Inisitituti
Lesona 8 Anomea a le Faiaoga: O le Olaga pe a mavae le Oti

“Lesona 8 Anomea a le Faiaoga: O le Olaga pe a mavae le Oti,” Anomea a le Faiaoga o Aoaoga ma Aoaoga Faavae o le Tusi a Mamona (2021)

“Lesona 8 Anomea a le Faiaoga,” Anomea a le Faiaoga o Aoaoga ma Aoaoga Faavae o le Tusi a Mamona

Lesona 8 Anomea a le Faiaoga

Olaga pe a mavae le Oti

A o faamaea e tagata aoga le iunite 2, “O Le Fuafuaga Tele o le Togiolaina,” o le a latou maua le avanoa e faamalamalama ai le auala e mafai ona faaopoopoina le mafanafana ma le faamoemoe i lenei olaga ona o le malamalama sa’o e uiga i le olaga a sau. O le a latou faailoa mai foi faatinoga e mafai ona latou faia e sauni lelei ai i latou lava e fetaiai ma le Atua.

Fautuaga mo le Aoao Atu

Ua aoao atu Alema ma Amoleka e uiga i le lalolagi o agaga ma le Toetu.

Amata le vasega i le faasoa atu o le tulaga lenei ma valaaulia tagata aoga e talanoa i mea latou te fai atu ai pe faapefea ona latou tali atu:

Mafaufau o le a e asiasi i le aiga o se uo mamae, o Ana, lea faatoa maliu. Sa auai Ana i le Ekalesia i ni nai masina ua mavae. O lona aiga e le lolotu. A o e faaali atu lou tigaalofa i le tina o Ana, na ia uuina ou lima ma tilotilo mai i ou mata ma fai mai, “E mafai ona e taʻu mai ia te aʻu le mea e tupu pe a tatou oti?”

Valaaulia tagata aoga e iloilo le Alema 11:43–44 ma le Alema 40:11–14, vaavaai mo mea moni e uiga i le olaga a sau e mafai ona aumaia ai i le tina o Ana le mafanafana ma le faamoemoe. (E mafai ona faailoa mai e tagata aoga aoaoga faavae e pei o nei: Ona o Iesu Keriso, o le a toetutu ai tagata uma ma aumaia i luma o le Atua e faamasinoina. I le Toetutu o le a faaatoatoaina ai o tatou tino. Afai tatou te amiotonu, o le a tatou malolo mai o tatou puapuaga ma faanoanoaga uma i le lalolagi o agaga.)

Valaaulia tagata aoga e mafaufau filemu pe o ai e ono manaomia le faalogo ia latou molimau o le olaga a sau ma pe faapefea ona latou faasoa a latou molimau ia i latou e manaomia ona faalogo i ai. (Tuu atu se taimi i tagata aoga e mafaufau loloto ai i a latou tali.)

Faamatalaga: Atonu na faalogo tagata aoga i manatu eseese e uiga i le olaga a sau. Faamanatu ia i latou e tatau ona tatou faaaogaina punaoa paia ua atofaina, e pei o tusitusiga paia ma aoaoga a taitai o le Ekalesia, e iloilo ai nei manatu. Atonu e ono aoga le fetufaai ma talanoaina o le lapataiga lenei mai ia Peresitene Dallin H.Oaks:

Ata
Peresitene Dallin H. Oaks

O a la nisi mea [e faaopoopo i mea ua tatou aoaoina mai a tatou tusitusiga paia] ua tatou iloa e uiga i le lalolagi o agaga? E toatele tagata o le Ekalesia na maua ni faaaliga po o isi musumusuga e faailoa atu ai ia i latou le auala e faagaoioi ai mea pe faatulaga i le lalolagi o agaga, ae o nei aafiaga faaleagaga faaletagata lava ia e le tatau ona malamalama i ai pe aoao atu o ni aoaoga faavae aloaia a le Ekalesia. Ma o le mea moni, o loo anoanoai masalosaloga o tagata o le ekalesia ma isi o loo i ai i faapogai o lomiga e pei o tusi o aafiaga toetoe oo i le oti (“Faalagolago i le Alii,” Liahona, Nov. 2019, 27)

Ua aoao mai Alema ma Amoleka e tatau ona tatou saunia e fetaiai ma le Atua.

Faaali atu saunoaga nei:

  • Ou te iloa tagata e solia tulafono ma fai mai, “E le o se mea tele naua, aua e mafai lava ona ou salamo i se taimi mulimuli mai.”

  • E alofa le Atua. Na te le taofia aʻu mai le malo selesitila ona ua faatuai lo’u salamo i nai agasala.

  • Tusa lava pe o le a loʻu taumafai malosi, ou te paʻu lava i taimi uma ma o le a ou le sauni e fetaiai ma le Atua.

Mafaufau e vaevae tagata aoga i vaega toalaiti ma tuuina atu i vaega taitasi se pepa e i ai faamatalaga atonu latou te mananao e talanoaina. Valaaulia vaega taitasi e faitau le Alema 34:32-34 ma faaaoga aoaoga i lenei fuaitau e iloilo ai a latou faamatalaga filifilia. Atonu e te manao e tuuina atu i vaega taitasi ni fesili nei e fesoasoani e faalauteleina ai a latou talanoaga:

  • O a vaega o lenei faamatalaga e moni, ma o a vaega e ono sese pe taufaasesē?

