Lesona 27 Anomea a le Faiaoga

Faatuatua, Faamoemoe, ma le Alofa Mama

Na aoao mai Peresitene Dieter F. Uchtdorf, i le taimi a o i ai i le Au Peresitene Sili, “O le faatuatua, faamoemoe, ma le alofa mama e galulue faatasi, ma a faateleina le tasi, e faatupuina foi le isi” (“O Le Mana e Le I’u o le Faamoemoe,” Ensign po o le Liahona, Nov. 2008, 23). I le lesona lenei, o le a mafai ai e tamaiti a’oga ona faamatala le ala e atina’e ma faateleina ai o latou faatuatua ma faamoemoe i le Faaola o Iesu Keriso ma i Lana talalelei. O le a mafai foi ona latou faailoa mai mea e mafai ona latou faia e saga atiina’e atoatoa ai le uiga auaumama faaKeriso o le alofa mama.

Fautuaga mo le Aoao Atu

Faaleleia o Lo Tatou Aoao Atu ma le Aoaoina

Faaaoga auala eseese talafeagai. Ina ia faaleleia atili le aafiaga faaleaoaoga a tamaiti a’oga, faaaoga ni auala eseese o metotia faafaia’oga, e pei o fesili, talanoaga a le vasega, tala, gaoioiga tusitusi, faataitaiga moni i le olaga, tala malie talafeagai, mea faitino, ata, upusii, galuega a vaega, aoaoga a le faiaoga, ma aoaoga i le laupapa po o otovisio. Ia manatua e le aunoa o metotia faafaia’oga o ni auala ia e faateleina ai le aoaoina ma e le tatau ona faalagolago i ai o latou taua moni. (Tagai Aoao Atu ma le Aoao Mai o le Talalalelei: O Se Tusitaulima mo Faia’oga ma Taitai i le Seminare ma Inisitituti o Mataupu Faalelotu [2012], 66.)

O loo aoao mai e Mamona le sootaga i le va o le faatuatua ma le faamoemoe.

Faaali atu le ata o loo i ai i le lesona o se maea felanulanua’i ma ni poloka ua faatutu faatasi. Faamatala atu, o lanu eseese o nei mea faitino ua faatusa i le faatuatua, faamoemoe, ma le alofa mama.

maea ma poloka meataalo

• O a ni auala atonu e tele ina pei ai le faatuatua, faamoemoe ma le alofa mama o ni alava e fili faatasi o se maea nai lo o ni poloka e faatutu faatasi?

Faaali atu le saunoaga lenei mai ia Elder Chi Hong (Sam) Wong o le Fitugafulu:

Elder Chi Hong (Sam) Wong

O le faatuatua, faamoemoe ma le alofa mama … e fili faatasi le tasi ma le isi. Tatou te le faamaeaina le fausiaina o le faatuatua, ma ona maua lea o le faamoemoe, po o le mavae ai ona mauaina o le faamoemoe, mulimuli ane atiina ae le alofa mama. Latou te galulue faatasi uma. Ma a o fili faatasi i latou, latou te fesoasoani uma e mamanu o o tatou tagata ma molimau.. (“Faith, Hope, and Charity: Interlacing Virtues,” Ensign, Dec. 2016, 19)

Valaaulia tamaiti aoga e toe iloilo le Moronae 7:33, 38, 40–43, ma vaavaai mo mea o loo aoao mai e nei fuaiupu ia i tatou e uiga i le sootaga i le va o le faatuatua ma le faamoemoe.

• O le a se mea e mafai ona tatou aoao mai i nei fuaiupu e uiga i le sootaga i le va o le faatuatua ma le faamoemoe? (E mafai ona faaali mai e tamaiti aoga ni upumoni, e aofia ai ma lenei: Ao tatou atiina ae le faatuatua ia Iesu Keriso, e mafai ona tatou maua le faamoemoe e ala i Lana Togiola ma le Toetu, e mafai ona tatou agai atu i le ola e faavavau.)

