Lesona 17 Anomea a le Faiaoga: O le Auai i le Ekalesia a le Alii

“Lesona 17 Anomea a le Faiaoga: O le Auai i le Ekalesia a le Alii,” Anomea a le Faiaoga o Aoaoga ma Aoaoga Faavae o le Tusi a Mamona (2021)

“Lesona 17 Anomea a le Faiaoga,” Anomea a le Faiaoga o Aoaoga ma Aoaoga Faavae o le Tusi a Mamona

Lesona 17 Anomea a le Faiaoga

O le Auai i le Ekalesia a le Alii

E pei ona Ia faia i e na mulimuli ia te Ia i Palesitina, sa faatulaga e Iesu Keriso Lana Ekalesia i totonu o sa Nifae ma sa Lamana. Na valaauina soo e sefululua ma tuu atu ia i latou le pule o le perisitua e taitai ai Lana Ekalesia. O lenei lesona o le a tuu atu ai i tamaiti aoga le avanoa e taulai ai i le sauniga o le faamanatuga ma iloa ai mea e mafai ona latou faia ia avea ai o se aafiaga e sili ona anoa ma faatotonugalemu ia Keriso. O le a iloilo ai foi e tagata aoga mea e mafai ona latou faia e fesoasoani ai i isi ia lagona le taliaina ma le faaaumeaina i a latou lava uarota po o paranesi.

Fautuaga mo le Aoaoina Atu

Sa faatulaga e Iesu Keriso le faamanatuga ma poloai i tagata ia faatasitasi e le aunoa ma ia lē faasaina se tagata mai le auai i a latou tapuaiga.

Faaali atu le ata lenei, ma faamanatu i tamaiti aoga e faapea, o se vaega o Lana auaunaga ia sa Nifae ma sa Lamana, sa faaee atu ai e Iesu Keriso le pule o le perisitua i luga o Ona soo e toasefululua ma faatulagaina Lana Ekalesia (tagai 3 Nifae 11:18–22; 12:1; 18:5, 37; 26:17–21).

Keriso ma Au Soo Sa Nifae e Toatolu, saunia e Gary L. Kapp

Aisea e te manatu ua taua ai le tuuina e le Alii o se faamuamua maualuga faapena i le faavaeina o Lana Ekalesia, i aso anamua ma i o tatou aso? (Atonu e te manao e valaaulia tamaiti aoga e toe iloilo le saunoaga a Elder D. Todd Christofferson i le vaega 1 o le anomea mo sauniuniga.)

Faailoa atu, e ui e tele vaega o le Ekalesia e mafai ona tatou aoao atili i ai, ae o le a na’o le lua vaega o le a taulai i ai lenei lesona. Faaali atu fesili nei, ma valaaulia tagata aoga e filifili le fesili atonu o le a latou suesue atili i ai:

O le a se mea e mafai ona ou faia ia avea ai le faamanatuga o se vaega e sili ona ‘anoa o o’u aafiaga faalelotu?
E mafai faapefea ona ou fesoasoani e fatufatu se aafiaga e sili atu ona taliaina ma faaaofia ai mo tagata uma i le lotu?

Faaleleia o lo Tatou Aoao Atu ma le Aoaoina

O talanoaga i vaega toalaiti ma tofiga e mafai ona fesoasoani i tagata aoga e faaloloto atili ai le aoao. O le faia o ni vaega toalaiti e mafai ona toatele atu ai tamaiti aoga e auai ma e mafai na maua ai se siosiomaga saogalemu e mafai ai ona faasoa o latou manatu, lagona ma aafiaga i le tasi ma le isi. O vaega toalaiti e mafai foi ona fesoasoani i tamaiti aoga e atinae ai tomai faaagafesootai ma fesootaiga. Ina ia fesoasoani i tamaiti aoga ia maua se aafiaga anoa i vaega toalaiti, atonu e aoga le tuuina atu o mea nei: (1) o punaoa e pei o upusii, kopi o lauga o konafesi aoao, po o isi tufaaga, (2) faatonuga manino ma fesili faatupu manatu, ma le (3) tele o le taimi mo talatalanoaga.

Valaaulia tamaiti aoga e fai ni vaega toalaiti (toatolu i le toafa tagata i le vaega) ma i latou o e na tutusa fesili na filifilia. Tuu atu i vaega taitasi le tufaaga e faatatau i le latou fesili. (O tufaaga o loo maua i le faaiuga o le lesona lenei.) Valaaulia tamaiti aoga e faaaoga fesili ma punaoa o loo i le tufaaga e uunaia ai se talanoaga anoa. Ao talatalanoa vaega, atonu e te manao e taamilo faasolo i le potu ma ofo atu le taitaiga ma le lagolago pe a manaomia.

A ua lava loa se taimi o vaega e talanoa ai i a latou autu, valaaulia tamaiti aoga e faasoa mai i le vasega nisi o mataupu faavae ua latou aoaoina mai aoaoga a le Faaola i tagata. Atonu e fesoasoani tele le taulai atu i se autu se tasi mo ni nai minute ona talanoa lea i le isi autu e sosoo ai.

