)
Mafaufau e faasoa atu lau molimau i le ala ua faia ai e le Tusi a Mamona se aafiaga i lou malamalama e uiga i le, ma le sootaga ma le Tama Faalelagi ma Iesu Keriso.
O a ni mau, tala, mea na tutupu, aoaoga faavae, po o mataupu faavae faapitoa mai le Tusi a Mamona ua faateleina ai lou malamalama i le Tama Faalelagi ma Iesu Keriso?
O loo molimau le Tusi a Mamona e uiga ia Iesu Keriso.
Faamatala atu faapea o le Tusi a Mamona na tele lava ona tusia e ni tusitala autu se toafa: o Nifae, Iakopo, Mamona, ma Moronae. Faaali pe tufa atu le siata lenei. Ona valaaulia lea o le vasega po o ni paga o tagata aoga e faitau fuaitau o loo i lalo o le “Aafiaga” i le koluma lona lua, ma vaavaai mo le mea na agavaa ai tusitala taitoatasi e avea o se molimau o Iesu Keriso.
Tusitala Autu o le Tusi a Mamona
Anomea a le Faiaoga o Aoaoga ma Aoaoga Faavae o le Tusi a Mamona,—Lesona 1
A ua lava loa se taimi na tuuina atu i tagata aoga, valaaulia i latou e faasoa mai mea na latou aoaoina mai nei fuaitau.
Vaai faalemafaufau o loo e talanoa i se tagata sa e iloa na vaai ma talanoa ma Iesu Keriso. Faamatala pe o le a faapefea ona e faalogo atu ma tali atu i upu a lena tagata. O le iloa ai o mea ua e iloa e uiga ia Nifae, Iakopo, Mamona, ma Moronae, mata o le a ese faapefea lou faitauina ma le suesueina o le Tusi a Mamona mai i isi tusi?
Fai atu i tagata aoga e faitau filemu se fuaitau latou te filifilia mai le koluma lona tolu o le siata, ua faaautuina “Faamoemoega,” ma vaavaai mo se mafuaaga se tasi pe sili atu na tusifaamaumauina ai e le tusitala lana savali. A lava loa se taimi na tuu atu i tagata aoga, valaaulia i latou e faasoa mai mea na latou mauaina.
Faitau faatasi le 2 Nifae 33:10 ma faailoa ni auala e mafai ai e upu a perofeta i le Tusi a Mamona ona faamanuia ma suia ai o tatou olaga.
O a ni mea na e aoaoina mai ia Nifae e uiga i le faamoemoega o lenei faamaumauga? (Atonu e faailoa mai e tagata aoga se upumoni e talitutusa i lenei: O le savali o le Tusi a Mamona e faatauanaua i tatou ia talitonu i le Alii o Iesu Keriso ma ia faia le lelei.)
Na faapefea ona fesoasoani le Tusi a Mamona ia te oe ia faia le lelei ma talitonu ia Iesu Keriso?
Tuu atu i tagata aoga se taimi e mafaufau loloto ai i auala latou te ono faia ai a latou suesuega o le Tusi a Mamona o se aafiaga e faatotonugalemu atili ia Keriso. Atonu e te valaaulia ni nai tagata aoga e faasoa mai o latou manatu.
O anomea mo le sauniuniga o le vasega e uunaia le aoaoina.
Faaleleia o Lo Tatou Aoao Atu ma le Aoaoina
Ia e faatuatuaina sauniuniga a au tagata aoga. Saili ni auala e faamalosiau ai tagata aoga e suesue i anomea mo sauniuniga mo le vasega a o le’i faia le vasega. Ona utuvai mai lea i a latou sauniuniga i le taimi o le vasega. O le faia o lena mea o le a musuia ai tagata aoga e tauave ni tiutetauave tetele atu mo lo latou lava aoaoina. I le aluga o le kosi, ia tuu atu i tagata aoga ni avanoa e faasoa mai ai pe o faapefea ona faaloloto e anomea mo sauniuniga a latou suesuega patino o le Tusi a Mamona ma siitia o latou aafiaga i le vasega.
Talu ai o le vasega muamua lenei ma o le toatele o tagata aoga atonu latou te le’i maua se avanoa e suesue ai i anomea mo sauniuniga a’o le’i faia le vasega, atonu e te manao e faitau faatasi le vaega 3 o anomea mo sauniuniga mo le vasega ma fesili atu:
O le a se mea na e iloa e uiga i le saunia mo le aoaoina faaleagaga mai le valaaulia a le Faaola o loo i le 3 Nifae 17:3?
O a ni auala e mafai ona tatou saunia ai o tatou mafaufau ma loto mo le aoaoina i le vasega lenei?
E mafai faapefea e le faitauina o anomea mo sauniuniga, e aofia ai fuaitau atofaina o le Tusi a Mamona, a’o le’i faia le vasega ona faateleina lou tomai e aoao ai mai le tasi ma le isi ma le Agaga Paia i le taimi o le vasega? (Atonu e fesoasoani le valaaulia o tagata aoga e maitau le ala e mafai ai e valaaulia e suesue, mafaufau loloto, tusifaamaumau, pe talanoa lea o loo maua i le anomea mo sauniuniga mo le vasega ona fesoasoani ia loloto atili lo latou aoao o i latou lava ma faapea foi ona faaleleia ai a latou aafiaga o le aoaoina i le vasega.)
Valaaulia tagata aoga e toe faamanatu pe faauma le gaoioiga “Tusifaamaumau Ou Manatu” o loo i le vaega 3 o anomea mo sauniuniga.
Mafaufau e valaaulia tagata aoga e faauma le gaoioiga o le “Faasoa atu i Lou Faiaoga” e lata i le faaiuga o anomea mo sauniuniga pe afai latou te le’i faia.
A o e faaiuina le vasega, e mafai e oe po o se tagata aoga ona molimau atu e uiga i le ala e mafai ai e le o mai saunia e aoao faatasi ona manuia ai olaga o tagata uma o le vasega a o outou galulue faatasi ia avea atili e pei o le Tama Faalelagi ma Iesu Keriso.
Mo Le Isi Taimi
Faamatala atu o le isi vasega e sosoo ai, o le a faatatau i le tali atu i fautuaga faaperofeta. Fesili atu i tagata aoga po o a ni savali lata mai nei mai perofeta ua i ai se aafiaga patino mo i latou. E mafai foi ona e fai atu ia i latou e mafaufau i soo se savali faaperofeta atonu e faigata ona talia e nisi o tagata. Valaaulia tagata aoga e mafaufau i nei savali ma o latou aafiaga e ono i ai a o latou suesue i le anomea mo sauniuniga mo le isi vasega e sosoo ai.