“Lesona 21 Anomea mo Sauniuniga o le Vasega: Faatoilaloina o le Faamaualuga,” Anomea a le Faiaoga o Aoaoga ma Aoaoga Faavae o le Tusi a Mamona (2021)
“Lesona 21 Anomea mo Sauniuniga o le Vasega,” Anomea a le Faiaoga o Aoaoga ma Aoaoga Faavae o le Tusi a Mamona
Lesona 21 Anomea mo Sauniuniga o le Vasega
Faatoilaloina o le Faamaualuga
O le tasi o lamatiaga faaleagaga ua faamamafaina i le Tusi a Mamona o le agasala o le faamaualuga. Mai lena faamaumauga ua tatou aoao ai le ala na faaleagaina ai e le faamaualuga le nofolelei o le aiga o Liae, faatupuina ai fevaevaeaiga i le Ekalesia a le Alii, iu ai i le tele o taua, ma faapea ona taitaiina atu ai i le faatafunaga o le atinaega o sa Nifae. Na lapatai mai Peresitene Ezra Taft Benson e faapea, “o le faamaualuga o le agasala a le lalolagi atoa, o le mea leaga tele” (“Beware of Pride,” Ensign, Me 1989, 6). A o e suesue e sauniuni ai mo le vasega, vaavaai mo aoaoga e mafai ona fesoasoani ia te oe e faailoa ai faailoga o le faamaualuga i lou lava olaga. Ma le isi, mafaufau pe faapefea ona fesoasoani aoaoga ma le faataitaiga a Iesu Keriso ia te oe e faatoilalo ai le faamaualuga.
Vaega 1
E mafai faapefea ona ou iloa lelei aafiaga faataumaoi o le faamaualuga o ono i ai i lo’u olaga?
Ina ua maliu Nifae, sa popole Iakopo i le faateteleina o le amioleaga sa i ai i sa Nifae. Sa faatonuina e le Alii ia Iakopo e tautala atu e uiga i agasala a le nuu (tagai Iakopo 1:15–2:4, 11). O le usiusitai, sa talanoa atu ai Iakopo i tagata i le malumalu e uiga i a latou agasala, e aofia ai le ala ua taitaiese ai e a latou oa i latou mai le Alii.
Suesue mo Sauniuniga mo le Vasega
Faitau le Iakopo 2:12–16 pe matamata i le vitio o le Tusi a Mamona “Jacob Teaches about Pride (Iakopo 2:3–21)” (5:56), o loo maua i le ChurchofJesusChrist.org. A o e faia, vaavaai pe o faapefea ona faatosina e le faamaualuga le ala na vaai atu ai nei sa Nifae i le tasi ma le isi.
Ua aoao atu Iakopo e uiga i le Faamaualuga | Iakopo 2:3–19
Iakopo 2:3–19 | O Iakopo, o se perofeta o le Tusi a Mamona, ua aoao atu tagata ina ia faaeteete i le faamaualuga ma ia tausia tutusa tagata uma lava. Ua ia aoao atu foi i latou e saili muamua le malo o le Atua.
I le faaiuga o le Tusi a Mamona, na molimauina ai e Mamona ma Moronae le taitaiina atu o sa Nifae i le faatafunaga atoa ona o le le salamo mai le faamaualuga (tagai Moronae 8:27). Ina ua uma ona molimauina lo latou faatafunaina, sa vaaia e Moronae i se faaaliga vaaia le ala o le a avea ai foi le faamaualuga ma se faafitauli mo tagata i o tatou aso.
Suesue mo Sauniuniga mo le Vasega
Faitau le Mamona 8:35–37, ma mafaufau pe faapefea e le faamaualuga ona oo atu ai i isi agasala faaopoopo.
I le 1989 na fofogaina ai e Peresitene Benson se saunoaga mamana e uiga i le faamaualuga. Ao e faitau i le vaega lenei mai lana saunoaga, mafaufau e faailoga ni upu ma ni fuaitau autu e faamatala ai le uiga o le ‘auga o le faamaualuga.
E toatele i tatou e mafaufau i le faamaualuga o le manatu o le tagata ua na’o ia lava, faasausili, fiatagata, fiamatamuamua, po o le fiailoa. O nei mea uma o elemene o le agasala, ae o le fatu po o le ‘auga, o loo misi lava.
O le ‘auga autu lava o le faamaualuga o le ita—ita i le Atua ma le ita i o tatou uso a tagata. O leita o lona uiga o le “le fiafia, inoino, po o se tulaga o le tetee.” O le mana lea e manao Satani e pulea ai i tatou.
