Lesona 8 Anomea mo le Sauniuniga o le Vasega

Olaga pe a mavae le Oti

O Le Aai e Faavavau, saunia e D. Keith Larson

Na aoao mai Peresitene Russell M. Nelson: “E le tatau ona tatou vaai atu i le oti o se fili. Faatasi ai ma le malamalama atoatoa ma sauniuniga, e suia ai e le faatuatua le fefe. E aveese e le faamoemoe le leai o se faamoemoe” (“Doors of Death,” Ensign, May 1992, 74). A o e suesue i lenei anomea mo sauniuniga, mafaufau po o le a se mea o aoao mai e le Tusi a Mamona e uiga i le oti ma le olaga pe a mavae le oti, lea e mafai ona fesoasoani ia te oe e “saunia ai e fetaiai ma le Atua” (Alema 12:24).

Vaega 1

O le a le mea e tupu pe a tatou oti?

Ina ua lafoai e Korianetona, o se atalii o Alema le Itiiti, le galuega ma faia agasala tau i feusuaiga, sa talanoa atu lona tama ia te ia e uiga i le matuia o ana amioga. Sa vaaia e Alema le popole o Korianetona i le olaga pe a mavae le oti ma le faasalaga ua faatalitali mai ai mo le tagata agasala. Sa aoao e Alema lona atalii, e ui ina o le a toetutu tagata uma, e na’o e amiotonu o le a nonofo faatasi ma le Atua (tagai Alema 40:1, 9–10, 25–26). Sa ia faamatala atu foi le mea e tupu i o tatou agaga i le va o le oti ma le Toetutu.

aikona, suesue

Suesue e Sauniuni ai mo le Vasega

A o e faitau i nisi o aoaoga a Alema e uiga i le lalolagi o agaga i le Alema 40:11–14, ia faatusatusa le eseesega i le va o le aafiaga a e amiotonu ma aafiaga o e amioleaga. (Ina ua faaaoga e Alema le fasifuaitau “pouliuli i fafo,” sa talanoa o ia i le tulaga o e amioleaga i le va o le oti ma le Toetu ma sa le faatatau i le tulaga faaiu o Satani ma e mulimuli ia te ia. Tagai Taiala i Tusitusiga Paia, “Seoli,” scriptures.ChurchofJesusChrist.org.)

O le Tofiaina, saunia e Harold I. Hopkinson

Na aoao mai e Peresitene Iosefa Filitia Samita le mea lenei e uiga i le fuaitau “e ave atu i fanua i lena Atua o le na ia tuuina ia te i latou le ola”:

Peresitene Iosefa Filitia Samita

O le uiga [o le fuaitau lenei] ua faaiuina lo latou ola faaletino, ma ua latou foi atu i le lalolagi o agaga, lea e atofaina ai i latou i se nofoaga e tusa ai ma a latou galuega faatasi ai ma e amiotonu po o e le amiotonu, ma faatalitali ai iina le toetu. (Joseph Fielding Smith, Answers to Gospel Questions, tuufaatasia e Joseph Fielding Smith Jr. [1958], 2:85)

Na saunoa foi Peresitene Dallin H. Oaks o le Au Peresitene Sili e uiga i le lalolagi o agaga:

Peresitene Dallin H. Oaks

Ua tatou iloa mai tusitusiga paia pe a oti o tatou tino e faaauau pea ona tatou ola o ni agaga i le lalolagi o agaga. Ua aoao mai foi tusitusiga paia ua vaevaeina lenei lalolagi o agaga ia i latou o ē na “amiotonu” pe na “faamaoni” i le taimi o le olaga ma i latou o ē amioleaga. Ua faamatalaina mai foi le auala e aoao atu ai e nisi o ē faatuatua le talalelei ia i latou o ē na amioleaga pe na fouvale (tagai i le 1 Peteru 3:19; Mataupu Faavae ma Feagaiga 138:19–20, 29, 32, 37). O le mea sili ona taua, ua faaali mai i faaaliga o onapo nei o le galuega o le faaolataga e agai pea i luma i le lalolagi o agaga (tagai i le Mataupu Faavae ma Feagaiga 138:30–34, 58), ma e ui e uunaia i tatou e aua ne’i faatuai lo tatou salamo i le olaga faaletino (tagai i le Alema 13:27), ae ua aoaoina foi i tatou o nisi salamo e mafai ona faia iina (tagai i le Mataupu Faavae ma Feagaiga 138:58). (“Faalagolago i le Alii,” Liahona, Nov. 2019, 26)

