“Lesona 20 Anomea mo Sauniuniga o le Vasega: O Faamanuiaga o le Saolotoga o Tapuaiga,” Anomea a le Faiaoga o Aoaoga ma Aoaoga Faavae o le Tusi a Mamona (2021)
“Lesona 20 Anomea mo Sauniuniga o le Vasega,” Anomea a le Faiaoga o Aoaoga ma Aoaoga Faavae o le Tusi a Mamona
Lesona 20 Anomea mo le Sauniuniga o le Vasega
O Faamanuiaga o le Saolotoga o Tapuaiga
O le a le taua o le saolotoga o tapuaiga ia te oe? E pei ona faamauina i le saite a le Church Newsroom, “O le saolotoga o tapuaiga o se aia tatau taua o le tagata e puipuia ai le lotofuatiaifo o tagata uma. E faataga ai i tatou e mafaufau, faaali ma faatino mea tatou te matuai talitonu i ai. … [Na te] puipuia ai aia tatau o vaega ma tagata taitoatasi uma, e aofia ai tagata e sili ona lamatia, pe lolotu pe leai” (“Religious Freedom,” newsroom.ChurchofJesusChrist.org).
O le saunoa ai e uiga i o tatou aso, sa lapatai mai ai Elder Robert D. Hales o le Korama a Aposetolo e Toasefululua, “Ua matua lili [Satani] e faavaivaia, teena, ma faasalalau le fenumiai e uiga i le saolotoga o tapuaiga---o le a le uiga ma pe aisea e taua ai i lo tatou olaga faaleagaga ma lo tatou lava faaolataga” (“Faasaoina o le Faitalia, Puipuia o le Saolotoga o Tapuaiga,” Liahona, Me 2015, 112). Ao e suesue e sauniuni ai mo le vasega, mafaufau loloto i mea e mafai ona aoao mai e le Tusi a Mamona ia i tatou e uiga i le taua o le saolotoga o tapuaiga ma mafaufau i mea e mafai ona e faia e faalauiloa, faasao, ma puipui ai.
Vaega 1
E faapefea ona puipuia e le saolotoga o tapuaiga o’u talitonuga ma le ala ou te filifili e ola ai?
Matamata i le vitio “Preserving Religious Freedom” (3:59).
O le aotelega lenei ua faatauaina ai nisi o aia tatau faavae ua aofia ai i le saolotoga o tapuaiga:
O le saolotoga o tapuaiga e le gata ina taliaina le aia tatau e tapuai saoloto ai ae faapea foi ona tautala ma galue ai e faavae i talitonuga faalelotu a le tagata. …
O le saolotoga o tapuaiga e malupuipuia ai le aia tatau o tagata uma e tutu ai mo o latou talitonuga faalelotu ma faailoa atu faalauaitele e aunoa ma le fefe i sauaga po o le teenaina o aia tutusa o le avea ma tagatanuu. …
O le saolotoga o tapuaiga e puipui ai e le gata i na’o tagata taitoatasi ae faapea foi i faalapotopotoga faalelotu ia mafai ai ona faia tauaofiaga faalelotu. (“Religious Freedom: The Basics,” ChurchofJesusChrist.org)
Mai lava i le talafaasolopito, o le aia tatau o le tagata soifua e galue i ona lava talitonuga na masani ona luiina ma faapea foi ona taofiaina. Mo se faataitaiga, i le nofoaiga a le Tupu o Mosaea, sa faapea ona matuai ogaoga ai le sauaina o tagata o le Ekalesia e tagata le talitonu (tagai Mosaea 27:1).
Suesue mo Sauniuniga mo le Vasega
Faitau le tala i le Mosaea 27:1–4, ma vaavaai mo auala na galulue faatasi ai taitai o le ekalesia ma le malo e fatua’i le filemu i tagata.
E le gata ina puipuia e le saolotoga o tapuaiga le faaaliaina e i latou o e lolotu, ae na te faatauaina foi aia tatau o i latou o e e le lolotu po o e ese ni talitonuga latou te tutu ai. O se tasi o faataitaiga o lenei mea o loo i le tala ia Korioa. Sa ola Korioa i le vaitaimi o le nofoaiga a faamasino, o se faiga malo sa mamanuina e faasao ma puipuia ai le saolotoga o tagata mai tupu le amiotonu (tagai i le Mosaea 29). Sa talai atu Korioa, “o le a le i ai se Keriso” (Alema 30:12). Sa ia tautino atu e leai se agasala ma o le a manuia tagata taitoatasi e tusa ai ma lona lava ia atamai. O aoaoga a Korioa sa taitaieseina ai le toatele o tagata mai le Alii. (Tagai i le Alema 30:6, 12–18.)
