Lesona 25 Anomea a le Faiaoga

Tatalo ma Faaaliga Faaletagata Lava Ia

Na poloa’i mai le Alii o Iesu Keriso, “O lea e tatau ai ona outou tatalo atu pea i le Tamā i lo’u igoa” (3 Nifae 18:19). O loo faaalia i le Tusi a Mamona ni mataupu faavae taua e faatatau i le tatalo ma faaaliga faaletagata lava ia. O le lesona lenei e mafai ona fesoasoani i tamaiti aoga e iloilo ai le tulaga o a latou tatalo ma faailoa ai mea e mafai ona latou faia e faalelei atili ai a latou tatalo. O le a maua foi e tamaiti aoga le avanoa e mafaufau ai i mea e mafai ona latou faia e faateleina ai lo latou mafai ona maua faaaliga faaletagata lava ia.

Fautuaga mo le A’oa’oina Atu

Ua aoao atu e Amoleka ia sa Sorama le taua o le tatalo.

Manatua: A o e talanoaina auala e faaleleia ai tatalo faaletagata lava ia i le taimi o le lesona lenei, faamanatu i tamaiti a’oga o soo se taumafaiga ia tatalo e tatau ona patipatia. Atonu e te manao e faamatala atu o le iloiloga faaletagata lava ia lenei, ua fuafuaina e faamalosiau ai i tamaiti a’oga ia latalata atili atu ai i le Atua e ala i le tatalo, ae le o le faalotovaivaia o i latou i a latou taumafaiga e tatalo. O le iloiloga faaletagata lava ia, o le a fesoasoani e saunia ai tamaiti a’oga e talanoa i mea ua aoao mai e Amoleka e uiga i le tatalo i le Alema 34:17–28.

Faaali atu faamatalaga nei, ma valaaulia tamaiti a’oga e fai ni a latou lava iloiloga e faaaoga ai se fuafaatatau o le 1 i le 5 (1 = matuai le ioe i ai, ma le 5 = matuai ioe i ai).

1. E fai i aso uma a’u tatalo faaletagata lava ia. 

2. O au tatalo e anoa ma sau mai i le loto. 

3. Ou te tatalo mo o’u manaoga faaletino ma faaleagaga. 

4. Ou te ole mo le fesoasoani e faatoilalo ai faaosoosoga a le tiapolo. 

5. Ou te tatalo mo isi tagata. 

6. Ou te taumafai i taimi uma ia i ai se tatalo i lou loto. 

Faamalosiau i tamaiti a’oga e mafaufau e uiga i a latou tali a’o e talanoaina aoaoga a Amoleka e uiga i le tatalo.

Filifili se tasi o filifiliga nei:

1. Faaali atu le ata lenei o se tagata o loo tatalo i luga o le Rameutoma:

   

2. Faaali atu le vitio o le Tusi a Mamona “Alma and Amulek Teach about Faith in Jesus Christ (Alema 31–34)” seia oo i le taimi 4:15.

Valaaulia tamaiti e faamatala faapuupuu le faiga e sa Sorama o tatalo ma ia faasoa mai o latou manatu e uiga i lenei faiga.

Faamanatu i tamaiti, sa aoao atu mulimuli ane e Amoleka ni mataupu faavae taua e uiga i le tatalo i se vaega lotomaualalo o Sa Sorama. Valaaulia tamaiti aoga e toe iloilo le Alema 34:17–28 ma faailoa mai ni upumoni e mafai ona faatatau i o tatou tulaga i le taimi nei.

O se vaega o le talanoaga lenei, e mafai foi ona e fai atu i tamaiti aoga e faasoa mai pe faapefea ona latou toe tuisa nei fuaiupu i le gagana faaonaponei e faatatau i o latou tulaga (tagai i le gaoioiga “Tusifaamaumau Ou Manatu” i le vaega 1 o anomea mo sauniuniga).

E mafai e tamaiti aoga ona faasoa mai ni upumoni e talitutusa ma lenei: E finagalo lo tatou Tama o i le Lagi ia tatou valaau atu ia te Ia i le tatalo i taimi uma ma i nofoaga uma. E tatau ona tatou tatalo mo o tatou popolega faaletino ma faaleagaga. O tatalo e tatau ona sau mai le loto ma faamaoni. E tatau ona ou tatalo faalilolilo. E tatau ona tatou tatalo mo isi tagata. E le tatau ona na ona tatou tatalo mo isi ae ia saili foi e auauna atu ia i latou.

