Lesona 2 Anomea a le Faiaoga

Tali Atu i Perofeta a le Alii

E faaali mai ma aoao mai e perofeta a le Alii le afioga a le Atua. Ao tatou ua’i atu i a latou aoaoga, e mafai ona tatou maua le mana o le afioga a le Atua i o tatou olaga. A uma le lesona lenei, ua tatau ona mafai e tagata aoga ona faamatala le ala e faamanuiaina ai i tatou pe a tatou faalagolago i perofeta a le Alii ma savali ua valaauina i latou e molimoli mai. O le a iloilo foi e tagata aoga a latou lava taumafaiga e ua’i atu i fautuaga faaperofeta lata mai nei.

Fautuaga mo le Aoaoina Atu

Faaleleia o Lo Tatou Aoao Atu ma le Aoaoina

Fetuunai anomea o le lesona ia fetaui ma manaoga o tagata aoga. O nisi taimi e tele ai anomea o lesona nai lo o mea e mafai ona lava ona e talanoaina i le vasega. Nai lo o le taumafai e talanoaina mea uma i le fuafuaga o le lesona, ia taulai atu i mau ma anomea o le a sili ona fesoasoani i au tagata aoga ia faia ni faatinoga anoa, amiotonu ina ia mafai ona latou avea atili e pei o le Tama Faalelagi ma Iesu Keriso. Saili le taitaiga mai le Agaga Paia ma mai i tagata aoga e fesoasoani e te iloa ai po o a mataupu faavae, fesili, ma gaoioiga e faaaoga i le vasega.

Na auina atu e le Alii ia Liae e vavalo atu i tagata o Ierusalema.

Amata le vasega i le fai atu i tagata aoga e manatunatu i se taimi na tali le lelei atu ai se tasi i se savali po o se manatu sa latou taumafai e faasoa atu.

• Aisea e faaauau ai ona faasoa atu e le au paia, faifeautalai, ma perofeta ia savali latou te iloa e ono le lauiloa?

O Liae o Loo Talai Atu i Ierusalema, saunia e Del Parson

Faaali atu se ata o Liae o loo talai atu. Valaaulia se tagata aoga e faamatala le tulaga o le siosiomaga mo le amataga o le Tusi a Mamona e pei ona tusifaamaumauina i le 1 Nifae 1. (Afai o loo e aoao atu faatasi lesona muamua e lua o le kosi, atonu e le maua se avanoa o tagata aoga e suesue ai le anomea mo sauniuniga mo le lesona lenei. Atonu e te manao e valaaulia se tagata aoga e faitau leotele le 1 Nifae 1:4 .)

• O a ni mea ua tatou iloa e uiga i le Alii ma Ana perofeta i le amataga o le Tusi a Mamona? (Mafaufau e faitau pe toe faamanatu ma tagata aoga le saunoaga a Peresitene Henry B. Eyring i le vaega 1 o anomea mo sauniuniga.)

Faamalamalama atu e faapea i se faaaliga vaaia, na tuuina atu ai e le Alii ia Liae se tusi e faitau. Na faitau ai Liae o le a faaumatia Ierusalema. (Tagai i le 1 Nifae 1:12–13.)

Faitau faatasi le 1 Nifae 1:14 , ma vaavaai mo le ala na tali atu ai Liae i le faaaliga vaaia.

• O a mea na aoaoina e Liae e uiga i le uiga auaumama o le Alii? O a ni auala e te manatu o lenei malamalamaaga i le alofa mutimutivale o le Alii na aafia ai le faaiuga a Liae e vavalo atu i tagata o Ierusalema?

Valaaulia tagata aoga e faitau le 1 Nifae 1:18–19, ma vaavaai mo le mea e mafai ona tatou aoaoina e uiga i perofeta mai le aafiaga a Liae. Fesoasoani i tagata aoga e faailoa mai upumoni e pei o nei: E folafola mai e perofeta le afioga ma le finagalo o le Alii. E aoao mai ma molimau mai perofeta e uiga ia Iesu Keriso ma le togiola lea e oo mai e ala mai ia te Ia.

• O a nisi o savali lata mai nei mai a tatou perofeta ma aposetolo ua folafola mai ai afioga ma le finagalo o le Alii?

Valaaulia tagata aoga e toe faamanatu ia saunoaga mai ia Elder D. Todd Christofferson ma Elder Ulisses Soares i le vaega 1 o anomea mo sauniuniga ma faasoa atu mea e tulaga ese ia i latou.

• E faapefea e nei saunoaga ona aafia ai ou manatu e uiga i o tatou perofeta i aso nei? E faapefea ona aafia ai le ala e te manatu ai e uiga ia Iesu Keriso?

• O a ni savali lata mai nei faaperofeta ua fesoasoani e te iloa lelei ai le alofa o le Atua mo Lana fanau? (Na mafaufau loloto tagata aoga i se fesili e talitutusa ma lenei ina ua latou suesueina le vaega 1 o anomea mo sauniuniga.)

