“Lesona 26 Anomea mo Sauniuniga a le Vasega: Se’ia Uma ona Tofotofoina o lo Outou Faatuatua,” Anomea a le Faiaoga O Aoaoga ma Aoaoga Faavae o le Tusi a Mamona (2021)
“Lesona 26 Anomea mo le Sauniuniga o le Vasega,” Anomea a le Faiaoga o Aoaoga ma Aoaoga Faavae o le Tusi a Mamona
Lesona 26 Anomea mo le Sauniuniga o le Vasega
Se’ia Uma ona Tofotofoina o lo Outou Faatuatua
Pe na e tatalo ea mo se vavega? E te sailia se molimau loloto faaleagaga e uiga ia Iesu Keriso ma Lana talalelei? E i ai se mea o loo e faamoemoe e maua mai i le Alii i lou olaga i le taimi nei? Mafaufau i nei faamoemoega ma manaoga a o e suesue atili e uiga i le faatuatua ma le ala o loo aoao mai ai le Tusi a Mamona ia i tatou e faaaoga ai.
Vaega 1
E mafai faapefea e le faaaoga o le faatuatua ia Iesu Keriso ona fesoasoani ou te aoao ma tuputupu a’e ai a o ou fetaia’i ma tofotofoga?
I le tusi a Eteru, ua tusifaamaumauina ai e Moronae e faapea, a o lofituina le nuu o Sa Iareto i taua, fouvalega, ma le amioleaga, na auina atu e le Alii le perofeta o Eteru e folafola atu le faatuatua, salamo ma le faamoemoe i le nuu.
Suesue e Sauniuni ai mo le Vasega
Faitau le Eteru 12:3–7, 12, 18, ma mafaufau pe aisea e taua ai le faatuatua i le Atua mo lo tatou alualu i luma faaleagaga.
Ona e alofa le Alii ia i tatou ma e finagalo ia tatou alualu i luma, ua Ia tuuina mai ai ia i tatou ni avanoa e tofotofo ai lo tatou faatuatua ia te Ia. Na saunoa mai Elder Richard G. Scott o le Korama a Aposetolo e Toasefululua:
O taimi uma lava e te tofotofoina ai lou faatuatua—o lona uiga, galue i le agavaa i se uunaiga—o le a e mauaina le faamaoniga mautu a le Agaga. A o e faatinoina se mea e tusa ai ma lou malamalama aupito sili i mea, ae e te le o mautinoa lava po o le a le mea e fai, o le faatinoga o le faatuatua, o le a taitai atu lava oe ia e maua ni tali semanu e te le mauaina. (“OLe Mana e Liua ai o le Faatuatua ma Uiga Tauleleia,” Liahona, Nov. 2010, 44)
Mafaufau i taimi o lou olaga na e faatinoina ai le faatuatua i le Alii ma mulimuli ane maua ai se molimau faaleagaga. Na faamatala e Elder D. Todd Christofferson o le Korama a Aposetolo e Toasefululua i se tasi taimi le ala na fesoasoani ai le tumau faamaoni i le taimi o se tofotofoga e tuputupu ae ai faaleagaga:
E ui ina sa ou pagatia i lena taimi, ae a ou toe tepa i tua i le taimi lenei, ou te faafetai ona sa leai se fofo vave i lo‘u faafitauli. O le mea moni i le faamalosia o au e liliu atu i le Atua mo se fesoasoani e toetoe lava o aso uma i se vaitau faaumiumi o tausaga, na ou aoao moni ai i le auala e tatalo ma maua ai tali i tatalo ma ou aoao ai i se ala moni lava e maua ai le faatuatua i le Atua. Sa ou iloaina lou Faaola ma lou Tama Faalelagi i se ala ma i se tikeri lea na semanu e le mafai ona tupu i se isi ala pe na semanu foi e umi atu se taimi e ausia ai. … Ua ou aoaoina e faatuatua i le Atua ma lo’u loto atoa. Sa ou aoao e savavali faatasi ma Ia i lea aso ma lea aso. (“Look to God Each Day,” New Era, Apr. 2015, 4)
Mafaufau Loloto i Sauniuniga mo le Vasega
O a ni lesona ua e aoaoina po o a ni faamanuiaga ua e mauaina ao e tumau faamoani i taimi o luitau? E mafai faapefea e lenei ituaiga o aafiaga ona fesoasoani e te latalata atili ai ia Iesu Keriso?
