Lesona 13 Anomea a le Faiaoga

O Le Faapotopotoina o Isaraelu i Aso Amulī

I lenei iunite o le a tatou talanoaina ai le tulagaese o aoaoga a le Tusi a Mamona e uiga i le faataapeapeina ma le faapotopotoina o Isaraelu. Na faataapeapeina Isaraelu anamua e le Alii ona sa latou teena Lana feagaiga, ae na Ia folafola atu e faapotopotoina i latou i aso amuli. I lenei lesona o le a maua ai e tagata aoga le avanoa e faamatala ai faamanuiaga ma tiute o le avea ai ma se vaega o le aiga o Isaraelu. O le a faamalolosia foi i latou e mafaufau pe faapefea ona latou fesoasoani i se tasi “i itu uma o le veli … e fai se laa agaʻi i le osia o feagaiga ma le Atua” (Russell M. Nelson ma Wendy W. Nelson, “Faamoemoe o Isaraelu” [faigalotu a le autalavou i le lalolagi atoa, Iuni 3, 2018], faaopoopo i le New Era ma le Ensign, 15, HopeofIsrael.ChurchofJesusChrist.org).

Fautuaga mo le Aoaoina Atu

Faaleleia o Lo Tatou Aoao Atu ma le Aoao Mai

Fesoasoani i tagata aoga ia iloa le talafeagai. Pe a lagona e tamaiti aoga o mea o loo latou suesue e fesootaʻi ma tulaga o latou olaga, latou te ono auai i le aoaoina lea e fesoasoani ia i latou e faia se faatinoga amiotonu. A o e saunia lesona, mafaufau i talaaga, aafiaga faaleaganuu, mea e fiafia i ai, fesili ma tauiviga a au tagata aoga. Faaeteete ia aua nei taʻuina i tagata aoga mea e talafeagai i o latou olaga; ae, fesoasoani ia iiloa lava e i latou le talafeagai mo i latou lava.

Na aoao atu e Liae ma Nifae e uiga i le faataapeapeina ma le faapotopotoina o Isaraelu.

Faaali atu le tulaga faataitai lenei:

Ua auai lau uo o Becky i lana uluai sauniga faamanatuga. Ua maeʻa le lotu ona e fesili lea ia te ia po o le a sona lagona i ai. Ua ia tali mai: “Sa agalelei tagata ma mananaia lauga, ae sa ou matua le mautonu lava ina ua talanoa se tasi o failauga e uiga i le faapotopotoina o Isaraelu ma fai mai o le mea sili ona taua lea o loo tupu i le lalolagi i aso nei.” Ona ia fesili lea: “O le a le faapotopotoina o Isaraelu, ma aisea e taua tele ai i lau ekalesia?”

Valaaulia tagata aoga e talanoaina ma se paga pe faapefea ona latou taliina le fesili a Becky. (Afai e manaomia, e mafai foi e tagata aoga ona iloilo le vaega 1 o anomea mo sauniuniga.) A uma ona tuuina mai e tagata aoga a latou tali, valaaulia nisi e faasoa mai mea na latou aoaoina pe na lagonaina e uiga i le aiga o Isaraelu a o latou talanoa faatasi.

Faaali atu le ata o loo avatu i le lesona. Valaaulia tagata aoga e toe iloilo le vaega 2 o le anomea mo sauniuniga (aemaise 1 Nifae 10:12-14 ma le 1 Nifae 15:12–15). Ona fai atu lea i se tagata aoga e faamatala faapuupuu mai le ala na faaaoga ai e Liae ma Nifae se laau olive e talanoa ai e uiga i le faataapeapeina ma le faapotopotoina o Isaraelu.

laau olive

Atonu e te manao e tusi le faamatalaga lenei e le’i mae’a luga o le laupapa: E fao mai se tagata i le aiga o Isaraelu pe a ia …

A o faasoa mai e le vasega o latou manatu, faamaumau a latou tali, ia e mafai ona aofia ai le upumoni lea: E ao mai se tagata i le aiga o Isaraelu pe a ia mauaina le atoaga o le talalelei, mauaina se malamalamaaga o Iesu Keriso o lo tatou Alii ma le Togiola, ma osia ma tausia feagaiga o le talalelei. E mafai ona e faaaogaina nisi o fesili nei e fesoasoani ai i tagata aʻoga e faalautele ai lo latou malamalama i le faapotopotoina o Isaraelu:

• E faapefea e le faapotopotoina o Isaraelu ona faatatau ia i latou o loo ola ma e ua maliliu?

• Aisea e te manatu ai na saunoa ai Peresitene Nelson o le faapotopotoina o Isaraelu o le “mea sili ona taua o loo tupu i le lalolagi i aso nei” (“Faamoemoe o Isaraelu,” 8)? (Atonu e te manao e toe iloilo ana faamatalaga o loo i totonu o le faatomuaga ma vaega 1 ma le 2 o le anomea mo sauniuniga.)

