၂ နီဖိုင်း ၂၈

အခန်းကြီး ၂၈

မှားယွင်းသည့် အသင်းတော်များစွာတို့ကို နောက်ဆုံးသောကာလ၌ တည်ထောင်ကြလိမ့်မည်—မှားယွင်း၍ အချည်းနှီးဖြစ်သော မိုက်မဲသည့်ဩဝါဒများကို ထိုအသင်းတော်များက သွန်သင်ပေးလိမ့်မည်—မှားယွင်းသောဆရာများကြောင့်၊ ဖောက်ပြန်သင်းကွဲခြင်းပျံ့နှံ့လိမ့်မည်—နတ်ဆိုးသည် လူသားတို့၏စိတ်နှလုံးကို လှုပ်ရှားထကြွစေလိမ့်မည်—သူသည် မှားယွင်းသောဩဝါဒအမျိုးမျိုးတို့ကို သွန်သင်ပေးလိမ့်မည်။ ဘီစီ ၅၅၉–၅၄၅ ခန့်။

၁ ယခုမူကား၊ ရှုလော့၊ ငါ၏ညီအစ်ကိုတို့၊ ဝိညာဉ်တော်က ငါ့ကို အတင်းစေခိုင်းသည့်အတိုင်း သင်တို့ကို ငါပြောလေပြီ။ သို့ဖြစ်၍၊ ထိုအရာတို့ဧကန်အမှန် ဖြစ်လာရမည်ကို ငါသိ၏။

၂ ထိုကျမ်း၌ ရေးလိမ့််မည့်အရာများသည် လူသားတို့အတွက်၊ အထူးအားဖြင့် ဣသရေလအမျိုးသားတို့၏ ကျန်ကြွင်းသောသူများဖြစ်သည့် ငါ၏အမျိုးအနွယ်များအတွက် ကြီးစွာ အဖိုးထိုက်လိမ့်မည်။

၃ အကြောင်းမူကား၊ အချိန်တန်လာလတ္တံ့သောအခါ၊ ထိုကာလ၌ တည်ထောင်ကြသော အသင်းတော်များသည်ကား၊ ကိုယ်တော်ရှင်၏ဘုန်းတော်ထင်ရှားစေဖို့ မဟုတ်၍၊ အသင်းတော်တစ်ခုက အခြားအသင်းတော်တစ်ခုကို ပြောဆိုလိမ့်မည်မှာ၊ ရှုလော့၊ ငါ၊ ငါသည် ကိုယ်တော်ရှင်၏အသင်းတော်ဖြစ်၏။ အခြားသော အသင်းတော်များကလည်းပြောဆိုကြမည်မှာ၊ ငါ၊ ငါသည် ကိုယ်တော်ရှင်၏အသင်းတော်ဖြစ်၏။ အသင်းတော်တည်ထောင်သူတိုင်းက ထိုကဲ့သို့ဆိုကြသော်လည်း၊ ကိုယ်တော်ရှင်၏ဘုန်းတော်ထင်ရှားစေဖို့ မဟုတ်ကြ—

၄ ထိုအသင်းတော်တို့သည်လည်း အချင်းချင်း ရန်တွေ့ကြလိမ့်မည်။ ၎င်းတို့၏ယဇ်ပုရောဟိတ်များသည်လည်း အချင်းချင်းရန်တွေ့ကြလိမ့်မည်၊ မိမိတို့၏အသိပညာဖြင့် သွန်သင်ပေးကြလိမ့်မည်၊ ဟောပြောခြင်းအခွင့်ကိုပေးသည့် သန့်ရှင်းသောဝိညာဉ်တော်ကိုလည်း ငြင်းဆိုကြလိမ့်မည်။

၅ ထို့အတူ၊ သူတို့သည် ဘုရားသခင်၊ ဣသရေလအမျိုး၏သန့်ရှင်းတော်မူသောဘုရား၏ တန်ခိုးတော်ကို ငြင်းဆို၍၊ လူတို့ကို ပြောဆိုကြသည်ကား၊ ငါတို့ကို စေ့စေ့နားထောင်ကြလော့။ ငါတို့၏ပညတ်ကို ကြားနာကြလော့။ အကြောင်းမူကား၊ ရှုလော့ ယခုကာလတွင် ဘုရားသခင်မရှိ။ ကိုယ်တော်ရှင်၊ ရွေးနှုတ်ရှင်သည် သူ၏အမှုတော်ကို ပြုထားတော်မူလေ၍၊ လူသားတို့အား၊ သူ၏တန်ခိုးတော်ကိုလည်း ပေးအပ်ထားတော်မူလေပြီ။

