၂ နီဖိုင်း ၂

အခန်းကြီး ၂

ရွေးနှုတ်ခြင်းသည် သန့်ရှင်းသောမေရှိယအားဖြင့် ဖြစ်ပေါ်လာ၏—ရွေးချယ်မှုလွတ်လပ်ခွင့် (ရွေးချယ်ပြုမူနိုင်ခွင့်) သည် ဖြစ်တည်ခြင်းနှင့် ဖွံ့ဖြိုးတိုးတက်ခြင်းတို့အတွက် မရှိမဖြစ်လိုအပ်သောအရာဖြစ်၏—လူသားများဖြစ်တည်နိုင်စေခြင်းငှာ၊ အာဒံလဲကျ၏—လူသားများသည် လွတ်လပ်ခြင်းနှင့်ထာဝရအသက်ကို ရွေးချယ်ရန် လွတ်လပ်ကြ၏။ ဘီစီ ၅၈၈–၅၇၀ ခန့်။

၁ ယခုမူကား၊ ယာကုပ် သင့်ကိုငါပြောမည်။ သင်သည်ကား တောရိုင်းထဲ၌ ငါ၏ အတိဒုက္ခကာလများမှ ငါ့သားဦးဖြစ်၏။ ရှုဦးလော့၊ သင့်အစ်ကိုများ၏ခက်ထန်ကြမ်းတမ်းမှုကြောင့် သင်ကလေးဘ၀၌ ဆင်းရဲဒုက္ခများနှင့် ဝမ်းနည်းခြင်းများစွာတို့ကို ခံစားရလေပြီ။

၂ သို့သော်လည်း၊ ယာကုပ်၊ တောရိုင်းထဲမှ ငါ့သားဦး၊ သင်သည် ဘုရားသခင်၏ကြီးမြတ်ခြင်းကို သိ၏။ သူသည် သင်၏ဆင်းရဲဒုက္ခများကို သင်၏အကျိုးအတွက် သန့်ရှင်းမွန်မြတ်စေတော်မူလိမ့်မည်။

၃ သို့ဖြစ်၍၊ သင်၏ဝိညာဥ်သည် ကောင်းချီးခံစားရလိမ့်မည်၊ သင်၏အစ်ကိုနီဖိုင်းနှင့် လုံခြုံစွာနေထိုင်ပြီး၊ သင်၏ဘဝကို သင့်ဘုရားသခင်၏ အမှုကို ဆောင်ခြင်း၌ ကုန်လွန်စေလိမ့်မည်။ သို့ဖြစ်၍၊ သင်၏ရွေးနှုတ်ရှင်၏ ဖြောင့်မတ်ခြင်းကြောင့်၊ သင်ရွေးနှုတ်ခံရကြောင်း ငါသိ၏။ အကြောင်းမူကား၊ အချိန်ကာလပြည့်စုံခြင်းသို့ ရောက်သောအခါ၊ လူသားများအဖို့ ကယ်တင်ခြင်းကို ဆောင်ယူခြင်းငှာ၊ သူကြွလာသည်ကို သင်သိမြင်ပြီးလေပြီ။

၄ သင်သည် ငယ်ရွယ်စဉ်၌ သူ၏ဘုန်းတော်ကို သိမြင်လေ၏။ သို့ဖြစ်၍၊ ဇာတိကိုယ်ခန္ဓာအားဖြင့် သူအမှုဆောင်တော်မူမည့် သူများကဲ့သို့ပင် ကောင်းချီးခံစားရ၏။ အကြောင်းမူကား၊ ဝိညာဉ်တော်သည် မနေ့၊ ယနေ့၊ ကာလအစဉ်အဆက် မပြောင်းမလဲရှိတော်မူ၏။ နည်းလမ်းကို လူသားကျရှုံးခြင်းမှစ၍၊ ပြင်ဆင်ထားလျက်၊ ကယ်တင်ခြင်းမှာ အခမဲ့ဖြစ်လေ၏။

