Lesona 15 Anomea a le Faiaoga

Saunia mo le Afio Mai o Iesu Keriso

I le iunite lenei o le a aoao ai e tamaiti aoga ni mea taua na tutupu ma aoaoga e fesootai ma le galuega a Iesu Keriso ia sa Nifae ma sa Lamana. Ao e sauni e talanoa i anomea i lenei iunite, vaavaai mo auala e fesoasoani ai i tamaiti aoga e faalolotoina a latou molimau i Lana misiona paia.

I le lesona lenei o le a maua ai e tamaiti aoga se avanoa e suesue ai i le ala ua tuuina mai ai e le Tusi a Mamona se mamanu e sauniuni ai mo le Afio Mai Faalua o le Faaola. O le a latou mafaufau ai i mea e mafai ona latou faia e faatoilalo ai lagona o le fefe ma tali atu i savali e ono afua ai le masalosalo, ina ia mafai ona latou lagona le saunia lelei mo Lona toe foi mai.

Fautuaga mo le Aoaoina Atu

Ua vavalo Samuelu le sa Lamana i faailoga o le a muamua faaali mai ao lei soifua mai Iesu Keriso.

Faaali atu le ata o le Afio Mai Faalua o Iesu Keriso, ma fesili atu:

• O a ni faailoga na valoia po o ni tulaga e faatatau i aso amuli ma le Afio Mai Faalua e ono afua ai le lagona popole o tagata? (Afai o faigata i tamaiti aoga ona faailoa mai faailoga o taimi, atonu e te manao e valaaulia i latou e toe iloilo vave le tusiga “Faailoga o Taimi” i le Taiala i Tusitusiga Paia [tagai scriptures.ChurchofJesusChrist.org].)

• O le a se mea e mafai ona tatou aoao mai i le mea moni e faapea, e faaali mai e le Alii faailoga a o lei afio mai o Ia i Lona nuu?

• E mafai faapefea ona fesoasoani le Tusi a Mamona ia i tatou e faaitiitia ai lagona popole, saunia lelei, ma ia faateleina le olioli i le toe foi mai o le Alii i le lalolagi? (Atonu e te manao e toe iloilo le saunoaga a Peresitene Benson o loo i le faatomuaga o anomea mo sauniuniga.)

Faaleleia o lo Tatou Aoao Atu ma le Aoaoina

Tuu atu i tamaiti aoga ni avanoa e faamalosi ai e le tasi le isi. Tatou te potopoto faatasi o ni soo o Iesu Keriso e le gata ina ia aoao mo i tatou lava ae ia fesoasoani e faamalosi le tasi ma le isi (tagai Moronae 6:4–5). I le aluga o le vasega, vaavaai mo ni auala e fatufatu ai ni avanoa mo tamaiti aoga ia faia ni talanoaga a le talavou i le talavou. Atonu o se taimi sili ona lelei mo nei talanoaga o le taimi lea e valaaulia ai tamaiti aoga e talanoa ma se paga pe fai se talanoaga i ni vaega toalaiti. I le taimi o talanoaga a le vasega, ia faaeteete e aua le faomalo i le talanoaga. Mo se faataitaiga, ae e te le’i tali atu i le fesili po o se atugaluga a se tamaitiitiaoga, mafaufau e valaaulia lana tupulaga e tali muamua. Nai lo le faasoa atu o ou aafiaga patino e sili ona e fiafia i ai, faamalosiau tamaiti aoga e faasoa mai ni o latou aafiaga. Aua le na o le vaai mo avanoa e faasoa atu ai lau molimau, ae ia tuu atu i tamaiti aoga ni avanoa e faasoa mai ai foi a latou molimau.

Faaali atu le fesili lenei: E tusa ai ma le Helamana 14:9–13, aisea na sau ai Samuelu e talai ma vavalo atu ia sa Nifae?

Mafaufau e valaaulia tamaiti aoga e galulue i paga e suesue ai mau atofaina ma talanoa pe o le a faapefea ona latou taliina le fesili. Valaaulia ni nai tamaiti aoga e faasoa mai mea na latou aoaoina. E tusa ai ma manatu faaalia o tamaiti aoga, mafaufau po o le fea o fesili nei e te ono fesili atu ai e fesoasoani ai i tamaiti aoga e sauni e faaaoga mea o loo latou aoaoina:

• E mafai faapefea e le iloa ma le talitonu i faailoga ma mea ofoofogia o le afio mai o Keriso ona suia o tatou olaga? (Tuu i tamaiti aoga se taimi e talanoaina ai lenei fesili i le tasi ma le isi, ona valaaulia lea o i latou e faasoa mai o latou malamalamaaga loloto i le vasega atoa. Fesoasoani i tamaiti aoga e faailoa mai se mataupu faavae e talitutusa ma lenei: O le iloa ma le matauina o faailoga o le afio mai o Keriso e mafai ona fesoasoani e taitai atu ai i tatou e talitonu ia te Ia ma salamo i a tatou agasala.)

