Lesona 11 Anomea mo le Sauniuniga o le Vasega

Fetaomi Atu i Luma i le Ala o le Feagaiga

tagata talavou o loo savali

Na aoao mai Peresitene Russell M. Nelson, “I tagata taitoatasi o le Ekalesia ou te faapea atu, tumau i le ala o le feagaiga. O lo outou tuuto e mulimuli i le Faaola e ala i le osia o feagaiga ma Ia ona tausia lea o na feagaiga, o le a matala ai le faitotoa i faamanuiaga uma faaleagaga ma avanoa e maua e alii, tamaitai, ma fanau i soo se mea” (“As We Go Forward Together,” Ensign, Apr. 2018, 4). A o faaauau au suesuega o le aoaoga faavae a Keriso, mafaufau pe faapefea ona faia ma tausia lau feagaiga o le papatisoga, mauaina o le meaalofa o le Agaga Paia, ma tumau e oʻo i le iuga ona fesoasoani ia te oe ia avea atili ai e pei o lou Tama i le Lagi.

Vaega 1

E mafai faapefea e la’u feagaiga o le papatisoga ona faamanuiaina a’u ma i latou uma ou te mafuta i ai?

Na auina atu e le Alii le perofeta o Apinati i le Tupu o Noa ma lona nuu e lapatai i latou afai latou te le salamo, o le a tuu i latou i le faatagataotauaina. Na teena e le Tupu o Noa le savali a Apinati ma fasiotia ai o ia. O Alema, o se tasi o faitaulaga a Noa, na faamaumauina ona aoao faalilolilo atu lea o upu a Apinati i tagata. Aʻo tuputupu aʻe le vaega o tagata talitonu ia Alema, na latou potopoto i le Vai o Mamona ma osia feagaiga o le papatisoga.

Ua faia e Alema papatisoga i le Vai o Mamona

aikona, suesue

Suesue e Sauniuni ai mo le Vasega

Faitau le Mosaea 18:8-10, vaavaai mo mea tatou te folafola atu e faia ma avea ai pe a tatou papatiso. Matau foi mea na aoao atu e Alema o le a faia e le Alii o se vaega o lenei feagaiga.

I le taʻua ai o la tatou folafolaga e faanoanoa faatasi ma faamafanafana i isi, na faamatala mai e Elder Dale G. Renlund o le Korama a Aposetolo e Toasefululua:

Elder Dale G. Renlund

I le Ekalesia, o le auauna atu ma le mataalia i isi, e tatau lava ona tatou vaai atu ia i latou mai se vaaiga faamatua, e ala atu i fofoga o le Tama Faalelagi. Ona faatoa mafai lea ona tatou amata ona malamalama i le taua moni o se agaga. Ona faatoa mafai lea ona tatou lagonaina le alofa o loo i ai i le Tama Faalelagi mo Ana fanau uma. Ona faatoa mafai lea ona tatou lagonaina le popole tele o le Faaola mo i latou. E le mafai ona tatou faataunuuina atoatoa a tatou matafaioi o le feagaiga e faanoanoa faatasi ma ē faanoanoa ma faamafanafana i ē o loo manaomia ona faamafanafanaina, sei vagana ua tatou vaai atu ia i latou e ala i fofoga o le Atua. [Tagai Mosaea 18:8–10.] O lenei vaaiga lautele e matala ai o tatou loto i le le fiafia, fefe ma le lototiga o isi tagata. (“EAla i Fofoga o le Atua,” Liahona, Nov. 2015, 94)

aikona, mafaufau loloto

Mafaufau Loloto i Sauniuniga mo le Vasega

Mafaufau i faataitaiga na e vaaia i tagata o faamamaluina a latou feagaiga o le papatisoga. O a ni faataitaiga e mafai ona e mafaufauina i le soifuaga o le Faaola na Ia faaalia ai le auala e faamamalu ai le feagaiga o le papatisoga? Ia saunia e faasoa atu au faataitaiga i le vasega.

