Dagiti Nasantuan a Kasuratan

No agsurat wenno agsarita dagiti nasantuan a lallaki ti Dios babaen ti bileg ti Espiritu Santo, dagiti balikasda “agbalin a nasantuan a kasuratan, agbalin a pagayatan ti Apo, agbalin a panunot ti Apo, agbalin a timek ti Apo, ken bileg ti Dios iti pannakaisalakan” (DkK 68:4). Ti opisial, inanamongan ti awtoridad ti Simbaan a nasantuan a kasuratan, a masansan a maaw-awagan iti pagrukodan a libro dagiti nasantuan a kasuratan [standard works], ket ti Biblia, ti Libro ni Mormon, ti Doktrina ken Katulagan, ken ti Perlas a Kapatgan. Mailadawan dagitoy a libro kadagiti panid 26–29.

Kinapateg ti Inaldaw a Panagadal iti Nasantuan a Kasuratan

Ti kangrunaan a panggep dagiti nasantuan a kasuratan ket ti mangipaneknek maipapan ken ni Cristo, tumulong kadatayo nga umasideg Kenkuana ken umawat iti agnanayon a biag (Juan 5:39; 20:31; 1 Nephi 6:4; Mosiah 13:33–35). Impaneknek ni propeta Mormon:

“Asino man a kumpet iti balikas ti Dios, a naalisto ken nabileg, a mamagsina amin a panangballaibo ken panangsilo ken dagiti panangallilaw ti sairo, ken mangiturong iti tao ni Cristo iti nailet ken akikid a dana a mangballasiw iti dayta agnanayon a taaw ti ladingit a nakasagana a mangalimon iti nadangkes—

“Ken mamasanglad iti kararuada, wen, ti saan a matay a kararuada, iti makanawan ti Dios iti pagarian iti langit, a makikatugaw ken ni Abraham, ken ni Isaac, ken ni Jacob, ken kadagiti amin a nasantuan nga ammatayo, tapno saandan a rummuar” (Helaman 3:29–30).

Balakadandatayo dagiti propeta iti ud-udina nga aldaw a mangadal kadagiti nasantuan a kasuratan iti inaldaw, agpada a bukod ken kadua dagiti pamiliatayo. Allukoyendatayo, kas iti panangallukoy ni Nephi kadagiti kakabsatna, nga aramatentayo dagiti nasantuan a kasuratan iti bagitayo, a mangsapul kadagiti wagas a pakayaplikaran dagiti sagrado a pakasaritaan iti biagtayo iti agdama (kitaen iti 1 Nephi 19:23–24). Igunamgunamda kadatayo a “sukimaten[tayo] dagiti sursurat” (Juan 5:39) ken “agpennek kadagiti balikas ni Cristo” (2 Nephi 32:3).

Dakkelto ti pakairanudam babaen ti panangsurotmo iti daytoy a balakad. Iti inaldaw, ti napnuan kaipapanan a panagadal iti nasantuan a kasuratan ket mangtulong kenka nga agbalin a managawat kadagiti arasaas ti Espiritu Santo. Mangpapigsa daytoy iti pammatim, mangpatibker kenka a maibusor iti pannulisog, ken mangtulong kenka nga umasideg iti Nailangitan nga Amam ken iti Ay-ayatenna nga Anak.

Mangaramidka iti maysa a plano para iti bukodmo a panagadal kadagiti nasantuan a kasuratan. Ibilangmo ti panangilatang iti masinunuo nga oras iti tunggal aldaw a panagadal kadagiti nasantuan a kasuratan. Kabayatan dayta nga oras, agbasaka a nasayaat, a managrikna kadagiti pannignay ti Espiritu. Dawatem iti Nailangitan nga Amam a tulongannaka a mangammo no ania koma ti kayatna a sursuruen ken aramidem.

Ituloymo ti panagbasa kadagiti nasantuan a kasuratan, nangnangruna iti Libro ni Mormon, iti unos ti biagmo. Matakuatamto dagiti kinapateg dagiti nasantuan a kasuratan manen ken manen, a pakasarakam iti baro a kaipapanan ken pakayaplikaranda bayat ti panagadalmo kadagitoy iti nadumaduma nga agpang ti biag.