aikona, mafaufau loloto

Mafaufau Loloto i Sauniuniga mo le Vasega

E mafai faapefea e le i ai o se malamalamaaga sa’o e uiga i le lalolagi o agaga ona fesoasoani e te faia ai ni filifiliga lelei?

Vaega 2

E mafai faapefea i le i ai o le malamalama i le Toetu ona aumaia le faamoemoe ia te a’u?

Ina ua aoao atu e Alema ma Amoleka le nuu o Amonaea, sa taumafai se loia na igoa ia Seseroma e mimilo upu a Amoleka ma ta’ufaatauvaa ana aoaoga e uiga ia Iesu Keriso. O le tali atu i ai, na molimau atu Amoleka ma le lototoa e faapea, o le Toetu ma le faaolataga mai le agasala e na’o Iesu Keriso lava e ala mai ai.

aikona, suesue

Suesue e Sauniuni ai mo le Vasega

Faitau le Alema 11:42–44, ma vaavaai mo faamanuiaga o le a tatou maua e ala i le Toetutu.

tamaitai talavou o i se nofoa faataavalevale o loo tuuina atu se opo

O le molimau mai ai i le taua o le Toetutu, na aoao mai ai Peresitene Susan W. Tanner, o le sa avea ma Peresitene Aoao o Tamaitai Talavou:

Peresitene Susan W. Tanner

O nei tino paia, ua faapea ona tatou matuai faafetaia, e pagatia i tapulaa faanatura. O nisi tagata e fananau mai ma le lē atoatoa, ma o nisi e mafatia i tiga o faama’i i o latou olaga atoa. O i tatou uma lava a o tatou faasolo matutua, e amatamata malie lava ona le toe aoga o tatou tino. A tupu mai lenei mea, tatou te moomoo mo le aso o le a faamaloloina ma faaatoatoaina ai o tatou tino. Tatou te tulimatai atu i le Toetutu, lea ua mafai ona o Iesu Keriso. … Ou te iloa, e ala mai ia Keriso, ua mafai ai ona tatou iloa le atoatoaga o le olioli, lea e maua mai i le agaga ma le elemene fesoota’i e lē mavavaeeseeseina (tagai M&FF 93:33). (“O Le Paia o le Tino,” Liahona, Nov. 2005, 15)

aikona, mafaufau loloto

Mafaufau Loloto i Sauniuniga mo le Vasega

E mafai faapefea e le mauaina o se molimau e uiga i le Toetutu, ona fesoasoani i lou taulimaina o luitau o le olaga ma se faamoemoe ma se lototele sili atu?

Vaega 3

O le a se mea e mafai ona ou faia ia saunia lelei ai e fetaiai ma le Atua?

I le mae’a ai o ni nai tausaga talu le aoao atu i Amonaea, sa toe o ai Alema ma Amoleka i se isi misiona, o le taimi lenei i sa Sorama ua liliuese. Sa amata ona manuia Alema ma Amoleka i totonu o vaega e sili atu ona faatauvaa o le nuu. Ina ua uma ona aoao atu tagata ia vaai atu ia Iesu Keriso ma talitonu i le mana o Lona Togiola, sa valaaulia i latou e Amoleka ia saunia e feiloai ma le Atua.

