Lesona 20 Anomea a le Faiaoga

O Faamanuiaga o le Saolotoga o Tapuaiga

O le saolotoga o tapuaiga o se aia tatau faavae a le tagata. O le Tusi a Mamona o loo i ai le tele o faataitaiga o faamanuiaga o le saolotoga o tapuaiga ma taunuuga o le faatapulaa o le saolotoga o tapuaiga. I le lesona lenei, o le a maua ai e tamaiti aoga le avanoa e faailoa ai faamanuiaga o le saolotoga o tapuaiga ma iloilo ai mea e mafai ona latou faia e fesoasoani e faasao ma puipui ai i o tatou aso.

Fautuaga mo le Aoaoina Atu

Ua faatuina e le Tupu o Mosaea se ituaiga o faigamalo e puipuia le saolotoga o tapuaiga.

Faamatalaga: O le tulaga o saolotoga o tapuaiga e matuai eseese lava i le lalolagi atoa. Ao e talanoaina le saolotoga o tapuaiga, ia nofouta i tulaga uigaese o le alalafaga o loo e aumau ai. Faamalosiau i tamaiti aoga e tautatala faaaloalo e uiga i faigamalo, isi ekalesia, ma isi tu ma aga faalelotu.

Faamanatu i tamaiti aoga, i sauniuniga mo le vasega, sa valaaulia i latou e faia se talanoaga ma se tagata e toatasi pe sili atu o se isi tapuaiga. Sa uunaia tamaiti aoga e fesili atu i nei tagata pe aisea e taua ai a latou tapuaiga ia i latou, ma pe na latou oo i ni sauaga faalelotu. Valaaulia ni nai tamaiti aoga e faasoa mai ni mea na latou aoaoina mai a latou talanoaga pe mai ni aafiaga ua mavae ma i latou o isi faatuatuaga.

Mafaufau e fai atu se fesili se tasi pe sili atu:

• E faapefea ona e faamatalaina le saolotoga o tapuaiga? (Afai e manaomia, valaaulia tamaiti aoga e toe iloilo le faatomuaga ma le vaega 1 o anomea mo sauniuniga.)

• Aisea e te manatu ai e taua le i ai i tagata uma o le aia tatau e faailoa ai ma faatino o latou talitonuga faalelotu? (Atonu e aoga le toe iloilo o le mataupu faavae o le faatuatua lona sefulutasi ma le saunoaga a Iosefa Samita i le vaega 1 o anomea mo sauniuniga.)

• Faamata e ono aafia faapefea o tatou olaga pe ana tatou le saoloto e faaali pe faatino o tatou talitonuga faavae, e aofia ai o tatou manatu faalelotu? O a ni faataitaiga o saolotoga o tapuaiga ua lamatiaina i o tatou aso?

Faamanatu i tamaiti aoga e faapea, sa faatuina e le Tupu o Mosaea se tulafono e puipui ai tagata o lona malo o e sa sauaina ona o o latou talitonuga. Atonu tou te toe iloiloina le Mosaea 27:1–4 faatasi ma tamaiti aoga ma fesili atu:

• O le a se mea e mafai ona tatou aoaoina e uiga i le saolotoga o tapuaiga mai le folafolaga a le Tupu o Mosaea?

Mafaufau e faaali atu le ata o loo avatu i le lesona, ma valaaulia tamaiti aoga e aotele nisi o manatu sa aoao atu e Korioa (tagai vaega 1 o anomea mo sauniuniga). Valaaulia tamaiti aoga e toe iloilo le Alema 30:7–9, 11 ma vaavaai mo mea o loo aoao mai e nei fuaiupu e uiga i le saolotoga o tapuaiga. Mafaufau po o le fea o fesili nei e mafai ona e fesiligia o le a sili ona fesoasoani i au tamaiti aoga ia loloto ai le aoao:

• O le a se mea e mafai ona tatou aoao mai i nei fuaiupu e uiga i le taua ua tuu e le Tama Faalelagi i le saolotoga o tapuaiga? (Atonu e faailoa mai e tamaiti aoga se mataupu faavae e tutusa ma lenei: E finagalo le Atua i Ana fanau uma ia i ai ni aia tatau tutusa ma avanoa ina ia latou saoloto ai e filifili e auauna ia te Ia e aunoa ma le faamalosia, e faapea foi ona saoloto e filifili e le auauna ia te Ia.)

• Aisea e taua ai i le fuafuaga a le Atua le le faamalosia o i tatou e talitonu pe mulimuli ia te Ia?

• O le a le uiga ia te oe o le faapea, o le a le faamalosia lava e le Tama Faalelagi ma Iesu Keriso oe ia e talitonu pe mulimuli ia i Laua? O le a se mea o aoao atu ia te oe e uiga i o Laua tagata?

• E faapefea ona manuia ia tagata uma o le lalolagi i saolotoga o tapuaiga? E faapefea ona e manuia ai?

Ua sisi e le Taitaiau o Moronae le tagavai o le saolotoga ma faapotopoto tagata e puipuia le saolotoga.

Valaaulia ni nai tamaiti aoga e faasoa mai ni faataitaiga o auala e mafai ona lamatiaina ai le saolotoga o tapuaiga. (Afai e manaomia, atonu e te fesili atu ia i latou e toe iloilo le vaega 2 o le anomea mo sauniuniga.)

