၂ နီဖိုင်း ၃၃

အခန်းကြီး ၃၃

နီဖိုင်း၏စကားများသည် မှန်ကန်၏—ထိုအရာတို့က ခရစ်တော်အကြောင်းကို သက်သေခံကြ၏—ခရစ်တော်ကို ယုံကြည်သောသူတို့သည် တရားစီရင်ရာတိုင်ရှေ့၌ သက်သေအဖြစ်ရှိကြမည့် နီဖိုင်း၏စကားများကို ယုံကြည်ကြလိမ့်မည်။ ဘီစီ ၅၅၉–၅၄၅ ခန့်။

၁ ယခုမူကား၊ ငါနီဖိုင်းသည် ငါ၏လူမျိုးတို့၌ သွန်သင်ပေးလေသည့် အရာခပ်သိမ်းတို့ကို မရေးနိုင်။ ငါသည် ဟောပြောခြင်းကဲ့သို့ ရေးခြင်း၌ အားကြီးလှသည်လည်းမဟုတ်။ အကြောင်းမူကား၊ လူသားသည် သန့်ရှင်းသောဝိညာဉ်တော်၏ တန်ခိုးအားဖြင့် ဟောပြောသောအခါ၊ သန့်ရှင်းသောဝိညာဉ်တော်၏တန်ခိုးက ထိုစကားကို လူသားတို့၏စိတ်နှလုံးသို့ ပို့ဆောင်တော်မူ၏။

၂ သို့ရာတွင်၊ ရှုလော့၊ များစွာသောသူတို့သည် သန့်ရှင်းသောဝိညာဉ်တော်ကိုဆန့်ကျင်၍၊ စိတ်နှလုံးကို မာကျောစေကြသဖြင့်၊ သူတို့အထဲ၌ တည်စရာနေရာမရှိ။ သို့ဖြစ်၍၊ သူတို့သည် ရေးထားသည့်အရာများစွာတို့ကို စွန့်ပစ်ပြီး တန်ဖိုးမရှိသောအရာများအဖြစ် ထင်မှတ်ကြ၏။

၃ သို့ရာတွင်၊ ငါနီဖိုင်းသည် ရေးလေပြီးသမျှကို ရေးလေ၍၊ ကြီးစွာအဖိုးထိုက်သည်ဟု မှတ်ယူ၏။ အထူးသဖြင့်၊ ငါ၏လူမျိုးတို့အတွက်ဖြစ်၏။ အကြောင်းမူကား၊ ငါသည် သူတို့အတွက် နေ့အချိန်၌ အစဉ်မပြတ်ဆုတောင်း၍၊ သူတို့ကြောင့် ငါ၏မျက်လုံးများက ညဉ့်အချိန်၌ ခေါင်းအုံးကို စိုရွှဲစေပြီ။ ငါ၏ဘုရားသခင်ထံသို့ ယုံကြည်ခြင်းဖြင့် တောင်းလျှောက်၍၊ တောင်းလျှောက်ခြင်းကို သူကြားတော်မူမည့်အကြောင်း ငါသိ၏။

၄ ကိုယ်တော်ရှင်ဘုရားသခင်သည် ငါ၏ဆုတောင်းခြင်းများကို ငါ၏လူမျိုးတို့အကျိုးအတွက် ရည်စူးတော်မူမည့်အကြောင်းကိုလည်း ငါသိ၏။ ထို့အတူ၊ ငါအားနည်းစွာရေးလေသော စကားများကို သူတို့အဖို့ အားကြီးစေတော်မူလိမ့်မည်။ အကြောင်းမူကား၊ ထိုစကားသည် သူတို့အား ကောင်းမြတ် သည်ကို ပြုကြစေခြင်းငှာ ဖျောင်းဖျ၏။ သူတို့ဘိုးဘေးတို့အကြောင်း သူတို့ကို ဖော်ပြ၏။ ယေရှုအကြောင်းကို ပြောပြ၍၊ အသက်ထာဝရရှင်ရာဖြစ်သည့် သူ့ကိုယုံကြည်ခြင်းနှင့်အဆုံးတိုင်အောင်တည်ကြည်ခြင်းသို့ သူတို့ကို ဖျောင်းဖျ၏။

