Lesona 6 Anomea mo le Sauniuniga o le Vasega

O Le Togiola e Le I’u a Iesu Keriso

O a ni ou lagona ma mafaufauga a o e tomanatu i mafatiaga o le Faaola i le Faatoaga o Ketesemane ma luga o le satauro? Na aoao mai Peresitene Russell M. Nelson, “Ua tuuina mai e le Tusi a Mamona le atoatoaga ma le malamalama sili ona mausali o le Togiola a Iesu Keriso e maua i soo se mea.” (“O Le Tusi a Mamona: Faamata e Faape’i Lou Olaga e aunoa ma Ia?” Liahona, Nov. 2017, 62). A o e suesue i mea o loʻo aoao mai e le Tusi a Mamona e uiga ia Iesu Keriso ma Lana togiola, mafaufau pe faapefea ona Ia togiolaina oe mai aafiaga o le Pa’ū ma mafai ai ona e avea atili e pei o Ia ma lo tatou Tama o i le Lagi.

Vaega 1

Aisea e tatau ai ona ou taliaina le Togiola a Iesu Keriso?

Pe tusa o le 74 TLM, na taitai ai e le perofeta o Alema se misiona i sa Sorama, o e sa i ai se faiga tapuaiga pi’opi’o ma sa aoao mai e faapea “o le a leai se Keriso” (Alema 31:16). Ina ua talaʻi atu Alema ma Amoleka i se vaega o tagata matitiva o sa Sorama o e na tutulieseina mai o latou fale o tapuaiga, na latou aoaoina i latou i le auala e tapuai ai i le Atua ma molimau atu ma le lototetele o le a afio mai Keriso ma faia se togiola e le iu.

Ua tatou iloa mai i tusitusiga paia ma faaaliga o aso nei e faapea “o le Togiola a [Iesu Keriso] e aofia ai Lona mafatiaga mo agasala a tagata, o le faamaligiina o Lona toto, ma Lona maliu ma sosoo ai ma le toetu mai le tuugamau” (Taiala i Tusitusiga Paia, “Atone, Atonement,” scriptures.ChurchofJesusChrist.org).

Suesue e Sauniuni ai mo le Vasega

Faitau le Alema 34:8–10, ma vaavaai mo mea na aoao mai e Amoleka e uiga i lo tatou manaomiaina o le Togiola a Iesu Keriso.

Na aoao mai e Peresitene Russell M. Nelson le mea lenei e uiga i le Togiola le i’u a le Faaola:

O le Togiola [a Iesu Keriso] e le i’u—e leai sona iuga. E le i’u foi ina ia mafai ona faaolaina tagata ola uma mai le oti e le uma. E le i’u pe a fuafua i Lona puapuagatia tele. Sa le’i i’u i le taimi, ua faamuta ai ia uluai faiga o taulaga sa osi i manu. Sa le’i i’u i se tulaga—na faia i le taimi e tasi mo tagata uma. Ma sa faalautele atu le alofa mutimutivale o le Togiola e le gata i tagata e le mafaitaulia, ae faapena foi i le tele o lalolagi e le mafaitaulia na foafoaina e Ia. Sa le i’u i le tulaga e le oo i ai se fua faatatau po o se malamalama o le tagata soifua.

E na o Iesu lava e mafai ona ofoina mai lea ituaiga togiola e le i’u, talu ai ona na soifua mai o Ia i se tina faitino, ma se Tama e i ai le tino ola pea. Ona o lena tofi tulagaese na fanau mai ma Ia, na avea ai Iesu ma Tagata e tumau faavavau. (“Ole Togiola,” Ensign, Nov. 1996, 35)

Na tuuina mai foi e le perofeta o Iakopo se lauga mamana e talanoaina ai lo tatou manaomia o le Togiola le i’u a le Alii ma le auala na laveaiina ai i tatou e Iesu Keriso mai aafiaga o le Pa’ū ma taunuuga o a tatou agasala.

Suesue e Sauniuni ai mo le Vasega

Suesue le 2 Nifae 9:6–10, 19–22, ma vaavaai mo le mea semanu e tupu pe ana le i ai le Togiola e le i’u a le Faaola.

E mafai ona tatou maua le talitonuina atoatoa o le Togiola le i’u a le Faaola e mafai ai ona tatou salamo ia tatou agasala ma faamamaina. O Peresitene Tad R. Callister, sa avea ma Peresetene Aoao o le Aoga Sa, na tuuina mai le lapataiga lenei e uiga i le tuuina o tapulaa i le Togiola a le Alii:

E i ai nisi taimi sa ou feiloai ai i nisi o le Au Paia lelei o loo i ai ni faafitauli i le faamagaloina o i latou lava ia, o ē sa aunoa ma le iloa na latou tuuina ma le le sa’o ni tapulaa i mana togiola o le Faaola. E aunoa ma le iloa, ua latou liuaina se Togiola le i’u i se togiola e gata lea e le taulimaina ai a latou agasala po o vaivaiga patino. Ae o se Togiola le i’u ona na te faaaofiaina ma totogiina agasala uma ma vaivaiga, faapea ai foi ma sauaga uma po o tiga e mafua ona o isi. (“Ole Togiola a Iesu Keriso,” Liahona, Me 2019, 85–86)

Mafaufau Loloto i Sauniuniga mo le Vasega

E faapefea e le iloa o le Togiola a le Faaola e le i’u ona aafia ai le auala e te malamalama ai ma tali atu i a oe lava tauiviga ma atugaluga? E te talitonu moni o le Togiola le iu a Iesu Keriso e mafai ona fesoasoani ma laveai ai oe?

