Lesona 12 Anomea a le Faiaoga: O Lo Tatou Manaomia o le Toefanauina Faaleagaga
“Lesona 12 Anomea mo Sauniuniga o le Vasega: O Lo Tatou Manaomia o le Toefanauina Faaleagaga,” Anomea a le Faiaoga o Aoaoga ma Aoaoga Faavae o le Tusi a Mamona (2021)
“Lesona 12 Anomea a le Faiaoga,” Anomea a le Faiaoga o Aoaoga ma Aoaoga Faavae o le Tusi a Mamona
Lesona 12 Anomea a le Faiaoga
O Lo Tatou Manaomia o le Toefanauina Faaleagaga
I lo tatou tulaga pa’ū, ua tatou le agavaa ai e mau i le afioaga o le Atua. Ona o Iesu Keriso ma e ala i Lona mana togiola, e mafai ai ona tatou toe fanauina faaleagaga o ni Ana fanau o le feagaiga ma agavaa ai mo le mamalu selesitila. I lenei lesona, o le a maua ai e tagata aoga le avanoa e faaloloto ai lo latou malamalama e uiga i le toefanauina faaleagaga ma faamatala ai le ala e mafai ai e Iesu Keriso ona sui o tatou loto. O le a iloilo ai foi e tagata aoga mea e mafai ona latou faia e ola lelei ai i le aoaoga faavae a Keriso ina ia loloto ai lo latou liuga.
Fautuaga mo le Aoao Atu
Faaleleia o Lo Tatou Aoao Atu ma le Aoao Mai
Fesoasoani i tagata aoga ia talia le tiutetauave mo lo latou lava aoaoina. “O le aoaoina e tatau ona faia e le [tagata aoga]. O le mea lea, o le [tagata aoga] la e tatau ona tuu i le faatinoga” (Teaching the Gospel: A Handbook for CES Teachers and Leaders [1994], 14). Sa matauina e Sister Virginia H. Pearce, o le sa avea ma fesoasoani i le Au Peresitene Aoao o Tamaitai Talavou: “E tau le mafaufau se faiaoga ua i ai le tomai e faapea, ‘O le a se mea ou te faia i le vasega i le asō?’ ae e fesili, ‘O le a le mea e fai e a’u tamaiti i le vasega i le asō?’; e lē o le ‘O le a se mea ou te aoao atu i le aso?’ ae o le ‘E faapefea ona ou fesoasoani i a’u tamaiti ia iloa le mea e tatau ona latou iloa?’ [Teaching the Gospel: A Handbook for CES Teachers and Leaders, 13]” (“The Ordinary Classroom—a Powerful Place for Steady and Continued Growth,” Ensign, Nov. 1996, 12).
Sa oo le nuu o le Tupu o Peniamina i le toefanauina faaleagaga.
Faaali atu le saunoaga lenei a Peresitene Dallin H. Oaks: “E le … lava mo i tatou le talitonuina o le talalelei; e ao ona tatou galulue ma mafaufau ina ia tatou liua ai” (“The Challenge to Become,” Ensign, Nov. 2000, 32).
Faamanatu atu i tagata aoga e faapea o le vaega 1 o anomea mo sauniuniga sa latou faitau ai i se tala i le toefanauina faaleagaga o le nuu o le Tupu o Peniamina. A manaomia, e mafai ona toe iloilo e tagata aoga le Mosaea 4:2–3 ma le Mosaea 5:2–7, ma vaavaai mo le fesootaiga i le va o le aoaoga faavae a Keriso ma le liuaina. E mafai ona e fai atu nisi po o fesili uma nei e faaloloto atili ai malamalamaaga o tamaiti aoga e uiga i upumoni na latou tau i ai.
O a vaega o le aoaoga faavae a Keriso na faaaoga e le nuu o le Tupu o Peniamina, ma na faapefea ona faatosinaina ai lo latou toe fanauina faaleagaga? (Fesoasoani i tagata aoga e faailoa mai se mataupu faavae e pei o lea: A o tatou taumafai e ola i le mataupu faavae a Keriso, o le a suia e le Faaola o tatou loto ma fesoasoani ia tatou toefanauina faaleagaga.)
Aisea e taua ai le iloa o le matafaioi a le Faaola i lou toefanauina faaleagaga ma le liuga?
O le a se mea ua e iloa e uiga ia Iesu Keriso ua musuia ai oe e liliu atu ia te Ia ia suia lou loto?
Na faapefea ona suia e Iesu Keriso lou loto? O le a sou lagona e uiga ia te Ia mo le fesoasoani ina ia e faia lena suiga? (Faamalosiau i tagata aoga e faasoa atu aafiaga e le patino tele, pe valaaulia i latou e tusifaamaumau se aafiaga i a latou api talaaga.)
O a ni auala e tatala ai e elemene taitasi o le aoaoga faavae a Keriso o le (faatuatua, salamo, papatisoga, ma le meaalofa o le Agaga Paia, ma le tumau seia oo i le iuga) ona tatalaina faitotoa mo le Faaola ia suia lou loto?
Valaaulia tagata aoga e mafaufau i se suiga o le loto latou te mananao ia oo i ai, ma fesili atu:
Na tanumia e le au Aneti-Nifae-Liae a latou auupega.
Faamalamalama atu e tusa lava pe uma ona maua e se tagata se suiga tele o le loto, e mafai lava ona mou ese lona tuuto. Faaali atu le saunoaga lenei a Elder Dale G. Renlund:
Ata
Elder Dale G. Renlund
Tatou te iloa uma tagata o e na i ai lenei suiga tele o le loto, ae mullimuli ane na gauai atu i le tagata natura. Sa oo ina latou le amanaia a latou tapuaiga ma tuutooga i le Atua, na oo ina faamaaaina o latou loto, ma sa faapena ona latou lamatiaina ai lo latou faaolataga e faavavau. (“Taofimau i le Liliu Tele o le Loto,,” Liahona, Nov. 2009, 99)
Aisea atonu e manatu faasamasamanoa ai se tagata na oo i se suiga tele o le loto, i lana tapuaiga ma le tuuto i le Atua?