Vaega 2
O a ni auala e mafai ai ona faamanuiaina ma faamalosia aʻu e ala i le faaaogaina o le faatuatua ia Iesu Keriso?
E pei ona tusifaamaumauina i le Eteru 12:7–22, na tuuina mai e Moronae ni fataitaiga o tagata na faaali le faatuatua ma na faamanuiaina i vavega, faaaliga, laveaiga, liuaina, ma folafolaga. O le ta’ua ai o le uso o Iareto, o le na aveesea le mauga o Serima e ala i le mana o le Alii, na faaiuina ai e Moronae, “A na fai e le ia te ia le faatuatua po ua le alu ese; o le mea lea e faia ai [e le Alii] mea pe a mavae ona i ai muamua i tagata le faatuatua” (Eteru 12:30).
Na aoao mai Peresitene Russell M. Nelson:
O le faatuatua ia Iesu Keriso e faaosofiaina i tatou e faia ni mea semanu tatou te le faia. O le faatuatua e uunaia i tatou i faatinoga tatou te maua atili ai Lona mana. (“Mauaina o le Mana o Iesu Keriso i o Tatou Olaga,” Liahona, Me 2017, 41)
Suesue e Sauniuni ai mo le Vasega
Saili se fuaitau po o se tala i le Tusi a Mamona o faaalia ai tagata na mauaina le fesoasoani faalealagi ina ua faaali le faatuatua ia Iesu Keriso. Afai e te manao i ni nai faataitaiga, mafaufau e faitau mea nei:
-
Eteru 6:2–12 (Ua sopoia e sa Iareto le sami i vaa faaofuofu.)
-
1 Nifae 3:4–7; 4:1–19 (Ua toe foi atu Nifae i le fale o Lapana. Atonu e te manao foi e matamata le vitio o le Tusi a Mamona “The Spirit Directs Nifae to Slay Laban (1 Nifae 4:1–19)” [3:26].)
3:26Ua Faatonu e le Agaga ia Nifae e Fasioti ia Lapana | 1 Nifae 4:1–19
Ua maua atu e Nifae Lapana o taoto onā mai le auala. Ua faatonu e le Alii ia Nifae e fasioti ia Lapana.
A uma ona e suesue i se tasi o nei fuaitau po o se tasi na e mafaufauina, mafaufau loloto i fesili nei ma tusifaamaumau au tali. Ia saunia e faasoa atu ou malamalamaaga loloto i le vasega.
-
Na faapefea ona faaalia e le tagata po o tagata le faatuatua ia Iesu Keriso? O a faamanuiaga ma le mana faalelagi na tuuina mai e le Alii ina ua mavae ona latou faaalia le faatuatua ia te Ia?
-
O a ni aoaoga faavae po o ni faiga masani e mafai ona e aoao mai i lenei tala? E mafai faapefea ona e faaaogaina i lou olaga?
