၂ နီဖိုင်း ၁၈

အခန်းကြီး ၁၈

ခရစ်တော်သည် ထိမိ၍လဲစရာကျောက်ခဲနှင့် မှားယွင်းစရာကျောက်သဖွယ်ဖြစ်လိမ့်မည်—ကိုယ်တော်ရှင်ကို ဆည်းကပ်ကြလော့၊ တိုးတိုးပြောသည့်စုန်းတို့ကို မဆည်းကပ်နှင့်—လမ်းညွှန်မှုအတွက် တရားတော်နှင့် သက်သေခံတော်မူချက်တို့ထံ လှည့်၍လာကြလော့—ဟေရှာယအခန်းကြီး ၈ နှင့် နှိုင်းယှဉ်ပါ။ ဘီစီ ၅၅၉–၅၄၅ ခန့်။

၁ တစ်ဖန် ကိုယ်တော်ရှင်၏နှုတ်ကပတ်တော်က၊ သင်သည် ကြီးသောစက္ကူလိပ်ကိုယူပြီးလျှင်၊ မဟေရရှာလလဟာရှဗတ်ဟူသော စာလုံးကို လူသုံးသည့် ကညစ်ဖြင့်ရေးလော့ဟု ငါ့ကို မိန့်တော်မူ၏။

၂ ထိုအခါ၊ သက်သေခံစေခြင်းအလိုငှာ၊ သစ္စာရှိသော သက်သေ ယဇ်ပုရောဟိတ်ဥရိယနှင့် ယေဗရခိ၏သား ဇာခိရိတို့ကို ငါခေါ်ထား၏။

၃ ထိုနောက်မှ ငါသည် ပရောဖက်မကို ချဉ်းသဖြင့်၊ သူမသည် ပဋိသန္ဓေစွဲယူ၍၊ သားကို ဖွားမြင်လေ၏။ ကိုယ်တော်ရှင်ကလည်း ငါ့ကို မိန့်တော်မူလေသည်ကား၊ ထိုသားကို မဟေရရှာလလဟာရှဗတ် ဟူသောအမည်ဖြင့် မှည့်လော့။

၄ အကြောင်းမူကား၊ ရှုလော့၊ ဒမာသက်မြို့၏စည်းစိမ်ဥစ္စာနှင့် ရှမာရိမြို့ ၌လုယက်သောဥစ္စာကို အာရှုရိရှင်ဘုရင်အားဖြင့် သိမ်းသွားခြင်းမတိုင်မီတွင် ထိုသူငယ်သည် ငါ၏အမိ၊ ငါ၏အဘဟု ခေါ်တတ်လိမ့်မည်မဟုတ်။

၅ တစ်ဖန် ကိုယ်တော်ရှင်က ငါ့ကို မြွက်ဆို၍၊ မိန့်တော်မူလေသည်ကား၊

၆ ဤလူမျိုးသည် ဖြည်းညှင်းစွာစီးသောရှိလောင်ချောင်းကိုငြင်းပယ်၍၊ ရေဇိန်နှင့် ရေမလိ၏သားတို့၌ ရွှင်လန်းဝမ်းမြောက်ကြသောကြောင့်၊

၇ ယခုမူကား၊ ရှုလော့၊ ကိုယ်တော်ရှင်သည် အလုံးအရင်းပါသော အာရှုရိရှင်ဘုရင်တည်းဟူသော၊ ခွန်အားကြီး၍၊ များသောမြစ်ရေနှင့်၊ သူတို့ကို လွှမ်းမိုးစေတော်မူသဖြင့်၊ ထိုမြစ်သည် မိမိချောင်းများကိုလွှမ်း၍၊ မိမိကမ်းများကို လျှံစေလိမ့်မည်။

၈ ထို့အတူ၊ သူသည် ယုဒပြည်ကို ချင်းနင်းလွှမ်းမိုးဖြန့်သွား၍၊ လည်ပင်းတိုင်အောင် ရောက်လိမ့်မည်။ သူ၏အတောင်တို့ကိုလည်း ဖြန့်သဖြင့်၊ ကိုယ်တော်၏မြေတစ်ပြင်လုံးကို ပြည့်စေလိမ့်မည်။ အို ဧမာနွေလဟု မိန့််တော်မူ၏။

၉ အချင်းလူများတို့၊ သင်တို့ကိုယ်သင်တို့ သင်းဖွဲ့ကြလော့။ သင်တို့သည် အစိတ်စိတ်အပိုင်းပိုင်း ပြိုကွဲကြလိမ့်မည်။ ဝေးသောပြည်သားခပ်သိမ်းတို့ နားညောင်းကြလော့။ သင်တို့ကိုယ်သင်တို့ ကြိုတင်ပြင်ဆင်ကြလော့။ သင်တို့သည် အစိတ်စိတ်အပိုင်းပိုင်း ပြိုကွဲကြလိမ့်မည်။ သင်တို့ကိုယ်သင်တို့ ကြိုတင်ပြင်ဆင်ကြလော့။ သင်တို့သည် အစိတ်စိတ်အပိုင်းပိုင်း ပြိုကွဲကြလိမ့်မည်။

