Lesona 1 Anomea mo Sauniuniga o le Vasega

O Le Tusi a Mamona: O Se Tasi Molimau ia Iesu Keriso

Susū Mai i Aoaoga ma Aoaoga Faavae o le Tusi a Mamona. Ua aoao mai Peresitene Russell M. Nelson, “O upumoni o le Tusi a Mamona ua i ai le mana e faamalolo ai, faamafanafana, toefuatai, fesoasoani, faamalosia, faatoafimalie, ma faafiafia ai o tatou agaga” (“O Le Tusi a Mamona: Faamata e Faape’ī Lou Olaga e Aunoa Ma Ia?” Liahona, Nov. 2017, 62). Ao e suesue ma ola i upumoni ua talanoaina i lenei kosi, o le a e iloa ai le moni o upu a Peresitene Nelson. O lau molimau i le Tusi a Mamona ma lou faatuatua i le Tama Faalelagi ma Iesu Keriso o le a faateleina, ma o le a e avea atili ai e pei o i La’ua.

Manatua: O lenei anomea mo sauniuniga o le a tuuina atu ai ia te oe se faavae mo lou aafiaga i le vasega. O le suesue o mea taitasi e faaaoga mo sauniuniga o le lesona a o lumanai le vasega, o le a fesoasoani e te maua ai se aafiaga loloto atu ma sili atu le anoa e aoao ai.

Vaega 1

E mafai faapefea e le suesueina o le Tusi a Mamona ona faalelei ai lo’u olaga?

I le amataga o le Toefuataiga o le talalelei, na tautino mai ai le Perofeta o Iosefa Samita:

Na ou tauina atu i le usoga e faapea o le Tusi a Mamona o se tusi silisili ona sa’o i tusi uma lava o i le lalolagi, ma o le maa autu o la tatou ekalesia, ma e sili atu ona latalata le tagata i le Atua e ala i le usitaia o ona mataupu, nai lo se isi lava tusi. (Faatomuaga i le Tusi a Mamona, parakalafa 6)

Talu mai ona lomiaina le Tusi a Mamona; ua fia miliona tagata ua iloaina le moni o lenei saunoaga.

Na faasoa mai e Elder Peter M. Johnson o le Fitugafulu se faataitaiga se tasi o le ala ua faamanuiaina ai e le Tusi a Mamona lona olaga a o talavou o ia:

Ina ua amata laʻu polokalama faafomai, sa ou lagonaina le lotovaivai. E na o le fa tamaiti na taliaina e le polokalama i lena tausaga, ae o isi tamaiti aoga sa atamamai. Sa maualuluga atu a latou togi i suega ma ni aafiaga faalegaluega i tofiga o pulega sinia, ma sa latou faaalia le talitonuga i o latou tomai. Ina ua uma a’u vaiaso muamua e lua i le polokalama, na amata ona ou lagonaina ni lagona o le faalotovaivaia ma le masalosalo, na toetoe lava a lofituina ai a’u.

Sa tonu ia te a’u afai e ao ona ou faamaeaina lenei polokalama e fa-tausaga, e tatau ona ou faamaeaina le faitauina o le Tusi a Mamona i semesa taitasi. O aso taitasi a o ou faitau, sa ou iloaina ai le tautinoga a le Faaola e faapea, o le a aoao mai e le Agaga Paia mea uma ia te a’u ma o le a ou manatua ai mea uma [tagai i le Ioane 14:26]. Sa toe faamautu ai po o ai a’u i le avea ai ma se atalii o le Atua, na faamanatu mai ia te a’u e ‘aua nei o’u faatusatusaina aʻu lava i isi, ma tuuina mai ia te a’u le talitonuga i laʻu matafaioi paia ia faamanuiaina. … Faitau ma suesue i le Tusi a Mamona i aso uma, aso uma, aso uma. (“Mana e Faatoilalo ai le Fili,” Liahona, Nov. 2019, 111)

Na aoao mai Peresitene Ezra Taft Benson e “tatau ona tatou faia le Tusi a Mamona o se taulaiga autu mo suesuega [aua] na tusiaina mo o tatou aso” (“The Keystone of Our Religion,” Ensign, Jan. 1992, 5). A o e faitau i le saunoaga lenei mai ia Peresitene Nelson, mafaufau e faailoga pe mafai faapefea ona faamanuia e le Tusi a Mamona o tatou olaga, ae maise lava i o tatou aso.

