“Lesona 5 Anomea mo le Sauniuniga o le Vasega: O Le Pā’u o Atamu ma Eva ma le Meaalofa o le Faitalia,” Anomea a le Faiaoga o Aoaoga ma Aoaoga Faavae o le Tusi a Mamona (2021)
“Lesona 5 Anomea mo le Sauniuniga o le Vasega,” Anomea a le Faiaoga o Aoaoga ma Aoaoga Faavae o le Tusi a Mamona
Lesona 5 Anomea mo le Sauniuniga o le Vasega
O Le Pau o Atamu ma Eva ma le Meaalofa o le Faitalia
I lenei iunite o le a e maua ai le avanoa e mafaufau ai pe mafai faapefea e le fuafuaga o le togiola a le Tama Faalelagi ona laveaiina Lana fanau mai le agasala ma le oti. A o e suesueina lenei lesona, mafaufau pe faapefea ona avea le paʻu o Atamu ma Eva, o le meaalofa o le faitalia, ma le Togiola a Iesu Keriso o se vaega taua i le fuafuaga a le Tama Faalelagi e togiola oe ma fesoasoani ia te oe ia avea atili e pei o Ia. Na aoao mai Peresitene Ezra Taft Benson “e leai se isi lava tusi i le lalolagi na te faamalamalamaina lelei lenei aoaoga faavae taua [o le Pa’ū ma lo tatou moomia o Keriso] e latalata atu i le Tusi a Mamona” (“O Le Tusi a Mamona ma le Mataupu Faavae ma Feagaiga” Ensign, Me 1987, 85).
Vaega 1
Aisea e taua ai le Pa’ū o Atamu ma Eva mo lou alualu i luma?
O le fasifuaitau “o le Pa’ū” e faatatau lea i tulaga na oo ia Atamu ma Eva ma ē tupuga mai ia i la’ua ona o le filifiliga a Atamu ma Eva e ‘ai le fua faasaina i le Faatoaga o Etena. I se taimi puupuu ae leʻi maliu o ia, na aoao ai e Liae lona atalii o Iakopo e uiga i le Paʻū ma le auala na aafia ai tagata. (Tagai i le 2 Nifae 2.)
Suesue e Sauniuni ai mo le Vasega
Faitau le 2 Nifae 2:19–25, ma mafaufau e maka ia upumoni e aoao mai ai ia i tatou le mafuaaga o le Pa’ū o Atamu ma Eva o se vaega talafeagai o le fuafuaga a le Tama Faalelagi. Atonu foi e te matamata i le vitio o le Tusi a Mamona “Ua Aoao Atu Liae I Le Ala Tatou Te Maua Ai le Olioli (2 Nifae 2:16–28)” (3:08).
Ua Aoao Atu Liae I Le Ala Tatou Te Maua Ai le Olioli | 2 Nifae 2:16–28.
2 Nifae 2:16–28 | O Liae, o se perofeta o le Tusi a Mamona, ua aoao atu e uiga i le ata o le faaolataga a le Atua ma faamatala atu ua tatou i ai i le lalolagi ina ia tatou maua le fiafia.
Matau i le 2 Nifae 2:22 ana le filifili Atamu ma Eva e solitulafono, o le a faavavau ai lava ona la “tumau pea mea uma na foafoaina i le tulaga e tasi sa i ai ina ua uma ona foafoaina.” Semanu e la te le alualu i luma pe feagai ma maʻi po o le oti. Semanu e faaletonu le fuafuaga a le Tama Faalelagi mo Lana fanau. A o avea ai o se tasi o Fitugafulu, sa aoao mai e Elder Bruce C. Hafen:
O le Pa’ū sa le o se mea leaga. E le o se mea sese po o se mea na tupu faafuasei. O se vaega fuafuaina o le fuafuaga o le faaolataga a le Alii. O i tatou o “fanau” agaga a le Atua [tagai Galuega 17:28], na auina mai i le lalolagi o loo “mama” [tagai Mataupu Faavae ma Feagaiga 93:38] mai le solitulafono a Atamu. Peitai o le fuafuaga a lo tatou Tama tatou te oo i ai i faaosoosoga ma puapuaga i lenei lalolagi paʻu o se tau ina ia malamalama ai i le olioli moni. Aua afai e le oo lava ia te i tatou le oona, e le mafai ona tatou iloa le suamalie [tagai Mataupu Faavae ma Feagaiga 29:39]. Tatou te manaomia le aoaiga i le olaga i le tino ma le toe faaleleia mo “le isi laasaga o lo [tatou] alualu i luma” ina ia avea atili e pei o lo tatou Tama. (“OLe Togiola: O Mea Uma mo Tagata Uma,” Liahona, Me 2004, 97–99)
Na faamatala e Elder Jeffrey R. Holland o le Korama a Aposetolo e Toasefululua nisi o aafiaga o le Pa’ū:
O le oti faaletino na aumaia ai le tuueseeseina o le agaga mai le tino, ma o le oti faaleagaga na aumaia ai le vavaeeseina o le agaga ma le tino mai le Atua. O le iuga o le Paʻū, o tagata uma e fananau mai i le olaga faitino o le a pagatia i nei ituaiga oti e lua. Ae e tatau ona tatou manatua o le Pa’ū o se vaega manaomia o le fuafuaga paia a le Tama Faalelagi. Ana leai lena, e leai ni fanau faaletino e fananau ia Atamu ma Eva, ma o le a leai se aiga o tagata e lagonaina le tuu faafeagai o mea ma le ola tuputupu a’e, saolotoga lelei, ma le olioli i le toetutu, faaolataga, ma le ola e faavavau [tagai 2 Nifae 2:22–27; Mose 5:11] . (Jeffrey R. Holland, Keriso ma le Feagaiga Fou: O Le Savali FaaMesia i le Tusi a Mamona (1997), 207)
Mafaufau Loloto i Sauniuniga mo le Vasega
Mafaufau pe faapefea ona avea aafiaga o le Pa’ū ma se vaega taua o le fuafuaga a le Atua mo Lana fanau. E faapefea e le Pa’ū ona tuuina atu ia te oe le avanoa e alualu ai i luma faaleagaga ma maua ai le olioli?
