Lesona 4 Anomea a le Faiaoga: Suesue i Tusitusiga Paia
“Lesona 4 Anomea a le Faiaoga: Suesue i Tusitusiga Paia,” Anomea a le Faiaoga o Aoaoga ma Aoaoga Faavae o le Tusi a Mamona (2021)
“Lesona 4 Anomea a le Faiaoga,” Anomea a le Faiaoga o Aoaoga ma Aoaoga Faavae o le Tusi a Mamona
Lesona 4 Anomea a le Faiaoga
Suesue i Tusitusiga Paia
Ua fetalai mai le perofeta o Mamona, “O lē ua i ai tusitusiga paia, ia suesue o ia ia te i latou” (3 Nifae 10:14). O le lesona lenei o le a tuu atu ai i tagata aoga se avanoa e faailoa mai ai nisi o faamanuiaga e mafai ona oo mai ia i latou o e suesue maelega i tusitusiga paia. O le a iloilo ai foi e tagata aoga mea e mafai ona latou faia ia avea ai le suesueina o tusitusiga paia o se vaega sili ona anoa o o latou olaga.
Fautuaga mo le Aoaoina Atu
Ua iloa e Liae ma lona aiga e taua tele tusitusiga paia.
Mafaufau e faasoa atu le tulaga faataitai lenei:
O Tasa o se talavou matua pisi tele. E alu i le aoga, i ai se galuega faavaitaimi, auauna i le Ekalesia, e malosi i fesootaiga faaleagafesootai, ma faaalu lona taimi faatasi ma ana uo i le faaiuga o le vaiaso. E fia fai ana suesuega patino o tusitusiga paia, ae e faigata ona maua le taimi ma le malosi e fai ai.
O le a se fautuaga e te faasoa atu ia Tasa?
Valaaulia se tagata aoga e toe faamatala le tala o le mea na oo i ai atalii o Liae ina ia maua mai papatusi apamemea. Ona faitau faatasi lea o le 1 Nifae 5:20–21 .
Tusi le faamatalaga e lei maea lea i luga o le laupapa ma i le aluga o le talanoaga e sosoo ai, ia uunaia tagata aoga e tusifaamaumau ni auala eseese e mafai ona faaumaina ai: E taua tele tusitusiga paia aua …
E ono faapefea ona faauma e Liae ma Nifae le faamatalaga o loo i le laupapa?
Mai a oe lava aafiaga o tusitusiga paia, o le a faapefea ona e faaumaina lenei faamatalaga?
Vaevae le vasega i ni vaega toalaiti. Faatonu vaega taitasi e vaevae fuaitau ia i latou ina ia tofu le tagata ma sana mau se tasi pe lua e faitau. Valaaulia tagata aoga e faitau le leoa a latou mau na atofa atu ma faailoa mai ni auala faaopoopo ua taua tele ai tusitusiga paia.
Uunaia tagata aoga e faasoa mai mea na latou aoaoina ma auala o le a latou faaopoopo atu ai i le lisi o auala e faauma ai le faamatalaga o loo i le laupapa. O se vaega o le latou talanoaga, e mafai e tagata aoga ona faasoa mai i se taimi na latou maua ai faamanuiaga o tusitusiga paia e pei ona faamatalaina i fuaitau o loo latou talanoaina.
A uma le gaoioiga faalevaega, atonu e te fai atu i le vasega fesili nei:
Mai mafuaaga uma e taua tele ai le aogā o tusitusiga paia, o le fea o [ia mafuaaga] e te faapea mai e sili atu ona taua?
O le a se mea ua e iloa ma lagona e uiga ia Iesu Keriso ao e faitau i tusitusiga paia—ae maise lava le Tusi a Mamona? O a ni fuaitau patino ua e latalata atili atu ai ia te Ia?
Faaleleia o Lo Tatou Aoao Atu ma le Aoaoina
Tuu atu i tagata aoga ni avanoa e tusifaamaumau ai lagona uunaia. A o faataitai ona tusifaamaumau e tagata aoga lagona uunaia latou te maua mai le Agaga Paia, e mafai atili ai ona latou nofouta i uunaiga faaleagaga. Valaaulia tagata aoga e tusifaamaumau lagona uunaia faapena i se nofoaga e mafai ona latou toe iloiloina ai ma mafai ai foi ona latou faia ai ni fuafuaga ma faatutu ni sini. Atonu e te faamalosiau atu ia i latou e faaaoga le polokalama o le Gospel Living e fai ai. Uunaia tagata aoga e faatino o latou lagona uunaia.
Faaali atu fesili nei, ma tuu atu i tagata aoga se taimi e mafaufau loloto ai pe tusifaamaumau lagona uunaia atonu latou te maua i le taimi o le vasega.
