Lesona 21 Anomea a le Faiaoga

Faatoilaloina o le Faamaualuga

O le agasala o le faamaualuga o se autu taua lea i le Tusi a Mamona. O vaitau o le amiotonu ma le faamanuiaina e masani ona sosoo ai ma vaitau o le faamaualuga ma le amioleaga. O lenei lesona o le a fesoasoani i tamaiti aoga e iloa ai faailoga o le faamaualuga i o latou lava olaga. O le a mafaufau ai foi tamaiti aoga i mea e mafai ona latou faia e faatoilalo ai le faamaualuga ma avea atili ai e pei o le Faaola.

Fautuaga mo le Aoaoina Atu

Ua aoao atu Iakopo ma Moronae e uiga i le agasala o le faamaualuga.

Ina ia amata le vasega, atonu e te manao e faaali atu le faamatalaga lenei a Elder J. Devn Cornish o le Au Fitugafulu: “E tatau ona tuu lo tatou faatusatusaina o i tatou lava i isi tagata” (“O Lava Ea Lo’u Lelei? Pe O Le A Ou Ausia Ea?” Liahona, Nov. 2016, 33). Fesili atu i tamaiti aoga pe aisea ua avea ai lenei fautuaga o se fautuaga lelei.

Faasoa atu le ata faataitai lenei, ma fesili i tamaiti aoga pe na i ai se isi latou te iloa sa oo i ai ni lagona faapea.

E le fiafia Tile e auai i fonotaga a le Aualofa. A tilotilo solo o ia i totonu o le potu, e pau le mea e vaai i ai o tamaitai o e e foliga mai e sili atu le aulelei, faaleagaga, ma talenia nai lo o ia. E le fiafia o ia ia i latou i le i ai o nei uiga ma e masani ona aluese mai le Aualofa ma lagona ita ma le lotovale.

Faaali atu le saunoaga lenei a Peresitene Dieter F. Uchtdorf, o le sa saunoa i le faamaualuga ao auauna ai o se tasi o le Au Peresitene Sili: “I lona natura, o le faamaualuga o se agasala o le faatusatusaga” (“O Le Faamaualuga ma le Perisitua,” Liahona, Nov. 2010, 56). Tusi i le laupapa le upumoni lenei: O le faamaualuga o se agasala o le faatusatusaga.

• O a ni auala e mafai ai ona oo le faatusatusaga o i tatou lava i isi i le faamaualuga?

Faaleleia o lo Tatou Aoao Atu ma le Aoaoina

Fetuunai ia fetaui ma manaoga o tamaiti aoga. E ui ina tuuina mai e mataupu aoaoina ia upumoni taua, punaoa, ma le taitaiga aoga, ae e le mafai ona muai iloa ai manaoga uma o au tamaiti aoga. Ao e aoao atu, faalogo ma le toto’a i manatu faalia, fesili, ma popolega a tamaiti aoga ina ia mafai e le Agaga Paia ona fesoasoani ia te oe ia iloa mea e taulai atu i ai ma ave i ai le faamuamua i le taimi o se talanoaga.

Faamanatu i tamaiti aoga na latou aoaoina mai le vaega 1 o anomea mo sauniuniga e faapea sa lapataia e Iakopo lona nuu e uiga i lo latou faamaualuluga, sa muai vaaia e Moronae le faamaualuga i aso amuli, ma sa saunoa Peresitene Ezra Taft Benson i le faamaualuga i totonu o le Ekalesia toefuataiina a le Alii. Valaaulia tamaiti aoga taitoatasi e filifili se tasi o perofeta nei ma toe iloilo lana savali e uiga i le faamaualuga, ma vaavaai mo auala ua avea ai le “faamaualuga o se agasala o le faatusatusaga” (“O Le Faamaualuga ma le Perisitua,” 56).

A ua maea loa se taimi e suesue ai e tamaiti aoga nei fuaitau, valaaulia i latou e faasoa mai ni mea sa latou aoaoina. Ao faasoa mai e tamaiti aoga a latou malamalamaaga loloto, mafaufau po o le fea o fesili nei e taulai i ai ma ave i ai le faamuamua:

• O le a lou manatu i le uiga o le “faafefeteina … i le faamaualuluga o o outou loto”? (Iakopo 2:13). E faapefea ona e iloa ua faafefeteina oe i le faamaualuga i lou lava loto?

• O a ni agasala faaopoopo e mafai ona faalauiloa mai i o tatou olaga pe a tatou vaai i lalo i isi ma le faasausili pe vaai foi i luga i isi ma se lagona le lelei? I lou aafiaga, e faapefea e nei ituaiga o faatusatusaga ona aafia ai mafutaga ma uo, tagata o aiga, uso e potu faatasi, uso a faigaluega, ma le Tama Faalelagi?

• O a ni auala e mafai ai ona faamatua’ia e ala o faasalalauga faaagafesootai le faatusatusaga lea e mafai ona oo atu ai i le agasala o le faamaualuga? O le a se mea na e faia e tetee atu ai i le faaosoosoga o le faatusatusa o oe lava i isi?