• O a ni auala tatou te faamamaluina ai le soifua ma le taulaga a Iesu Keriso pe a tatou tofu sao i le faapotopotoina o Isaraelu?

• Na faapefea ona tosina lou olaga pe na faapefea ona faamanuiaina olaga o tagata o lou aiga e ala i le faapotopotoina o Isaraelu?

Mafaufau e valaaulia tagata aoga e mafaufau loloto i mea latou te ono lagonaina ma pe faapefea ona latou tali atu pe afai e fesiligia e le perofeta i latou i lenei fesili: “Pe tou te mananao e avea o se vaega tele o le lu’i aupito silisili, le mafuaaga aupito silisili, ma le galuega aupito silisili i le lalolagi i le taimi nei?” (“Faamoemoe o Isaraelu,” 8).

Ua valaauina e Iesu Keriso auauna e fesoasoani i le galuega o le faapotopotoina o Isaraelu.

Toe iloilo puupuu le ala na faaaoga ai e Iakopo le tala faatusa a Senosa i le laau o le olive e aoao atu ai e uiga i le faapotopotoina ma le faataapeapeina o Isaraelu (tagai vaega 3 o le anomea mo sauniuniga). Faamanino atu o se vaega o le tala faafaatusa na tiga ai le Alii o le tovine aua o laau olive (ia na fai ma sui o le nuu o le Alii) sa le’i fua mai ai ni fua lelei. Valaaulia tagata aoga e faitau le Iakopo 5:47, 51, saili mo lagona o le Alii e uiga i le aiga o Isaraelu.

• O a ni mea o loo aʻoaʻo mai e nei fuaiupu e faatatau i uiga o Iesu Keriso?

• E faapefea e le iloaina o le loloto o le popole o le Alii mo oe ona aafia ai ou lagona mo Ia?

Valaaulia tagata aoga e toe iloilo le Iakopo 5:61–62, 70–72, vaavaai mo a tatou matafaioi i le fesoasoani ai i le Alii e faapotopoto Isaraelu. (Fesoasoani i tagata aoga e faailoa mai le mataupu faavae lenei: A o tatou galulue ma le filiga ma le Alii e fesoasoani e faapotopoto Isaraelu, o le a faamanuiaina i tatou i le olioli.)

• Aisea e taua ai mo i tatou taitoatasi ona fesoasoani i le Alii i le faapotopotoina o Isaraelu?

• O le a se mea e mafai ona tatou faia e faapotopoto ai Isaraelu? (E ono faaalu sina taimi e tagata aʻoga e lisi ai manatu ma talanoa ai e uiga i auala na latou tofu sao ai i le faapotopotoina o Isaraelu. Atonu e te manao e iloilo le faamatalaga a Peresitene Nelson i le vaega 3 o anomea mo sauniuniga.)

• O a ni ou lagona ina ua e fesoasoani i se tasi i soo se itu o le veli e ao mai i le aiga o Isaraelu?

Atonu e te manao e faamaeaina le lesona i le faasoa atu o le faamatalaga lenei pe faaali se ata vitio (taimi 32:19 i le 33:37) o le saunoaga lea mai ia Peresitene Nelson mai le saunoaga “Faʻamoemoe o Isaraelu”:

Peresitene Russell M. Nelson

Sa talanoa perofeta taitasi e uiga i o tatou aso, pe a faapotopotoina Isaraelu ma o le a saunia le lalolagi mo le Afio Mai Faalua o le Faaola. Mafaufau i ai! Mai i tagata uma ua ola ai i le paneta o le lalolagi, o i tatou o tagata ua saofaga i lenei mea maoae faaiu, o le faapotopotoina. Se mea ina a ofoofogia! (“Faamoemoe o Isaraelu,” 8)

Faamanatu atu i tagata aoga o sauniuniga mo lenei lesona, sa valaaulia i latou e faailoa se tasi—i itu uma o le veli—e mafai ona latou fesoasoani e uia laasaga agai i le osiga feagaiga ma le Atua (tagai vaega 2 ma le 3 o anomea mo sauniuniga). Tuu atu i tamaiti aoga le taimi e mafaufau ai, faamaumau o latou lagona, ma faamaeʻaina a latou fuafuaga o gaoioiga. A e lagona ua talafeagai, valaaulia ni tagata aoga e faasoa mai mea ua latou lagona le musuia e fai.

Mo Le Isi Taimi

Faamatala i tagata aoga e faapea ina ia fesoasoani e faapotopoto Isaraelu, ua valaaulia i tatou e avea ma mea faigaluega i aao o le Atua ma faasoa atu Lana talalelei i tagata uma. E pei ona faitau ai e tagata aoga i sauniuniga mo le isi vasega, valaaulia i latou e mafaufau i mea e mafai ona latou faia ia avea atili ai ma mea faigaluega lelei i aao o le Atua e fetufaai atu ai le talalelei.