Lesona 3 Anomea mo Sauniuniga o le Vasega

Miti a Liae i le Laau o le Ola

O Liae o loo pipii i le ai uamea

Mafaufau e uiga i tagata, faalapotopotoga, saite o le initoneti, po o tulaga o ala o fesootaiga faaagafesootai e uunaia ai ou mafaufauga, filifiliga, ma amioga i aso taitasi. O le fia o nei punavai o loo uunaia oe e mulimuli ia Iesu Keriso? A o e suesue, mafaufau i auala e mafai ai e le upu a le Atua ona fesoasoani e faateleina lou gafatia ona savali i le ala sa’o ma le vaapiapi lea e tau atu i le Alii ma faamanuiaga o Lana Togiola.

Vaega 1

E mafai faapefea ona ou lagona atili le alofa o le Atua i lo’u olaga?

A o “[no]nofo le [aiga o Liae] i le vao” (1 Nifae 8:2) i le taimi o le latou malaga atu i le nuu o le folafolaga, na maua ai e Liae se faaaliga vaaia mai le Atua. I lana faaaliga vaaia, sa taitai atu ai Liae e se tagata sa laeiina se ofu talaloa paepae i totonu “o se gaogao pogisa ma pagatia” (1 Nifae 8:1–7).

aikona, suesue

Suesue i Sauniuniga mo le Vasega

Faitau le 1 Nifae 8:8–12 mo le tala a Liae i le mea na ia vaaia ina ua uma ona tatalo i le Alii mo le alofa mutimutivale.

Liae o loo uuina fua o le laau o le ola

Na maua mulimuli ane e Nifae se faaaliga vaaia e talitutusa ma le [faaaliga vaaia] a lona tamā. Ina ua fesili Nifae e fia malamalama i le uiga o le laau o le ola, sa faaali ane ia te ia “le tina lea o le Alo o le Atua, e tusa ma la le tino … ua sapasapaia e ia se tamameamea i ona lima” (1 Nifae 11:18, 20). Ona faaali ane lea o se agelu e fesoasoani ia Nifae ia malamalama atili i le uiga o le laau.

aikona, suesue

Suesue i Sauniuniga mo le Vasega

Faitau le 1 Nifae 11:21–22, ma vaavaai mo le manatu o Nifae e faatatau i le uiga o le laau o le ola.

Na aoao mai Elder Neal A. Maxwell o le Korama a Aposetolo e Toasefululua, “O le tofo i le alofa o le Atua, o le tofo lea i le Togiola a Iesu ma le … olioli e mafai ona ia aumaia” (“Lessons from Laman and Lemuel,” Ensign, Nov. 1999, 8).

Na saunoa mai foi Elder Neil L. Andersen o le Korama a Aposetolo e Toasefululua:

Elder Neil L. Andersen

O le ‘aai i le fua o le laau e faatusa foi i lo tatou taliaina o sauniga ma feagaiga o le talalelei toefuataiina—o le papatisoina, mauaina o le meaalofa o le Agaga Paia, ma le ulu atu i le maota o le Alii ina ia faaeeina i le mana mai luga. E ala atu i le alofa tunoa o Iesu Keriso ma e ala i le faamamaluina o a tatou feagaiga, tatou te maua ai folafolaga le mafuatia o le ola ai ma o tatou aiga amiotonu i le faavavau atoa.

E leitioa faamatala e le agelu le fua o se mea e “silisili ona olioli i le agaga” [1 Nifae 11:23]. (“Fua,” Liahona, Nov. 2019, 117)

aikona, mafaufau loloto

Mafaufau Loloto i Sauniuniga mo le Vasega

Mafaufau i upu na faaaoga e Liae (tagai i le 1 Nifae 8:10–12) e faamatala ai le laau o le ola ma ona fua. O a mea ua aoao mai e nei upu ia te oe e faatatau i le alofa o le Atua e pei ona faaalia e ala mai i le meaalofa o Lona Alo o Iesu Keriso?

Vaega 2

O a ni mea e mafai ona taofia a’u mai ia Iesu Keriso ma fua o Lana Togiola?

Sa le o tagata uma i le miti a Liae na aai i le fua pe na nonofo ina ua uma ona aai ai. Ua tatou iloa mai lenei tala, e ui ina sa mumusu isi e talia le Faaola ma faamanuiaga ia e oo mai mai Lana Togiola, ae o isi na tofo i Lona agalelei ma na mulimuli ane liliu ese mai ia te Ia ona sa faalavefauina, faamāina, pe faatosinaina foi e ola i le agasala.

aikona, suesue

Suesue i Sauniuniga mo le Vasega

Suesue toto’a i le 1 Nifae 12:16–18, ma vaavaai mo elemene o le miti a Liae na faapea ona taofia ai tagata mai le laau, ma mea na iloa e Nifae na faatusa i ai ia elemene taitasi.

tagata o loo pipiimau i le ai uamea i totonu o le puao o le pogisa

Tagata o loo pipiimau i le ai uamea i totonu o le puao o le pogisa.

aikona, talanoa

Talanoa i Sauniuniga mo le Vasega

Faatasi ai ma le fesoasoani a se tagata o le aiga po o se uo, faailoa mai nisi o faataitaiga i le taimi lenei o le “punavai o vai eleelea” (1 Nifae 12:16), o le “puao o le pogisa” (fuaiupu e 17), ma le faatauemu a i latou i totonu o le fale tele ma le ateatea. Ia saunia e faasoa atu au faataitaiga i le vasega.

o tagata faatauemu i le fale tele ma le ateatea

Vaega 3

E mafai faapefea ona ou tetee atu i faaosoosoga ma tumau pea i le faamaoni ia Iesu Keriso?