No naasawaanka, mangilatangka iti oras iti tunggal aldaw a panagbasa kadagiti nasantuan a kasuratan kas maysa a pamilia. Mabalin a narigat daytoy nga aramid, ngem mangtedto kadagiti nakaskasdaaw, agnanayon a pagbanagan. Babaen ti pannarabay ti Espiritu, mangplanoka iti panagbasa iti nasantuan a kasuratan a mangipaayto kadagiti kasapulan ti pamiliam. Saanka nga agbuteng iti panangibasam kadagiti nasantuan a kasuratan kadagiti babassit nga ubbing. Adda pannakabalin ti pagsasao dagiti sagrado a kasuratan a mangsagid uray kadagiti babassit nga ubbing.

Ti Biblia

Mabingay ti Biblia iti dua a paset: ti Daan a Tulag ken ti Baro a Tulag. Ti Daan a Tulag ket maysa a sagrado a kasuratan maipanggep kadagiti pannakipulapol ti Dios kadagiti naitulag a tattaona iti Nasantuan a Daga. Iramanna dagiti pannursuro dagiti propeta a kas kada Moises, Josue,Isaias, Jeremias, ken Daniel. Naisurat iti Baro a Tulag ti pannakayanak, panagministro iti daga, ken Pannubbot ti Mangisalakan. Gibusanna iti panagministro dagiti disipulo ti Mangisalakan.

Gapu ta naipatarusen ti Biblia iti adu a gundaway, naiprenta daytoy iti nadumaduma a bersion. Iti Ingles, ti Bersion a King James ti Biblia ti inawat ti Simbaan a kas nasantuan a kasuratan.

Iti Ti Simbaan ni Jesucristo dagiti Santo iti Ud-udina nga Aldaw, raementayo ti Biblia ken dagiti sagrado a pannursuro daytoy. Makaawattayo iti pigsa ken liwliwa manipud kadagiti pakaammuan ti Biblia maipanggep kadagiti pannakipulapol ti Dios kadagiti taona.

Ti Libro ni Mormon: Mainayon a Pammaneknek ken ni Jesucristo

Dimteng ti Libro ni Mormon iti daytoy a dispensasion babaen ti pagayatan ti Apo. Daytoy ket kasuratan maipapan iti pannakipulapol ti Dios kadagiti tao a nagbiag kadagiti nagkauna a kontinente ti America. Inkitikit dagiti propeta ti Apo dagiti sigud wenno orihinal a kasuratan kadagiti pinanid a balitok. Impakdaar ti Apo a naglaon ti Libro ni Mormon iti “pakabuklan ti ebanghelio ni Jesucristo” (DkK 20:9; kitaen met iti DkK 42:12).

Idi Septiembre 22, 1827, maysa nga anghel nga agnagan iti Moroni—ti maudi a propeta ti Libro ni Mormon —ti nangipan kadagitoy a kasuratan ken ni Propeta Joseph Smith. Babaen ti sagut ken pannakabalin ti Dios, impatarus ni Propeta Joseph Smith ti kasuratan iti Ingles. Manipud idin, naipatarusen ti Libro ni Mormon iti adu a sabali pay a pagsasao.

Ti kangrunaan a panggep ti Libro ni Mormon ket mangguyugoy iti amin a tao “a ni Jesus isu ti Cristo, ti Agnanayon a Dios, a mangiparangarang iti bagina kadagiti amin a pagilian” (panid ti paulo ti Libro ni Mormon). Isurona nga “umasideg amin kenkuana dagiti tao, wenno saandanto a maisalakan” (1 Nephi 13:40). Kinuna ni Joseph Smith a ti Libro ni Mormon isu “ti pagbatayan ti pammatitayo, ket as-asideg[to] ti tao iti Dios babaen ti panangsurotna kadagiti linaonna, ngem iti sabali a libro” (pakauna iti Libro ni Mormon).