aikona, suesue

Suesue e Sauniuni ai mo le Vasega

Mafaufau i mea e mafai ona e faia ia saunia lelei ai e feiloai ma le Atua a o e faitau i le Alema 34:32–34.

tamaitai o loo manatunatu loloto

O le saunoa ai i le taua o le sauniuni i le taimi nei e fetaiai ma le Atua, na aoao mai ai Peresitene Henry B. Eyring o le Au Peresitene Sili:

Peresitene Henry B. Eyring

“E i ai se tulaga matautia i le upu e i ai se aso pe afai o lona uiga o le, ‘e le o le aso nei.’ “E i ai se aso ou te salamo ai.” “E i ai se aso ou te faamagalo ai ia te ia.” …

Ua faamanino mai e tusitusiga paia le leaga o le faatuai. … O le aso nei o se meaalofa faapelepele a le Atua. O le manatu ‘E i ai se aso o le a ou” e mafai ona avea o se gaoi i avanoa o le aso nei ma faamanuiaga o le faavavau. (“OLe Aso Nei,” Liahona, Me 2007, 89)

Ina ua auauna atu Alema le Itiiti i tagata i le nuu o Saraemila, sa tele ni fesili faatupu manatu sa ia fesiligia e fesoasoani ai ia latou manatunatu i mea e ao ona latou faia e saunia ai e tutu atu i le afioaga o le Atua (tagai Alema 5).

aikona, suesue

Suesue i Sauniuniga mo le Vasega

Faitau le Alema 5:15–17, 19, 27, 33, ma mafaufau pe o le a faapefea ona e tali i fesili a Alema.

aikona, tusifaamaumau

Tusifaamaumau Ou Lagona Uunaia

A uma ona mafaufau loloto i fesili a Alema, mafaufau pe faapefea ona e tali i le fesili lenei mai ia Peresitene Oaks: “Afai [e] te iloa o taeao le aso [e] te fetaia’i ai ma le Alii—e ala i [lou] oti faafuasei, po o Lona tu faafuase’i mai foi—o le a se mea [e] te faia i le aso?” (“Sauniuniga mo le Afio Mai Faalua,” Liahona, Me 2004, 9).

Manao Pea i Nisi Mea? (Tuu i le faitalia)

E mafai faapefea e le fuafuaga o le faaolataga ona fesoasoani ia ou vaai i le oti mai se vaaiga e faavavau?

Matamata le vitio “What Happens to Our Bodies and Spirits after We Die?” (4:19) mo se faamalamalamaga faigofie o le oti.

O fea e mafai ona ou aoao atili ai e uiga i le faamoemoega ma le taua o le Toetutu?

I le 3 Nifae 11:1–17 tatou te faitau ai i le tala i le faaali atu o le Keriso toetu i le pe tusa ma le 2,500 o tagata i le laueleele o Nuumau.

O perofeta nei o le Tusi a Mamona ua tuuina mai ni aoaoga faaopoopo e uiga i le Toetutu: Liae (tagai 2 Nifae 2:8), Iakopo (tagai 2 Nifae 9:10–12), Apinati (tagai Mosaea 15:20–24; 16:7–8), Samuelu le sa Lamana (tagai Helamana 14:15–17), ma Mamona (tagai Mamona 7:5–7).

I le vitio “Finding Hope through the Resurrection of Christ” (4:41), o loo faasoa mai ai e tagata o le Ekalesia le ala ua aumaia ai e le Togiola ma le Toetu a le Faaola ia i latou le faamoemoe.

O le a le mea e tatau ona ou faia pe a i ai ni a’u fesili e le’i taliina e uiga i le olaga pe a mavae le oti?

Peresitene Dallin H. Oaks

I lana saunoaga “Faalagolago i le Alii” (Liahona, Nov. 2019, 26–29), Na aoao mai ai e Peresitene Oaks nisi o mea ua tatou iloa e uiga i le olaga pe a mavae le oti ma uunaia i tatou ia faalagolago i le Alii e uiga i na mea tatou te le’i iloa.