“Lesona 28 Anomea mo Sauniuniga o le Vasega: O Mai ia Keriso,” Anomea a le Faiaoga o Aoaoga ma Aoaoga Faavae o le Tusi a Mamona (2021)
“Lesona 28 Anomea mo le Sauniuniga o le Vasega,” Anomea a le Faiaoga o Aoaoga ma Aoaoga Faavae o le Tusi a Mamona
Lesona 28 Anomea mo le Sauniuniga o le Vasega
O Mai ia Keriso
Na saunoa Peresitene Russell M. Nelson, “O le su’esu’eina o le Tusi a Mamona e matua’i sili atu ona tauia pe a taula’i atu se tasi i lona faamoemoega faavae—o le molimau atu lea ia Iesu Keriso. I se faatusatusaga, o isi faafitauli uma o taunuuga o faatinoga” (“A Testimony of the Book of Mormon,” Ensign, Nov. 1999, 69). Na faapefea ona fesoasoani lau suesuega o le Tusi a Mamona ia e latalata atili ai ia Iesu Keriso? A o e suesue, fesili ifo ia te oe lava po o le a se mea e mafai ona e faia e atili atoatoa ai lou sau ia te Ia.
Vaega 1
O le a le mana ou te maua pe a ou atina’eina lo’u faavae ia Iesu Keriso?
E oo ane i le 30 TLM “ua pauu atu [sa Nifae] i se tulaga o le le talitonu ma le amioleaga tele” ma na “matua ai mo le faafanoga” (Helamana 4:25; 5:2). O le vaivai ai ona o le amioleaga o tagata, na faamavae ai Nifae mai le nofoa faamasino ae, faatasi ma lona uso o Liae, na tuuto atu aso uma o lona olaga e talai ai le talalelei (tagai Helamana 5:4). A o lei o i laua i le la misiona, sa la manatuaina le fautuaga taua na la maua mai lo la tama o Helamana.
Suesue e Sauniuni ai mo le Vasega
Faitau le Helamana 5:9-12, ma vaavaai mo mea na aoao ai e Helamana ona atalii i le pogai na manaomia ai ona atiina a’e o la’ua olaga i luga o le faavae o Iesu Keriso.
Mafaufau Loloto i Sauniuniga mo le Vasega
Sa faamatalaina e Helamana ia lu’itau o le olaga e faaaoga ai ata faatusa o matagi. O a ni matagi o feagai ma oe e mafai ona e faaaoga i ai le fesoasoani a le Alii?
A o auauna ai i le Au Peresitene aoao o le Aualofa, sa aoao mai ai Sister Sheri L. Dew le pogai ua na’o Iesu Keriso ai lo tatou faavae mautu:
O le tuu ai o le tagata ia te ia lava, e mautinoa lava le lilifa atu ai o le tagata natura ia Satani (tagai Mosaea 3:19), o lē lafoaia lana vetei le taimi lava na te maileia ai i latou mai le ala sa’o ma le vaapiapi. Ae o le a taiala e le Faaola i latou o e mulimuli ia te Ia i le ala atoa seia tau i le aiga [faalelagi]. …
Ua silafia e le Alii le ala aua o Ia o le ala ma ua pau lea o le avanoa e manuia ai le gafataulimaina o le olaga nei. O Lana Togiola ua avanoa ai le mana, filemu, malamalama, ma le malosi uma tatou te manaomia e taulima ai luitau o le olaga—e mai lava i a tatou lava measese ma agasala e oo i tofoofoga ia e le au i ai se tatou malosiaga, ae tatou te lagona ai le tiga.
… Ua Ia folafola mai, afai o le a tatou atiina ae o tatou olaga i luga o Lana papa, o le a leai se mana o le tiapolo ia i tatou [tagai Helamana 5:12]. Ma ua Ia tauto mai o le a Ia le tuua nao i tatou pe tuulafoaia i tatou [tagai Eperu 13:5]. E leai lava se mea o le olaga nei e tutusa ai. Leai i tulaga tau i tautinoga, mana po o le alofa. Ua nao Ia lava lo tatou avanoa. (“Our Only Chance,” Ensign, May 1999, 66–67)
Mafaufau Loloto i Sauniuniga mo le Vasega
Na faapefea ona fesoasoani le atinaeina o lou faavae ia Iesu Keriso e te onosaia ai matagi na oo atu i lou olaga?
Vaega 2
O le a se mea e mafai ona ou faia ou te sau ai ia Iesu Keriso?
I le mataupu faaiu o le Tusi a Mamona, o loo valaaulia ai e Moronae tagata uma e o mai ia Iesu Keriso.
Suesue e Sauniuni ai mo le Vasega
Faitau le Moronae 10:30, 32–33, ma vaavaai mo le mea na fai mai Moronae o le mea e tupu mai a tatou filifili e o mai ia Iesu Keriso.
