Lesona 12 Anomea mo le Sauniuniga o le Vasega

O Lo Tatou Manaomia o le Toefanauina Faaleagaga

Na saunoa Elder David A. Bednar o le Korama a Aposetolo e Toasefululua, “O le Tusi a Mamona o la tatou tusitaulima o faatonuga a o tatou faimalaga i le ala mai le leaga i le lelei i le lelei atu ma taumafai ia suia o tatou loto” (“O Le Togiola ma le Malaga i le Olaga Faitino,” Liahona, Apr. 2012, 40). I le Tusi a Mamona o lenei suiga ua faamatalaina o se toefanauina faaleagaga, o se liuga o le loto, ma le liua. A o e suesue i lenei anomea e sauniuni ai mo le vasega, mafaufau pe mafai faapefea ona fesoasoani ia te oe le ola i le aoaoga faavae a Keriso e faaloloto ai lou liuga ma avea atili ai e pei o Iesu Keriso.

Vaega 1

E mafai faapefea e le ola i le aoaoga faavae a Keriso ona faaloloto lo’u liuga?

O le aotelega lenei o loo faamatala ai le mea e tupu pe a tatou liua moni.

O le liuga e aofia ai se suiga i le amio, ae e sili mamao atu nai lo o le amio; o se suiga i lo tatou natura moni. O se suiga taua tele lea e faatatau i ai le Alii ma Ana perofeta o se toefanauina, o se suiga o le loto, ma o se papatisoga i le afi. (“Conversion,” Gospel Topics, topics.ChurchofJesusChrist.org)

Mo se faataitaiga, ina ua uma ona faatonuina Alema le Itiiti e se agelu ia salamo, sa mafatia o ia i le faanoanoa tele mo ana agasala. A o mafatia Alema, sa liliu atu o ia i le Alii mo se fesoasoani, sa faamagaloina ana agasala, ma sa oo o ia i se toefanauina faaleagaga (tagai i le Mosaea 27:11–23).

Suesue e Sauniuni ai mo le Vasega

Faitau le Mosaea 27:25-26, ma vaavaai mo mea na aoao atu e le Alii ia Alema e uiga i le manaomia o le toefanauina faaleagaga.

O le toefanauina faaleagaga, po o le liuga, e le o se mea e tupufua. “O le liua e oo mai o se taunuuga o taumafaiga amiotonu e mulimuli i le Faaola. O nei taumafaiga e aofia ai le faaaogaina o le faatuatua ia Iesu Keriso, salamo i agasala, papatisoina, mauaina o le meaalofa a le Agaga Paia, ma le tumau i le faatuatua e oo i le iuga [faaaogaina o le aoaoga faavae a Keriso]” (“Conversion,” Gospel Topics, topics.ChurchofJesusChrist.org).

O le aafiaga o le nuu o le Tupu o Peniamina ua faaalia ai o le faaaoga o le aoaoga faavae a Keriso e oo atu ai i lenei toefanauina faaleagaga ma le liuga i le Alii.

I lana lauga faaiu, na aoao atu ai e le Tupu o Peniamina, o i tatou uma o “auauna le aoga” ma e “nonofo aitalafu e faavavau” i le Atua (Mosaea 2:21–25, 34). Ona ia molimau mai lea e na’o Iesu Keriso lava e mafai ai ona togiolaina i tatou. O le lofituina i lenei savali, na pauu ai le nuu o Peniamina i le eleele i le migao ma le maofa (tagai i le Mosaea 3:17–4:2).

Suesue e Sauniuni ai mo le Vasega

Faitau le Mosaea 4:2–3, ma vaai mo le ala na faaaoga ai e le nuu o le Tupu o Peniamina le aoaoga faavae a Keriso ma po o a faamanuiaga na latou maua ai.

Ua tatou aoao mai i le Mosaea 4 ina ua uma ona maua e lona nuu le faamagaloga o a latou agasala, ona aoao lea e le Tupu o Peniamina i latou ia talitonu i le Atua ma ola i le faatuatua ina ia mafai ona latou “taofi pea le faamagaloina o a [latou] agasala” (fuaiupu e 12). Ina ua mae’a lana lauga, sa fia iloa e le Tupu o Peniamina pe na talitonu tagata i mea sa ia aoao atu (tagai i le Mosaea 5:1).

Suesue e Sauniuni ai mo le Vasega

Faitau le Mosaea 5:2–7, vaavaai mo le mea na faia e le Alii mo le nuu o le Tupu o Peniamina a o latou faaaogaina le aoaoga faavae a Keriso i o latou olaga.

Na saunoa Elder D. Todd Christofferson o le Korama a Aposetolo e Toasefululua, i le mea lenei e uiga i le toefanauina faaleagaga:

Atonu e te fesili, Aisea e le vave ai ona tupu lenei suiga tele ia te au? E tatau ona e manatua o faataitaiga tulaga ese a le nuu o le Tupu o Peniamina, Alema, ma isi i tusitusiga paia o mea tonu a na—e tulaga ese ae le o se mea masani [tagai Ezra Taft Benson, “A Mighty Change of Heart,” Ensign, Oct. 1989, 2–5]. Mo le toatele lava o i tatou, e faifai malie suiga ma e umi se taimi e tulai mai ai. O le toe fanauina, e le pei o lo tatou fananau mai i la le tino, o se faagasologa ae le o se mea ua fuafua e tupu. Ma o le galue ai i lena faagasologa o le faamoemoega tutotonu lea o le olaga nei.