၅ အကောင်းနှင့် အဆိုးကို ခွဲခြား၍သိစေခြင်းငှာ လူသားတို့အား လုံလုံလောက်လောက် သွန်သင်ထားပေ၏။ လူသားများသို့ ပညတ်တရားကို ပေးထား၏။ ပညတ်တရားအားဖြင့် အဘယ်သူမျှ၊ အပြစ်ကင်းစေခြင်းသို့မရောက်၊ သို့မဟုတ်၊ ပညတ်တရားအားဖြင့် လူသားတို့သည် ပယ်ရှင်း ခံရကြ၏။ အထူးသဖြင့်၊ သူတို့သည် ဇာတိပကတိပညတ်တရားအားဖြင့် ပယ်ရှင်း ခံရကြလေ၏။ ထို့အတူ၊ သူတို့သည် ဝိညာဉ်ပကတိပညတ်တရားအားဖြင့်လည်း ကောင်းရာမှပျက်စီး၍ ကာလအစဉ်အဆက် ဝမ်းနည်းပူဆွေးစရာများ ဖြစ်လာကြ၏။

၆ သို့ဖြစ်၍၊ ရွေးနှုတ်ခြင်းသည်ကား၊ သန့်ရှင်းသောမေရှိယကိုယ်၌နှင့် မေရှိယအားဖြင့် ဖြစ်ပေါ်လာပေ၏။ အကြောင်းမူကား၊ သူသည် ကျေးဇူးတော်၊ သမ္မာတရားတို့နှင့် ပြည့်စုံ၏။

၇ ရှုလော့၊ ကျိုးပဲ့သောနှလုံးသားနှင့် ကြေကွဲသောစိတ်ရှိသူ ခပ်သိမ်းအတွက်သော် လည်းကောင်း၊ ပညတ်တရား၏အလိုသို့ မပြည့်စုံစေနိုင်သော အခြားသူများအတွက်သော်လည်းကောင်း၊ ပညတ်တရား၏အလိုသို့ပြည့်စုံစေခြင်းငှာ၊ အပြစ်အတွက် သူ့ကိုယ်ကို ယဇ်အဖြစ် ပူဇော်တော်မူလိမ့်မည်။

၈ သို့ဖြစ်၍၊ ပထမဦးဆုံးထမြောက်သောသူဖြစ်၍၊ သေသူတို့၏ ရှင်ပြန်ထမြောက်ခြင်းကို ဖြစ်ပေါ်စေခြင်းငှာ၊ လူဇာတိအတိုင်း သူ၏အသက်ကိုစွန့်၍၊ ဝိညာဉ်တော်၏တန်ခိုးအားဖြင့်၊ တစ်ဖန်ပြန်၍ယူတော်မူသည့် သန့်ရှင်းသောမေရှိယ၏ ကောင်းမှုများ၊ ကရုဏာတော်နှင့် ကျေးဇူးတော်တို့အားဖြင့် မှတစ်ပါး၊ ဘုရားသခင်၏ မျက်မှောက်တော်၌၊ အဘယ်သူမျှ မနေနိုင်သည်ကို သိကြစေကြောင်း၊ မြေကြီးပေါ်မှာနေထိုင်သူတို့အား ဤအရာတို့ကို ဖော်ပြခြင်းသည်ကား၊ အလွန်အရေးကြီးလှပေစွတကား။

၉ သို့ဖြစ်၍၊ သူသည် လူသားအားလုံးတို့အတွက် တောင်းပန်မည်ဖြစ်သကဲ့သို့၊ ဘုရားသခင်အဖို့ အဦးသီးသောအသီး ဖြစ်ပေ၏။ ထို့အတူ၊ သူ့ကို ယုံကြည်သောသူတို့သည် ကယ်တင်ခြင်းသို့ ရောက်ကြပေလိမ့်မည်။

၁၀ ခပ်သိမ်းသောသူတို့အတွက် တောင်းပန်ခြင်းကြောင့်၊ ခပ်သိမ်းသောလူသားတို့သည် ဘုရားသခင်ထံသို့ လာကြ၏။ သို့ဖြစ်၍၊ သူ့ ၌ရှိသော သမ္မာတရားနှင့် သန့်ရှင်းတော်မူခြင်းတို့အတိုင်း တရားစီရင်တော်မူခြင်းကို ခံရစေရန် သူ၏မျက်မှောက်တော်၌ ရပ်ကြ၏။ သို့ဖြစ်၍၊ အပြစ်ဖြေခြင်းမင်္ဂလာ၏ အလိုသို့ ပြည့်စုံစေခြင်းငှာ ဆက်စပ်လျက်ရှိသော ပျော်ရွှင်ခြင်း၏ ဆန့်ကျင်ဘက်၌ ဆက်စပ်လျက်ရှိသည့် အပြစ်ဒဏ်၊ ထိုဆက်စပ်လျက်ရှိသည့် အပြစ်ဒဏ်သည်ကား၊ သန့်ရှင်းတော်မူသောဘုရားပေးထားတော်မူလေသည့် ပညတ်တရား၏အလိုပေတည်း—

