Lesona 10 Anomea a le Faiaoga

Salamo ma le Faamagaloina

Ua ofoina mai e le Tusi a Mamona ni malamalamaaga tulaga ese i le aoaoga faavae o le salamo ma le faamagaloga. O aafiaga o Enosa, le nuu o le Tupu o Peniamina, ma Alema le Itiiti ua faaalia ai o le Faaola o le punavai autu lea o lo tatou faamagaloga ma le toafilemu o le mafaufau. I lenei lesona, o le a maua ai e tagata aoga le avanoa e talanoa ai i fesili e uiga i le faagasologa o le salamo ma aoao ai ia iloa lelei le taimi e faamagaloina ai i latou e le Faaola. O le a mafaufau ai foi tagata aoga i auala e mafai ai ona faaauau pea ona latou salamo ma avea atili e pei o Iesu Keriso.

Fautuaga mo le Aoao Atu

Na faamalamalama mai e Alema le ala na ia maua ai le faamagaloga a le Faaola.

Faaali atu fesili nei e tolu i vaega eseese o le potuaoga. Faatulaga ni nofoa i se li’o e latalata i fesili taitasi. Ia faailoa atu o nei fesili e talitutusa ma fesili o loo i le vaega 1 o anomea mo sauniuniga.

• O le a tonu le uiga o le ia salamo? O le a se fautuaga e mafai ona e tuuina atu i se tasi na uia laasaga o le salamo, ae leai se mea o sui i ona lagona?

• E mafai faapefea ona tatou maua le malosiaga e suia moni ai? O le a sau tala i se tasi ua lotovaivai ona sa latou taumafai malosi lava e avea ma ni tagata lelei, ae latou te faia pea na mea sese masani?

• Ae faapefea pe a lagona e se tasi ua leai so latou faamoemoe? E mafai faapefea ona e fesoasoani i se tasi ua lagona e le tatau ona latou popole i le salamo ona ua matuai leaga tele a latou agasala e le mafai ai ona faamagaloina i latou?

Valaaulia tagata aoga e vaai faalemafaufau o i latou o ni faifeautalai o loo sauni e tali se tasi o seti o fesili mo a latou tagata sailiili pe o loo latou sauniuni e fesoasoani i se tagata e pele ia i latou o loo tauivi ia salamo. Ona fai atu lea i tagata aoga e saofafai i se nofoa e latalata i fesili latou te fia talanoaina. Faamalosiau i tagata aoga e faaaoga le tala i le aafiaga o Alema ma isi fuaitau mai le Tusi a Mamona e mafai ona fesoasoani e tali ai a latou fesili.

Tofi se taitai o le talanoaga mo vaega taitasi, ma tuu atu i taitai taitoatasi se kopi o faatonuga o loo maua i le faaiuga o anomea o le lesona lenei. Ia lava le taimi e tuu atu i vaega ia faia ai ni talanoaga anoa.

A uma ona tuu atu i tagata aoga le taimi e talanoa ai, atonu e te manao e valaaulia se tasi pe sili atu mai vaega taitasi e tuuina mai ni aotelega pupuu o mea na aoaoina ma lagonaina e a latou vaega i le taimi o a latou talanoaga.

Sa oo Enosa, le nuu o le Tupu o Peniamina, ma Alema i le olioli o le faamagaloga.

Fai i tagata aoga e manatunatu pe na latou, poo tagata foi latou te iloa, na tuufesili pe faapefea ona iloa ua faamagaloina i latou e le Faaola i a latou agasala. Valaaulia tagata aoga e sue i le Enosa 1:4–8; Mosaea 4:1–3; ma le Alema 36:19–21, ma vaavaai mo auala e iloa ai ua faamagaloina i tatou.

Faaleleia o Lo Tatou Aoao Atu ma le Aoaoi Mai

Iloa le mana o aoaoga e faatotonugalemu ia Keriso. Sa saunoa atu Chad H Webb, o le taitai o Seminare ma Inisitituti o Mataupu Faalelotu, i faiaoga: “O le auala e tasi e sili ona taua e mafai ai ona tatou fesoasoani e faateleina le faatuatua i le tupulaga faia’e o le tuu atoatoa atili lea o Iesu Keriso i le totonugalemu o lo tatou aoao atu ma le aoao mai e ala i le fesoasoani i a tatou tagata aoga ia iloa o Ia, ia aoao mai ia te Ia, ma taumafai malosi e avea e faapei o Ia” (“We Talk of Christ, We Rejoice in Christ” [address given at the Seminaries and Institutes of Religion annual training broadcast, June 12, 2018], ChurchofJesusChrist.org). A o e sauni e aoao atu, fesili ifo ia te oe lava: E mafai faapefea ona ou fesoasoani i tagata aoga ia atoatoa atili ona iloa, alofa, ma mulimuli i le Faaola e ala i lenei aafiaga e aoao ai?

• O le fea o upu po o fasifuaitau o loo i nei fuaiupu e tulaga ese ia te oe? Aisea e te manatu ai na tosina lou mafaufau i na fuaitau?

• Aisea e taua ai le talitonu ma talia faapea o Iesu Keriso e naunau, emaffai, ma finagalo e faamagalo a tatou agasala ma aveese lo tatou ta’usalaga? (Mafaufau e valaaulia tagata aoga e toe iloilo le vaega 3 o anomea mo sauniuniga.)