Na aoao mai e Elder L. Whitney Clayton o le Au Peresitene o Fitugafulu le mea lenei e uiga i le ola i le faatuatua:
Ua talosagaina i tatou e le Atua ia onosai atu ia te Ia—ia faalagolago atu ia te Ia ma mulimuli atu ia te Ia. Ua Ia aioi mai ia i tatou ina ia “aua tou te masalosalo ona ua outou le vaaia.” Ua lapataia i tatou e le tatau ona tatou faamoemoe i ni tali faigofie po o ni faaleleiga vavave mai le lagi. O le a lelei mea uma pe a tatou tutu mausali i le taimi o le “tofotofoina o lo [tatou] faatuatua,” po o le a lava le faigata o lena tofotofoga e onosaia ai po o le tuai ona oo mai o le tali [tagai Eteru 12:6]. Ou te le o tautala atu e uiga i le “usiusitai tauaso” [tagai Boyd K. Packer, “Agency and Control,” Ensign, Me 1983, 66–68] ae o le mafaufau mautinoa i le alofa atoatoa ma le taimi atoatoa a le Alii. (“Soo Se Mea Lava E Fai Mai Ai O Ia Ia Te Outou, Ia Outou Faia,” Liahona, Me 2017, 99)
Mafaufau Loloto i Sauniuniga mo le Vasega
Aisea atonu e fetalai mai ai le Alii e te faia le mea o le a manaomia ai lou faatinoina o le faatuatua? E mafai faapefea ona e faaalia lou faalagolago ia te Ia ao e agai i luma?
Vaega 3
O le a le mea e manaomia ona ou faia ia maua ai pe faamalosia ai la’u molimau patino o le Tusi a Mamona?
Ina ua mavae le faatamaiaga o le nuu o sa Nifae, sa tuua toatasi na’o Moronae e faauma le Tusi a Mamona. A o le’i faamaufaailogaina ia tusifaamaumau, sa ia tuuina mai ni nai fautuaga ma faamalosiauga. Sa ia uunaia taitai i le lumanai ia suesue i le Tusi a Mamona ma le faatuatua ina ia mafai ona latou maua se molimau patino mai le Agaga Paia ua moni ia.
Suesue e Sauniuni ai mo le Vasega
Faitau le valaaulia a Moronae i le Moronae 10:3–5, ma mafaufau e faailoga pe faapefea ona tatou faaalia le faatuatua ia Iesu Keriso ma faapea ona iloa ai e moni le Tusi a Mamona.
A o avea ai o se tasi o le Korama a Fitugafulu, sa faamalamalama mai ai e Elder Gene R. Cook o le taliaina o le valaaulia a Moronae o se faatinoga o le faatuatua:
Maitau le auala faapitoa lea tatou te maua ai tali mai le Atua: e tatau ona tatou “ole atu ma le loto faamaoni, ma le manatu moni i ai, ma le faatuatua ia Keriso” [Moronae 10:4]. Toe mafaufau i le gagana o le “faatuatua ia Keriso.” O lenei mea e faaalia ai se tulaga taua o le mafaufau. O le i ai o le faatuatua ia Keriso o lona uiga, ua tatou talia o loo i ai se Atua; talia le, e ala i le mana o lona Alo o Iesu Keriso, e mafai ai e le Atua ona tali mai a tatou tatalo; ma talitonu e mafai e le Atua ona faaali mai le mea moni ia i tatou. Tatou te tuu ese i tatou lava mai le laina o le faavaeluatai ma o le faia o lena mea ua faaalia ai le faatuatua ia Iesu Keriso. Tatou te faatinoina! E ui lava atonu e itiiti lo tatou faatuatua, ae tatou te faia e pei ona aoao mai o Alema: tatou te “faaaoga sina vaega itiiti o le faatuatua, ioe, e tusa pe ua le mafai ona [tatou] faia o se isi lava mea nai lo le fia talitonu [e mafai ona fesoasoani mai le Atua ia i tatou], ia tuu lea manao e galue i totonu ia [i tatou]” (Alema 32:27). (“Moroni’s Promise,” Ensign, Apr. 1994, 14)
Tusifaamaumau Ou Manatu
Mafaufau pe o faapefea ona mulimuli le valaaulia ma le folafolaga a Moronae i le mamanu o le mauaina o se molimau pe a uma ona faaali le faatuatua (tagai Eteru 12:6). Na faapefea mai lou aafiaga i le mauaina o se molimau i le moni o le Tusi a Mamona? O le a se mea e mafai ona e faia a le ia maua ai la oe lava molimau i le Tusi a Mamona pe faaloloto ai lau molimau lena ua i ai?