၁၁ အကြောင်းမူကား၊ အရာရာ၌ ဆန့်ကျင်ဘက် ရှိရပေမည်။ ထိုသို့မဟုတ်လျှင်၊ တောရိုင်းထဲမှ ငါ၏သားဦး၊ ဖြောင့်မတ်ခြင်းကို ဖြစ်ပေါ်စေနိုင်လိမ့်မည်မဟုတ်။ ဆိုးညစ်ခြင်းကိုလည်း ဖြစ်ပေါ်စေနိုင်လိမ့်မည်မဟုတ်၊ သန့်ရှင်းခြင်းနှင့် ဝမ်းနည်းပူဆွေးမှုတို့ကိုလည်း ဖြစ်ပေါ်စေနိုင်လိမ့်မည်မဟုတ်၊ အကောင်းနှင့် အဆိုးတို့ကိုလည်း ဖြစ်ပေါ်စေနိုင်လိမ့်မည်မဟုတ်။ သို့ဖြစ်၍၊ အရာခပ်သိမ်းတို့၌ တူညီသောအချက်တစ်ခု ရှိရပေမည်။ သို့ဖြစ်၍၊ တစ်မျိုးတည်းသာဖြစ်လျှင်၊ အသက်ရှင်ခြင်းနှင့် သေခြင်း၊ ပုပ်ပျက်ခြင်းနှင့် မပုပ်ပျက်ခြင်း၊ ပျော်ရွှင်ခြင်းနှင့် ဝမ်းနည်းပူဆွေးခြင်း၊ အာရုံခံစားခြင်းနှင့် အာရုံမခံစားနိုင်ခြင်းတို့ မရှိလေ၍၊ ပုံသေအဖြစ် ဆက်၍တည်ရှိရပေမည်။

၁၂ သို့ဖြစ်၍၊ တန်ဖိုးမရှိသောအရာကို ဖန်းဆင်းထားလေသကဲ့သို့ ဖြစ်ပေမည်။ သို့ဖြစ်၍၊ ဖန်ဆင်းတော်မူခြင်း၏ရည်ရွယ်ချက်ကား၊ အကြံအစည်မရှိဘဲဖြစ်ခဲ့လိမ့်မည်။ သို့ဖြစ်၍၊ ဤအရာက ဘုရားသခင်၏ဉာဏ်ပညာနှင့် သူ၏ထာဝရအကြံအစည်တော်များ၊ ထို့အတူ၊ ဘုရားသခင်၏ တန်ခိုးတော်၊ ကရုဏာတော်နှင့် တရားတော်မူခြင်းတို့ကိုလည်း ဖျက်ဆီးပေလိမ့်မည်။

၁၃ ပညတ်တရားမရှိဟု သင်တို့ဆိုကြလျှင်၊ အပြစ်တရားမရှိဟုလည်း သင်တို့ဆိုကြလိမ့်မည်။ အပြစ်တရားမရှိဟု သင်တို့ဆိုကြလျှင်၊ ဖြောင့်မတ်ခြင်းမရှိဟုလည်း သင်တို့ဆိုကြလိမ့်မည်။ ဖြောင့်မတ်ခြင်းမရှိလျှင်၊ ပျော်ရွှင်ခြင်းမရှိ။ ထို့အတူ၊ ဖြောင့်မတ်ခြင်းနှင့်ပျော်ရွှင်ခြင်းမရှိလျှင်၊ အပြစ်ဒဏ်နှင့် ဝမ်းနည်းပူဆွေးမှုမရှိ။ ထို့အတူ၊ ဤအရာများမရှိလျှင်၊ ဘုရားသခင်မရှိ။ ထို့အတူ၊ ဘုရားသခင်မရှိလျှင်၊ ငါတို့နှင့်မြေကြီးလည်းမရှိ။ အကြောင်းမူကား၊ ပြုစရာနှင့် အပြုခံအရာများကို ဖန်ဆင်းတော်မူခြင်း ရှိနိုင်မည်မဟုတ်။ သို့ဖြစ်၍၊ ခပ်သိမ်းသောအရာတို့ ကွယ်ပျောက်သွားရပေမည်။