  • O a aoaoga faavae na aoaoina i le Alema 34: 32–34 e sili ona talafeagai i lenei faamatalaga? E faapefea ona e faamatalaina nei mataupu faavae i se tasi na faia lenei faamatalaga? (Atonu e ono faailoa ma faamatala e tagata aoao nisi o nei mataupu faavae: O lenei olaga o le taimi e saunia ai e feiloai ma le Atua ma fai ai a tatou galuega. Tatou sauni e feiloai ma le Atua e ala i le salamo ma faaleleia i aso nei. Afai tatou te faatuai lo tatou salamo, o le a tatou le saunia e feiloai ma le Atua.)

A ua uma se taimi na talanoaina ai e tagata aoga nei fesili, valaaulia ni vaega e faasoa mai mea na latou aoaoina i le vasega.

  • O a nisi mea e taofia ai tagata mai le sauniuni e feiloai ma le Atua? (Lisi i luga o le laupapa ia tali a tagata aoga.)

Faaleleia o Lo Tatou Aoao Atu ma le Aoaoi Mai

Tuu atu i tagata aoga se taimi e mafaufau loloto ai. O se tasi auala e mafai ona tatou fesoasoani ai i tamaiti aoga ia sili atu le faaaogaina o latou loto i le malamalama o le tuuina atu lea ia i latou se “taimi i le vasega e manatunatu ai, mafaufau loloto, pe tusi e uiga i mea ua latou malamalama ma lagona, ma mafaufau poo a faatinoga faapitoa e tatau ona latou faia e faaaogaina ai i o latou olaga ” (Aoao Atu ma le Aoaoina: O Se Tusitaulima mo Faiaoga ma Taitai Seminare ma Inisitituti o Mataupu Faalelotu [2012], 2.5.4). Mafaufau e matamata le vitio “2.5.4 The Importance and Power of Pondering” (0:31) e maua ai nisi manatu i lenei autu.

Faamanatu i tagata aoga na fai atu e Alema i tagata o Saraemila ni fesili loloto. (Na iloilo e tagata aoga nei fesili a o latou suesueina le Alema 5:15–17, 19, 27, 33 i le vaega 3 o anomea mo sauniuniga.) Valaaulia tamaiti aoga e faaaoga ni nai minute e suesue loloto atili ai e ala i le toe faitau ma mafaufau loloto atili i fesili a Alema ma aoaoga o loo maua i le Alema 5:14-35. Atonu e te manao e fesoasoani ia latou iloa o mea latou te mafaufau loloto i ai e sili atu le taua nai lo le tele o fuaiupu latou te faitauina.

A uma ua lava se taimi, atonu e te manao e fai atu se tasi pe lua foi o fesili nei mo tagata aoga e mafaufau loloto i ai:

  • O a ni auala o le a fesoasoani ai le Faaola ia te oe a o e taumafai e sauniuni e feiloai ma le Atua?

  • O le a se suiga poʻo ni suiga e manaomia ona e faia nei ina ia sauniuni ai e feiloai ma le Atua?

Mafaufau e faasoa atu le faamatalaga lenei mai ia Peresitene Oaks:

Ata
Peresitene Dallin H. Oaks

O le Faamasinoga Mulimuli ua le na o se iloiloga o le aofaiga atoa o amioga lelei ma leaga—o mea ua tatou faia. O se faailoaga o aafiaga mulimuli o a tatou galuega ma mafaufauga—o tagata ua avea ai i tatou. (“The Challenge to Become,” Ensign, Nov. 2000, 32)

Atonu e te fai atu i tagata aoga e mafaufau po o ai latou te mananao e avea ai i latou. Mafaufau e faasoa atu i tagata aoga lau molimau o le Tama Faalelagi ma le Faaola o loo i ai le naunautaiga ma le gafatia e fesoasoani ai ia latou avea ma ituaiga o tagata e iai le filemu i o La’ua luma.

Fautuaina tagata aoga e mafaufau loloto, fuafua, pe tusi ni faatinoga patino o le a latou faia i le aso e faaalia ai lo latou manao moni e sauniuni atili e feiloai ma le Atua. (Atonu e fesoasoani le toe iloilo o le faamatalaga a Peresitene Nelson i le vaega 3 o anomea mo sauniuniga.)

E mafai ona faaiu le vasega i le valaaulia o tamaiti aoga e faasoa mai mea na latou aoaoina faatasi i le suesueina o le iunite 2, “O Le Fuafuaga Tele o le Togiolaina.” E mafai foi ona e valaauliaina tagata aoga e molimau mai pe faapefea e lenei malamalamaaga ona aafia ai lo latou talisapaia o le Faaola ma o latou manaoga ia avea atili e pei o Ia.

Mo Le Isi Taimi

Ia molimau atu ua saunia e le Alii le ala mo i tatou uma taitoatasi e toe foi atu ai i le afioaga o le Atua. O lenei ala mo i tatou e toe foi atu ia te Ia ua taʻua o le aoaoga faavae a Keriso, ma o lena autu o le taulaiga lea o la tatou iunite o loo sosoo ai. A o sauniuni tagata aoga mo le isi vasega, valaaulia i latou e mafaufau pe faapefea ona saunia i latou e le faatuatua ia Iesu Keriso e feiloai ma le Atua.

Lolomi