Lesona 18 Anomea a le Faiaoga

O le Avea e Faapei o le Tama Faalelagi ma Iesu Keriso

Na ta’u atu e Iesu Keriso i sa Nifae ma sa Lamana i le laueleele o Nuumau ua Ia faataunuuina le tulafono a Mose. Ao Ia aoaoina atu se tulafono maualuga atu, sa Ia valaaulia tagata ina ia atoatoa, e pei foi ona atoatoa o Ia ma le Tama Faalelagi. (Tagai i le 3 Nifae 12:17–48.) I le lesona lenei, o le a maua ai e tamaiti aoga le avanoa e faamalamalama ai le aoaoga a le Alii i le atoatoa. O le a aoao foi e tamaiti aoga ni vaega eseese o le tulafono maualuga atu ma faailoa ai se mea e mafai ona latou faia ia lelei atu ai ona ola i lenei tulafono ma avea atili ai e pei o Iesu Keriso.

Fautuaga mo le Aoaoina Atu

Ua aoao e le Faaola ia sa Nifae ma sa Lamana auala e faaatoatoa ai.

Faaali atu fesili nei, ma valaaulia tamaiti aoga e mafaufau loloto i ai:

• Mafaufau i ou gafatia faalelagi, o a ni uiga auaumama faaKeriso ua e faamoemoe e atinae i le tausaga a sau? i le isi 10 tausaga?

• O a ni uiga auaumama ua e faamoemoe ia oo atu i le faaiuga o lou olaga ua atinaeina?

Afai e te manatu e talafeagai, fai atu i tamaiti aoga e faasoa atu a latou tali i se tasi o le latou tupulaga pe valaaulia ni tamaiti aoga se toatasi pe toalua e faasoa mai a latou tali i le vasega.

Faamalamalama atu e faapea, i le taimi o Lana auaunaga i sa Nifae ma sa Lamana, na aoao atu ai e Iesu ni upumoni taua e uiga i o tatou gafatia faalelagi. Valaaulia tamaiti aoga e iloilo le 3 Nifae 12:19–20, 46–48, ma vaavaai mo le mea ua finagalo le Alii ia avea ai i tatou.

• E tusa ai ma nei fuaiupu, o a ni gafatia o vaaia e le Alii ia i tatou?

• O a ni mea o aoao mai e nei fuaiupu e uiga i le ala e mafai ona tatou atoatoa ai e pei o Iesu Keriso ma le Tama Faalelagi? (E mafai ona faailoa mai e tamaiti aoga se mataupu faavae e tutusa ma lenei: A o tatou o mai ia Iesu Keriso ma mulimuli i Ana tulafono ma poloaiga, e mafai ona tatou atoatoa, e faapei ona atoatoa o Ia ma le Tama.)

Faaleleia o lo Tatou Aoao Atu ma le Aoaoina

Fesoasoani i tamaiti aoga e faaaoga fesoasoaniga mo le suesueina o tusitusiga paia ma punaoa. Ua tuuina mai e le Ekalesia ia fesoasoaniga mo suesuega ma punaoa e faaleleia ai a tatou suesuega o tusitusiga paia. O fesoasoaniga mo suesuega e pei o le Taiala i Tusitusiga Paia, Taiala i Autu, Bible Dictionary, Faaliliuga a Iosefa Samita, vaefaamatalaga, faaulutala o mataupu, ma faafanua e mafai ona fesoasoani i tamaiti aoga ia malamalama lelei i mea latou te faitauina. I le taimi o le vasega, vaavaai mo avanoa e fesoasoani ai i tamaiti aoga e faaaoga nei fesoasoaniga ma punaoa.

Faailoa atu o nisi tagata e faigata ona malamalama i le poloaiga ina ia atoatoa. Valaaulia tagata aoga e sailiili i le autu “atoatoa” i le Taiala i Tusitusiga Paia. Atonu e te fai atu foi i tamaiti aoga e toe iloilo le Moronae 10:32–33 ma le saunoaga a Elder Jeffrey R. Holland i le vaega 1 o anomea mo sauniuniga. Mafaufau e fai atu se fesili se tasi pe sili atu o fesili nei:

• Aisea e aoga ai le malamalama o le atoatoa o lona uiga o le “atoa, mea atoa, ma le atinaeina atoa”? (Taiala i Tusitusiga Paia, “Perfect,” scriptures.ChurchofJesusChrist.org). O le a le taimi ma e faapefea ona mafai ona ausia ai le atoatoa?

• E faapefea ona e aoteleina mea sa aoao mai e Moronae e uiga i le ia atoatoa? E mafai faapefea e le malamalama i lenei aoaoga ona aumaia le faamoemoe ia te oe pe a e le ausia ma faia ni measese? O le a se taimi na e lagonaina ai le tuuina mai e le Alii ia te oe o le fesoasoani ma le malosiaga faalelagi?