၁၄ ယခုမူကား၊ ငါ့သားတို့၊ သင်တို့၏အကျိုးနှင့် သင်ယူခြင်းအတွက် ဤအရာများကို သင်တို့အား ငါပြောမည်။ အကြောင်းမူကား၊ ဘုရားသခင်ရှိတော်မူ၍၊ ကောင်းကင်၊ မြေကြီး နှစ်ခုစလုံးနှင့် ခပ်သိမ်းသောအရာတို့ကို သူဖန်ဆင်းတော်မူလေ၍၊ ၎င်းတို့ ၌ရှိသည့် ခပ်သိမ်းသောအရာတို့သည် ပြုစရာဖြစ်သောအရာများနှင့် အပြုခံဖြစ်သောအရာနှစ်မျိုးစလုံး ဖြစ်ကြလေ၏။

၁၅ လူသား၏အဆုံး၌ သူ၏ထာဝရအကြံအစည်တော်ကို ပြီးမြောက်စေခြင်းငှာ၊ ငါတို့၏ပထမဦးဆုံးသောမိဘများ၊ တောသားရဲများနှင့် မိုးကောင်းကင်ငှက်၊ အချုပ်အားဖြင့် ဖန်ဆင်းထားသည့် ခပ်သိမ်းသောအရာတို့ကို သူဖန်ဆင်းတော်မူလေပြီးမှ၊ တစ်ခုမှာ ချိုပြီး၊ အခြားတစ်ခုမှာ ခါးလေသည့်၊ အသက်ပင်နှင့် ဆန့်ကျင်ဘက်၌ တားမြစ်ထားသောအသီးရှိသကဲ့သို့ပင် ဆန့်ကျင်ဘက်တစ်ခု ရှိရပေမည်။

၁၆ သို့ဖြစ်၍၊ ကိုယ်တော်ရှင်ဘုရားသခင်သည် လူသားအား ကိုယ်တိုင်ပြုမူနိုင်စေကြောင်း အခွင့်ပေးထားတော်မူခဲ့၏။ သို့ဖြစ်၍၊ လူသားသည် တစ်ခုသို့မဟုတ် အခြားတစ်ခု၏ သွေးဆောင်သည်ကို မခံရလျှင်၊ ကိုယ်တိုင်မပြုမူနိုင်။

၁၇ ငါ၊ လေဟိသည်လည်း၊ ငါ ဖတ်ရှုရသည့်အရာများအတိုင်း၊ ရေးထားသည့်အတိုင်း ဘုရားသခင်၏ ကောင်းကင်တမန်တစ်ပါး ကောင်းကင်ဘုံမှ ကျလေသည်ကို ယုံကြည်ရပေမည်။ သို့ဖြစ်၍၊ သူသည် ဘုရားသခင်ရှေ့၌၊ ဆိုးသောအရာကို ရှာလေသောကြောင့်၊ နတ်ဆိုးတစ်ပါးဖြစ်လာ၏။

၁၈ သူသည် ကောင်းကင်ဘုံမှ ကျသောကြောင့်၊ ကာလအစဉ်အဆက် ဝမ်းနည်းပူဆွေးစရာ ဖြစ်လာ၍၊ ခပ်သိမ်းသောလူသားတို့၏ ဝမ်းနည်းပူဆွေးမှုကိုလည်း ရှာ၏။ သို့ဖြစ်၍၊ သူ၊ အထူးသဖြင့် ခပ်သိမ်းသောမုသားတို့၏အဘဖြစ်သူ၊ နတ်ဆိုးဖြစ်သူ၊ ရှေးမြွေဟောင်းသည် ဧဝအား တားမြစ်ထားသောအသီးကို သုံးဆောင်လော့၊ သင်တို့မသေရ၊ သို့ရာတွင် အကောင်းနှင့်အဆိုးကို သိ၍၊ ဘုရားသခင်ကဲ့သို့ဖြစ်လိမ့်မည်ဟု ဆို၏။