• E mafai faapefea ona tatou iloa ua faamagaloina i tatou e le Faaola mai a tatou agasala? (Fesoasoani i tagata aoga e faailoa se mataupu faavae e pei o lenei: A tatou salamo faamaoni ma faatuatua ia Iesu Keriso, e faamagalo ma faamanuia e Ia i tatou i le olioli ma le filemu o le mafaufau.)

• O le a se taimi na e oo ai i le olioli ma le filemu o le faamagaloga mai le Alii, ma na faapefea e lenei aafiaga ona tosina ai lou olaga? (Faamalosiau i tagata aoga e talanoa e uiga i o latou lagona o le faamagaloga ae le o itu e fitoitonu i a latou agasala.) O a ou manatu ma lagona e uiga i le mafai ma le finagalo o le Faaola e faamagalo oe?

I le taimi o lau talanoaga, atonu e fesoasoani le faasoa atu o le saunoaga lenei a Elder Neil L. Andersen:

Mo i latou o e ua salamo faamaoni ae e foliga mai e le o mafai ona lagona le mapusaga: ia faaauau pea ona tausia poloaiga. Ou te folafola atu ia te outou, o le a oo mai lena mapusaga i le taimi a le Alii. O le faamaloloina e manaomia ai foi le taimi. (“Salamo … Ina Ia Ou Faamaloloina Outou,” Liahona, Nov. 2009, 42)

Faamatalaga: Mo tagata aoga o e atonu e lagona le lotovaivai i le faagasologa o le salamo ona o a latou taumafaiga e le’i maua ai i le taimi nei se toomaga, ofo atu ni upu faamalosiau ma valaaulia i latou ia faaauau pea ona liliu atu i le Alii ma atonu e faasoa atu foi o latou atugaluga faapitoa i o latou epikopo.

Tuu atu se taimi mo tagata aoga e iloilo ai o latou olaga ma faailoa soo se mea e tatau ona latou salamo ai. Valaaulia tagata aoga e tusifaamaumau soo se uunaiga latou te maua.

Faasoa atu lau molimau e uiga i le aoaoga faavae o le salamo ma le faamagaloga. Fuafua e valaaulia le tagata aoga e faasoa mai foi a latou molimau.

Mo Le Isi Taimi

Fesili i tagata aoga pe ua faapefea ona faamanuiaina o latou olaga i a latou feagaiga o le papatisoga ma isi feagaiga. Valaaulia i latou, a o latou suesue i anomea mo sauniuniga mo le isi vasega e sosoo ai, ia mafaufau i a latou ala o feagaiga ma le ala e fusia ai i latou i le Faaola ma Lona mana i le faamamaluina o feagaiga.

Talanoaga a Vaega Toalaiti i le Salamo

Anomea a le Faiaoga o Aoaoga ma Aoaoga Faavae o le Tusi a Mamona,—Lesona 10

Faamatalaga mole taitai o le talanoaga: Faamolemole faaaoga faatonuga nei e faafoe ai se talanoaga ma tagata o lau vaega. Uunaia tagata uma o lau vaega ia tofu sao mai. Peitai, e le tatau ona tauanauina, e le tatau ona lagona e se tasi faapea ua uuna’ia e faasoa mai.

Valaaulia tagata o le vaega e faaalu ni nai minute e toe faamanatu ai le vaega 1 o anomea mo sauniuniga ma mau e faatatau i ai (tagai Mosaea 27:35; Alema 36:12–13, 17–21, 24). Fai i tagata aoga e vaavaai mo mataupu faavae e faatatau i le fesili a lau vaega. Ia valaaulia foi tagata o le vaega ina ia saunia e faasoa mai soo se mau faaopoopo atonu na latou maua a o latou sauniuni mo le vasega lenei.

Ia filifili faatasi po o le fea o fesili nei o le a sili ona taua e talanoaina e lau vaega. Ina ia malamamalama atili i nei manatu, atonu e sili atu le taua o le talanoa mae’ae’a i se fesili se tasi pe lua nai lo o le taumafai e talanoaina fesili uma.

• O a ni mataupu faavae e mafai ona tatou aoao mai i le aafiaga o Alema e faatatau i le tatou fesili? O a ni auala ua faamanuiaina ai oe i le mulimuli i nei mataupu faavae?

• O a isi mau po o aoaoga mai le Tusi a Mamona e mafai ona fesoasoani e tali ai le fesili lenei? O faapefea ona fesoasoani nei upumoni ua aoaoina i nei mau e te maua ai le mana o le salamo?

• O le a le matafaioi a Iesu Keriso i lo tatou salamo? O le a sou lagona i le naunau o le Faaola e faamagalo oe i au agasala?

• E faapefea ona fesootai le poloaiga ia ofo atu i le Faaola “se loto momomo ma se agaga salamo” (3 Nifae 9:20) i la tatou fesili? (Afai tou te talanoaina le fesili mulimuli lenei, atonu e aoga le toe iloilo o le 3 Nifae 9:19–20 o le saunoaga a Elder Bruce D. Porter mai le vaega 2 o anomea mo sauniuniga.)

© 2021 Puletaofia e le Intellectual Reserve, Inc. Ua taofia aia tatau uma.

Talanoaga a Vaega Toalaiti i le Salamo