Ti Libro ni Mormon ti sabali pay a pammaneknek para kadagiti kinapudno a maisursuro iti Biblia. Daytoy pay ti mangisubli kadagiti “nalawag ken napateg” a kinapudno a napukaw manipud iti Biblia babaen kadagiti biddut iti patarus wenno “naikkat” kadagiti pananggandat a “pangballikug iti umno a wagas ti Apo” (kitaen iti 1 Nephi 13:24–27, 38–41). Ti Biblia ken ti Libro ni Mormon “agsulboddanto a sangkamaysa, a pangtubngar kadagiti ulbod a doktrina ken pangpasardeng iti panagsususik, ken pangipatakder iti talna” (2 Nephi 3:12).

Iti dumani paggibusan ti Libro ni Mormon, isuro ni propeta Moroni kadatayo no kasano a maammuantayo a pudno ti libro: “Inton awatenyo dagitoy a banag, igunamgunamko a dawatenyo iti Dios, ti Agnanayon nga Ama, iti nagan ni Cristo, no saan a pudno dagitoy a banag; ket no naimpusuan ti idadawatyo, ken addaan iti pudno a panggep, ken addaan iti pammati ken ni Cristo, iparangarangna ti kinapudnona kadakayo, babaen ti pannakabalin ti Espiritu Santo” (Moroni 10:4; kitaen met iti Moroni 10:3 ken Moroni 10:5).

Ti Doktrina ken Katulagan

Aglaon ti Doktrina ken Katulagan kadagiti paltiing a naited ken ni Propeta Joseph Smith. Iramanna pay ti sumagmamano a paltiing a naited kadagiti dadduma pay a propeta iti ud-udina nga aldaw. Naidumduma daytoy a libro gapu ta saan a patarus daytoy dagiti nagkauna a dokumento. Daytoy ket napagtitipon a paltiing nga inted ti Apo kadagiti napili a propetana kadagiti ud-udina nga aldaw.

Kinuna ni Propeta Joseph Smith a ti Doktrina ken Katulagan ket “pamuon ti Simbaan kadagitoy maudi nga aldaw, ket pagsayaatan ti lubong, mangipakita a naitalek manen iti tao dagiti tulbek dagiti kinadatdatlag iti pagarian ti Mangisalakantayo” (paulo a benneg iti DkK 70).

Ti Perlas a Kapatgan

Aglaon ti Perlas a Kapatgan iti libro ni Moises, ti libro ni Abraham, ti naparegta a patarus ni Propeta Joseph Smith iti kapitulo 24 ti Mateo, ken sumagmamano a sinurat ni Propeta Joseph.

Ti libro ni Moises ket ababa nga adaw manipud iti naparegta a patarus ni Joseph Smith iti Biblia. Nakumkumpleto daytoy a rekord dagiti sinurat ni Moises iti rugi ti libro ti Genesis iti Daan a Tulag. Aglaon daytoy ti adu a doktrina ken pannursuro a napukaw manipud iti Biblia ken mangted iti nayon pay nga impormasion maipapan iti plano ti pannakaisalakan, ti pannakaparsua ti daga, ken dagiti pannakipulapol ti Apo kada Adan ken Enoc.

Ti libro ni Abraham ket patarus dagiti nagkauna a kasuratan a naisurat iti papyrus a natagikua ti Simbaan idi 1835. Impatarus ni Propeta Joseph Smith dagiti kasuratan babaen ti paltiing. Aglaon daytoy a libro kadagiti kinapudno maipapan iti Konseho iti Langit sakbay daytoy a biag, ti pannakaparsua ti daga, ti kinatao ti Dios, ken ti priesthood.

Ti Joseph Smith—Mateo ket mangnayon iti pannakaammo maipanggep kadagiti pannursuro ti Mangisalakan maipapan iti Maikadua a Yaayna.

Dagiti sinurat ni Joseph Smith iti Perlas a Kapatgan iramanna:

Joseph Smith—Pakasaritaan, a maysa nga adaw manipud iti pakasaritaan ti Propeta iti Simbaan. Salaysay daytoy maipapan kadagiti pasamak a nangiturong iti pannakaisubli ti Simbaan, agraman iti Umuna a Parmata, dagiti isasarungkar ni Moroni ken ni Propeta Joseph, ti pananggun-od kadagiti balitok a pinanid, ken ti pannakaisubli ti Aaronic Priesthood.
Ti Pagannurotan ti Pammati, nga insurat ni Propeta Joseph Smith kas kangrunaan a palawag maipapan iti pammati ken doktrina.