Faaleleia o Lo Tatou Aoao Atu ma le Aoao Atili

Ia iloatino le taimi e tatau ai ona e faifailemu ia loloto atili ai ona e aoao. O le loloto o le aoao e le mafai ona faanatinatia. A o e faalogo i manatu faaalia o tamaiti aoga ma mulimuli i le taitaiga a le Agaga Paia, e mafai ona e iloatino le taimi e taua ai ona faifailemu ma tuu atu i tamaiti aoga ia matuai iloilo atoatoa i o latou lava manatu, lagona, fesili, po o popolega. Mafaufau e mulimuli i faataitaiga nei:

• Afai e fai mai se tamaitiiti aoga e faapea, o le tatalo ua na faia se eseesega tele i lona olaga, e mafai ona e fai atu i ai, “E mafai ona e tuuina mai se faataitaiga o le uiga o lau tala?”

• Afai e faaali mai e se tamaitiiti aoga se popolega e faapea, ua ia lagona le taumamao mai le Tama Faalelagi, e mafai ona e faapea atu, “O se tulaga taua tele lena. Sei o tatou faaalu se taimi o se vasega e faasoa mai ni mea na sili ona fesoasoani ia i tatou e latalata atili atu ai i le Tama Faalelagi.”

• Afai e fai mai e se tamaitiiti aoga se manatu faaalia e iloa ai e i ai se mea o loo popole ai i le talanoaga a le vasega, e mafai ona e faapea atu, “Ou te le o malamalama lelei i lou popolega. E mafai ona e faasoa mai nisi mea o loo e mafaufau i ai pe lagonaina?”

(Tagai Aoao Atu ma le Aoao Mai o le Talalalelei: O Se Tusitaulima mo Faiaoga ma Taitai i le Seminare ma Inisitituti o Mataupu Faalelotu [2012], 64.)

A o faasoa mai e tamaiti aoga ni mataupu faavae ma lo latou toe tusiga faaonaponei o fuaiupu o le Alema 34 mafaufau po o le fea o fesili nei e mafai ona e fai atua e sili ona fesoasoani ai i au tamaiti aoga ia faia ni faatinoga faamanuiaina ma amiotonu.

• Aisea e taua ai le faaaofia o le Tama Faalelagi i tulaga uma o o tatou olaga? O le a se eseesega e mafai ona e vaaia i lou olaga pe a e faia tatalo faamaoni ma faisoo?

• O a ni mea faalavefau o ono taofia oe mai i le faia o tatalo faamaoni? E mafai faapefea ona e aveesea nei mea faalavefau?

• O anafea na e “tagi” pe “sasaa atu ai” lou loto i le Atua, ma o le a se taunuuga na i ai lenei mea? E mafai faapefea ona tatou “tuu [ma le loto i ai] o [tatou] loto ia faatumuina, ia alu atu pea ia te ia i le tatalo e le aunoa”? (Alema 34:27).

• Aisea e avea ai le tatalo ma se malosiaga mamana e faatoilalo ai le mana o le tiapolo? (Atonu e fesoasoani le faitau o le 2 Nifae 32:8 ma le 3 Nifae 18:15, 18.) Na faapefea ona fesoasoani le tatalo ia te oe e tetee ai faaosoosoga?

• O a faamanuiaga ua oo mai i lou olaga ao e tatalo mo, ma auauna atu i isi tagata? O le a se taimi na e lagonaina ai tatalo a isi o fai ma ou sui? O ai o e iloaina e ono manaomia lou faatuatua, tatalo, ma le auaunaga?

Mafaufau e faasoa atu le saunoaga lenei mai ia Elder David A. Bednar o le Korama a Aposetolo e Toasefululua:

Ou te faamoemoe ua iloa e i tatou uma o le tatalo e taua mo lo tatou atinaega faaleagaga ma le puipuiga. Ae o mea ua tatou iloaina e le o taimi uma e atagia atu ai i mea tatou te faia. Ma e tusa lava pe ua tatou iloaina le taua o le tatalo, ae e mafai e i tatou uma ona faaleleia atili le faia e le aunoa ma le malosi e mafai ai ona maua taunuuga manaomia o a tatou tatalo faaletagata lava ia ma faaleaiga. (“Ole Atu ma le Faatuatua,” Ensign po o le Liahona, Me 2008, 94)

Fai atu i tamaiti aoga e manatunatu i a latou tali i le iloiloga faaletagata lava ia i le amataga o le lesona. Faamalosiau ia i latou e iloilo o latou lava taumafaiga patino ma tusifaamaumau mea e mafai ona latou faia e faalelei atili ai a latou fesootaiga ma le Atua.