• O le a le uiga ia te oe o le iloa ua faasafua mai e Iesu Keriso ia Lona alofa tunoa ia te oe ma ua sauniaina se ala mo oe e avea ai e pei o Ia ma Lona Tama?

Ina ia fesoasoani i tamaiti aoga e faaaoga mea sa latou aoaoina atonu e te manao e faaali atu le ata faataitai lenei:

O Ioana o se tagata faamaoni o le Ekalesia. E ui e i ai sa na molimau i le talalelei, ae sa popole o ia o le a le mafai lava ona atoatoa o ia. Ina ua tulai mai le autu o le atoatoa, na pau le mea sa mafai ona mafaufau i ai o ona faaletonu ma measese. Ua talitonu o ia e le o lava lona lelei e oo ai i le malo selesitila.

• Mafaufau i mea ua e aoaoina i le asō, o a ni upumoni e mafai ona e faasoa atu ia Ioana e fesoasoani ia te ia ia maua ai le faamoemoe sili atu i le valaaulia a le Alii ia atoatoa?

Ua aoao mai e Iesu Keriso le tulafono maualuga atu o Lana talalelei.

Faamanatu atu i tamaiti aoga e faapea, ina ua uma ona faamalamalama atu e le Faaola ua Ia faataunuuina le tulafono a Mose, sa Ia aoao atu i tagata le tulafono maualuga atu o le talalelei.

• E faapefea ona e faauigaina le tulafono maualuga atu? O le a le faamoemoega o lenei tulaga faatonuina maualuga atu? (Afai e manaomia, e tatau i tamaiti aoga ona tagai i le vaega 2 o anomea mo sauniuniga.)

Valaaulia tamaiti aoga e toe iloilo ia mau na latou suesueina muamua i le vaega 2 o anomea mo sauniuniga. (Afai sa lei saunia mamao nisi tamaiti aoga, valaulia i latou e filifili se mau ma suesue ai i le taimi nei.) A ua lava loa le taimi na iloilo ai tamaiti aoga, filifili se tasi o gaoioiga nei pe fatu sa oe lava gaoioiga o le a tuu atu ai i tamaiti aoga le avanoa sili ona lelei e faasoa ma talanoa ai i mea ua latou mauaina:

• Filifiliga 1: Vaevae tagata aoga i ni vaega toalaiti. Valaaulia tagata aoga e auauai e faasoa atu i a latou vaega mea na latou aoaoina mai se fuaitau sa latou suesueina. A uma ona talanoa ai i a latou vaega, valaaulia i latou e faasoa atu i le vasega mea na latou mauaina.

• Filifiliga 2: Faaali atu fesili o loo aofia i le gaoioiga “Tusifaamaumau Ou Manatu” i le vaega 2 o anomea mo sauniuniga. Valaaulia tagata aoga e mafaufau pe o le a faapefea ona latou tali atu i fesili e faavae i le fuaitau na latou suesueina. Valaaulia tagata aoga e faasoa ma se paaga po o se vaega toalaiti pe faapefea ona latou taliina fesili.

• Filifiliga 3: Valaaulia tagata aoga e mafaufau i se ata faataitai e mafai ona latou faaaoga i ai se aoaoga mai le fuaitau na latou filifilia. Tuu atu i tamaiti aoga se avanoa e faailoa atu ai a latou ata faataitai, a le i ni vaega toalaiti po o i le vasega ma ia faamalamalama i ai le ala o le a latou faaaoga ai aoaoga na latou filifilia.

Valaaulia tamaiti aoga e filifili se mataupu faavae po se uiga auaumama faaKeriso latou te mananao e faaleleia atili ai o latou olaga. Uunaia tagata aoga e tusi i lalo auala e mafai ona latou alualu ai i luma i le ola ai i lenei mataupu faavae pe atinae ai lenei uiga auaumama. Mafaufau e valaaulia se tagata aoga se toatasi pe toalua e faasoa mai a la molimau e uiga i le agalelei ma le alofa tunoa o Iesu Keriso.

Mo Le Isi Taimi

Faailoa atu na saunoa mai Peresitene Boyd K. Packer o le Korama a Aposetolo e Toasefululua e faapea, o tagata talavou i o tatou taimi ua “ola ae i teritori o le fili” ona ua i soo se mea lava ia faatosinaga a le fili (“How to Survive in Enemy Territory,” New Era, Apr. 2012, 2). Ao amata e tamaiti aoga le iunite e uiga i lamatiaga faaleagaga i o tatou aso ma suesue le anomea mo sauniuniga mo le vasega e sosoo ai, valaaulia i latou e vaavaai mo le ala e mafai ai ona fesoasoani le Tusi a Mamona ia i latou ia ola amiotonu i se lalolagi amioleaga.