Suesue mo Sauniuniga mo le Vasega
Faitau le Alema 30:7–9, 11, ma faailoa mai pe aisea na i ai ai le aia tatau a Korioa e faaali ai ona talitonuga.
I le Alema 30:29–58 tatou te faitau ai sa auina atu Korioa i le perofeta o Alema ma le faamasino sili i Saraemila, ma sa tali atu Alema i aoaoga a Korioa e ala i le tuuina atu o lana molimau e uiga ia Keriso. E pei lava ona i ai ia Korioa le aia tatau e faaali ai lona le talitonu i le Atua, sa saoloto foi Alema e molimau atu i le i ai o le Tama Faalelagi ma Iesu Keriso. O le filifili ai e le talitonu ia Alema, sa poloai atu ai Korioa mo se faailoga mai le Atua ma sa taia ma gūgū ai. Ina ua uma ona faalauiloa lenei mea na tupu, o i latou o e na talitonu ia Korioa sa faatalitonuina sa sese o ia ma “sa latou toe liliu uma ai i le Alii” (fuaiupu 58).
O le saunoa ai i le taua o le puipuia o le saolotoga o tapuaiga mo tagata uma, na fai mai le Perofeta o Iosefa Samita:
Ua ou saunia ou te oti i le puipuia o aia tatau a se Peresipeteriane, o se Papatiso, po o se tagata lelei o soo se ituaiga lotu [e faapei foi o se Mamona]; mo le mataupu faavae lava e tasi lea e solia ai aia tatau a le Au Paia o Aso e Gata Ai lea foi e solia ai aia tatau a le Katoliko Roma, po o soo se isi lava ekalesia o e atonu e le ta’uta’ua pe e vaivai tele foi e puipuia i latou lava. (Aoaoga a Peresitene o le Ekalesia: Iosefa Samita [2007], 345)
Sa faamamafa foi e Iosefa Samita saolotoga o tapuaiga o se aoaoga faavae o le Ekalesia: “Matou te taʼutino atu ua ia i matou le aiā tatau matou te tapuai atu ai i le Atua Mamana e tusa ai ma o matou lava lotofuatiaifo, ma ua matou tuuina atu foi lea lava aiā tatau i tagata uma, e faitalia i latou, pe faapefea, po o fea, po o le a foi le mea latou te tapuai atu i ai” (Mataupu Faavae o le Faatuatua 1:11).
Sa lomia e Le Ekalesia a Iesu Keriso o le Au Paia o Aso e Gata Ai, le faamatalaga lenei e uiga i le galulue ma le filemu mo le saolotoga o tapuaiga:
I tulaga e taofiofi ai e le tulafono le saolotoga o tapuaiga, e talitonu le Au Paia o Aso e Gata Ai i le usitaia o le tulafono a’o sailia le puipuiga mo o latou aia tatau faavae e ala i auala faatulafonoina e ono maua i itumalo po o atunuu taitasi. (“Religious Freedom: The Basics,” ChurchofJesusChrist.org)
Talanoa i Sauniuniga mo le Vasega
Mafaufau e fai se talanoaga ma se tagata se toatasi pe sili atu o se isi tapuaiga, ma fesili i ai pe aisea e taua ai ia i latou la latou ekalesia, ma pe na latou oo i ni sauaga faalelotu. Sau sauni i le vasega e faasoa mai mea ua e aoaoina.
Vaega 2
O le a se mea e mafai ona ou faia e fesoasoani ai e faalauiloa pe puipui le saolotoga o tapuaiga?