O le faamaualuga e i ai le uiga o le fiatautavā. Tatou te faatautava atu o tatou loto i le finagalo o le Atua. …
E le mafai ona talia e le tagata faamaualuga le pule a le Atua e tuuina atu le taitaiga i o latou olaga. (Tagai Hel. 12:6.) …
O le tagata faamaualuga, e fai tagata uma ma ona fili e ala i le fiatautava atu o ō latou atamai, manatu, galuega, tamaoaiga, taleni, po o soo se isi fuataga faalelalolagi e faasaga i isi. I upu a C. S. Lewis: “O le faamaualuga na te le mauaina se fiafia mai le mauaina o se mea, e tele atu nai lo le isi tagata. … O le faatusatusaga lea e fai ai oe ma tagata faamaualuga: o le fiafia i le iloa ai ua sili atu oe i lo isi tagata. O le taimi lava e aluese ai le agaga lea o le fiatautava, o le taimi foi lena e aluese ai foi ma le faamaualuga.” (Mere Christianity, New York: Macmillian, 1952, pp. 109–10.) …
O le fefe i faamasinoga a tagata e iloa lelei lava e faatautava i le faamalieina o tagata. …
… O le toatele o i tatou e mafaufau o le faamaualuga o se agasala a i latou e maualuluga atu, e pei o le tagata maumea ma atamamai, o loo vaai maualalo mai ia i tatou uma. (Tagai 2 Ni. 9:42.) Peitai, o loo i ai se gasegase taatele ia i tatou—ma o le faamaualuga lena mai le pito i lalo i le vaai atu i luga. E tele auala e faaalia ai, e pei o le saili masei, faitatala, faatuāupua, muimui, ola fiatele, matau’a, manaonao fua, leai se lotofaafetai ma se faamalo e ono siitia ai se isi, ma le lē loto faamagalo ma le lotovale. (“Ia Faaeteete i le Faamaualuga,” 4, 5)
![o se tamaitai talavou o loo tilotilo atu i se [tasi la te] tupulaga](https://assets.ldscdn.org/86/7d/867d353ab0f4b2231d27ba416e2df6fffe3c58ac/south_america_stock_trip_chile.jpeg)
Tusifaamaumau Ou Lagona Uunaia
Sa saunoa Peresitene Benson, “O le faamaualuga o se agasala e faigofie ona iloa atu i isi ae seasea ona tatou iloaina ia i tatou lava” (“Ia Faaeteete i le Faamaualuga,” 5). Filifili fesili o loo i lalo e sili ona fetaui i lou olaga, ma tusifaamaumau au tali i lau apitalaaga po o le tamaiapi.
-
O i ai ni o’u lagona o le ita (le fiafia, inoino po o le tetee) i lo’u loto agai i le Atua po o se isi tagata? Afai o i ai, o faapefea ona aafia e nei lagona lo’u loto ma a’u fegalegaleaiga?
-
O a taimi e foliga mai ou te faatusatusa ai a’u lava i isi? A ou faatusatusa a’u lava i isi, e faapeī o’u lagona e i ai?
Vaega 2
E faapefea ona ou faatoilaloina le agasala o le faamaualuga?
Ina ua uma ona lapataia e Iakopo lona nuu e uiga i le agasala o le faamaualuga, sa ia aoao i latou i le taua o upumoni e uiga i le ala e faatoilalo ai.
Suesue mo Sauniuniga mo le Vasega
Ao e faitau i le Iakopo 2:17–21, vaavaai mo fautuaga e mafai ona fesoasoani ia te oe e faatoilalo ai le faamaualuga.
I le Tusi a Mamona, e tele taimi na faamaualuluga ai sa Nifae. Mo se faataitaiga, ina ua manumalo i se taua umi e faasaga i faomea a Katianetona, sa faamanuiaina sa Nifae ma sa le’i umi ae faamaualuluga, ma faatulaga i latou lava e tusa ai ma a latou oa ma le aoaoina. Sa amata ona sauaina e isi i latou sa matitiva nai lo o i latou. (Tagai i le 3 Nifae 6:4–12.)
Suesue mo Sauniuniga mo le Vasega
Ao e faitau i le 3 Nifae 6:12–14, maitau le eseesega i le va o tagata o e sa faamaualuluga ma tagata o e sa le faamaualuluga. O a ni uiga faaalia na iloa ai le eseesega o vaega e lua o tagata mai le tasi ma le isi?
Na aoao mai e Peresitene Benson le mea lenei i le auala e faatoilalo ai le faamaualuga:
O le vaifofo o le faamaualuga o le lotomaulalo—agamalu, usitai. (Tagai i le Alema 7:23.) …
Ia tatou filifili e lotomaualalo.
E mafai ona tatou filifili e faalotomaualalo i tatou lava i le faatoilalo lea o le ita i o tatou uso ma tuafafine,faataua i latou e pei o i tatou lava, ma sii a’e i latou ia maualuga pe maualuga sili atu nai lo i tatou lava. [Tagai i le Mataupu Faavae ma Feagaiga 38:24.]
E mafai ona tatou filifili e faalotomaualalo i tatou lava e ala i le talia o fautuaga ma aoaiga. [Tagai Iakopo 4:10.]
E mafai ona tatou filifili e faalotomaualalo i tatou lava e ala i le faamagalo atu ia i latou o e ua faatiga mai ia i tatou. [Tagai 3 Nifae 13:11, 14; Mataupu Faavae ma Feagaiga 64:10.]
E mafai ona tatou filifili e faalotomaualalo i tatou lava e ala i le faia o auaunaga lē manatu faapito. (Tagai i le Mosaea 2:16–17.)
E mafai ona tatou filifili e faalotomaualalo i tatou lava e ala i le o i ni misiona ma talai atu le afioga e mafai ona faalotomaualalo ai isi. [Tagai Alema 4:19.]
E mafai ona tatou filifili e faalotomaualalo i tatou lava e ala i le o atu soo i le malumalu.
E mafai ona tatou filifili e faalotomaualalo i tatou lava e ala i le ta’uta’u atu ma lafoai a tatou agasala ma toe fanaufouina i la le Atua. [Tagai i le Mataupu Faavae ma Feagaiga 58:43.]
E mafai ona tatou filifili e faalotomaualalo i tatou lava e ala i le alofa atu i le Atua, ma uai atu o tatou loto i Lona finagalo, ma faamuamua o Ia i o tatou olaga. [Tagai 3 Nifae 11:11.] (“Ia Faaeteete i le Faamaualuga,” 6–7)
Mafaufau Loloto i Sauniuniga mo le Vasega
Mafaufau loloto i le soifuaga o le Faaola. O le a se mea e mafai ona e aoaoina mai ia te Ia e uiga i le lotomaualalo? Ia saunia e faasoa atu au faataitaiga i le vasega.