Lesona 9 Anomea mo Sauniuniga o le Vasega: Faatuatua ia Iesu Keriso
“Lesona 9 Anomea mo Sauniuniga o le Vasega: Faatuatua ia Iesu Keriso,” Anomea a le Faiaoga o Aoaoga ma Aoaoga Faavae o le Tusi a Mamona (2021)
“Lesona 9 Anomea mo Sauniuniga o le Vasega,” Anomea a le Faiaoga o Aoaoga ma Aoaoga Faavae o le Tusi a Mamona
Lesona 9 Anomea mo le Sauniuniga o le Vasega
Faatuatua ia Iesu Keriso
Ata
o se talavou o loo uuina se ata o Iesu Keriso
Na e lagona se naunautaiga malosi e faaleleia ma suia ina ia mafai ona e avea atili e pei o le Faaola? Na aoao mai Uso Brian K. Ashton, o le na avea ma Fesoasoani Lua i le Au Peresitene Aoao o le Aoga Sa, “O le aoaoga faavae a Keriso lea e faatagaina i tatou ina ia maua le mana faaleagaga lea o le a siitiaina i tatou mai o tatou tulaga faaleagaga o i ai nei i se tulaga e mafai ai ona faaatoatoaina i tatou faapei o le Faaola” (“O le Mataupu Faavae a Keriso,” Liahona, Nov. 2016, 106). O le aoaoga faavae a Keriso e faatatau lea i le i ai o le faatuatua ia te Ia ma Lana Togiola, salamo, papatisoga, mauaina o le meaalofa o le Agaga Paia, ma le tumau e oo i le iuga (tagai 2 Nifae 31:2, 10–21; 3 Nifae 27:13–22). A o e suesueina le aoaoga faavae a Iesu Keriso, e amata i le faatuatua ia te Ia, mafaufau e uiga i auala e te manao e suia ai ma le tagata e te manao e avea ai.
Vaega 1
O le a se mea e mafai ona ou faia e atiina aʻe loʻu faatuatua ia Iesu Keriso?
O le aotelega lenei o loʻo faamatalaina ai le uiga o le faatuatua ia Iesu Keriso:
O le i ai o le faatuatua ia Iesu Keriso o lona uiga o le faalagolago atoa atu lea ia te Ia—faalagolago i Lona mana, atamai, ma le alofa e faavavau. E aofia ai le talitonu i Ana aoaoga. O lona uiga o le talitonu e tusa lava pe tatou te le malamalama i mea uma, e malamalama i ai o Ia. … Ua le aunoa ona saunia o Ia e fesoasoani mai ia i tatou pe a tatou manatua Lana valaau mai: “Vaai mai ia te aʼu i mafaufauga uma; aua le masalosalo, aua le fefefe” (Mataupu Faavae ma Feagaiga 6:36). (“Faatuatua ia Iesu Keriso,” Gospel Topics, topics.ChurchofJesusChrist.org)
O Bishop Richard C. Edgley, o le na avea ma fesoasoani i le Au Epikopo Pulefaamalumalu, na ia faapea mai, “o le faatuatua o se filifiliga, ma e tatau ona sailia ma atiaʻe” (“Faatuatua—o le Filifiliga e A Oe Lea,” Liahona, Nov. 2010, 32).
Na aoao malosi mai le perofeta o Alema e uiga i le mataupu faavae o le faatuatua. Na popole Alema e uiga i sa Sorama, o e na le toe talitonu ia Iesu Keriso ma pauu ese mai Lana Ekalesia. A o o atu Alema ma ana soa faifeautalai e talai ia i latou, na ia iloa ai nisi o sa Sorama na faalotomaualaloina ona o lo latou matitiva ma sa taliaina le savali. Na ia manao ia latou malamalama i le auala e suia ai e le Faaola o latou olaga. (Tagai Alema 31-32.)
A o aoao atu le au sa Sorama, na faatusatusa e Alema le afioga a le Atua i se fatu ma faamatala o le a tupu pe a tatou totoina i o tatou loto ma fafagaina lelei e ala i le faaaogaina o le faatuatua (tagai Alema 32:26–33).
A o e faitauina le Alema 32:21, 27–30, mafaufau e maka ia upu poʻo fasifuaitau o loo aoao mai ai le ala tatou te faʻateleina ai le faatuatua.
I le taʻua ai o le talafaatusa a Alema o se fatu na fai ma sui o le afioga a le Atua, na aoao mai ai Peresitene Dieter F. Uchtdorf, a o avea ma Au Peresitene Sili:
Ata
Peresitene Dieter F. Uchtdorf
E masani ona tatou faia i le talalelei e pei o se faifaatoaga na te luluina se fatu i le eleele i le taeao ma faamoemoe e fua ane le sana i le aoauli. …
O le iloaina o le fatu e lelei e le lava lea. E tatau ona tatou “tausia ma le faaeteete tele, ina ia mafai ona mauaa” [Alema 32:37]. …
… O le avea ma soo e le o se taaloga a tagata matamata. E le mafai ona tatou faamoemoe e maua faamanuiaga o le faatuatua i le na ona tutu e leai se mea e fai i tua o le laina pe faapea e mafai ona tatou maua faamanuiaga o le ola maloloina i le nofonofo i luga o le sofa ma matamata i taaloga i le televise ma tuu atu fautuaga i le au taaalo. (“The Way of the Disciple,” Liahona, May 2009, 76, 77)
Ata
aikona, mafaufau loloto
Mafaufau Loloto i Sauniuniga mo le Vasega
O le a se fautuaga e te ono avatu i se tasi ua lotovaivai ona ua ia galue i le faatuatua ae na te leʻi mauaina fua o le faatuatua?