Vaega 2

E mafai faapefea e le Togiola a Iesu Keriso ona fesoasoani ia te au e faatoilalo le tagata natura?

Ina ua taufaaiuiu le soifua o le Tupu o Peniamina, sa ia tuuina atu se lauga mamana i ona tagata e faatotonugalemu ia Keriso. I le taimi o lenei lauga sa ia faamatala ai le mea na aoaoina ai o ia e le agelu e uiga i le galuega ma le Togiola a Iesu Keriso. Na ia a’oa’o mai ua na o le Togiola lava a le Alii le ala e mafai ona tatou manumalo ai i le vaega natura faaletagata, po o le agasala o patino ia i tatou.

Suesue e Sauniuni ai mo le Vasega

Faitau le Mosaea 3:19, ma vaavaai mo mea e mafai ona e faia e faatoilalo ai le tagata natura.

Na tuuina mai e Elder David A. Bednar o le Korama a Aposetolo e Toasefululua manatu nei e uiga i le alii po o le tamaitai natura:

I se isi itu, o le tagata natura o loo faamatalaina e le Tupu o Peniamina o loo ola pea ma o loo i ai i totonu o i tatou taitoatasi (tagai Mosaea 3:19). O le alii po o le tamaitai natura e le salamo, e tuinanau ma faamalie lagona o le tino (tagai Mosaea 16:5; Alema 42:10; Mose 5:13), e faalologo ma soonafai, ma e faamaualuga ma manatu mo na o ia lava. E pei ona aoao mai Peresitene Spencer W. Kimball, “O le ‘tagata natura’ o le ‘tagata i le lalolagi’ o lē na te faatagaina naunauga masani a manu e faapogisaina ona lagona faaleagaga” (“Ocean Currents and Family Influences,” Ensign, Nov. 1974, 112). …

O le uiga moni lava la o le suega i le olaga nei, e mafai ona aoteleina i le fesili lea: Pe o le a ou tali atu ea i faamoemoega o le tagata natura, pe o le a ou gauai atu i uunaiga a le Agaga Paia ma tuu ese le tagata natura ae avea ma tagata paia e ala i le Togiola a Keriso le Alii (tagai Mosaea 3:19)? O le suega lena. O naunauga uma, manaoga, faamoemoega, ma moomooga o le tagata natura, e mafai ona faatoilalo e le, ma ala i le Togiola a Iesu Keriso. Ua tatou i ai iinei i le lalolagi e atiina ae uiga auaumamā faale-atua ma ia pulea lelei faanaunauga uma o le tino. (“Matou te Talitonu i le Nofomama,” Liahona, Me 2013, 42, 43)

Mafaufau Loloto i Sauniuniga mo le Vasega

Na e lagona ea e te le mafai ona faatonutonu pe faatoilaloina manaoga ma lagona faaosofia o le alii po o le tamaitai natura? E faapefea e aoaoga i le Mosaea 3:19 ona aumaia ia te oe le faamoemoe e mafai ona e faia ni suiga amiotonu ma avea atili ai e pei o le Faaola?

E Te Manao i Nisi Mea? (Tuu i le faitalia)

O fea e mafai ona ou aoao atili ai e uiga i mea o loʻo aoao mai i le Tusi a Mamona e uiga i le Togiola a Iesu Keriso?

I le vitio “Jesus Christ and the Atonement in the Book of Mormon” (2:25), na faamatala e Peresitene Russell M. Nelson o le Tusi a Mamona o loʻo i ai le tele o aoaoga e uiga ia Iesu Keriso ma Lana Togiola.

I se faaopoopoga i fuaitau na taʻua i luga, o fuaiupu nei ua taʻu mai ai le loloto ma le lautele o aoaoga a le Tusi a Mamona e uiga i le Togiola a Iesu Keriso: 2 Nifae 2:6–8; Mosaea 3:5–11; 15:7–9; Alema 7:11–13; 42:12–26; Helamana 14:15–19; Moronae 8:8–12.

O a faamanuiaga o le Togiola a Iesu Keriso?

I le tusiga “The Atonement of Jesus Christ” (Ensign, Mar. 2008, 32–38), o loo faamatala mai ai e Elder Jeffrey R. Holland o le Korama a Aposetolo e Toasefululua e faapea o nisi o faamanuiaga o le Togiola a le Alii e tuuina fua atu i tagata uma a o isi faamanuiaga e i ai tuutuuga ma e faavae i luga o lo tatou usitai i tulafono.

O le a laʻu mea e fai e faatoilaloina ai le alii po o le tamaitai natura?

I le tusiga “Win the Battle with the Natural Man” (Ensign, Dec. 2018, 64–69), ua tuuina mai e Elder Carl B. Cook o le Au Peresitene o le Au Fitugafulu ni fautuaga mo auala e mafai ai ona tatou faateleina lo tatou gafatia e manumalo ai i le alii po o le tamaitai natura ma avea ma tagata o le au paia “e ala i le togiola a Keriso le Alii” (Mosaea 3:19).