E ono aoga le mafaufau i nisi o faataitaiga o le mea e ono oo i ai le olaga pe ana leai le saolotoga o tapuaiga. Vaai faalemafaufau i le fetaiai ai ma se ata faataitai se tasi pe sili atu lea e faatapulaaina ai le saolotoga o tapuaiga:
E mafai ona e malolo mai le galuega po o tulaga faaletaitai mo le faaalia atu o ou talitonuga faalelotu—e oo lava i fafo atu o le galuega. …
Atonu e manaomia ona e natia lau tapuaiga pe faatino ni tiute i le galuega e feteenai ma ou talitonuga. …
Atonu e manaomia ona e faigaluega i le Sapati po o aso malolo faalelotu e tusa lava pe o loo mananao isi e ave lau sifi. …
Atonu e manaomia e lau fanau i aoga a le malo ona aoao e uiga i feusuaiga ma manatu le faavaea e uiga i itupa ia e feteenai ma aoaoga faavae a le Ekalesia. …
Atonu e le mafai ona e vaetamaina ni tamaiti pe avea o se matua i se fanau tausi ona o ou talitonuga faalelotu po o manatu e uiga i le aiga.
I le avea ai o se tagata e anaina se pisinisi po o se matata, atonu e ono aveesea lou laisene pe sala pe afai e te musu e faatino ni auaunaga e le tusa ai ma ou talitonuga faalelotu. (“Religious Freedom Matters: What’s at Risk,” Ensign, July 2017, 37)
O loo tusia i le Tusi a Mamona e faapea, i le tausaga lona 19 o le nofoaiga a faamasino, sa taupulepule ai se alii amioleaga na igoa ia Amalekia e fai ma tupu i sa Nifae. Sa ia saili ma le poto leaga e faaumatia le Ekalesia a le Alii ma “le faavae o le saolotoga lea na tuuina mai e le Atua ia te i latou” (Alema 46:10). Sa faaviivii e Amalekia le toatele o sa Nifae, ma na tuua ai e nei sa Nifae le Ekalesia ae mulimuli ia te ia. (Tagai Alema 46:1–10.)
Ina ua iloa e Moronae, le taitaiau sili o autau a sa Nifae, le fuafuaga a Amalekia, sa ita o ia ma faapotopoto mai tagata e puipui o latou aia tatau, e aofia ai lo latou saolotoga o tapuaiga (tagai Alema 46:11–13, 19–20).
Suesue mo Sauniuniga mo le Vasega
Faitau le Alema 46:11–13, 19–20, ma vaavaai mo le mea na fai e Taitaiau Moronae e puipui ai tagata e faasaga i le taufaamata’u i lo latou saolotoga.
Sa faapotopoto faatasi tagata ma Moronae ma tutu e tetee atu i taufaamata’u i lo latou saolotoga (tagai Alema 46:21–22). O le saunoa ai e uiga i lo tatou tiute o le lagolago o saolotoga o tapuaiga, na aoao mai ai Elder Hales:
I le avea ai ma soo o Iesu Keriso ua ia te i tatou se tiutetauave e galulue faatasi ai ma le au faatuatua e tutusa mafaufau, e faaali o tatou manatu i le mea e sa’o. …
… O i tatou ua nafa ma le malupuipuia o nei saolotoga paia ma aia tatau mo i tatou lava ma a tatou fanau. O le a se mea e mafai ona e faia ma ou faia?
Muamua, e mafai ona tatou iloa. Ia nofouta i faafitauli i lou nuu ia e ono i ai se aafiaga o le saolotoga o tapuaiga.
Lua, i lou lava tulaga, ia aufaatasi ma isi o e tutusa lo tatou naunau i le saolotoga o tapuaiga. Galulue soosootauau e puipuia le saolotoga o tapuaiga.
Tolu, ia e ola i lou olaga ia avea o se faataitaiga o mea ua e talitonu i ai—i upu ma galuega. O le ala tatou te ola ai i la tatou tapuaiga, e sili atu ona taua nai lo mea e mafai ona tatou tautatala atu ai e uiga i la tatou tapuaiga.
Ua lalata mai lava le Afio Mai Faalua o lo tatou Faaola. Ia aua nei tatou faatuai i lenei galuega tele. Manatua le Taitaiau o Moronae, o le na sisiina a’e le tagavai o le saolotoga [tagai Alema 46:12]. … Ia tatou manatua le tali a tagata na faaaoga ai la latou faitalia: sa latou “taufetuli faatasi mai” ma se feagaiga e faatino [Alema 46:21]. (“Faasaoina o le Faitalia, Puipuia o le Saolotoga o Tapuaiga,” 112, 113)
Mafaufau Loloto i Sauniuniga mo le Vasega
O le a se mea e mafai ona e faia e faalauiloa ai ma puipuia le saolotoga o tapuaiga i le mea o loo e nofo ai?