Faamatalaga: A faaali mai e tamaiti aoga se popolega e uiga i luitau e tuuina i luga o ala o faasalalauga faaagafesootai, atonu e te manao e faasoa atu ma talanoa i le saunoaga lenei mai ia Elder Gary E. Stevenson o le Korama a Aposetolo e Toasefululua:

O le tele o ata (pe afai e le o ata uma) ua tuu i luga o ala o faasalalauga e foliga mai o loo faaalia ai le olaga i le tulaga sili—e masani lava e le talafeagai. …

A tatou faatusatusa i ai o o tatou lava olaga masani ma olaga o isi ua lelei le mamanuina e pei ona faaalia i luga o ala o faasalalauga faaagafesootai, o nisi taimi e tuua ai i tatou ma lagona o le lotovaivai, lotovale, ma le toilalo. …

E pei ona faamanatu mai ia i tatou e Sister Bonnie L. Oscarson i lenei taeao, o le manuia i le olaga e le o le tele o tagata e fiafia i ai (likes) ua tatou maua po o le fia o uo ma tagata ua mulimuli ia i tatou i luga o ala o faasalalauga faaagafesootai. Peitai, e i ai se mea e faatatau i sootaga anoa ma isi ma le faaopoopo atu o le malamalama i o latou olaga. (“Spiritual Eclipse,” Liahona, Nov. 2017, 46)

Fai atu i tamaiti aoga e o i fesili i le faaiuga o le vaega 1 o anomea mo sauniuniga. Valaaulia i latou e toe iloilo tali na latou tusifaamaumauina i le taimi o a latou suesuega patino ma ia faaopoopo soo se manatu po o lagona faaopoopo na latou maua talu ona tusifaamaumau a latou tali.

Na faatoilalo e sa Nifae le faamaualuga e ala i le lotomaualalo.

Fai atu i tamaiti aoga e faamalamalama mai le faamoemoega o se vaifofo. (A manaomia, faamalamalama atu o se vaifofo o se vailaau e inuina e faafetauia se vailaau oona faapitoa.) Faaali atu le saunoaga lenei mai ia Peresitene Benson: “O le vaifofo mo le faamaualuga o le lotomaulalo—agamalu, usitai. (Tagai Alema 7:23.)” (“Beware of Pride,” Ensign, May 1989, 6). Tusi i le laupapa le upumoni lenei: O le lotomaualalo o le vaifofo lea o le faamaualuga.

• O a ni auala e mafai ona pei ai le faamaualuga o se vailaau oona?

• Aisea e te manatu na faamatalaina ai e Peresitene Benson le lotomaualalo o le vaifofo o le faamaualuga?

Faamanatu i tamaiti aoga e faapea, i le Iakopo 2:17–21, na ta’u atu ai e Iakopo i lona nuu le ala e tetee atu ai i le faaosoosoga o le faamaualuga i le faateleina o a latou oa. Faamanatu foi i tamaiti aoga na latou aoaoina mai a latou sauniuniga mo le vasega, o le 3 Nifae 6:12–14 o loo faamatala ai se nuu lotomaualalo o e na mumusu e ola faamaualuluga. Valaaulia tamaiti aoga e toe iloilo se tasi o nei fuaitau, ma vaavaai mo mea e mafai ona tatou faia e faatoilalo ai le faamaualuga.

• E tusa ai ma nei fuaiupu, o le a se mea e mafai ona tatou faia e faatoilalo ai le faamaualuga? (Atonu e te manao e lisi tali a tamaiti aoga i luga o le laupapa. O nisi o tali e mafai ona aofia ai mea nei: ia limafoai i mea ua tatou maua, saili muamua le malo o le Atua, maua se faamoemoe ia Keriso, tausia e matitiva, vaai atu i tagata uma o ni tagata faapelepele, aua le finau ma isi, ia faamaualalo ma loto salamo i luma o le Atua, ma tausi poloaiga.)

• E faapefea ona faaalia e nei uiga ma faatinoga le lotomaualalo?

• O le a se mea ua e aoaoina e uiga i le lotomaualalo mai le soifuaga o le Faaola? E faapefea ona tatou faaaogaina Lana faataitaiga o le lotomaualalo i o tatou olaga?

Tuu atu i tamaiti aoga ni nai minute e iloilo ai le saunoaga lenei a Peresitene Benson i le vaega 2 o anomea mo sauniuniga. Faamalosiau ia i latou e faailoa mai se auala fitoitonu e mafai ona latou atinaeina ai le lotomaualalo atili i o latou olaga ma filifili pe o faapefea la ona latou faia.

Mafaufau e tuuina atu lau molimau e faapea, faatasi ai ma le fesoasoani a le Alii, e mafai ai pea ona tatou iloa ma faatoilalo le faamaualuga ae avea atili e pei o le Faaola.

Mo Le Isi Taimi

Fai atu i tamaiti aoga pe ua latou faitau pe faalogo i ni mea na oo atu ai le masalosalo pe finauina ai aoaoga a Iesu Keriso ma Ana perofeta soifua. Ao suesue tamaiti aoga i anomea mo sauniuniga mo le isi vasega e sosoo ai, valaaulia i latou e vaavaai mo ni aoaoga e mafai ona fesoasoani e puipuia ai i latou e faasaga ia i latou o e saili e faaumatia o latou faatuatua.