Vaega 2
E mafai faapefea e le fafagaina o le afioga a le Atua e ala i le faatuatua ona ou latalata atili ai ia Iesu Keriso?
Na aoao mai e Alema a tupu le fatu ma amata ona ola, o le a tatou iloa e lelei le fatu ma o le a faamalosia lo tatou faatuatua. Pe a mavae lenei tuputupu aʻe i le amataga, sa lapatai mai Alema e aua le “tuu ese lou faatuatua” ma faatuatuanai i le fafagaina o le laau (tagai Alema 32:30-38).
Ata
aikona, suesue
Suesue e Sauniuni ai mo le Vasega
Faitau le Alema 32:41-43, ma vaavaai mo faamanuiaga e oo mai pe a tatou fafagaina le laau ma le faatuatua tumau.
Ina ua uma ona aoao atu e Alema ia sa Sorama e uiga i le faatuatua, na ia faailoa atu o le fatu na ia manao ia latou totoina i o latou loto o le savali e faapea, o Iesu Keriso o le Alo o le Atua, o le a “togiola mo a latou agasala; ma o le a toetu mai o ia mai le oti” (Alema 33:22–23). Na tusia e Elder Jeffrey R. Holland o le Korama a Aposetolo e Toasefululua:
Ata
Elder Jeffrey R. Holland
I lenei aoaoga matagofie, sa ave ai e Alema le tagata faitau mai se faamatalaga lautele o le faatuatua i le upu a le Atua e pei o le fatu i se lauga ua taulai atu i le faatuatua ia Keriso o le upu a le Atua, ua tuputupu ae i se laau e fua mai ai ni fua, o se laau e tutusa lelei ona fua ma fua o le laau lea na muai vaaia e Liae o le alofa o Keriso. … O Keriso o le fatu, o le laau, ma o le fua o le ola faavavau. (Keriso ma le Feagaiga Fou: O Le Savali FaaMesia i le Tusi a Mamona [1997], 169)
Na faapefea e le galue i le faatuatua ma totoina Iesu Keriso ma Lana talalelei i lou loto ona faatosinaina lau molimau ma le liua?
Vaega 3
O a ni auala e mafai ai ona faamanuiaina aʻu i le faaaogaina o le faatuatua ia Iesu Keriso?
A o faaiuina e Moronae lana galuega i le Tusi a Mamona, sa ia faaaofia ai ma le lauga na faia e lona tama, o Mamona, i le tele o tausaga ua tuanai (tagai Moronae 7:1). I lenei lauga na aoao atu e Mamona le mea e mafai ona ausia e ala i le mana o le faatuatua.
Ata
aikona, suesue
Suesue e Sauniuni ai mo le Vasega
Faitau le Moronae 7:25–26, 33, ma mafaufau i faamanuiaga ma vavega e mafai ona tatou oo i ai a o tatou faatinoina le faatuatua ia Iesu Keriso.
Na aoao mai e Elder Richard G. Scott o le Korama a Aposetolo e Toasefululua le ala e aumaia ai e lo tatou faatuatua ia Keriso le mana faaopoopo i o tatou olaga:
Ata
Elder Richard G. Scott
O le mauaina o le faatuatua le maluelue ia Iesu Keriso o le faalolovaia lea o lou olaga i se malamalama susulu. E le tuua na o oe e tauivi ma luitau e le mafai ona e foia pe taulimaina e oe lava, aua na Ia fetalai, “Afai tou te faatuatua mai ia te au o le a outou maua le mana e fai soo se mea e e tatau ia te au” [Moronae 7:33; faaopoopo le faatusilima].
Afai ua vaivai lou loto, mafatia i le agasala, ma’i, nofo toatasi, pe ua e manaomia se fesoasoani ma se lagolago malosi, ou te molimau atu ma le faamaoni, o le a fesoasoani le Alii ia te oe pe a e usitai ma le faaeteete i tulafono faaleagaga ua faavae ai i luga lena fesoasoani. O Ia o lou Tama. O oe o Lona atalii. E alofa o Ia ia te oe. O le a Ia le tuua lava oe ina ia toilalo. Ou te iloa o le a Ia faamanuia ia te oe. (“Obtaining Help from the Lord,” Ensign, Nov. 1991, 86)
Ata
aikona, tusifaamaumau
Tusifaamaumau Ou Lagona
Faailoa se tasi po o ni tagata se toalua i le Tusi a Mamona o e na faaalia le faatuatua ia Iesu Keriso, ma tusi e uiga i le auala na faamanuiaina ai i la’ua. Ia saunia e faasoa atu au faataitaiga i le taimi o le vasega. Atonu foi e te mafaufau i auala na e iloa ai le mana o le Alii a o e faaaogaina le faatuatua ia te Ia.