• Aisea ua vavalalata ai le sootaga a le faamoemoe i le faatuatua ma le faalagolago i le Togiola a Iesu Keriso ma Lana Toetu?

Valaaulia tamaiti aoga e toe faamanatu le saunoaga a Peresitene M. Russell Ballard i le vaega 1 o le anomea mo sauniuniga.

• E mafai ona e mafaufau i ni faataitaiga atonu na e vaai ai i olaga o tagata e atagia ai upumoni na aoao mai e Peresitene Ballard?

Mafaufau e faasoa atu le fuaitau lenei o se tusi na auina atu ia Peresitene Russell M. Nelson mai i se uo o lē sa tauivi ma se faafitauli patino:

“O le tausalaina ma le toilalo na ou lagonaina na toetoe lava a faigata ai ona ou salamo. Ua leai so’u faatuatua. O agasala na muamua; na sosoo mai ai ma le masalosalo. …

“O le tiga o lo’u le maumanatu, lo’u musua, ma leai o so’u taitaiga, lo’u le mafai ona faia se faaiuga, o le leai o so’u talitonu ia te a’u lava, na mafua ai le puapuagatia ma le le fiafia. O lo’u aiga, lo’u lumanai, ma lo’u faatuatua na i ai i se tulaga lamatiaina. Ua leai so’u faamoemoe.” (“A More Excellent Hope,” Ensign, Feb. 1997, 60)

Valaaulia tamaiti aoga e toe faamanatu le Eteru 12:4, 32 ma le saunoaga a Peresitene Uchtdorf i le vaega 2 o le anomea mo sauniuniga, ma talanoa i mea e mafai ona faia e le tagata na tusia le tusi e toe maua ai le faamoemoe.

• O le a se mea sa sili ona fesoasoani ia te oe e fai ai le faamoemoe o se vaega malosi i aso uma o lou olaga?

• E faavae i le mea na e mafaufau i ai ma lagonaina i le aluga o lenei lesona, o a ni suiga ua e lagona le musuia e faia ia faateleina ai lou gafatia ona maua le faamoemoe? (Atonu e te tuuina atu i tamaiti aoga le taimi e tusifaamaumau ai o latou manatu ma lagona.)

Ua aoao mai e Mamona le taua o le sailia o le meaalofa o le alofa mama.

Fai atu i tagata aoga le fesili lenei:

• Mai au suesuega ma ou aafiaiga, o le a faapefea ona e faamatala atu po o le a le alofa mama?

Valaaulia se tamaitiiti aoga e faitau le Moronae 7:43–44, 48, ma fesili atu:

• O a ni auala e te manatu e fesootai ai le faatuatua ma le faamoemoe ia Iesu Keriso i le meaalofa o le alofa mama?

• O le a le mea na fautua mai Mamona ia i tatou e fai pe a tatou mananao moni i le meaalofa o le alofa mama? (Fesoasoani i tamaiti aoga e faailoa mai se mataupu faavae e talitutusa ma lenei: Afai tatou te tatalo ma le malosi uma o o tatou loto ma mulimuli ia Iesu Keriso, e mafai ona faatumulia i tatou i le alofa mama.)

Mafaufau e tuu atu i tamaiti aoga ni minute se lua e mafaufau loloto ai i taimi na latou tatalo ai mo se fesoasoani ina ia maua le alofa mama, ma o le a foi le mea na tupu o se taunuuga.

Valaaulia tamaiti aoga e fai ni vaega toalaiti, ma tuu atu i vaega taitasi le pepa e tufa atu lenei.

