၂ နီဖိုင်း ၁၄

အခန်းကြီး ၁၄

ဇိအုန်နှင့်သူ၏သတို့သမီးတို့သည် အနှစ်တစ်ထောင်ကာလတွင် ရွေးနှုတ်ခြင်းနှင့် သန့်စင်စေခြင်းကို ခံရကြမည်—ဟေရှာယအခန်းကြီး ၄ နှင့် နှိုင်းယှဉ်ပါ။ ဘီစီ ၅၅၉–၅၄၅ ခန့်။

၁ ထိုကာလ၌ မိန်းမခုနစ်ယောက်တို့သည် ယောက်ျားတစ်ယောက်ကို ကိုင်ဆွဲ၍၊ ကျွန်မတို့သည် ကိုယ့်မုန့်ကို စားပါမည်။ ကိုယ့်အဝတ်ကိုလည်း ဝတ်ပါမည်။ ကျွန်မတို့ကို သင်၏နာမဖြင့်အခေါ်ခံရခြင်းသာရှိစေ၍၊ ကျွန်မတို့၏ရှက်ကြောက်ခြင်းကို ဖယ်ရှားပါဟု ဆိုကြလိမ့်မည်။

၂ ထိုကာလ၌ ကိုယ်တော်ရှင်၏အညွှန့်သည် တင့်တယ်၍၊ ဘုန်းအသရေပွင့်လန်းလိမ့်မည်။ လွတ်သောဣသရေလအမျိုးတို့အဖို့၊ မြေအသီးအနှံသည် ကောင်းမြတ်လျောက်ပတ်လိမ့်မည်။

၃ ဤသို့အားဖြင့်အချိန်တန်လာလတ္တံ့သောအခါ၊ ဇိအုန်တောင်မှာ ကျန်ကြွင်း၍၊ ယေရုရှလင်မြို့ ၌နေရစ်သောသူတည်းဟူသော၊ ယေရုရှလင်မြို့ ရှိ အသက်ရှင်သောသူတို့တွင် စာရင်းဝင်သမျှသောသူတို့သည် သန့်ရှင်းခြင်း ရှိကြလိမ့်မည်—

၄ ကိုယ်တော်ရှင်သည် ဇိအုန်သတို့သမီးတို့၏အညစ်အကြေးကို ဆေးကြောပြီးလေလျှင်၊ တရားစီရင်သောသောဝိညာဉ်၊ လောင်မြိုက်သောဝိညာဉ်တော်အားဖြင့်၊ ယေရုရှလင်မြို့၏အသွေးကို မြို့ထဲက ပယ်ရှားတော်မူလိမ့်မည်။

၅ ထို့အတူ ကိုယ်တော်ရှင်သည် ဇိအုန်တောင်မှာရှိသမျှသောအိမ်များနှင့်၊ စည်းဝေးရာ ပရိတ်သတ်များအပေါ်တွင်၊ နေ့အချိန်၌ မိုးတိမ်နှင့်မီးခိုးကိုလည်းကောင်း၊ ညဉ့်အချိန်၌ မီးလျှံအလင်းကိုလည်းကောင်း ဖန်ဆင်းတော်မူ၍၊ ဇိအုန်၏ ဘုန်းအသရေအလုံးစုံတို့ကို ကာကွယ်တော်မူလိမ့်မည်။

၆ နေ့အချိန်၌လည်း နေပူကို ကွယ်ကာသောတဲ၊ မုန်တိုင်းမှလည်းကောင်း၊ မိုးရေမှလည်းကောင်း လုံခြုံသောခိုလှုံရာအရပ်နှင့် အကွယ်အကာ ဖြစ်လိမ့်မည်။