၆ ရှုလော့၊ ငါ၏ပညတ်ကို သင်တို့စေ့စေ့နားထောင်ကြလော့။ အလွန်တရာအံ့ဩဖွယ်အမှုကို ကိုယ်တော်ရှင်၏ လက်တော်အားဖြင့် ပြုပြင်စီရင်ထားပြီဟု အခြားသူတို့ဆိုကြလျှင် မယုံကြနှင့်။ အကြောင်းမူကား၊ ဤကာလတွင်၊ သူသည် အလွန်တရာအံ့ဩဖွယ်အမှုတို့၏ ဘုရားသခင်မဟုတ်။ သူ၏အမှုကို သူဆောင်ရွက်တော်မူပြီးလေပြီ။

၇ ထိုမှတစ်ပါး၊ များစွာသောသူတို့က၊ စားလော့၊ သောက်လော့၊ ပျော်မွေ့လော့။ အကြောင်းမူကား၊ ငါတို့သည် နက်ဖြန်နေ့၌ သေပြီးနောက်၊ ကောင်းသောအကျိုးခံရလိမ့်မည်ဟု ဆိုကြလိမ့်မည်။

၈ အခြားလူများစွာတို့ကလည်း ပြောဆိုကြမည်ကား၊ စားလော့၊ သောက်လော့၊ ပျော်မွေ့ကြလော့။ သို့သော်လည်း ဘုရားသခင်ကို ကြောက်ရွံ့ကြလော့—အပြစ်အနည်းငယ်ကျူးလွန်ရာ၌ သူကအပြစ်ကင်းစေတော်မူလိမ့်မည်။ ထိုမှတစ်ပါး၊ မုသားအနည်းငယ်ပြောလော့။ စကားကျွံလေသူအပေါ် အခွင့်ကောင်းယူကြလော့။ ကိုယ်နှင့်စပ်ဆိုင်သောသူအဖို့ ကျင်းကိုတူးကြလော့။ ဤသို့ပြုခြင်းအားဖြင့် ထိခိုက်မှုမရှိ၍ ဤအရာခပ်သိမ်းတို့ကို ပြုကြလော့။ အကြောင်းမူကား၊ နက်ဖြန်နေ့၌ ငါတို့သေကြ၏။ ငါတို့အပြစ်ရောက်လျှင်၊ ဘုရားသခင်သည် ငါတို့ကို ရိုက်ချက်အနည်းငယ်ဖြင့်သာ ရိုက်တော်မူ၍၊ နောက်ဆုံးတွင် ငါတို့သည် ဘုရားသခင်၏ နိုင်ငံတော်၌ ကယ်တင်ခြင်းသို့ ရောက်ကြလိမ့်မည်။

၉ ထိုမှတစ်ပါး၊ မှားယွင်း၍ အချည်းနှီးဖြစ်သော မိုက်မဲသည့် ဩဝါဒများကို ဤကဲ့သို့အားဖြင့် သွန်သင်ပေးသူများစွာရှိလိမ့်မည်။ သူတို့စိတ်နှလုံး၌ မာနထောင်လွှားလျက်၊ သူတို့၏အကြံများကို ကိုယ်တော်ရှင်ထံမှ ကွယ်ဝှက်ခြင်းငှာ နက်နဲစွာ ကြိုးစားကြလိမ့်မည်။ သူတို့၏အမှုများသည်လည်း မှောင်မိုက်၌ ရှိကြလိမ့်မည်။

၁၀ ထို့အတူ၊ သန့်ရှင်းသူတို့၏အသွေးက ထိုသူတို့တစ်ဖက်၌၊ မြေကြီးမှနေ၍ ဟစ်ကြွေးလိမ့်မည်။

၁၁ ထိုမှတစ်ပါး၊ သူတို့အားလုံး လမ်းလွဲကြလေပြီ။ သူတို့သည် ဖောက်ပြန်လာကြလေပြီ။

၁၂ မာနကြောင့်လည်းကောင်း၊ မှားယွင်းသောဆရာများနှင့် မှားယွင်းသောဩဝါဒများကြောင့်လည်းကောင်း သူတို့၏အသင်းတော်များသည် ဖောက်ပြန်လာကြလေ၍၊ သူတို့၏အသင်းတော်များသည် ဘဝင်မြင့်ကြလေ၏။ မာနကြောင့် သူတို့မာနထောင်လွှားကြ၏။