I lana faaaliga vaaia, na vaai ai Liae i ni vaega se tolu o tagata o e sa taumafai e savavali i le ala sa’o ma le vaapiapi e tau atu i le laau ma ona fua. Sa vaai foi Liae i se ai uamea na i ai i le ala e tau atu i le laau.

lima o loo pipiimau i le ai uamea

Na aoao mai Nifae o le ai uamea ua faatusa i le afioga a le Atua ma o i latou o e pipiimau i ai “e lē fano lava i latou; pe mafai foi e faaosoosoga ma u fanafana mu a le fili ona faatoilaloina i latou” (1 Nifae 15:24). Na saunoa mai Peresitene Ezra Taft Benson, o le afioga a le Atua o loo maua “i totonu o tusitusiga paia, i upu a perofeta soifua, ma i faaaliga patino faaletagata lava ia” (“The Power of the Word,” Ensign, Me 1986, 80).

aikona, suesue

Suesue i Sauniuniga mo le Vasega

Ao e faitau i mau o loo i lalo, vaavaai mo le eseesega i le va o i latou o e na faalagolago i le upu a le Atua ma i latou sa le’i faalagolago i ai.

• Vaega 1: 1 Nifae 8:21–23

• Vaega 2: 1 Nifae 8:24–28

• Vaega 3: 1 Nifae 8:30, 33

• Vaega 4: 1 Nifae 8:31–32

tagata o loo tootutuli i le laau o le ola

Na tuuina mai e Sister Ann M. Dibb, sa avea muamua ma se fesoasoani i le Au Peresitene Aoao a Tamaitai Talavou, le upu faamalosiau lenei ia i latou o e ua faamamulua le ai uamea:

Sister Ann M. Dibb

E le o taimi uma e faigofie ai le pipiimau i le ai uamea. Atonu tatou te faamamulua ona o le malosi o faatosinaga a le tupulaga po o le faamaualuga, ma le manatu e mafai lava ona tatou toe maua lo tatou ala e toe foi atu ai—i se taimi mulimuli ane. … Fai mai Nifae, “Ma e toatele sa lē iloa atu i lana vaai, ua feseseaʼi i ala ese” (1 Nifae 8:32). I taimi faigata i o tatou lava olaga, atonu tatou te iloa ai o loo tatou “fesesea’i [ai foi] i ala ese” Ou te fia faamautinoa atu ia te outou, e mafai lava i taimi uma ona tatou toe maua lo tatou ala e toe foi atu ai. E ala i le salamo, ua mafaia ona o le taulaga togiola a lo tatou Faaola, o Iesu Keriso, e mafai ai ona tatou toe maua ma toe tautino i se pipiimau malosi i luga o le ai uamea ma toe lagona ai le taitaiga alofa a lo tatou Tama Faalelagi. Ua tuuina mai e le Faaola se valaaulia faalauaitele ia i tatou: salamo, pipiimau, ma aua ne’i faamamulua. ( “Pipii Mau,” Liahona, Nov. 2009, 81)

aikona, mafaufau loloto

Mafaufau Loloto i Sauniuniga mo le Vasega

Mafaufau po o le fea o vaega na faamatalaina e Nifae e sili ona atagia ai le tulaga o loo e i ai nei. O a ni auala o loo fesoasoani ai le afioga a le Atua ia te oe ia latalata atili i le Faaola ma Lona mana togiola? O i ai ni suiga e te manao e fai ina ia e pipiimau lelei ai i le ai uamea?

Manao Pea i Nisi Mea? (Tuu i le faitalia)

O fea e mafai ona ou aoao atili ai e uiga i le miti a Liae?

O le vitio o le Tusi a Mamona o le “Lehi Sees a Vision of the Tree of Life (1 Nifae 8)” (13:06) o loo tuuina atu ai se toe faatinoga o le miti a Liae.

Peresitene Boyd K. Packer

I lana lauga “Lehi’s Dream and You” (New Era, Ian. 2015, 2–5), Na faamalamalama mai ai e Peresitene Boyd K. Packer o le Korama a Aposetolo e Toasefululua le ala e mafai ona i ai se uiga faapitoa o le miti a Liae ia te oe.

Atonu e te fiafia foi e vaavaai i le polokalama o le Tree of Life AR augmented reality app.

aikona, polokalama o le Tree of Life AR

O le polokalama lenei e maua i masini o le Google ma leApple . Saili i faleoloa o polokalama mo le “Tree of Life AR.”

aikona, polokalama o le faleoloa o le Google

aikona, polokalama o le faleoloa o le Apple

O le a se isi mea o loo aoaoina i le Tusi a Mamona e uiga i le laau o le ola?

I le Alema 5:34, 62 ma le Alema 32:37–42 e mafai ona e aoao atili ai e uiga i le ala e olioli ai i faamanuiaga e mafai ona tatou maua a o tatou aai i le fua o le laau o le ola.