Lesona 4 Anomea mo Sauniuniga o le Vasega

Suesue i Tusitusiga Paia

Na saunoa mai Elder Richard G. Scott o le Korama a Aposetolo e Toasefuulua e faapea, “Aua nei gauai atu i pepelo a Satani faapea e leai sou taimi e suesue ai i tusitusiga paia. … O le taumamafa i afioga a le Atua i aso taitasi e sili atu le taua nai lo le moe, a’oga, faigaluega, ata o le televise, taaloga vitio, po o faasalalauga faaagafesootai” (“Ia Avea le Faaaogaina o le Faatuatua ma Mea E te Faamuamuaina,” Liahona, Nov. 2014, 93). Aʻo e suʻesuʻe i lenei anomea, mafaufau pe aisea na manao ai Elder Scott e te tuu se faamuamua aupito maualuga i le suesueina o tusitusiga paia. Iloilo po o le a le matafaioi o loo faia i le taimi nei e tusitusiga paia i lou olaga.

Vaega 1

O a ni faamuamua o loo i ai o tusitusiga paia i lo’u olaga?

Ina ua mavae le tele o aso o le malaga a Liae ma lona aiga i le vao, na poloaiina e le Alii ia Liae e toe auina atu ona atalii i Ierusalema e aumai papatusi apamemea mai ia Lapana. O papatusi apamemea o se voluma o tusitusiga paia anamua, e faatusa i le Feagaiga Tuai a tatou, na i ai se faamaumauga o tagata Iutaia ma le tele o tusitusiga a perofeta (tagai i le 1 Nifae 5:11–16; Taiala i Tusitusiga Paia, “Papatusi Apamemea,” scriptures.ChurchofJesusChrist.org).

Na silafia e le Alii o nei tusitusiga paia o le a taua tele i le aiga o Liae ma e tupuga mai ia te i latou. Sa poloaiina foi e le Alii ia Nifae e fasioti Lapana ina ia maua mai ai faamaumauga, na fetalai, “E sili le fano o le tagata e toatasi nai lo le faaitiitia ma le fano o se atunuu i le lē talitonu” (1 Nifae 4:13).

Ina ua maua e Liae papatusi apamemea ma amata ona “suesue i ai” (1 Nifae 5:10), “sa tumu o ia i le Agaga, ma amata ona vavalo” (fuaiupu e 17).

Suesue i Sauniuniga mo le Vasega

Faitau le 1 Nifae 5:19, 21–22, ma vaavaai pe aisea sa taua ai ona ave e le aiga o Liae ia papatusi ma i latou a o latou malaga atu i le nuu o le folafolaga.

O le saunoa ai i le taua o tusitusiga paia i lona lava olaga, sa aoao mai ai Peresitene Julie B. Beck, o le sa auauna atu o se Peresitene Aoao o le Aualofa:

O le olioli sili sa maua mai i le mausa o le faitau o tusitusiga paia i aso taitasi, lea sa ou amataina i le tele o tausaga ua mavae. O nisi aso, e tele taimi ou te mafaufau loloto ai i tusitusiga paia. O isi aso, e na o ni nai fuaiupu lava ou te mafaufau i ai. E pei lava ona ou ‘ai ma manava ia ou ola i aso taitasi, e faapena foi ona fafaga e tusi paia ma maua ai le ola i lo’u agaga. Ua mafai nei ona ou faaleo atu upu a Nifae: “Ua fiafia lo’u agaga i tusitusiga paia, ma ua manatunatu loloto i ai lo’u loto. … Faauta, ua fiafia lo’u agaga i mea a le Atua, ma ua manatunatu loloto pea lo’u loto i mea sa ou vaaia ma faalogoina” (2 Nifae 4:15–16). (“E Fiafia Lo’u Agaga i Tusitusiga Paia,” Liahona, Me 2004, 109)

Tusifaamaumau Ou Lagona Uunaia

Tusifaamaumau nisi o mafuaaga e te manatu e tatau ona avea ai le suesuega patino o tusitusiga paia o se mea e faamuamua i lou olaga.

Vaega 2

E mafai faapefea ona fesoasoani tusitusiga paia ia ou iloa lelei Iesu Keriso?

I le taimi o lana auaunaga, na faia ai e Nifae ni faamaumauga se lua—o papatusi lapopoa ma papatusi laiti a Nifae. O papatusi lapopoa a Nifae sa i ai muamua le talafaasolopito faalelalolagi o tagata sa Nifae. Na faia papatusi laiti a Nifae mo le “faamoemoega faapitoa” o le faasaoina o se faamaumauga o auaunaga a le nuu o Nifae (1 Nifae 9:3). Na ta’ua e Nifae e faapea, o le “atoatoa o [lona] faamoemoe” mo lenei faamaumauga sa, ina ia faatauanau ai tagata uma e o mai ia Keriso ma ia faaolaina (1 Nifae 6:4).

Ina ua tuu atu e Nifae le tiutetauave mo papatusi laiti i lona uso o Iakopo, sa ia poloaiina Iakopo ia tusifaamaumau ai na’o mea na “sili ona pele” (Iakopo 1:1–2).