၁၃ သူတို့သည် မိမိတို့၏တင့်တယ်သောဝတ်ပြုရာဌာနတို့ကြောင့် ဆင်းရဲသားတို့ကို လုယူကြ၏။ သူတို့သည် မိမိတို့၏တင့်တယ်သော အဝတ်တန်ဆာကြောင့် ဆင်းရဲသားတို့ကို လုယူကြ၏။ ထို့အတူ၊ သူတို့သည် မိမိတို့၏မာန၌ မာနထောင်လွှားကြသောကြောင့် သိမ်မွေ့အောက်ကျို့သောသူနှင့် စိတ်နှလုံးနှိမ့်ချသောသူတို့ကို ညှဉ်းဆဲကြ၏။

၁၄ သူတို့သည် လည်ပင်းခိုင်မာ၍၊ မောက်မာကြ၏။ ထိုမှတစ်ပါး၊ မာန၊ ဆိုးညစ်ခြင်း၊ စက်ဆုပ်ရွံရှာဖွယ်အမှုများနှင့် မတရားသောမေထုန်အမှုများတို့ကြောင့်၊ ခရစ်တော်၏ နှိမ့်ချသောတပည့်တော်အနည်းငယ်တို့မှတစ်ပါး၊ သူတို့အားလုံးသည် လမ်းလွဲကြလေပြီ။ သို့ရာတွင်၊ ထိုတပည့်တော်တို့သည်လည်း လူတို့၏ပညတ်ကို သင်ယူခဲ့ရလေကား၊ ကြိမ်ဖန်များစွာ အမှားအယွင်းကို ပြုကြစေကြောင်း သွေးဆောင်ခံရကြလေ၏။

၁၅ အို မိမိမာနစိတ်နှလုံးဖြင့်၊ မာနထောင်လွှားကြသော၊ ဉာဏ်ပညာရှိသူများ၊ စာတတ်သောသူများနှင့် ကြွယ်ဝသောသူများ၊ ထို့အတူ၊ မှားယွင်းသောဩဝါဒတို့ကို ဟောပြောကြသူခပ်သိမ်း၊ မတရားသောမေထုန်အမှုများကို ကျူးလွန်ကြသူခပ်သိမ်းနှင့် ကိုယ်တော်ရှင်၏မှန်သောတရားလမ်းတော်တို့ကို မှောက်လှန်ကြသောသူများတို့သည် အမင်္ဂလာ၊ အမင်္ဂလာ၊ အမင်္ဂလာရှိကြ၏ဟု ကိုယ်တော်ရှင်ဘုရားသခင်အနန္တတန်ခိုးရှင်မိန့်တော်မူလေ၏။ အကြောင်းမူကား၊ သူတို့သည် ငရဲသို့တိုင်အောင် ပစ်ချခံရကြလိမ့်မည်။

၁၆ ဖြောင့်မတ်သောသူကို တန်ဖိုးမရှိသောအရာအဖြစ် မထီမဲ့မြင်ပြု၍ ကောင်းမြတ်သောအရာကို ဆန့်ကျင်ကဲ့ရဲ့ပြောဆို၍၊ ထိုအရာသည် အဖိုးမတန်ဟုပြောကြသောသူတို့သည် အမင်္ဂလာရှိကြ၏။ အကြောင်းမူကား၊ မြေကြီးပေါ်မှာနေထိုင်သူတို့ကို ကိုယ်တော်ရှင်ဘုရားသခင်အလျင်အမြန်ဆုံးမတော်မူမည့်နေ့သည် ကျရောက်လာလိမ့်မည်။ ထိုနေ့တွင်၊ ဒုစရိုက်၌ လုံးလုံးရင့်မှည့်ကြသောသူတို့သည် ပျက်စီးကြလိမ့်မည်။

၁၇ သို့ရာတွင်၊ ရှုလော့၊ မြေကြီးပေါ်မှာနေထိုင်သူတို့သည် မိမိတို့၏ဆိုးညစ်ခြင်းနှင့် စက်ဆုပ်ရွံရှာဖွယ်အမှုများမှ နောင်တရကြလျှင်၊ ဖျက်ဆီးခံရကြလိမ့်မည်မဟုတ်ဟု ကောင်းကင်ဗိုလ်ခြေကိုယ်တော်ရှင်မိန့်တော်မူလေ၏။