Vaega 2
E faapefea ona faamanuiaina loʻu olaga i le faaaoga tatau ai o le faitalia?
I le fesootai ai ma ana aoaoga i le Pa’ū, na talanoaina e Liae e faapea o le saolotoga e filifili e taua lea i lo tatou alualu i luma i le ata o le faaolataga. Na ia faailoa mai o tulaga nei e manaomia ina ia mafai ai ona maua le faitalia. (Suesue i fuaitau o mau o loo i ai, ma mafaufau e maka upu ma fasifuaitau o loo aoao mai ai e uiga i nei tulaga o le faitalia.)
-
O se iloa o le lelei ma le leaga (tagai 2 Nifae 2:5)
-
Tulafono na tuuina mai i tagata (tagai i le 2 Nifae 2:5, 10.)
-
Tetee i faatosinaga ma filifiliga (tagai 2 Nifae 2:11-16)
-
Mana ma le saolotoga e filifili ai (tagai 2 Nifae 2:16, 26)
Mafaufau pe faapefea ona aafia lou gafatia e filifili ai ma alualu i luma pe a fai na misi se tasi o nei tulaga mai le fuafuaga a le Tama Faalelagi.
Na saunoa Peresitene Thomas S.Monson e uiga i ituaiga eseese o filifiliga tatou te faia i lenei olaga:
Toetoe a leai se itula o le aso e alu e aunoa ma le moomia ona tatou faia o ni filifiliga mo lea mea ma lea mea. O nisi e le taua, a o nisi e matua taua lava. O nisi filifiliga e le afaina ai le faavavau, a o nisi o le a faia ai le eseesega o mea uma . (“O R e Tolu o Filifiliga,” Liahona, Nov. 2010, 69)
Ia manatua e saunia e le Tama Faalelagi le taitaiga e fesoasoani e faia ai a tatou filifiliga, ae maise lava filifiliga taua. Mafaufau pe faapefea ona oo mai lena taitaiga ia te oe i taimi ua tuanai.
Mafaufau Loloto i Sauniuniga mo le Vasega
Mafaufau e uiga i filifiliga na e faia talu ai nei. E faapefea e nei filifiliga ona aafia ai lou alualu i luma?
Vaega 3
E mafai faapefea e le Togiola a Iesu Keriso ona aumaia ia te aʻu le saolotoga moni?
Ina ua uma ona aoao atu e uiga i le taua o le Pa’ū ma le faitalia i le fuafuaga o le faaolataga, na aoao atu e Liae lana fanau e faapea o le Togiola a Iesu Keriso e maua ai le saolotoga mo fanau a le Atua e faia ai e faavavau filifiliga taua.
Suesue e Sauniuni ai mo le Vasega
Faitau le 2 Nifae 2:26-28, ma mafaufau i le filifiliga ua avanoa mo oe ona o le taulaga togiola a le Faaola.
I le taʻua ai o le sootaga i le va o le Pa’ū, filifiliga saoloto, ma le Togiola a Iesu Keriso, na aoao mai ai Elder Hafen:
Sa aoaoina pea lava pea Atamu ma Eva mai o laua aafiaga tiga. … Ae ona o le Togiola [a Iesu Keriso], sa mafai ai ona la aʻoaʻo mai lo laua aafiaga e aunoa ma le taʻusalaina ai. O lea la, o le taulaga a Keriso sa le na ona tapeese ai a laua filifiliga ae sa toe faafoi atu ai i laua i se Etena o le ta’umamaina. O le a avea lena o se tala e leai se auivi ma e le o agai i luma le tagata o le tala. O Lana fuafuaga e atinaeina—fuaitau i lea fuaitau, ma lea laasaga ma lea laasaga, alofa tunoa mo le alofa tunoa.
Afai la o i ai ni faafitauli i lou olaga, aua e te manatu faapea o loo i ai se mea o faaletonu ia te oe. O le tauivi ai ma na faafitauli o le faavae lea o le faamoemoega o le olaga. A o tatou faalatalata atu i le Atua, o le a Ia faaali mai ia i tatou o tatou vaivaiga, ma o na vaivaiga o le a tatou atamamai, ma malolosi ai [tagai Eteru 12:27]. (“O Le Togiola: O Mea Uma mo Tagata Uma,” Liahona, Me 2004, 97–99)
Tusifaamaumau Ou Lagona Uunaia
Na aoao mai Peresitene Boyd K. Packer o le Korama o Aposetolo e Toasefululua, “Pe ana fai e oo mai le faitalia i le tagata e aunoa ma le Togiola [a Iesu Keriso], semanu o se meaalofa e oti ai” (“O le Togiola, Saolotoga, Tiutetauave,” Liahona, Iulai 1988, 71). O a ni auala ua mafai ai ona e aoao mai au filifiliga ona o le Togiola a Iesu Keriso? O le a se mea e mafai ona e aoaoina mai se agasala na e faia poo se mea sese na e faia?