O’u uso e ma tuafafine pele, ou te molimau atu o le Tusi a Mamona o le afioga moni lava a le Atua. O loo i ai tali i fesili sili ona taua o le olaga. O loo aoao mai ai le aoaoga faavae e uiga ia Keriso. O loo faalauteleina ma faamanino ai le tele o upumoni “faigofie ma taua” [tagai i le 1 Nifae 13:29–33] ia na leiloloa i le tele o seneturi o taimi ma le anoanoai o faaliliuga o le Tusi Paia.

Ua tuuina mai e le Tusi a Mamona le atoatoaga ma le malamalama sili ona mausali o le Togiola a Iesu Keriso e maua i soo se mea. … O le mana atoa o le talalelei a Iesu Keriso o loo i ai i totonu o le Tusi a Mamona. Periota.

O loo faamanino uma e le Tusi a Mamona aoaoga a le Matai ma faailoa mai ai togafiti a le fili. O loo aoao e le Tusi a Mamona aoaoga faavae moni e soloia ai uputuu sese faalelotu—e pei o faiga masani sese o le faatinoina o le papatisoga o tamaiti. Ua tuuina mai i le Tusi a Mamona le faamoemoega i le olaga e ala i le uunaia o i tatou e mafaufau loloto i le gafatia o le ola e faavavau ma le “fiafia e le gata” [Mosaea 2:41; tagai foi i le Alema 28:12]. Ua talepeina e le Tusi a Mamona talitonuga sese e faapea, e mafai ona maua le fiafia i le amioleaga ma o le lelei o le tagata lava ia na o le pau lena o le mea e manaomia e toefoi atu ai i le afioaga o le Atua. Ua tafiesea ai e faavavau ia manatu sese e faapea, na muta faaaliga i le Tusi Paia ma o loo tapunia le lagi i aso nei. (“OLe Tusi a Mamona: Faamata e Faapei Lou Olaga e aunoa ma Ia?” Liahona, Nov. 2017, 62)

Mafaufau Loloto i Sauniuniga mo le Vasega

O a faamanuiaga ua e maua pe maua e se tasi e te iloaina e ala i le suesueina o le Tusi a Mamona? O a ni ituaiga faamanuiaga ua e faamoemoe o le a aumaia i lou olaga e se suesuega o le Tusi a Mamona i nai masina o le a sosoo ai?

Vaega 2

E mafai faapefea e se suesuega o le Tusi a Mamona ona faamalosia la’u molimau ia Iesu Keriso?

I se faaaliga vaaia, na aoao ai e le perofeta o Nifae e faapea o le faamoemoega autu o le Tusi a Mamona (ma isi tusitusiga paia o aso e gata ai) o le molimau atu o Iesu Keriso “o le Alo lea o le Tamā Faavavau, ma o le Faaola o le lalolagi; ma e ao i tagata uma ona o mai ia te ia, pe e lē mafai ona faaolaina i latou” (1 Nifae 13:40).

I lona soifuaga atoa, sa matua galue maelega ai Nifae “e faatauanau atu ai [i lana] fanau, ma o [latou] uso foi, ia talitonu ia Keriso” (2 Nifae 25:23). I le faaiuga o lana faamaumauga, sa ia tuuina mai ai se molimau faaiu e uiga i le mana o le Tusi a Mamona e aumai ai tagata uma ia Keriso.

Suesue i Sauniuniga mo le Vasega

Faitau le 2 Nifae 33:6–10, ma vaavaai pe o a ni auala sa faamoemoe Nifae o le a faia ai e ana upu se aafiaga ia te oe.

Na saunoa Peresitene Benson, o le a teena e le toatele o tagata i le lalolagi le paia o Iesu Keriso. Na ia faamatalaina mai:

Ua latou fesiligia Lona soifua mai faavavega, le atoatoa o Lona soifuaga, ma le moni o Lona toetu mamalu. Ua aoao mai e le Tusi a Mamona i upu manino ma le le mafaaseseina le moni o ia mataupu uma. Ua tuuina mai ai foi se faamalamalamaga atoatoa o le aoaoga faavae o le Togiola. E moni, o lenei tusi paia musuia, o se maa’au’au lea o le molimau atu i le lalolagi o Iesu o le Keriso. … O le molimau [a le Tusi a Mamona] e uiga i le Matai e manino, mama atoatoa, ma tumu i le mana. (Aoaoga a Peresitene o le Ekalesia: Ezra Taft Benson [2014], 233–34)

Mafaufau Loloto i Sauniuniga mo le Vasega

Faaalu ni nai minute e mafaufau loloto ai i mea ua e aoaoina ma lagonaina e uiga ia Iesu Keriso e ala i lau suesuega o le Tusi a Mamona. O le a se mea e mafai ona e faia ia avea ai lau suesuega o le Tusi a Mamona o se aafiaga e faatotonugalemu ia Keriso?