၅ ထိုစကားသည် သမ္မာတရား၏ ရှင်လင်းခြင်းအတိုင်း၊ အပြစ်ကိုဆန့်ကျင်၍ ပြင်းထန်စွာပြော၏။ သို့ဖြစ်၍၊ ငါရေးလေသည့် စကားများကို နတ်ဆိုးဝိညာဉ်၏ လူမှတစ်ပါး၊ အဘယ်သူမျှ အမျက်ထွက်လိမ့်မည်မဟုတ်။

၆ ငါသည် ရှင်းလင်းခြင်း၌ ဂုဏ်ယူဝမ်းမြောက်၏။ ငါသည် သမ္မာတရား၌ ဂုဏ်ယူဝမ်းမြောက်၏။ ငါသည် ငါ၏ယေရှု၌ ဂုဏ်ယူဝမ်းမြောက်၏၊ အကြောင်းမူကား၊ သူသည် ငါ၏ဝိညာဉ်ကို ငရဲမှ ရွေးနှုတ်တော်မူလေပြီ။

၇ ငါ့၌ ငါ၏လူမျိုးတို့အတွက် မေတ္တာ၊ ထို့အတူ ခရစ်တော်ကိုကြီးစွာသော ယုံကြည်ခြင်းတို့ ရှိသည်မှာ၊ များစွာသော ဝိညာဉ်တို့ကို သူ၏တရားပလ္လင်တော်၌ အပြစ်ကင်းစင်လျက် ငါတွေ့ရ စေခြင်းငှာ ဖြစ်၏။

၈ ငါ့၌ ယုဒလူမျိုးတို့အတွက် မေတ္တာရှိ၏—သူတို့သည်ကား၊ ငါလာခဲ့ရာအရပ်မှ လူများဖြစ်ကြသည်ဟုငါ ဆင်ခြင်မိသောကြောင့် ယုဒလူမျိုးဟု ငါဆို၏။

၉ ငါ့၌ တပါးအမျိုးသားတို့အတွက်လည်း မေတ္တာရှိ၏။ သို့ရာတွင်၊ ရှုလော့၊ သူတို့သည် ခရစ်တော်ထံသို့ မိတ်သဟာယဖွဲ့ခြင်း၊ ထို့အတူ ကျဉ်းမြောင်းသည့် တံခါးထဲသို့ဝင်ခြင်း၊ ထို့အတူ အသက်ရှင်ရာသို့ ပို့ဆောင်သည့် ကျပ်တည်းသောလမ်းကြောင်းသို့ လိုက်ခြင်း၊ ထိုလမ်းထဲတွင် အစမ်းသပ်ခံကာလ၏ အဆုံးတိုင်အောင် ဆက်၍နေခြင်းတို့မရှိကြလျှင်၊ သူတို့အထဲမှ အဘယ်သူ့အတွက်မျှ ငါမမျှော်လင့်နိုင်။

၁၀ ယခုမူကား၊ ငါ၏ချစ်လှစွာသော ညီအစ်ကိုတို့၊ ထို့အတူ၊ ယုဒလူမျိုးတို့နှင့် ခပ်သိမ်းသော အသင် မြေကြီးစွန်းသားတို့ ဤစကားများကို စေ့စေ့နားထောင်၍၊ ခရစ်တော်ကို ယုံကြည်ကြလော့။ သင်တို့သည် ဤစကားများကို မယုံကြည်လျှင်လည်း၊ ခရစ်တော်ကို ယုံကြည်ကြလော့။ သင်တို့သည် ခရစ်တော်ကို ယုံကြည်လျှင်၊ ဤစကားများကိုလည်း ယုံကြည်ကြပေမည်။ အကြောင်းမူကား၊ ထိုစကားများသည် ခရစ်တော်၏နှုတ်ကပတ်တော်များဖြစ်၍၊ ငါ့ကို ဖော်ပြထားတော်မူ၏။ ခပ်သိမ်းသောလူသားတို့ကောင်းမြတ်သည်ကို ပြုရမည့်အကြောင်း ထိုစကားများက သွန်သင်၏။