E mafai ona faailoa mai e tagata o le vasega ni mataupu faavae e pei o nei:

A tatou aai ma feinu i le faamanatuga, tatou te molimau atu i le Tama Faalelagi lo tatou naunau e manatua pea Iesu Keriso ma usitai i Ana poloaiga.
A o tatou tagofia le faamanatuga ma taumafai e manatua pea Iesu Keriso, o le a tatou maua le Agaga Paia faatasi ma i tatou.
Ua poloaiina i tatou e le Alii ina ia tatou taliaina ma faaaofia fanau uma a le Atua ma ia fesoasoani ia i latou ia o mai ia te Ia.

A o faailoa mai mataupu faavae, e mafai ona e fai atu i tamaiti aoga e tusi i luga o le laupapa. Mafaufau e fai atu i tamaiti aoga e faasoa mai ni o latou manatu po o ni fesili o i ai e faatatau i soo se mataupu faavae nei.

Faaali atu fesili nei, ma valaaulia tagata aoga e filifili se tasi po o fesili uma e mafaufau loloto i ai. E mafai ona e faamalosiau i tamaiti aoga e tusifaamaumau ni manatu ma ni lagona e oo mai ia i latou.

O le a se mea e mafai ona ou faia e saunia ai a’u lava e tagofia le faamanatuga ma avea o se aafiaga e sili atu le anoa ma e faatotonugalemu ia Keriso?
O a ni mea o le a ou faia e fesoasoani ai i isi ia lagona le taliaina ma ia lagona se lagona o le auai i le Ekalesia a Iesu Keriso?

Mo Le Isi Taimi

Valaaulia tamaiti aoga e maufaufau i nisi o tulaga i le lalolagi o siomai ai i latou e mafai ona luitauina ai le ola i le talalelei. Faamalosiau i tamaiti aoga e suesue i anomea mo sauniuniga mo le vasega e sosoo ai, ma vaavaai mo mea e mafai ona latou aoao ai mai faataitaiga a tagata i le Tusi a Mamona o e sa taumafai e ola i le amiotonu e ui lava ina nonofo i se siosiomaga amioleaga.

Faamanuiaga o le Faamanatuga

Anomea a le Faiaoga o Aoaoga ma Aoaoga Faavae o le Tusi a Mamona—Lesona 17

Faatonuga mo Taitai o Talanoaga

Faaaoga ia faatonuga nei e faafaigofie ai se talanoaga ma tagata o lau vaega. Faamalosiau i tagata uma o lau vaega ina ia auai. E ui i lea, e le tatau i se tasi ona lagona le faamalosia e faasoa mai o latou manatu.

O le a se mea e mafai ona ou faia ia avea ai le faamanatuga o se vaega e sili ona anoa o o’u aafiaga faalelotu?

Toe iloilo le 3 Nifae 18:6–12; 20:8–9 ma aoaoga mai ia Elder David A. Bednar ma D. Todd Christofferson i le vaega 2 o anomea mo sauniuniga. Ona talanoaina lea o fesili nei:

O le a le mea tatou te molimau atu i le Tama Faalelagi pe a tatou aai ma feinu i le faamanatuga?
O a ni auala e mafai ai e le faamanatuga ona faalatalata atili atu i tatou i le Faaola? E faapefea ona ese lou olaga pe a sili ona e taulai atu ia Iesu Keriso ma i taimi e te lagona ai le latalata atili atu ia te Ia?
E tusa ai ma saunoaga a Elder Bednar ma Christofferson, o a ni auala e tatau ona aafia ai o tatou olaga ma ituaiga tagata i vaiaso uma ona o le faamanatuga? Mata e i ai se tasi e naunau e molimau mai e uiga i nei faamanuiaga mai o latou lava aafiaga?
O le a se mea ua sili ona fesoasoani ia te oe i le faia o le faamanatuga o se aafiaga anoa ma faatotonugalemu ia Keriso?

Taliaina o Tagata Uma i le Ekalesia

Anomea a le Faiaoga o Aoaoga ma Aoaoga Faavae o le Tusi a Mamona—Lesona 17

Faatonuga mo Taitai o le Talanoaga

E mafai faapefea ona ou fesoasoani e fatufatu se aafiaga e sili atu ona taliaina ma faaaofia ai mo tagata uma i le lotu?

Atonu e te manao e amata lau talanoaga i le faailoa atu o ni nai mafuaaga taatele atonu e le lagona ai e tagata le faaaofiaina i a latou uarota po o paranesi. Faaalu se taimi e toe iloilo ai le 3 Nifae 18:22–25 ma le faamatalaga a Sister Carol F. McConkie i le vaega 3 o le anomea mo sauniuniga. Ona talanoaina lea o fesili nei:

O a ni aoaoga ma mataupu faavae mai nei fuaiupu e te manatu e taua ona malamalama i ai tagata uma o le Ekalesia? Aisea?
O le a le mea e sili ona taua ia te oe e uiga i le saunoaga a Sister McConkies? O le a lou manatu i le uiga o le “vaai atu i [isi] i fofoga faapei o Keriso”? (Carol F. McConkie, “Lifting Others” [vitio], ChurchofJesusChrist.org).
O a ni faataitaiga mai le soifuaga o le Faaola o faaalia ai Lona naunau ina ia taliaina ma faaaofia fanau uma a le Atua e tusa lava po o a o latou tulaga?
E mafai faapefea ona tatou mulimuli i le faataitaiga a le Faaola ia atili faaaofia ma valaaulia tagata o le ekalesia ma tagata asiasi o e auai mai i a tatou uarota po o paranesi? O a ni mea na fai e tagata na fesoasoani ia te oe e lagona ai le faaaofiaina ma le taliaina i le lotu?