Vaega 3

E mafai faapefea ona ou faaaogaina lelei lenei anomea mo sauniuniga e faaleleia ai o’u aafiaga i lenei vasega?

Ina ua faaali atu Iesu Keriso ia Sa Nifae i le laueleele o Nuumau, sa Ia tuuina atu i tagata taitoatasi le avanoa e tagotago ai i manu’a i Ona lima ma vae ona aoao atu lea o Lana aoaoga faavae i le motu o tagata. Sa Ia folafola atu o i latou o e talitonu ia te Ia ma ola i Ana aoaoga, o le a maua faamanuiaga silisili i lenei olaga ma o le a faatu mai i le aso gataaga (tagai i le 3 Nifae 11:29–40; 15:1).

A o sauni le Faaola e tuumuli i le uma ai o le aso, sa silasila atu o Ia i le motu o tagata ma tuuina atu fautuaga taua i le ala e sauniuni ai mo mea o le a Ia aoao ai i latou i le aso e sosoo ai.

Suesue i Sauniuniga mo le Vasega

Faitau le 3 Nifae 17:2–3, ma vaavaai mo mea sa aoao atu e le Faaola e uiga i le ala e sauniuni ai e aoao le talalelei.

Tusifaamaumau Ou Lagona Uunai

Atonu e te manao e faailoa ma tusifaamaumau se sini e mafai ona e galue i ai i le aluga o le kosi lenei ina ia avea ai oe o se tagata aoao maelega sili atu o le talalelei a le Alii. Mafaufau e fai se fuafuaga ia aofia ai le taimi o le a e suesue ai i anomea mo sauniuniga mo vasega taitasi.

Faasoa atu i Lou Faiaoga

Afai e mafai, ia auina atu faaeletonika nisi po o faamatalaga uma o loo i lalo i lou faiaoga. Pe e mafai foi ona e tusia se faamatalaga puupuu e momoli atu i ai i se taimi mulimuli.

1. O a ni o outou lagona e uiga i le Tusi a Mamona?

2. O a ni auala ua e faamoemoe e te tuputupu a’e ai a o e faia lenei kosi?

3. O a ni fesili e te manao ia tautalagia i se taimi i le aluga o lenei kosi?

Manao Pea i Nisi Mea? (Tuu i le faitalia)

E mafai faapefea e le Tusi a Mamona ona suia lo’u olaga?

I le vitio “A Book of Mormon Story” (5:15), o loo faamatala ai e se epikopo talavou i Egelani le ala na ola ai le Tusi a Mamona mo ia ma na suia ai lana vaaiga mamao e faavavau.

O le tusiga “O Le Tusi a Mamona e Suia ai Olaga” (Ensign, Iulai 2018, 32–35) o loo faasoa mai ai ni tala e uiga i tagata liliu mai o e na atinaeina le faatuatua i le talalelei toefuataiina a Iesu Keriso e ala i le faitauina o le Tusi a Mamona.

O a ni faamanuiaga e mafai ona ou maua pe a ou suesue ma mafaufau loloto i le Tusi a Mamona i aso uma?

I lana saunoaga i lana konafesi aoao mulimuli, “O Le Mana o le Tusi a Mamona” (Liahona, Me 2017, 86–87), na otooto mai ai e Peresitene Thomas S. Monson ia faamanuiaga e mafai ona tatou maua pe afai o le a tatou suesue ma le agaga tatalo ma mafaufau loloto i le Tusi a Mamona i aso taitasi.

Aisea ua avea ai le Tusi a Mamona o se molimau mamana i le paia o Iesu Keriso ma le valaauga faaperofeta o Iosefa Samita?

I le tautalaga “O Le Molimau Mamana a le Atua: O Le Tusi a Mamona” (Liahona, Nov. 2017, 107–9), o loo faamalamalama mai ai e Peresitene Tad R. Callister, o le sa avea ma Peresitene Aoao o le Aoga Sa, le ala ua avea ai le Tusi a Mamona o se “molimau mamana i le paia o Iesu Keriso, le valaauga faaperofeta o Iosefa Samita, ma le moni a’ia’i o lenei Ekalesia” (109).