Ina ia tuuina atu se faatusatusaga i tagata na faamatalaina mai e Elder Renlund, mafaufau e faaali atu le ata lenei. Valaaulia tagata aoga e faamalamalama le tala i le au Aneti-Nifae-Liae ma ia faamatala le mea na mafua ai ona tanumia e le au Aneti-Nifae-Liae a latou auupega o le taua.
A o faasoa mai e tagata aoga mea latou te iloa e uiga i Aneti-Nifae-Liae, e mafai ona e faaaogaina nisi o fuaitau nei e faailoa ai le loloto o le suiga ma le liua o tagata ia Iesu Keriso: Alema 23:6–7; Alema 24:9–11, 15; ma le Alema 27:27.
O a mea na taofiofia ai le au Aneti-Nifae-Liae mai le manatu faasamasamanoa i la latou tapuaiga ma le tuuto i le Atua?
O a ni lesona mai i nei fuaitau e mafai ona fesoasoani ia te oe e faaleleia atili ai au taumafaiga ina ia “mausali i lo latou faatuatua ia Keriso, e oo i le iuga” (Alema 27:27)?
Atonu e te valaaulia tagata aoga e mafaufau loloto po o a ni auupega o le fouvale o ono taofia i latou mai le oo patino i se suiga tele o le loto.
Ina ia fesoasoani i tagata aoga e faaaoga mea ua latou aoaoina i lenei lesona ma le iunite, faatulaga tagata aoga i ni vaega toalaiti ma tofi se taitai o le talanoaga mo vaega taitasi. Tuu atu i vaega taitasi le pepa o tufaaga, ma ia mautinoa e lava se taimi o tagata aoga e faia ai se talanoaga anoa. Pe a talafeagai ma le taimi, valaaulia tagata aoga e faasoa mai i le vasega mea na latou talanoaina.
Talanoaga a Vaega Toalaiti i le Toefanauina Faaleagaga
Anomea a le Faiaoga o Aoaoga ma Aoaoga Faavae o le Tusi a Mamona,—Lesona 12
Faamatalaga mo le taitai o le talanoaga: Faamolemole e taitai se talanoaga ma tagata o lau vaega e uiga i le vaaiga faataitai lenei. Uunaia tagata uma o lau vaega ia tofu sao mai. Peitai, e le tatau ona i ai se tasi e lagona le faamalosia e faasoa mai o latou manatu.
Sa fiafia Pablo i lana auaunaga faamisiona ma lagona sa o’oo’o le talalelei i lona loto. Sa foi o ia i le aiga mai lana misiona sa faatumulia i le olioli ma faamoemoega maoae mo lona lumanai. I le mavae ai o ni nai vaiaso talu ona i ai i le aiga, sa amata ona ia lagonaina le le manaomia o ia ma le leiloa. Sa tele taimi sa ia lagonaina ai le tuuatoatasi. I se taumafaiga e faatoilalo nei lagona, sa tele ni gaoioiga ma ni galuega faatino eseese sa ia auai i ai. Na faasolo ina amata ona ia lafoai i ana tatalo ma suesuega patino o tusitusiga paia . Sa seāseā ona alu i le lotu, ma lata mai nei sa faaosoosoina ai o ia e toe foi i nisi o amioga leaga sa ia faia a’o lei alu i lana misiona.
Fesili mo Talanoaga:
O a ni upumoni e uiga i le toefanauina faaleagaga ma se suiga o le loto atonu e sili ona taua i le tulaga o Pablo?
Ana faapea o Pablo o sau uo, o le a se mea e te faasoa atu ia te ia e uiga ia Iesu Keriso e ono fesoasoani ia te ia e toe faaolaola ai se suiga o le loto?
O a ni lesona e mafai ona aoao e Pablo mai i le au Aneti-Nifae-Liae?
Mafaufau e tuu atu i tagata aoga ni nai minute e lipoti mai ai ni mea na latou aoaoina i talanoaga a a latou vaega. Atonu e te tuu atu foi ia i latou le taimi e mafaufau loloto ai i mea latou te lagona le musuia e fai ona o mea na latou aoaoina ma lagonaina i le asō. Mafaufau e valaaulia i latou e faasoa mai pe o faapefea ona tuputupu ae lo latou malamalama ma le molimau i le aoaoga faavae a Keriso a o latou suesueina le iunite lenei.
Mo Le Isi Taimi
A o e sauni e faauma le vasega, e mafai ona e faaali atu le saunoaga lenei a Peresitene Russell M. Nelson: “Ma te fia talanoa atu ia te outou e uiga i le luitau aupito silisili i le mafuaaga aupito silisili , ma le galuega aupito silisili i le lalolagi. Ma ma te mananao e valaaulia oe e avea o se vaega o lena mea!” (Russell M. Nelson ma Wendy Nelson, “Faamoemoe o Isaraelu” [faigalotu a le autalavou i le lalolagi atoa, 3 Iuni, 2018], faaopoopoga i le New Era ma le Ensign, 3, HopeofIsrael.ChurchofJesusChrist.org). A o suesue tagata aoga i le anomea mo sauniuniga mo le vasega e sosoo ai, ia faamalosiau ia i latou e mafaufau i a latou matafaioi i lenei faamoemoega maoae: o le faapotopotoina o Isaraelu.