• Aisea e tatau ai i faailoga ma mea ofoofogia e fesootai i le Afio Mai Faalua o le Alii ona faateleina lo tatou faamoemoe ae le o le faateleina o lo tatou matatau? O a ni auala o faaalia ai e faailoga ma mea ofoofogia e fesootai ma le Afio Mai Faalua ona faaalia ai le alofa ma le popole o le Atua mo Ana fanau?

• O a ni aoaoga po o ni faailoga faavaloaga o le Afio Mai Faalua ua musuia ai oe ina ia e saunia lelei mo le toe foi mai o le Alii? (Ina ia fesoasoani i tamaiti aoga ia iloa le ala ua faaalia mai ai le alofa o le Atua i o tatou aso, e mafai ona e valaaulia i latou e faasoa mai pe sue ni mea na aoaoina lata mai nei e perofeta ma aposetolo soifua e uiga i le saunia mo le toe foi mai o le Alii.)

Faaali atu le saunoaga lenei a Elder D. Todd Christofferson:

Muamua, ma e taua tele mo le toe afio mai o le Alii, le i ai i luga o le fogaeleele o se nuu ua saunia e talia o Ia i Lona afio mai. (“Sauniuniga mo le Toe Foi Mai o le Alii,” Liahona, Me 2019, 82)

Tuu atu i tamaiti aoga ni nai minute e mafaufau loloto ma tusifaamaumau ai o latou mafaufauga e uiga i le fesili lenei:

• O le a se mea e tatau ona e amata faia pe taofia le faia ina ia mafai ai ona e lagona le saunia lelei e talia Iesu Keriso i Lona afio mai?

E tofotofoina le faatuatua o e talitonu a o latou faatalitali ma le mausali mo le faataunuuina o faailoga na valoia.

Fuafua e vaevae le vasega i ni vaega toaitiiti mo talanoaga. Valaaulia vaega taitasi e suesue faatasi i le Helamana 16:13–22 ma le 3 Nifae 1:4–15, 22 , ma vaavaai mo le auala e faatupuina ai e Satani le masalosalo i le fanau mai o le Faaola ma le ala na tali atu ai ē faamaoni. A maea loa se taimi talafeagai, valaaulia se tagata mai vaega taitasi e faasoa mai le mea na ia mauaina. A o faasoa mai e tamaiti aoga o latou malamalamaaga loloto, mafaufau e fai atu nisi o po o fesili uma nei e fesoasoani e faaloloto ai le talanoaga a lau vasega:

• O faapefea ona faaaogaina nei lava faiga o le faasalalauina o le masalosalo i o tatou aso?

• O le a le mea na faia e nisi o sa Nifae ma sa Lamana e tumau faamaoni ai ina ua faafetoai i latou e le masalosalo ma le tetee mai tagata le talitonu? (Atonu e te faaali atu se mataupu faavae e pei o lenei: O le faalagolago i le Alii ma vaavaai atu ma le mausali mo Lona afio mai, e mafai ona fesoasoani tatou te tali atu ai ma le faatuatua i le le talitonu ma le masalosalo.)

• O le a se mea e mafai ona tatou faia e mautinoa ai tatou te tumau malosi ma mausali a o tatou tepa taulai atu i le Afio Mai Faalua o Iesu Keriso? (Mafaufau e toe iloilo ia saunoaga a Peresitene Bonnie L. Oscarson ma Elder D. Todd Christofferson i le vaega 2 o anomea mo sauniuniga.)

• Na faapefea ona fesoasoani le faalagolago i le Alii ia te oe i taimi e feagai ai ma tagata le talitonu ma savali e ono afua ai le masalosalo? E mafai faapefea ona tatou fesoasoani i le tasi ma le isi ia tumau mausali a o tatou sauniuni mo le toe foi mai o le Alii?

Valaaulia tamaiti aoga e tomanatu filemu i mea ua latou aoaoina ma lagonaina e uiga ia Iesu Keriso ma le Afio Mai Faalua a o latou sauniuni mo ma auai i lenei vasega. Ona tuu atu lea i tamaiti aoga e faasoa mai a latou molimau e uiga i le Alii ma le faamoemoe o loo ia i latou i le iloa o le a toe foi mai o Ia.

Mo Le Isi Taimi

Faamalamalama atu e faapea, i le isi vasega e sosoo ai, o le a maua e tamaiti aoga le avanoa e mafaufau ai pe o le a faapeī le i ai i le afioaga o le Faaola ma fegalegaleai ma Ia. A o suesue tamaiti aoga i anomea mo sauniuniga mo le vasega, valaaulia i latou e vaavaai mo mea e mafai ona latou aoao i ai e uiga i le natura ma le uiga o Iesu Keriso mai i Lana galuega ia i latou i le atu Amerika.