Na maua e Nifae se faamautinoaga e aoao mai e perofeta le afioga a le Atua.

Valaaulia tagata aoga e faailoa mai nisi o aoaoga faaperofeta atonu o tauivi tagata e talia i o tatou aso. (Faamatalaga: Afai e manaomia, faamanatu i tagata aoga o lo tatou faamoemoega e le o le faitio i perofeta ae ia talanoa i auala e mafai ona tatou tali atu ai ma le faatuatua i se savali faaperofeta lea atonu e faigata ia i tatou po o se tasi tatou te iloa ona malamalama i ai pe talia.)

• Aisea e ono avea ai ma luitau i nisi taimi le taliaina o mea e folafola mai e se perofeta?

Faaali atu pe fai atu le fesili lenei: O le a se mea e mafai ona ou faia pe a ou tauivi ma se mea e aoao mai e perofeta? A o talanoaina e tagata aoga lenei fesili, ia saoloto e faaaoga uma po o nisi o anomea nei e fesoasoani ia latou mafaufau ai i le ala o le a latou tali atu ai pe o i latou po o se tasi latou te iloa na i ai lenei atugaluga.

Fai atu i tagata aoga e vaai faalemafaufau pe na faapeī ni lagona na i ai i le aiga o Liae ina ua ta’u atu e Liae na finagalo le Alii ia latou tuua lo latou aiga ae malaga atu i le vao.

• Na faapeī le tali atu a Lamana ma Lemuelu i le tuua o lo latou aiga? Na faapefea ona tali atu Nifae? (Valaaulia i latou e toe faamanatu le 1 Nifae 2:11–13, 16–17. Atonu e te faailoa atu, atonu na manaomia foi ona faamaluluina le loto o Nifae [tagai i le 1 Nifae 2:16].)

• O a nisi auala eseese na tali atu ai tagata o le Tusi a Mamona i perofeta ma a latou savali? (Atonu e te manao e tuu atu i tagata aoga se taimi e toe faamanatu ai mea na latou aoaoina a o suesue i le vaega 3 o anomea mo sauniuniga.) O a ni taunuuga o a latou amioga? O le a se taimi na e vaaia ai ni faataitaiga talitutusa o nei ituaiga tali eseese i o tatou aso?

• O le a se mea e mafai ona tatou aoao mai i le tali a Nifae i le savali a lona tamā? O le a le matafaioi a le Alii i le fesoasoani ina ia tatou iloa pe moni upu a Ana perofeta? (E mafai e tagata aoga ona faailoa mai se mataupu faavae e pei o lenei: A tatou faamaulalo i tatou lava ma liliu atu i le Alii, e mafai ona fesoasoani o Ia e faamalulu o tatou loto i le moni o upu a perofeta.)

Faitau atu le saunoaga lenei a Peresitene Russell M. Nelson:

Peresitene Russell M. Nelson

E mafai ona e iloa mo oe lava le mea ua moni ma le mea e le moni e ala i le aoao ia iloatino musumusuga a le Agaga. …

O’u uso e ma tuafafine pele, ou te aioi atu ia te outou ia saili maelega se faamaoniga mai le Agaga o mea ua ou ta’u atu ia te outou ua moni ua mai le Alii. Ua Ia folafola mai e mafai ona tatou sailia le malamalama mai le lagi ma faamoemoe e maua [tagai i le Mataupu Faavae ma Feagaiga 42:61]. …

Fesili atu i lou Tama Faalelagi pe o i matou moni o ni aposetolo ma perofeta a le Alii. (“The Love and Laws of God” [saunoaga na tuuina atu i se faigalotu a le Iunivesite a Polika Iaga, 17 Sete., 2019], 4–5, speeches.byu.edu)

• O a ni aafiaga sa e mauaina i le aoaoina mo oe lava o le moni o se valaauga faalelagi po o se savali a se perofeta?

A o e faaumaina le talanoaga e uiga i le fesili, “O le a se mea e mafai ona ou faia pe afai ou te tauivi ma se mea e aoao mai e se perofeta?” mafaufau e tuu atu i tagata aoga se taimi e mafaufau loloto ai ma tusifaamaumau mea na latou lagonaina pe aoaoina e ono fesoasoani ia i latou po o se isi tagata o i ai se fesili faapena.

Atonu e te manao e valaaulia ni nai tagata aoga e faasoa mai se mea o le a ese ona latou faia i le lumanai pe a latou tauivi ma se mea e aoao mai e se perofeta.

Mo Le Isi Taimi

Atonu e te manao e faaali atu se ata o le faaaliga vaaia a Liae o le laau o le ola ma valaaulia tagata aoga e mafaufau a o latou suesue i le anomea mo sauniuniga mo le isi vasega e sosoo ai, se mea e mafai ona aoao mai e lenei faaaliga vaaia ia i tatou e uiga i le mana o le afioga a le Atua.