Faataitaiga o le Alofa Mama i le Olaga i Aso Taitasi

Anomea a le Faiaoga o Aoaoga ma Aoaoga Faavae o le Tusi a Mamona,—Lesona 27

I le avea o se vaega, saili ia faaloloto lo outou malamalama i le alofa mama e ala i le faatumuina o se gaoioiga se tasi pe lua lenei:

1. Toe faamanatu le Moronae 7:45–47, ma faailoa mai upu po o fuaitau o loo faamatala ai le alofa mama. Ona auauai lea i le faaumaina o fesili nei: “E faapei foliga o le alofa mama pe a …” (Mo se faataitaiga, “O a foliga o le alofa mama pe a e le fiafia i se tasi? pe a ua e afaina i se tagata?”) I le faaaoga ai o aoaoga o loo i le Moronae 7:45–47, tali i fesili na tou faia.

2. Toe faamanatu le saunoaga a Peresitene Jean B. Bingham i le vaega 3 o le anomea mo sauniuniga, ma faasoa atu ni faataitaiga o auala ua avea ai Iesu Keriso “o le faataitaiga atoatoa lea o le alofa mama” (“O Le A Ou Aumaia le Malamalama o le Talalelei i Totonu o Lo’u Aiga,” Ensign po o le Liahona, Nov. 2016, 6). A o outou talanoaina faataitaiga eseese, mafaufau e fesili atu i le tasi ma le isi ia fesili e mafai ona fesoasoani e te faaaoga ai mea ua e aoaoina mai le faataitaiga a le Faaola.

3. Toe faamanatu le saunoaga a Peresitene Thomas S. Monson i le vaega 3 o le anomea mo sauniuniga, ma faasoa atu ni faataitaiga o le alofa mama ua e molimauina i olaga o tagata e te iloa. Talanoa po o a mea ua aoao mai e nei faataitaiga e uiga i le alofa mama ma le ala e mafai ai ona fesoasoani nei faataitaiga ia i tatou ia avea atili faapei o Keriso i o tatou olaga i aso uma.

© 2021 by Intellectual Reserve, Inc. Ua taofia aia tatau uma.

Faataitaiga o le Alofa Mama i le Olaga i Aso Taitasi

tufaaga a le faiaoga

A lava le taimi, valaaulia ni nai tamaiti aoga e faasoa mai ni mea na latou aoaoina i a latou vaega.

Faaali atu fesili nei, ma valaaulia tamaiti aoga e filifili le tasi latou te manatu e sili atu le talafeagai i o latou tulaga o loo i ai nei. Faamalosiau i tamaiti aoga e tusifaamaumau soo se lagona latou te maua po o ni uunaiga latou te maua.

• O ai e manaomia ona lagona le alofa o le Faaola e ala atu ia te au? O le a se mea e mafai ona e faia e fesoasoani ai i lenei tagata ia lagona Lona alofa?

• Na faapefea ona faamanuiaina au i le upu po o faatinoga faaKeriso a se isi tagata?

• O le a se taimi na ou latalata atili atu ai ia Iesu Keriso ma le Tama Faalelagi ona o le faaalia o le alofa faaKeriso?

• O le a se mea o loo o’u faia (pe e le o faia) i le taimi nei o loo taofia ai a’u mai le sailia (po o le mauaina) o le meaalofa o le alofa mama?

Faamalosiau i tamaiti aoga e faatu se sini mo se auala e mafai ona latou galulue ai ia maua uiga auaumama faaKeriso o le faatuatua, faamoemoe, ma le alofa mama ina ia avea atili ai i latou e pei o Iesu Keriso.

Mo Le Isi Taimi

Fai atu i tamaiti aoga ia o mai saunia i le vasega e sosoo ai e talanoa pe faapefea ona taitai atu e le Tusi a Mamona ia tagata ia Iesu Keriso. Faamalosiau i tamaiti aoga e mafaufau loloto i aafiaga na latou maua i le Tusi a Mamona i le taimi o lenei kosi ua faapea ona faamalosia ai a latou molimau ma sootaga ma le Tama Faalelagi ma Iesu Keriso.