Vaega 2

E mafai faapefea e le meaalofa o le Agaga Paia ona suia lo’u olaga?

I ana tusitusiga e uiga i le aoaoga faavae a Keriso, na aoao atu ai e Nifae o i latou e mulimuli i le faataitaiga a Iesu Keriso ma ua papatisoina o le a mauaina le Agaga Paia mai le Tama Faalelagi (tagai 2 Nifae 31:12).

aikona, suesue

Suesue i Sauniuniga mo le Vasega

Faitau le 2 Nifae 31:13, 17, ma saili pe faafefea ona faapaiaina lou olaga e le meaalofa o le Agaga Paia.

tagata talavou o loo faamauina

Na saunoa Peresitene Boyd K.Packer o le Korama a Aposetolo e Toasefululua e uiga i le tautala i gagana a agelu:

Peresitene Boyd K. Packer

Na faamatala e Nifae o agelu e tautatala i le mana o le Agaga Paia, ma e mafai ona e tautala i gagana a agelu, o lona uiga e mafai ona e tautala i le mana o le Agaga Paia. O le a filemu. … Ae o le mana o le a i ai iina. (“Ole Meaalofa o le Agaga Paia: O Mea e Tatau ona Iloa e Tagata Uma,” Ensign, Aug. 2006, 49–50)

Ma o Elder David A. Bednar o le Korama a Aposetolo e Toasefululua na faamalamalamaina le papatisoga i le afi.

Faauma se tasi po o gaoioiga uma e lua nei:

1. Matamata le vitio “Baptism by Fire” (1:41).

2. Faitau le faamatalaga lenei:

   Elder David A. Bednar

   O le Agaga Paia o le e faapaia lea na te faamamaina ma susunuina mea le mama ma mea leaga mai agaga o tagata e peiseai o susunuina i se afi. [Tagai i le 3 Nifae 27:19–21]. …

   I le avea ai ma tagata o le Ekalesia toefuataiina a le Alii, ua faamanuiaina ai i tatou uma e ala i lo tatou uluai faamamaina mai le agasala e fesootai ma le papatisoga ma e ala i le gafatia mo se faamamaaga faifai pea mai le agasala lea ua mafai e ala i le mafutaga ma le mana o le Agaga Paia. …

   … Ae a o tatou saunia ma le mafaufau loloto i ai ma auai i [le faamanatuga] faatasi ma se loto momomo ma le agaga salamo, ona maua lea o le folafolaga o le a mafai ona tatou maua pea le Agaga o le Alii e faatasi ma i tatou. Ma e ala i le mana faapaiaina o le Agaga Paia e fai ma a tatou soa tumau, e mafai ai ona tatou faatumauina pea se faamagaloga o a tatou agasala. (“Faatumauina Pea le Faamagaloina o a Outou Agasala,” Liahona, Me 2016, 59, 61–62)

aikona, mafaufau loloto

Mafaufau Loloto i Sauniuniga mo le Vasega

E faapefea ona e faamatala le papatisoga i le afi ma le tautala i le gagana a agelu i se tasi o loo sauniuni mo le papatisoga? O a ni auala ua e iloa ai ia faamanuiaga o le Agaga Paia?

Vaega 3

E faafefea ona ou mauaina le faamoemoe ma le fiafia sili atu a o ou taumafai e tumau e oʻo i le iuga?

Faatasi ai ma le faatuatua, salamo, papatisoga, ma le mauaina o le meaalofa o le Agaga Paia, na aoao mai e Nifae o le tumau e oo i le iuga o se mataupu faavae taua i le aoaoga faavae a Keriso.

aikona, suesue

Suesue e Sauniuni ai mo le Vasega

Faitau le 2 Nifae 31:15–16, 19–21, ma saili mo le uiga o le tumau e oʻo i le iuga.

Matamata pe faitau le saunoaga lenei a Elder Dieter F. Uchtdorf o le Korama a Aposetolo e Toasefululua, ma mafaufau pe faapefea ona e tumau e oʻo i le iuga ma le olioli e sili atu.