၁၉ အာဒံနှင့် ဧဝတို့သည်လည်း တားမြစ်ထားသောအသီးကို သုံးဆောင်ကြလေပြီးနောက်၊ မြေကြီးကို ထွန်ယက်စေရန် ဧဒင်ဥယျာဉ်မှ နှင်ထုတ်ခံရကြလေ၏။

၂၀ သူတို့သည်လည်း သားသမီးများ၊ အမှန်စင်စစ်၊ မြေကြီးတစ်ခုလုံး၏ မိသားစုကိုပင် ဖွားမြင်ကြလေ၏။

၂၁ လူသားတို့ဇာတိကိုယ်ခန္ဓာ၌ရှိကြစဉ်တွင် နောင်တရနိုင်ကြစေကြောင်း၊ ဘုရားသခင်၏အလိုတော်အတိုင်း၊ သူတို့၏အသက်တာကို ရှည်စေ၏။ သို့ဖြစ်၍၊ သူတို့၏နေရာမှာ၊ အစမ်းသပ်ခံခြင်း၏နေရာ ဖြစ်လာလျက်၊ လူသားများသို့ ပေးထားတော်မူလေသော၊ ကိုယ်တော်ရှင်ဘုရားသခင်၏ပညတ်တော်များအတိုင်း၊ သူတို့၏အချိန်ကိုလည်း ရှည်စေ၏။ အကြောင်းမူကား၊ ခပ်သိမ်းသောလူသားတို့ နောင်တရကြရမည့်အကြောင်း၊ သူမိန့်မှာခဲ့၏။ သူတို့သည် မိမိတို့မိဘများ၏ လွန်ကျူးခြင်းကြောင့် ပျောက်ဆုံးလေသည်ကို ခပ်သိမ်းသောလူသားတို့အား သူပြတော်မူခဲ့၏။

၂၂ ယခုမူကား၊ ရှုလော့၊ အာဒံသည် မလွန်ကျူးခဲ့လေလျှင်၊ ကျရှုံးခဲ့လိမ့်မည်မဟုတ်ဘဲ ဧဒင်ဥယျာဉ်၌ ဆက်၍ ရှိနေလိမ့်မည်။ ဖန်ဆင်းထားတော်မူလေသည့် ခပ်သိမ်းသောအရာတို့သည်လည်း ဖန်ဆင်းထားပြီးနောက် ရှိနေခဲ့သော အခြေအနေ၌ ဆက်၍ရှိနေရပေမည်၊ ထိုအရာတို့သည် ကာလအစဉ်အဆက် ဆက်၍ရှိနေရပေမည်၊ အဆုံးလည်းမရှိရ။

၂၃ သူတို့၌ သားသမီးရှိလိမ့်မည်မဟုတ်။ သို့ဖြစ်၍၊ သူတို့သည် အပြစ်မရှိသောအခြေအနေ၌ ဆက်၍၊ ရှိလေပြီး၊ ဝမ်းမြောက်ခြင်း မရှိလေကြ။ အကြောင်းမူကား၊ သူတို့သည် ဝမ်းနည်းပူဆွေးခြင်းကို မသိကြ။ မကောင်းသည့်အရာကို မပြုလေကြ၊ အကြောင်းမူကား သူတို့သည် အပြစ်ကို မသိကြ။

၂၄ သို့ရာတွင်၊ ရှုလော့၊ ခပ်သိမ်းသောအရာတို့ကို သိတော်မူသည့်သူ၏ဉာဏ်ပညာတော်အတိုင်း ခပ်သိမ်းသောအရာတို့ကို ပြုထားတော်မူလေ၏။

၂၅ လူသားများဖြစ်တည်နိုင်ကြစေခြင်းငှာ၊ အာဒံလဲကျ၏။ လူသားများသည် ဝမ်းမြောက်ခြင်းရှိနိုင်ကြစေကြောင်း ဖြစ်တည်ကြ၏။