Valaaulia tamaiti aoga e faitau le Alema 46:4, 10, ma faamalamalama atu le ala na faamata’uina ai e Amalekia le saolotoga o sa Nifae, e aofia ai o latou saolotoga o tapuaiga. Fesili i tamaiti aoga pe na faapefea ona tali atu ai Taitaiau Moronae i lenei taufaamata’u. (Afai e manaomia, fesili i tamaiti aoga e iloilo le Alema 46:12–13, 19–20.) Mafaufau e talanoaina ia fesili nei:

• O a ni mataupu faavae o le talalelei e uiga i le saolotoga o tapuaiga atonu tatou te aoao mai i taumafaiga a le Taitaiau Moronae ma lona nuu? (Fesoasoani i tamaiti aoga e faailoa se mataupu faavae e talitutusa ma lenei: A tatou valaau i le Atua ma saunia i tatou lava e faatino, o le a Ia faamalosia i tatou i le puipuia o o tatou aiga, a tatou tapuaiga, ma o tatou saolotoga.)

• O le a se aafiaga na faia e le Taitaiau o Moronae ma le tagavai o le saolotoga i tagata? Aisea tatou te manaomia ai le fesoasoani a le Tama Faalelagi i a tatou taumafaiga e puipui le saolotoga o tapuaiga?

• O a ni auala na puipuia ai e Taitaiau Moronae le saolotoga o tapuaiga e talitutusa ma le ala na puipuia ai e Iesu Keriso lo tatou saolotoga e filifili ai?

Ina ia fesoasoani i tamaiti aoga e mafaufau i auala e faaaloalo ai pe a puipuia le saolotoga o tapuaiga, atonu e te faaali atu le saunoaga lenei a Peresitene Dallin H. Oaks o le Au Peresitene Sili:

E tatau ona tatou alolofa atu i tagata uma, avea ma tagata e faalogo lelei, ma faaalia le popole mo talitonuga faamaoni a isi. E tatau ona tatou atamamai i le faamalamalamaina ma le tuliloaina o o tatou tulaga ma le faatosinaina mai o isi tagata. E tatau ona tatou sailia le lotomalamalama ma le lagolago a tagata le talitonu. Ma e ao foi ona tatou aumai faatinoga aloaia a faigamalo ma tino talafeagai o ni atunuu tuufaatasi. O nei mea uma e manaomia e puipuia ai le tele o le lelei e mafai ona ausia e faalapotopotoga faalelotu ma tagata talitonu mo le manuia o tagata ola uma. (“Challenges to Religious Freedom” [address at the Argentina Council for Foreign Relations (CARI), Apr. 23, 2015], newsroom.ChurchofJesusChrist.org)

Ina ia fesoasoani i tamaiti aoga e faataitai le puipuia o le saolotoga o tapuaiga, valaaulia i latou e galulue ma se paaga ma talanoa i auala o le a latou tali atu ai i le ata faataitai lenei:

E i ai sau uo Mosalemi i le galuega e i ai se nofoaga patino e tatalo ai i taimi o ana malologa. Sa amata ona ulagia e nisi o le latou aufaigaluega lenei faiga masani. Sa iu ina faapea atu se tasi o le latou aufaigaluega, “E tatau ona tuu lana tapuaiga ia te ia lava ae aua le faia i le galuega.” Ona faliu ane ai lea ia te oe ma fai atu, “O le a sou manatu?”

A uma ona maua e tamaiti aoga se taimi e talatalanoa ai i a latou tali ma a latou paga, valaaulia ni nai tamaiti aoga e faasoa mai le ala na latou tali ai i le ata faataitai.

Faaleleia o lo Tatou Aoao Atu ma le Aoaoina

Valaaulia tamaiti aoga e faatutu ni sini. Sa saunoa Peresitene M. Russell Ballard o le Korama a Aposetolo e Toasefululua, “Ua matuai faatalitonuina lelei a’u e faapea, afai tatou te le faatutuina ni sini i o tatou olaga ma aoao i le ala e taulima ai le faiga o le ola ia ausia a tatou sini, e mafai ona tatou oo i tausaga o lo tatou toeaiina/olomatutua ma toe tepa i tua i o tatou olaga ae pau le mea e iloa ai, e na’o se vaega itiiti lava o o tatou gafatia atoatoa na tatou ausia” (“Do Things That Make a Difference,” Ensign, Iuni 1983, 69–70). Tuu atu i tamaiti aoga ni avanoa e mafaufau e uiga i ai ma faia ni sini fitoitonu e mafai ona fesoasoani ia i latou e faia ai ni faatinoga tauaogaina ma amiotonu. Seivagana o o latou sini e patino tele mo le faasoaina, valaaulia tamaiti aoga e faasoa atu a latou sini ia te oe, ma mafaufau pe faapefea ona e tulitataoina ia tamaiti e uiga i a latou sini.

Valaaulia tamaiti aoga e faatu se sini fitoitonu o se mea e mafai ona latou faia ia saunia lelei ai e puipui le aia tatau paia o le saolotoga o tapuaiga. (Atonu e aoga le faaali atu ma toe iloilo le saunoaga a Elder Robert D. Hales i le vaega 2 o anomea mo sauniuniga.) Mafaufau e valaaulia tamaiti aoga e tusi se fuafuaga faigofie e faatino ia ausia ai a latou sini. Mafaufau e tuu atu lau molimau i le taua o le saolotoga o tapuaiga e faauma ai le lesona.

Mo Le Isi Taimi

Fai atu i tamaiti aoga e mafaufau pe aisea ua avea ai le faamaualuga o se autu taatele i le Tusi a Mamona. Ia faailoa atu sa saunoa Peresitene Ezra Taft Benson, “O le faamaualuga o se agasala lea e mafai ona faigofie ona iloa i isi, ae e seāseā taliaina ia i tatou lava” (“Beware of Pride,” Ensign, Me 1989, 5). Valaaulia tamaiti aoga e faaloloto o latou malamalamaaga e uiga i aoaoga e faatatau i le faamaualuga o loo i le Tusi a Mamona ma auala e ono aafia ai o latou olaga i le faamaualuga.