Suesue i Sauniuniga mo le Vasega

Faitau le Iakopo 1:4, 6–8 ma le Iakopo 4:3–4, ma vaavaai mo le mea na manatu Iakopo ua “sili ona pele” (Iakopo 1:2).

Na aoao mai Peresitene Russell M. Nelson, o Nifae, Iakopo, ma isi perofeta o le Tusi a Mamona ua faaopoopo i ai a latou molimau i perofeta o isi tusitusiga paia. Na ia faamatalaina mai:

I se faasologa e foliga mai e le gata o folafolaga faaperofeta—o molimau a “perofeta paia uma” [Iakopo 4:4] mo “i le tele o afe o tausaga ae lei oo i lona afio mai” [Helamana 8:18]—ua faia ai e le Tusi a Mamona le folafolaga paia o Iesu o le Keriso, o lo tatou Faaola ma le Togiola. (“A Testimony of the Book of Mormon,” Ensign, Nov. 1999, 69)

Mafaufau Loloto i Sauniuniga mo le Vasega

O le a se mea ua e iloa ma lagona e uiga ia Iesu Keriso ina ua e faitau i tusitusiga paia—ae maise lava o le Tusi a Mamona? O a ni fuaitau patino ua e latalata atili atu ai ia te Ia?

Vaega 3

E mafai faapefea ona taiala a’u e tusitusiga paia i le foiaina o faafitauli ma le faia o faaiuga?

Ina ua uma ona faataunuu e Liae mea uma na poloaiina ai o ia, na tuuina mai e le Alii se meafaigaluega na ta’ua o le Liahona (tagai i le Alema 37:38). Na galue le Liahona e pei o se tapasa ma avea ma se taiala a o malaga le aiga o Liae i le vaomatua. Na faaalia ai foi ni savali patino mai le Alii. Na aoaoina e Liae o le Liahona na galue “e tusa ma le faatuatua ma le filiga sa matou tuu atu i ai” i savali a le Alii (1 Nifae 16:28–29).

Pe tusa ma le 500 tausaga mulimuli ane, ina ua tuuina atu e Alema i lona atalii o Helamana le tausiga o papatusi apamemea ma isi tusitusiga paia, sa ia tuuina atu ni malamalamaaga loloto e uiga i le faagaoioiga o le Liahona.

Suesue i Sauniuniga mo le Vasega

Faitau ma mafaufau loloto i malamalamaaga loloto a Alema i le Alema 37:40–41, 43–45 e uiga i le ala e mafai ai ona faatatauina pe faatusatusaina tusitusiga paia i le Liahona.

A o auauna ai o se sui o le Fitugafulu, sa aoao mai e Elder W. Rolfe Kerr:

E mafai ona avea afioga a Keriso ma Liahona mo i tatou taitoatasi, e faasino mai ia i tatou le ala. Aua nei tatou faapaie ona o le faigofie o le ala. Ia tatou tuuina ma le faatuatua ia afioga a Keriso i totonu o o tatou mafaufau ma loto, e pei ona tusia i tusitusiga paia ma e pei foi ona fofogaina mai e perofeta soifua, tagata vaai ma talifaaaliga. Ia tatou faatuatua ma maelega i le fiafia ai i afioga a Keriso, aua o afioga a Keriso o le a avea ma o tatou Liahona faaleagaga, latou te tau mai ia i tatou mea e tatau ona tatou faia. (“O Afioga a Keriso—O Lo Tatou Liahona Faaleagaga,” Liahona, Me 2004, 37)

Talanoa i Sauniuniga mo le Vasega

Mafaufau e fai atu i se uo po o se tagata o le aiga pe na faapefea ona avea tusitusiga paia ma upu a perofeta soifua o se puna o le taitaiga—e pei o se Liahona patino—i o latou olaga. I le taimi o le tou talanoaga, atonu e te manao e faasoa atu lau lava aafiaga e faatatau i lenei mea.

Manao Pea i Nisi Mea? (Tuu i le faitalia)

O a faamanuiaga o loo avanoa e ala mai i le afioga a le Atua?

I le vitio “Principles of Peace: God’s Word #Prince of Peace” (2:02), o loo faamatala ai e se tausi soifua talavou le ala na fesoasoani ai tusitusiga paia ia te ia i taimi le mautonu o lona olaga.

I le lauga “O Le Faamanuiaga o Tusitusiga Paia” (Liahona, Me 2010, 32–35), na talanoaina ai e Elder D. Todd Christofferson o le Korama a Aposetolo e Toasefululua auala taua e mafai ona suia ai e tusitusiga paia o tatou olaga.

Aisea e taua ai le suesue ma mafaufau loloto i tusitusiga paia i aso uma?

Na saunoa Elder Christofferson e uiga i lo tatou manaomia o le tausiga faaleagaga i aso uma i le vitio “Daily Bread: Pattern” (2:51).

O le a se mea e mafai ona ou faia e faaleleia atili ai a’u suesuega patino o tusitusiga paia?

Mo manatu i le ala e faaleleia atili ai suesuega patino o tusitusiga paia, toe faamanatu le vaega “Manatu e Faaleleia Atili Ai Au Suesuega Patino o Tusitusiga Paia” i le faatomuaga o anomea o le Sau, Mulimuli Mai ia te A’u—Mo Tagata Taitoatasi ma Aiga.