၁၁ ထိုစကားများသည် ခရစ်တော်၏နှုတ်ကပတ်တော်များ ဟုတ်မဟုတ် သင်တို့ဆုံးဖြတ်ကြလော့—အကြောင်းမူကား၊ ထိုစကားများမှာ သူ၏နှုတ်ကပတ်တော်များ ဖြစ်ကြောင်းကို နောက်ဆုံးသောနေ့၌ ခရစ်တော်သည် တန်ခိုးတော်အရှိန်နှင့် ကြီးစွာသောဘုန်းတော်တို့ဖြင့် သင်တို့ကို ပြတော်မူလိမ့်မည်။ သင်တို့နှင့် ငါသည်လည်း သူ၏တရားစီရင်ရာတိုင်ရှေ့၌ မျက်နှာချင်းဆိုင်၍ ရပ်ရကြလိမ့်မည်။ ငါ့၌အားနည်းချက်ရှိသော်ငြားလည်း၊ ဤအရာများကို ရေးစေခြင်းငှာ ငါ့ကို သူမိန့်တော်မူထားလေကြောင်း သင်တို့သိကြလိမ့်မည်။

၁၂ ထိုကြီးစွာသောနောက်ဆုံးနေ့၌၊ အားလုံးမဟုတ်ကြလျှင်လည်း ငါတို့မှ များစွာသောသူတို့သည် သူ၏နိုင်ငံတော်၌ ကယ်တင်ခြင်းသို့ ရောက်နိုင်စေကြောင်း၊ ငါသည် ခမည်းတော်ထံသို့ ခရစ်တော်၏နာမတော်အားဖြင့် ဆုတောင်း၏။

၁၃ ယခုမူကား၊ ငါ၏ချစ်လှစွာသောညီအစ်ကိုတို့၊ ဣသရေလအမျိုးသားများဖြစ်သည့် ခပ်သိမ်းသော သူတို့၊ ခပ်သိမ်းသော အသင်မြေကြီးစွန်းသားတို့၊ ငါသည် တစ်ယောက်သောသူ မြေမှုန့်မှနေ၍ ဟစ်ကြွေးနေသကဲ့သို့ သင်တို့ကို ဆို၏။ ထိုကြီးစွာသောနေ့ ကျရောက်လာသည်တိုင်အောင် မင်္ဂလာရှိကြပါစေ။

၁၄ ဘုရားသခင်၏ကောင်းမြတ်ခြင်းကို မခံယူ၊ ယုဒလူမျိုးတို့၏စကားများ၊ ထို့အတူ ငါ၏စကားများ၊ ထို့အတူ ဘုရားခင့်သိုးသငယ်၏နှုတ်မှ ထွက်တော်မူမည့် နှုတ်ကပတ်တော်များကို ပမာဏမပြုသောသင်တို့၊ ရှုလော့၊ သင်တို့၌ ထာဝရတည်မြဲသောမင်္ဂလာရှိကြပါစေဟု ငါနှုတ်ဆက်၏။ အကြောင်းမူကား၊ ဤစကားများက နောက်ဆုံးသောနေ့၌ သင်တို့ကို ပြစ်ဒဏ်ချမှတ်လိမ့်မည်။

၁၅ အကြောင်းမူကား၊ မြေကြီးပေါ်၌ ငါစည်းနှောင်သည့်အရာကို တရားစီရင်ရာတိုင်တွင် သင်တို့တစ်ဖက်၌ အစစ်ခံရလိမ့်မည်။ ထိုကဲ့သို့ ကိုယ်တော်ရှင်မိန့်မှာတော်မူခဲ့လေ၍ ငါနာခံရပေမည်။ အာမင်။