Na faamalamalama mai e Elder D. Todd Christofferson o le Korama a Aposetolo e Toasefululua le uiga o le “o mai ia Keriso” (Moronae 10:30, 32):
O le o mai ia Keriso o se faapuupuuga, o se auala e faamatalaina ai i upu e tolu le ata o le faaolataga. O lona uiga ina ia maua ai fua o Lana Togiola ma le Toetu—ma oo ai i le ola e faavavau. O le ola e faavavau e faalagolago i le faaaogaina o la tatou filifiliga saoloto, ae faatoa mafai lava i le alofa tunoa o Iesu Keriso. O le o mai ia te Ia o lona uiga o le faia o mea e manaomia e faaaoga ai lena alofa tunoa—le faamagaloga, faapaiaga, liua, le mana togiola o Lana taulaga lē i’u, le taulaga togiola.. (“Why We Share the Gospel,” Ensign, Aug. 2014, 37)
Sa faamalamalama mai e Peresitene Tad R. Callister, sa avea ma Peresitene Aoao o le Aoga Sa, le alofa tunoa o le Alii i le ala lenei:
Ona o Lana Togiola, ua i ai ai i le Faaola ni mana gafatia, o nisi taimi e faatatau atu i ai o le alofa tunoa [tagai Bible Dictionary, “Grace”; tagai foi Guide to the Scriptures, “Grace,” scriptures.ChurchofJesusChrist.org], lea e mafai ona fesoasoani ia i tatou e faatoilalo ai o tatou vaivaiga ma le atoatoa, ma faapea ona fesoasoani ai ia tatou taumafaiga ia avea atili faapei o Ia.
Sa aoao mai Moronae: “Ioe, o mai ia Keriso, ma faaatoatoaina ia te ia, … ma o lona alofa tunoa e mafai ai ona outou atoatoa ia Keriso” [Moronae 10:32]. E foliga mai pe a ma le lua metotia po o ni auala tatou te faaaoga ai na mana gafatia ia e mafai ona faaleleia—e faaatoatoa ai—i tatou.
Muamua, o sauniga faaola. … O nisi taimi, atonu tatou te mafaufau i sauniga o se lisi o mea e fai—ua tatau ai mo le faaeaga; ae o le mea moni o sauniga taitasi e matala ai se mana faaleatua lea e fesoasoani ia i tatou ia avea atili e faapei o Keriso. …
O se auala lona lua mo nei mana gafatia o meaalofa ia a le Agaga. Ona o le Togiola a Keriso, ua tatou agavaa ai e mauaina le meaalofa o le Agaga Paia ma ana meaalofa faaleagaga e o mai faatasi ai. O nei meaalofa o ni uiga auaumama o le faaleatua; o le mea lea, o taimi taitasi tatou te maua ai se meaalofa a le Agaga, e avea atili i tatou e pei o le Atua. (“Ole Togiola a Iesu Keriso,” Liahona, Me 2019, 87)
Mafaufau Loloto i Sauniuniga mo le Vasega
Mafaufau po o le a se mea e mafai ona e ausia i le mana gafatia o le Alii, po o le alofa tunoa. O le a se mea o e faia e valaaulia ai le alofa tunoa ma le fesoasoani a le Alii i lou olaga?
Vaega 3
Na faapefea ona avatu au e le Tusi a Mamona ia Iesu Keriso ma fesoasoani ia ou tumau faamaoni ia te Ia?
Ina ua otooto e Mamona faamaumauga a Sa Iareto lea ua avea nei ma se vaega o le Tusi a Mamona, sa ia faailoa mai lona popole i au faitau i le lumanai ne’i o latou “faatauemu i nei mea, ona o lo matou vaivai i le tusitusi” (Eteru 12:23). Sa faamafanafanaina e le Alii ia Moronae i le fetalai mai, “Ua lava lou alofa tunoa mo e e agamalu, o le a latou le faaaoga ai lo outou vaivai” (Eteru 12:26). Ona tatalo lea o Moronae mo Nuuese, ma molimau atu na vaai o ia ia Iesu, ma ofoina atu se valaaulia taua i tagata uma o e o le a iu ina faitauina le Tusi a Mamona (tagai Eteru 12:36–41).
Suesue e Sauniuni ai mo le Vasega
Faitau le Eteru 12:41, ma mafaufau pe o faapefea ona e tali atu i le valaaulia a Moronae i le aluga o le kosi lenei.
Tusifaamaumau Ou Manatu
A o e sauniuni mo le vasega mulimuli, mafaufau pe o faapefea ona fesoasoani lou suesueina o le Tusi a Mamona e te sau ai ia Keriso ma avea atili ai e pei o Ia. Faailoa ni manatu patino, lagona, uunaiga, po o ni aafiaga faapitoa ua faatupulaia ai lau molimau ma faalolotoina ai lou liua. Tusifaamaumau ou manatu.
Ina ia saunia mo lou aso mulimuli o le vasega, filifili ma fai se tasi o gaoioiga nei:
-
Filifiliga 1: Filifili se fuaitau po o se aoaoga mai le Tusi a Mamona ua sili ona mamana i le fesoasoani ia te oe e o mai ia Keriso, ma tusifaamaumau pe o faapefea ona faatosinaina ai oe.
-
Filifiliga 2: Faailoa se tagata i le Tusi a Mamona o lana faataitaiga ua fesoasoani e te malamalama lelei ai i le uiga o le o mai ia Keriso, ma tusifaamaumau ni mea ua e aoaoina.
-
Filifiliga 3: Mafaufau loloto i ni auala na musuia ai oe e au suesuega lata mai nei o le Tusi a Mamona e te sau ia Keriso. Tusifaamaumau auala ua tuputupu ae ai lau molimau ma le ala ua faamalosia ai lou liua i le Faaola.
A uma ona tusifaamaumau ou manatu ma lagona, ia mafaufau ma le agaga tatalo po o ai atonu o le a faamanuiaina i mea ua e tusia ma ia faasoa atu i ai. Ma le isi, ia saunia e faasoa atu ou manatu i le taimi o le vasega.