၁၈ သို့ရာတွင်၊ ရှုလော့၊ မြေကြီးတခုလုံး၏ ပြည့်တန်ဆာဖြစ်သော ထိုစက်ဆုပ်ရွံရှာဖွယ်ကောင်းသည့်အသင်းတော်ကြီးသည် မြေကြီးသို့ ပြိုကျရမည်ဖြစ်၍၊ ကြီးမားလှသည်ကား၊ ထိုအသင်းတော်ကြီး၏ ကျရှုံးခြင်းဖြစ်၏။

၁၉ နတ်ဆိုး၏နိုင်ငံသည် တုန်လှုပ်၍၊ သူနှင့်ဆိုင်သောသူတို့ကို နောင်တရခြင်းသို့ နှိုးဆော်ရမည်၊ သို့မဟုတ်လျှင်၊ နတ်ဆိုးသည် ထိုသူတို့ကို သူ၏ထာဝရတည်မြဲသောသံကြိုးဖြင့် ချုပ်ကိုင်လိမ့်မည်။ သူတို့သည်လည်း၊ အမျက်ထွက်ကြစေကြောင်း နှိုးဆော်ခံရ၍၊ ပျက်စီးကြ၏။

၂၀ အကြောင်းမူကား၊ ထိုကာလ၌ သူသည် လူသားတို့၏စိတ်နှလုံးကို လှုပ်ရှားထကြွစေလျက်၊ ကောင်းမြတ်သောအရာကို ဆန့်ကျင်၍ အမျက်ထွက်စေကြောင်း သူတို့ကို နှိုးဆော်လိမ့်မည်။

၂၁ ထို့အတူ၊ အခြားသောသူတို့ကိုလည်း သူစိတ်ပြေစေလျက်၊ လောကီဆိုင်ရာလုံခြုံရာသို့ လှည့်ဖြားခေါ်ဆောင်သွား၍၊ ထိုသူတို့ဆိုမည်ကား၊ ဇိအုန်မြို့ ၌ အားလုံးကောင်းပါ၏။ ထိုမှတစ်ပါး၊ ဇိအုန်မြို့သည် အောင်မြင်၍ အားလုံးကောင်းပါ၏—ထိုကဲ့သို့အားဖြင့်၊ နတ်ဆိုးသည် သူတို့၏စိတ်ဝိညာဉ်ကို လိမ်လည်လှည့်ဖြား၍၊ သူတို့ကို ငရဲသို့ သတိကြီးစွာလှည့်ဖြားခေါ်ဆောင်သွား၏။

၂၂ ရှုဦးလော့၊ အခြားသောသူတို့ကိုလည်း မြှောက်ပင့်ပြောဆို၍ သွေးဆာင်လျက်၊ ငရဲမရှိကြောင်းပြောဆို၏။ ငါသည် နတ်ဆိုးမဟုတ်။ အကြောင်းမူကား၊ အဘယ်နတ်ဆိုးမျှမရှိဟုလည်း သူတို့ကို ဆို၏—ထိုကဲ့သို့အားဖြင့်၊ လွတ်မြောက်ခြင်းမရှိရာ သူ၏ကြောက်ရွံ့ဖွယ်ကောင်းသော သံကြိုးတို့ဖြင့် သူတို့ကို ချုပ်ကိုင်သည်အထိ သူတို့နား၌ အသံသေးနှင့် တိုးတိုးပြော၏။

၂၃ ထိုမှတစ်ပါး၊ သူတို့သည် သေခြင်းနှင့် ငရဲ၏ချုပ်ကိုင်သည်ကို ခံရ၏။ သေခြင်း၊ ငရဲ၊ နတ်ဆိုးနှင့် ၎င်းတို့၏ဖမ်းဆီးထားခြင်းကို ခံရလေသူခပ်သိမ်းတို့သည် ဘုရားသခင်၏ပလ္လင်တော်ရှေ့၌ ရပ်ရမည်ဖြစ်၍၊ မိမိတို့၏အကျင့်အတိုင်း တရားစီရင်ခြင်းကို ခံရလျက်၊ ထိုနေရာမှတစ်ဆင့် မိမိတို့အတွက် ပြင်ဆင်ထားသောနေရာ၊ အကယ်စင်စစ်၊ အဆုံးမရှိသည့် စိတ်ဆင်းရဲကိုယ်ဆင်းရဲဖြစ်ခြင်းတည်းဟူသော ကန့်နှင့်ရောသောမီးအိုင်သို့ သွားရကြမည်။

