Lesona 10 Anomea mo le Sauniuniga o le Vasega

Salamo ma le Faamagaloina

tamaitai talavou o loo manatunatu loloto

O le salamo o se vaega o le aoaoga faavae a Iesu Keriso. O Lana meaalofa lea ia i latou o e mananao ia suia ma ia mama mai le agasala. E mafai ona e manatua pe na faape’i ou lagona ina ua e faatoese moni mo ma salamo mai se mea i le taimi ua tuanai? Sa aoao mai Elder Richard G. Scott o le Korama a Aposetolo e Toasefululua e faapea, “Manatua, o le salamo e le o se faasalaga. O le ala lea ua tumu i le faamoemoe e tau atu i se lumanai sili ona mamalu.” (“Malosi Patino e ala i le Togiola a Iesu Keriso,” Liahona, Nov. 2013, 84). A o e suesue e sauniuni ai mo le vasega, mafaufau loloto i le ala ua mafai ai e le meaalofa a le Faaola o le salamo ma le faamagaloga ona e aoao, tuputupu ae, ma avea atili faapei o Ia.

Vaega 1

E mafai faapefea ona ou salamo moni ma maua le faamagaloga a le Alii mo a’u agasala?

E le’i talitonu Alema le Itiiti i aoaoga a lona tamā, o Alema le Matua. Faatasi ai ma atalii o le Tupu o Mosaea, sa taumafai malosi Alema le Itiiti e faaumatia le Ekalesia a le Faaola. A o latou gauai atu i lenei galuega leaga, sa faaali ane se agelu a le Alii ia i latou ma lapataia Alema e tuu mea sa ia faia pe o le a “lafoa’i ese” o ia” (Mosaea 27:16). I le lofituina ai i lenei aafiaga, sa le mafai ona tautala pe minoi Alema. Sa ave e atalii o Mosaea ia Alema le Itiiti i lona tamā ma faamatala i ai le mea na tupu. (Tagai i le Mosaea 27:8–20.)

Na Olioli Lona Tamā, na saunia e Walter Rane

aikona, suesue

Suesue e Sauniuni ai mo le Vasega

Faitau e uiga i le aafiaga o Alema le Itiiti i le Mosaea 27:35 ma le Alema 36:12–13, 17–21, 24. A o e faitau, mafaufau e maka pe fai se lisi o mataupu faavae e uiga i le salamo ma le faamagaloga na aoao mai i nei fasi fuaitau. Ia saunia e faasoa atu nei mataupu faavae i le vasega. Manatua o le aafiaga o Alema e sili atu le matautia nai lo mea tatou te oo i ai pe a tatou salamo. Ae peitai, e mafai lava ona tatou aoaoina mataupu faavae e silisili ona mamana mai nei tala.

Na matauina e Elder Jeffrey R. Holland o le Korama a Aposetolo e Toasefululua tulaga nei e uiga i le matafaioi taua a le Alii i lo tatou salamo:

Elder Jeffrey R. Holland

O Keriso o le mana e i tua o le salamo. … Sa lagonaina e Alema mea na aoaoina ai o ia e lona tama, ae o le valoaga e sili ona taua na ia manatuaina o se tasi e faatatau i le “afio mai o Iesu Keriso, o le Alo o le Atua e toatasi, e togiola mo agasala a le lalolagi.” (Alema 36:17.) O le igoa lena ma o le savali lena e ao i tagata taitoatasi ona faalogo i ai. … Po o a lava isi tatalo tatou te faia, o a lava isi manaoga o loo ia i tatou, o ia mea uma e faalagolago i lena olega: “E Iesu e, oe le Alo o le Atua, ia e alofa mutimutivale mai ia te au.” Ua saunia o Ia e tuuina mai lena alofa mutimutivale. Sa ia totogiina i lona lava soifua ina ia mafai ai ona tuuina mai.. (However Long and Hard the Road [1985], 85)

aikona, mafaufau loloto

Mafaufau Loloto i Sauniuniga mo le Vasega

Filifili se tasi o fesili nei e te manao e aoao pe faapefea ona sili atu lou taliina:

• O le a le uiga moni o le salamo? Ua ou uia laasaga, ae ou te le o lagonaina se eseesega.