E faavae i mea ua e aoaoina e uiga i faamanuiaga o le suesue i tusitusiga paia, o a ni faamanuiaga faapitoa e te fia maua ia tele nauā?
Mafaufau pe faafia ae po o le a foi le lelei o lou suesueina o tusitusiga paia. O le a se mea, pe afai o i ai, o taofia oe mai le lelei o le suesuega o tusitusiga paia? O le a se mea o le a ese lou faiga e faaleleia atili ai lou aafiaga i tusitusiga paia?
Na faatusa e Alema ia afioga a Keriso i le Liahona.
Faaali atu le ata o loo i le lesona, ma fai atu i tagata aoga e faamatala mai po o a faafitauli na feagai ma le aiga o Liae a o malaga e ui atu i le vao. O a ni auala ua pei ai o tatou olaga o se malaga e ui atu i le vao?
Faʻaali atu le ata o loo i le lesona o le Liahona, ma valaaulia tagata aoga e faamalamalama mai le ala e gaoioi ai. (Afai e manaomia, fai atu i tagata aoga e tagai i le vaega 3 o anomea mo sauniuniga.)
O a ni lesona faaleagaga atonu na aoaoina e le aiga o Liae i le faaaogaina o le Liahona?
Faaali atu le ata o loo i le lesona o se alii talavou o loo faitau i tusitusiga paia mai se telefoni poto, ma valaaulia tagata aoga e faitau pe toe faamanatu le Alema 37:43–46.
O fea e mafai ona tatou maua ai afioga a Keriso? E mafai faapefea ona avea afioga a Keriso ma a tatou lava Liahona patino?
Faaali atu le mataupu faavae lenei: Ao tatou ua’i atu i afioga a Keriso, o le a latou taiala i tatou ao ui atu i luitau o lenei olaga e agai atu i le olioli e faavavau.
Ina ia fesoasoani i tagata aoga ia malamalama i ala e masani ona taiala ai i tatou e afioga a Keriso, faaali atu le faataitaiga lenei ma valaaulia se tagata aoga e faitauina leotele:
Na ta’u atu ia Lui o loo i ai i tusitusiga paia ia tali mo fesili uma. Na lotovaivai o ia ona na le mafai ona ia maua se tali faapitoa i tusitusiga paia i se fesili patino taua. O le tele o lona suesue, o le tele foi lena o lona le fiafia na i ai.
O le a se fautuaga o le a e tuuina atu i a Lui?
Faaali atu ma faitau leotele le faamatalaga lenei mai ia Peresitene Dallin H. Oaks o le Au Peresitene Sili.
Ata
Peresitene Dallin H. Oaks
Tatou te faapea o tusitusiga paia o loo i ai tali i fesili uma aua e mafai e tusitusiga paia ona taitai i tatou i tali uma. …
… E ui lava e [ono] le i ai i tusitusiga paia ni upu e tali ai a tatou fesili fitoitonu patino, ae o se suesuega ma le agaga tatalo o tusitusiga paia o le a fesoasoani tatou te maua ai tali faapena. E mafua lenei mea ona o le suesue i tusitusiga paia o le a faapea ona tatou nofouta ai i le musumusuga a le Agaga Paia. …
… O le a fesoasoani tusitusiga paia tatou te maua ai tali uma o a tatou fesili patino, aua e ala i le faitauina o [tusitusiga paia] tatou te valaaulia ma faaagavaa ai i tatou lava mo le musumusuga a le Agaga Paia, lea o le a taitai atu ai i tatou i le upumoni atoa. (“Studying the Scriptures” [faigalotu a le Iunivesite o Polika Iaga–Hawaii, 14 Mar., 1986], 18–21, Church History Library, Salt Lake City)
O le a se upumoni ua aoao mai e Peresitene Oaks ia i tatou e uiga i le ala e taitai ai e le Allii i tatou e ala i Lana afioga? (Atonu e faailoa mai e tagata aoga se upumoni e talitutusa ma lenei: O le suesueina o tusitusiga paia e valaaulia ai faaaliga patino.)
O le a se taimi na tatala ai e tusitusiga paia po o upu a perofeta i onaponei le faitotoa i faaaliga patino i lou olaga?
Tuu atu lau molimau i le taua o le faia pea o suesuega patino o tusitusiga paia ma faamalosiau i tagata aoga e faatino uunaiga mai le Agaga Paia latou te maua i a latou suesuega ma i le vasega.
Mo Le Isi Taimi
Ia faailoa atu, i le taimi o le isi vasega e sosoo ai, o le a tatou amatalia ai se iunite fou e ta’ua “O Le Fuafuaga Sili o le Faaolataga.” A o suesue tagata aoga i anomea mo sauniuniga mo le lesona 5, valaaulia i latou e mafaufau i mea ua latou iloa e uiga i le Pau o Atamu ma Eva ma filifiliga na matala mai ai mo i tatou taitoatasi.