၁၀ အတူတကွတိုင်ပင်ကြလော့။ အကျိုးမဲ့ဖြစ်လိမ့်မည်။ စကားကို ပြောကြလော့။ ပြောသည်အတိုင်း မတည်ရ။ အကြောင်းမူကား၊ ဘုရားသခင်သည် ငါတို့ဘက်၌ ရှိတော်မူ၏။

၁၁ ဤလူမျိုး၏လမ်းသို့ ငါမလိုက်ရမည့်အကြောင်း၊ ကိုယ်တော်ရှင်သည် အားကြီးသောလက်ဖြင့်၊ ငါ့ကို သွန်သင်၍၊ မြွက်ဆိုတော်မူလေသည်ကား၊

၁၂ သင်းဖွဲ့ခြင်းဟု ဤလူမျိုးတို့ဆိုသမျှအတိုင်း၊ သင်တို့သည် သင်းဖွဲ့ခြင်းဟု မဆိုကြနှင့်။ သူတို့ကြောက်တတ်သောအရာကို မကြောက်ကြနှင့်။ မထိတ်လန့်ကြနှင့်။

၁၃ ကောင်းကင်ဗိုလ်ခြေကိုယ်တော်ရှင်ကို ရိုသေကြလော့။ သူ့ကိုသာ ကြောက်ရွံ့ခြင်း၊ ထိတ်လန့်ခြင်းရှိကြလော့။

၁၄ ထိုသို့ပြုလျှင်၊ သူသည် ခိုလှုံရာ ဖြစ်တော်မူလိမ့်မည်။ သို့ရာတွင်၊ ဣသရေလအမျိုးသားတို့ ထိမိ၍လဲစရာကျောက်ခဲ၊ မှားယွင်းစရာကျောက်၊ ယေရုရှလင်မြို့သားတို့၌ ကျော့ကွင်းနှင့် ထောင်ချောက် ဖြစ်တော်မူလိမ့်မည်။

၁၅ သူတို့၌ များစွာသောသူတို့သည်လည်း ထိမိ၍လဲကျ၍ တိမ်းလဲကျိုးပဲ့ခြင်း၊ ကျော့မိ ဖမ်းဆီးခြင်းသို့ ရောက်ကြလိမ့်မည်။

၁၆ ငါ့တပည့်တို့တွင်၊ သက်သေခံချက်ကို ထုပ်ထား၍၊ ဥပဒေကို တံဆိပ်ခတ်လော့။

၁၇ ယာကုပ်အမျိုးသားတို့ထံမှ မိမိမျက်နှာတော်ကို ကွယ်ထားတော်မူသော ကိုယ်တော်ရှင်ကို ငါစောင့်ဆိုင်း၍၊ သူ့ကို ငါမျှော်လင့်မည်။

၁၈ ရှုလော့၊ ငါနှင့်အတူ ငါ့ကို ကိုယ်တော်ရှင်ပေးတော်မူသောသူငယ်တို့သည် ဇိအုန်တောင်ပေါ်မှာ ကိန်းဝပ်တော်မူသော ကောင်းကင်ဗိုလ်ခြေကိုယ်တော်ရှင်ထံတော်က၊ ဣသရေလအမျိုး၌ နိမိတ်လက္ခဏာနှင့် အံ့မခန်းချီးမွမ်းဖွယ်အမှုများ အတွက်ဖြစ်လေ၏။

၁၉ နတ်ဝင်သောသူကိုလည်းကောင်း၊ တိုးတိုးပြော၍ မန္တာန်သရဇ္ဈာယ်တတ်သော စုန်းတို့ ၌လည်းကောင်း ဆည်းကပ်ကြလော့ဟု သင်တို့ကို ဆိုလျှင်မူကား—အသက်ရှင်သောသူသည် သေသူထံမှ ကြားနာခြင်းငှာ၊ လူတို့သည် မိမိတို့၏ဘုရားသခင်၌ မဆည်းကပ်အပ်သလော။

၂၀ တရားတော်ကိုလည်းကောင်း၊ သက်သေခံတော်မူချက်ကိုလည်းကောင်း နားထောင်ကြလော့။ ဤစကားအတိုင်း သူတို့မပြောကြလျှင်၊ သူတို့၌ အလင်း မရှိသောကြောင့်ဖြစ်၏။

၂၁ သူတို့သည် နှောင့်ယှက်ခြင်းနှင့် မွတ်သိပ်ခြင်းကိုခံလျက်၊ ခက်ခဲစွာ ဖြတ်သန်းသွားရကြလိမ့်မည်။ ဤသို့အားဖြင့်အချိန်တန်လာလတ္တံ့သောအခါ၊ သူတို့သည် မွတ်သိပ်သောအချိန်တွင် ကိုယ့်ကိုယ်ကို စိုးရိန်ပူပန်၍၊ မိမိတို့၏ရှင်ဘုရင်နှင့် မိမိတို့၏ဘုရားသခင်ကို ကျိန်ဆဲ၍၊ အထက်သို့မျှော်ကြည့်ကြလိမ့်မည်။

၂၂ သူတို့သည် မြေကြီးကိုကြည့်လျှင်၊ ဒုက္ခဆင်းရဲ၊ မှောင်မိုက်၊ ပြင်းစွာသောဝေဒနာအမှောင်တို့နှင့်တွေ့၍၊ မှောင်မိုက်သို့ နှင်ထုတ်ခံရကြလိမ့်မည်။