• E mafai faapefea ona ou maua le malosi e suia moni ai? Ua ou lotovaivai ona ou te taumafai malosi e fai ia sili atu, ae ou te faia lava mea sese masani.

• Aisea e tatau ai ona ou taumafai e salamo? E leaga tele a’u agasala ma e le mafai ona faamagaloina au.

Mafaufau loloto i le aafiaga o Alema ma isi tala mai le Tusi a Mamona e mafai ona fesoasoani e tali ai le fesili na e filifilia. Sau saunia i le vasega e faasoa mataupu faavae ma fuaitau e te manatu o le a talanoaina ai lenei fesili.

Vaega 2

E faapefea ona avea le ofoina atu i le Alii o se loto momomo ma le agaga salamo o se vaega o le salamo faamaoni?

Sa ola sa Nifaē i le tulafono a Mose seia oo ina le’i umi ae faaali tino atu Iesu Keriso ia te i latou. I le avea ai o se vaega o le tulafono a Mose, na poloaiina ai e le Faaola Ona tagata e osi atu taulaga i manu, o se faatusa o le taulaga togiola na Ia faia.

Na osia e Liae ma lona aiga se taulaga mu

aikona, suesue

Suesue e Sauniuni ai mo le Vasega

Ina ua fetalai le Faaola i tagata Sa Nifaē na sao mai le faatafunaga na o faatasi ma Lona maliu, na Ia folafola atu o le a Ia le toe taliaina taulaga e osi atu i manu. Faitau le 3 Nifae 9:19-20, ma vaavaai mo le taulaga fou na manaomia e le Faaola mai Ona tagata.

Na faamalamalama mai e Elder Bruce D. Porter o le Fitugafulu le uiga o le “loto momomo ma le agaga salamo” (3 Nifae 9:20):

Elder Bruce D. Porter

A tatou agasala ma manaomia le faamagaloga, o le loto momomo ma le agaga salamo o le oo i le “tiga e tusa i le Atua [e] tupu ai le salamo” (2 Korinito 7:10). E oo mai lenei mea pe afai o lo tatou manao e matuai malosi ia mama mai agasala lea e tiga ai o tatou loto i le faanoanoa ma tatou mananao ai e faalelei ma lo tatou Tama o i le Lagi. O i latou ua i ai se loto momomo ma se agaga salamo e naunau e fai soo se mea e fetalai mai ai le Atua ia i latou, e aunoa ma le tetee pe le fiafia. E tuu lo tatou faia o mea i a tatou lava ala ae aoao e faia i le ala a le Atua. I se tulaga faapena o le gauai atu, e mafai ona aoga ai le Togiola ma tupu mai ai le salamo moni. (“O Se Loto Momomo ma se Agaga Salamo,” Liahona, Nov. 2007, 32)

o se tamaitai talavou ua lagonaina le faanoanoa mo agasala

aikona, mafaufau loloto

Mafaufau Loloto i Sauniuniga mo le Vasega

O le a se mea e mafai ona e faia e faaali atu ai i le Alii lou naunau faamaoni e ofo atu ia te Ia se loto momomo ma se agaga salamo?

Vaega 3

Aisea ua naunau tele ai le Faaola e faamagalo aʻu i aʻu agasala?

I le taimi o le nofoaiga a le Tupu o Mosaea, “sa toatele tupulaga faiaʻe” (Mosaea 26: 1) na tauanau tagata o le Ekalesia e faia ni agasala matuia. I le le mautonu pe faapefea ona faafoeina lenei tulaga, na liliu atu Alema le Matua i le Alii mo se taitaiga.

aikona, suesue

Suesue e Sauniuni ai mo le Vasega

Faitau le Mosaea 26:22, 30, ma vaavaai mo le mea na aoaoina e Alema le Matua e uiga i le naunautaiga o le Alii e faamagalo atu.