… Ia tatou aai ma feinu ma le agavaa i le faamanatuga i vaiaso taitasi ma faaauau pea ona pipiimau i le Agaga Paia ina ia lia’ieseina ia muiaa o mea eleelea o loo totoe i totonu ia i tatou. Ou te molimau atu a o outou faaauau ai i le ala o le toe fanauina faaleagaga, o le a aveeseina e le alofa togiola o Keriso a outou agasala ma pisipisia o na agasala o loo ia te outou, o le a mou ese atu faaosoosoga, ma o Keriso o le a faapaiaina ai outou, e pei ona paia o Ia ma lo tatou Tama. (“Toe Fanauina,” Liahona, Me 2008, 78)

Na aoao mai Peresitene Bonnie L. Oscarson, o le sa avea ma Peresitene Aoao o Tamaitai Talavou:

E manaomia lo tatou sailia uma ina ia suia o tatou loto ma natura ina ia le toe i ai se manao ia mulimuli i ala a le lalolagi ae ia faafiafia i le Atua. O le liuga moni o se faagasologa umi ma e aofia ai se naunautaiga ia faatino le faatuatua. … E manaomia ai taumafaiga faifaipea ma i aso uma. (“OO’u Talitonu Ea?” Liahona, Me 2016, 88)

Tusifaamaumau Ou Lagona Uunaia

Mafaufau e matamata le vitio “The People of King Benjamin Make a Covenant (Mosaea 5)” (3:41), ona tusifaamaumau lea o se tautinoga patino e mafai ona e faia e faaauau ai i le ala o le liuaina.

Tusifaamaumau se tautinoga patino e mafai ona e faia e faaauau ai i le ala o le liuainia.

Vaega 2

E mafai faapefea ona ou faaalia i le Alii ou te manao moni ia i ai se suiga o le loto?

Mafaufau i mea e mafai ona tatou aoaoina mai le faataitaiga a Aneti-Nifae-Liae e uiga i le i ai o le faamoemoe i a tatou taumafaiga ia maua ma faatumau se liuga tele o le loto. O nei tagata sa avea muamua ma sa Lamana sa “o ni tagata aivao, ma lotomaaa ma feai; o ni tagata sa fiafia i le fasioti o sa Nifaē, ma le fao ma le vete o a latou mea” (Alema 17:14). Peitai ane, na maua e Aneti-Nifae-Liae le talalelei a Iesu Keriso ina ua aoaoina i latou e Amona ma ona uso, ma e toatele na “faaliliuina i le Alii, sa lei pauu ese lava” (Alema 23:6).

Suesue e Sauniuni ai mo le Vasega

Faitau le Alema 24:9–11, 15, 19, vaavaai mo le mea na faia e Aneti-Nifae-Liae e faamalosia ai lo latou liua i le Alii.

O le saunoa ai e uiga i le suiga tele o le loto lea na oo i nei tagata, na fautua mai ai Elder Bednar:

O le faataatia ese o “auupega o le fouvale” e pei o le manatu faapito, faamaualuga, ma le le usiusitai e tele atu mea e manaomia ai nai lo le na o le talitonu ma le iloa. O le talitonuga maumaututu, lotomaualalo, salamo, ma le usiusitai e ta’imua i le lafoaiina o a tatou auupega o le fouvale. Pe o tatou umiaina pea ni auupega o le fouvale lea e taofia ai i tatou mai le liua i le Alii?? Afai o lea, ua tatau nei loa ona tatou salamo. (“Faaliliuina i le Alii,” Liahona, Nov. 2012, 108–9)

Mafaufau Loloto i Sauniuniga mo le Vasega

O a “auupega o le fouvale” o ono taofia oe mai le oo i se liuga o le loto?

E Te Manao i Nisi Mea? (Tuu i le faitalia)

O le a se mea ou te ta’u atu i se tasi e fesili mai, “Pe ua faaolaina oe?”

I le lauga “Pe Ua Faaolaina Oe? [Have You Been Saved?]” (Ensign, Me 1998, 55–57), na faamalamalama ai e Peresitene Dallin H. Oaks o le Au Peresitene Sili ni uiga eseese e ono o upu faaolaina ma le faaolataga.

O fea e mafai ona ou faitau atili ai e uiga i tagata o le Tusi a Mamona o e na oo i se liliuga loloto ma tumau?

I le 4 Nifae 1:1–18 tatou te faitau ai e uiga i se vaega o tagata o e na oo i se liliuga loloto ma faaauau pea lea na oo ai i le toeitiiti 200 tausaga o le filemu.

Mata e faapeī foliga o le toefanauina faaleagaga ma se liuga tele o le loto i o tatou taimi?

I le vitio “A Change of Heart” (4:39) o loo faasoa mai ai e se alii talavou le ala na laveaiina ai o ia mai se olaga o le agasala ma le leai o se faamoemoe ina ua uma ona faasoa atu e lana uo le talalelei ia te ia.

Ua faasoa mai e se alii le ala na ia faatoilaloina ai lana mausa o fualaau faasaina ma oo ai i se liuga tele o le loto i le vitio “Step 6: Change of Heart—Aram’s Story about Drug Addiction Recovery” (4:04).

O a nisi mea e mafai ona ou faia e faasao ai le liuga tele o lo’u loto?

I le lauga “Tautinoga Mausali ia Iesu Keriso” (Liahona, Nov. 2019, 22–25), o loo talanoa mai ai Elder Dale G. Renlund o le Korama a Aposetolo e Toasefululua i le uiga o le liliu mai i le Alii ma ia suia e faavavau e Lana talalelei.