Elder Dieter F. Uchtdorf

Tumau e oʻo i le iuga, poʻo le tumau le faamaoni i tulafono ma sauniga o le talalelei a Iesu Keriso i o tatou olaga uma, o se tulaga manaomia taua lea mo le faaolataga i le malo o le Atua. O lenei talitonuga ua tulaga ese ai le Au Paia o Aso e Gata Ai mai le tele o isi lotu Kerisiano o loo tala’ia faapea, ua tuuina atu le faaolataga i tagata uma o e ua na ona talitonu ma tautino o Iesu o le Keriso. Ua tautino manino mai e le Alii, “Afai e te tausia a’u poloaiga ma tumau e oo i le iuga, o le a e maua le olaga e faavavau, le meaalofa silisili lea o meaalofa uma a le Atua” (M&FF 14:7).

O le mea lea, o le tumau e oo i le iuga e le na o se mataupu o le onosaia o tulaga faigata o le olaga po o le “ola ai pea i faigata.” O la tatou tapuaiga e ola, e fesoasoani ai i fanau a le Atua i le ala lauitiiti ma le vaapiapi e atiina ae lo latou agavaa atoa i lenei olaga ma toe foi atu ai ia te Ia i se aso.

Mai le vaaiga lenei, o le tumau e oo i le iuga o le faaeaina ma viia, e le nenefu ma puaoa. O se lotu fiafia lenei, o se lotu o le faamoemoe, malosi, ma le faasaolotoina. (“ELe Tatau Ea Ona Tatou Olioli?” Liahona, Nov. 2007, 20)

aikona, tusifaamaumau

Tusifaamaumau Ou Lagona Uunaia

Faailoa se faataitaiga o le uiga o le tumau e oo i le iuga mai le soifuaga o le Faaola, mai se tagata i le Tusi a Mamona, pe mai i se tasi e te iloa. Faamaumau pe faapefea e lenei faataitaiga ona tosinaina lou malamalamaaga i le uiga o le tumau e oʻo i le iuga.

E Te Manao Pea i Nisi Mea? (Tuu i le faitalia)

Aisea e le faia ai e Le Ekalesia a Iesu Keriso o le Au Paia o Aso e Gata Ai le papatisoga o pepe?

I se tusi i lona atalii o Moronae, lea na faamaumauina i le Moronae 8, na faamatala ai e Mamona se faaaliga na ia mauaina e faamatala ai le mafuaaga e le tatau ai ona papatisoina tamaiti laiti. O le suesueina o le Moronae 8 e mafai ona fesoasoani ia te oe e malamalama lelei ai i lenei aoaoga faavae.

O le a se mea e mafai ona ou faia e maua ai pea le Agaga Paia e faatasi ma aʻu?

I le vitio “Having the Holy Ghost” (2:55), e faasoa atu e tagata o le Ekalesia mea latou te faia e valaaulia ai le Agaga Paia i o latou olaga.

I lana saunoaga “Ina Ia Tatou Maua Pea Lona Agaga e Faatasi Ma I Tatou,” ua lapatai mai Elder Bednar i mea e mafai ona tuueseeseina i tatou mai le Agaga Paia (matamata mai le taimi 4:38 i le 7:24).

E faapefea ona ou tumau i le ala o le feagaiga pe a feagai ma taimi o faigata?

I le “Unto All the World: Essa’s Story” (5:23), ua faasoa mai Dean ma Danelle Ricker i le auala na la onosaia ai le tiga o le maliu o lo la afafine e 15-tausaga o Essa.

Elder Richard J. Maynes

I le saunoaga “O Le Malosi e Tutumau Ai” (Liahona, Nov. 2013, 79–81), ua faamatala mai e Elder Richard J. Maynes o le Au Peresitene o Fitugafulu le ala tatou te mafai ai ona onosaia e tutusa ma le “malosi o a tatou molimau ma le loloto o lo tatou liua” (79).