Na aoao mai Elder Dale G. Renlund o le Korama a Aposetolo e Toasefululua:

Elder Dale G. Renlund

E mafai ona faamagalo mai Iesu Keriso ona o Ia na totogia le tau mo a tatou agasala [tagai Isaia 53:5].

E filifili lo tatou Togiola e faamagalo mai ona o Lona agaalofa, alofa mutimutivale, ma le alofa lemafaatusalia.

E finagalo lo tatou Faaola e faamagalo mai ona o se tasi lea o Ona uiga paia.

Ma, i le avea ai o Ia ma se Leoleo Mamoe Lelei, e fiafia o Ia pe a tatou filifili e salamo [tagai Luka 15:4–7; Mataupu Faavae ma Feagaiga 18:10–13]. (“Salamo: O Se Filifiliga Fiafia,” Liahona, Nov. 2016, 123; faaopoopo le faatusilima)

Na faamautinoa mai foi e Elder Neil L. Andersen o le Korama a Aposetolo e Toasefululua:

Elder Neil L. Andersen

Ou te maofa i le opo mai o aao alofa mutimutivale o le Faaola mo le tagata ua salamo, e tusa lava pe o le a le manatu faapito o le agasala ua lafoai. Ou te molimau atu e mafai ma e naunau le Faaola e faamagalo i a tatou agasala. (“Salamo … Ina Ia Ou Faamaloloina Outou,” Liahona, Nov. 2009, 40)

aikona, mafaufau loloto

Mafaufau Loloto i Sauniuniga mo le Vasega

E mafai faapefea ona aafia lou aga atu ia salamo ona o lou talitonuina ma taliaina faapea e naunau, e mafai, ma finagalo Iesu Keriso e faamagalo au agasala ma aveese le ta’usalaga?

E Te Manao Pea i Nisi Mea? (Tuu i le faitalia)

O a nisi mea e mafai ona ou aoaoina mai tagata i le Tusi a Mamona o e na salamo ma ua faamagaloina?

Faitau ia fuaitau nei e aoao atili ai e uiga i tagata i le Tusi a Mamona o e na salamo i agasala, mauaina le faamagaloga, pe faamagaloina isi:

• Ua faamagalo e Nifae ia Lamana ma Lemuelu (tagai 1 Nifae 7:16–21).

• Ua tauivi Enosa ia maua le faamagaloga (tagai Enosa 1:1–8).

• Ua maua e le nuu o le Tupu o Peniamina le faamagaloga (tagai Mosaea 4:1–3).

• Ua faamagaloina ia Seseroma mo ana agasala e tele ma ua faamaloloina (tagai Alema 15:1–11).

• Ua lafoai e le tama o le Tupu o Lamonae ana agasala (tagai Alema 22:15-27).

• E faitau selau le au sa Lamana na usitaia le valaau e salamo (tagai Helamana 5:20–52).

Faamata e mafai ona faamagaloina aʻu pe a ou paʻū atu i agasala lava ia e tasi?

I le vitio “The Savior Wants to Forgive” (5:50), ua faamatalaina e se tasi sa avea fualaau faasaina ma vaisu ia le auala na faamagaloina ai pea lava pea o ia e le Faaola, e oo lava i taimi na toe foi ai i le faia o agasala muamua ae na faaauau pea ana taumafaiga e salamo.

O a agasala e moomia ona ta’uta’u atu i se epikopo?

Elder C. Scott Grow

I le “Aisea ae O a foi Mea e Tatau ona Ta’uta’u Atu i Lo’u Epikopo” (New Era, Oct. 2013, 28–30), ua aoao mai Elder C. Scott Grow o le Fitugafulu e uiga i le matafaioi a le epikopo i le faagasologa o le salamo.

O le a laʻu mea e fai pe a ou tauivi ma le faamagaloina o aʻu lava?

Elder D. Chad Richardson

I le tusiga “Forgiving Oneself” (Ensign, Mar. 2007, 30–33), na talanoaina e Elder D. Chad Richardson, o se sa avea ma Fitugafulu Eria, le uiga o le faamagaloina o i tatou lava.