၂၆ အချိန်ကာလပြည့်စုံခြင်းသို့ ရောက်သောအခါ၊ မေရှိယသည် လူသားတို့ကို ကျရှုံးခြင်းမှ ရွေးနှုတ်တော်မူခြင်းငှာ ကြွလာတော်မူ၏။ သူတို့သည် ကျရှုံးခြင်းမှ ရွေးနှုတ်ခံရကြသောကြောင့်၊ အကောင်းနှင့် အဆိုးကို ခွဲခြား၍သိကြပြီး၊ ဘုရားသခင်ပေးထားတော်မူလေသည့် ပညတ်တော်များအတိုင်း၊ ထိုကြီးစွာသောနောက်ဆုံးနေ့၌၊ ဥပဒေအားဖြင့် အပြစ်ဒဏ်ပေးခြင်းမှတစ်ပါး၊ မိမိတို့ကိုယ်တိုင်အတွက် ပြုမူကြစေခြင်းငှာနှင့် အပြုမူခံမဖြစ်ကြစေခြင်းငှာ ကာလအစဉ်အဆက် လွတ်လပ်လာကြ၏။

၂၇ သို့ဖြစ်၍၊ လူသားတို့သည် လူဇာတိအတိုင်း လွတ်လပ်ကြ၏။ လူသားအဖို့ မရှိမဖြစ်လိုအပ်သည့် ခပ်သိမ်းသောအရာတို့ကိုလည်း ပေးထားတော်မူလေ၏။ သူတို့သည် လူသားခပ်သိမ်းတို့၏ ကြီးမြတ်တော်မူသည့် စေ့စပ်ရှင်အားဖြင့် လွတ်လပ်ခြင်းနှင့် ထာဝရအသက်ကိုရွေးချယ်ရန် သို့မဟုတ်၊ နတ်ဆိုး၏ဖမ်းဆီးချုပ်နှောင်ခြင်းတန်ခိုးအတိုင်း ဖမ်းဆီးချုပ်နှောင်ခြင်းနှင့်သေခြင်းကိုရွေးချယ်ရန် လွတ်လပ်ကြ၏။ အကြောင်းမူကား၊ သူသည် ခပ်သိမ်းသောလူသားတို့ကို သူကိုယ်တိုင်ကဲ့သို့ ဝမ်းနည်းပူဆွေးဖွယ်ဖြစ်နိုင်စေခြင်းငှာ ကြိုးစားအားထုတ်၏။

၂၈ ယခုမူကား၊ ငါ့သားတို့၊ ငါအလိုရှိသည်မှာ၊ သင်တို့သည် ထိုကြီးမြတ်တော်မူသည့် စေ့စပ်ရှင်ကို မျှော်ကိုး၍၊ သူ၏ကြီးမြတ်တော်မူသော ပညတ်တော်များကို လိုက်နာလျက်၊ သူ၏နှုတ်ကပတ်တော်များအပေါ်၌ သစ္စာရှိ၍၊ သူ၏သန့်ရှင်းသောဝိညာဉ်တော်၏ အလိုတော်အတိုင်း ထာဝရအသက်ကို ရွေးချယ်ကြစေခြင်းငှာနှင့်၊

၂၉ နတ်ဆိုးအဖို့ သူ၏နိုင်ငံ၌ သင်တို့အပေါ်အုပ်စိုးနိုင်ခြင်းငှာ၊ သင်တို့ကို ငရဲသို့တိုင်အောင် ဆွဲချခြင်းငှာ သူ၏ဝိညာဉ်အား ဖမ်းဆီးချုပ်နှောင်ခြင်းတန်ခိုးကိုပေးသော လူဇာတိ၏အလိုနှင့် ၎င်း၌ရှိသည့် မကောင်းမှုအတိုင်း ထာဝရသေခြင်းကို မရွေးချယ်ကြစေခြင်းငှာပေတည်း။

၃၀ ငါသည် ဤစကားအနည်းငယ်ကို သင်တို့အားလုံးကို၊ ငါ့သားများကို ငါ၏အစမ်းသပ်ခံချိန်နောက်ဆုံးသောကာလ၌ ပြောလေပြီ။ ငါသည် ကောင်းသောအပိုင်းကို ရွေးကောက်ထား၏၊ ပရောဖက်၏စကားများအတိုင်းပေတည်း။ သင်တို့စိတ်ဝိညာဉ်၏ ထာဝရတည်မြဲသောကောင်းကျိုးအတွက်မှတစ်ပါး၊ ငါ့၌ အခြား အဘယ်ရည်ရွယ်ချက်မျှမရှိ။ အာမင်။