Ua saili ma maua e Nifae ia faaaliga faaleatagata lava ia.

Faaali atu saunoaga nei ai ia Peresitene Julie B. Beck, o le sa avea ma Peresitene Aoao o le Aualofa, ma Peresitene Russell M. Nelson, ma fai atu i tamaiti aoga e faamatala pe aisea latou te manatu ai o nei savali e uiga i faaaliga e ono faapitoa ona taua mo talavou matutua i aso nei.

O le tomai e agavaa ai mo le mauaina ma faatino e ala i faaaliga faaletagata lava ia, o le tomai aupito taua lea e mafai ona maua i lenei olaga. (“Ou te Liligi Ifo foi lo’u Agaga i Auauna Fafine i Ia ona Aso,” Ensign po o le Liahona, Me 2010, 11)

E leai lava se isi taimi ua sili ona matua taua ai le iloa o le auala e fetalai mai ai le Agaga ia te oe nai lo le taimi nei. …

Ou te toe faafou atu la’u aioiga mo outou ia fai po o le a lava le mea e faateleina ai lo outou gafatia faaleagaga e maua ai faaaliga faaletagata lava ia. (“Faalogo ia te Ia,” Ensign po o le Liahona, Me 2020, 90)

Tusi faamatalaga le mae’a ma mau nei i luga o le laupapa:

• Na faatelelina e Nifae lona gafatia e maua ai faaaliga e ala …

• (Faitau le 1 Nifae 10:17–19; tagai foi i le 1 Nifae 2:16.)

• Na faaitiitia e Lamana ma Lemuelu o laua gafatia e maua ai faaaliga e ala …

• (Faitau le 1 Nifae 15:2–4, 8–11; tagai foi i le 1 Nifae 2:11–12.)

Valaaulia tamaiti aoga e galulue i paga po o ni vaega toalaiti ma suesue i mau e uiga a le o Nifae po o Lamana ma Lemuelu ona faauma lea o faamatalaga o loo i luga o le laupapa. O tali a tamaiti aoga e mafai ona aofia ai tali nei:

Na faatelelina e Nifae lona gafatia e maua ai faaaliga e ala i le manao ia iloa le mea moni, faatuatua i mea na ia iloa e uiga i le Atua, faaaoga le faatuatua ia Iesu Keriso, salamo, ma saili ma le filiga i tali mai le Atua.

Na faaitiitia e Lamana ma Lemuelu o laua gafatia e maua ai faaaliga e ala i le faamaaa o o laua loto, lē talitonu o le a tali mai le Alii ia i laua, fefinauai ma le tasi ma le isi, ma le le fai atua o a laua fesili i le Atua.

• Na faapefea ona faatosinaina ia olaga o Nifae, Lamana ma Lemuelu i o latou gafatia e maua faaaliga? E mafai faapefea e le faateleina o lou gafatia e maua ai faaaliga ona faatosinaina ai lou olaga? (Atonu e te valaaulia tamaiti aoga e toe faamanatu le Alema 12:9–10.)

Tuu atu i tamaiti aoga se taimi e mafaufau loloto ai ma tusi o latou manatu e uiga i fesili nei. A o latou mafaufau loloto, atonu e te faaali atu le saunoaga a Peresitene Nelson mai le vaega 2 o anomea mo sauniuniga.

• O le a se mea ua e aoaoina mai i lenei lesona mai faataitaiga a Nifae, Lamana ma Lemuelu e uiga i le mauaina o faaaliga? O le a se mea e tatau ona tuu lou faia pe amata ona e faia e faateleina ai lou mafai ona maua faaaliga?

Mafaufau e faauma le lesona i le faamalosiau atu i se tamaitiiti se toatasi pe toalua e faasoa mai se ala ua faamanuiaina ai o latou olaga i le mauaina o faaaliga.

Mo Le Isi Taimi

Fai atu i tamaiti aoga e mafaufau i se tofotofoga o loo feagai ma i latou i le taimi nei po o feagai ma se tagata latou te iloa. A o latou sauniuni mo le vasega e sosoo ai, faamalosiau ia i latou e faailoa mai ni upumoni e mafai ona fesoasoani tatou te faafetaiaia ai o tatou tofotofoga ma le faatuatua, lototele, ma le faamoemoe.