၂၄ ထို့ကြောင့်၊ ဇိအုန်မြို့ ၌ ငြိမ်သက်ချမ်းသာစွာနေသောသူသည် အမင်္ဂလာရှိ၏။

၂၅ အားလုံး ကောင်းပါ၏ဟု ဟစ်ကြွေးသောသူသည် အမင်္ဂလာရှိ၏။

၂၆ ထိုမှတစ်ပါး၊ လူတို့၏ပညတ်များကို စေ့စေ့နားထောင်၍၊ ဘုရားသခင်၏တန်ခိုးတော်နှင့် သန့်ရှင်းသောဝိညာဉ်တော်၏ဆုကျေးဇူးကို ငြင်းဆိုသောသူသည် အမင်္ဂလာရှိ၏။

၂၇ ထိုမှတစ်ပါး၊ ငါတို့ ရရှိကြပြီးပြီဖြစ်၍၊ မလိုအပ်တော့ဟု ဆိုသောသူသည် အမင်္ဂလာရှိ၏။

၂၈ ထို့အတူ၊ အချုပ်အားဖြင့်၊ ဘုရားသခင်၏ သမ္မာတရားကြောင့် တုန်၍ အမျက်ထွက်ကြသောသူခပ်သိမ်းတို့သည် အမင်္ဂလာရှိကြ၏။ အကြောင်းမူကား၊ ရှုလော့၊ ကျောက်ပေါ်၌ တည်ဆောက်ထားသောသူသည် ထိုတရားကို ဝမ်းသာခြင်းနှင့် လက်ခံရရှိ၏။ သဲအုတ်မြစ်ပေါ်၌ တည်ဆောက်ထားသောသူသည် လဲကျမည်ကို ကြောက်ရွံ့၍ တုန်၏။

၂၉ ငါတို့သည် ဘုရားသခင်၏နှုတ်ကပတ်တော်ကို ရရှိလေ၍၊ လုံလောက်စွာရှိပြီဖြစ်သဖြင့် ဘုရားသခင်၏နှုတ်ကပတ်တော်ကို နောက်ထပ်မလိုအပ်တော့ဟု ဆိုသောသူသည် အမင်္ဂလာရှိ၏။

၃၀ အကြောင်းမူကား၊ ရှုလော့၊ ကိုယ်တော်ရှင်ဘုရားသခင်မိန့်တော်မူလေသည်ကား၊ ငါသည် လူသားတို့အား ပညတ်တစ်ခုပြီးတစ်ခု၊ နည်းတစ်ခုပြီးတစ်ခု၊ သည်ဘက်မှာအနည်းငယ်၊ ဟိုဘက်မှာအနည်းငယ် ပေးတော်မူမည်။ ငါ၏ပညတ်များကို စေ့စေ့နားထောင်၍၊ ငါ၏အကြံကို ကြားနာသောသူတို့သည် မင်္ဂလာရှိကြ၏။ အကြောင်းမူကား၊ သူတို့သည် ဥာဏ်ပညာကို သင်ယူကြလိမ့်မည်။ ရရှိတတ်သောသူအား ငါထပ်၍ပေးတော်မူမည်။ ငါတို့မှာလုံလောက်စွာရှိ၏ဟု ပြောမည့်သူတို့ထံမှ၊ ရှိသည့်အရာကိုပင် သိမ်းယူသွားလိမ့်မည်။

၃၁ ကျိန်ခြင်းခံရသောသူသည်ကား၊ လူကိုကိုးစား၍ လူ၏လက်ရုံးကို အမှီပြုသော၊ သို့တည်းမဟုတ်၊ လူတို့၏ပညတ်များသည် သန့်ရှင်းသောဝိညာဉ်တော်၏တန်ခိုးအားဖြင့် ပေးထားတော်မူလေခြင်းမဟုတ်လျှင်၊ ထိုသူတို့၏ပညတ်များကို စေ့စေ့နားထောင်မည့်သူ ဖြစ်၏။

၃၂ တပါးအမျိုးသားတို့သည် အမင်္ဂလာရှိကြ၏ဟု ကောင်းကင်ဗိုလ်ခြေ ကိုယ်တော်ရှင်ဘုရားသခင်မိန့်တော်မူလေ၏။ အကြောင်းမူကား၊ ငါ၏လက်တော်ကို သူတို့ထံနေ့တိုင်းမပြတ် ဆန့်သော်ငြားလည်း၊ သူတို့သည် ငါ့ကို ငြင်းဆိုကြလိမ့်မည်။ သို့သော်လည်း သူတို့သည် နောင်တရလျက်၊ ငါ့ထံသို့လာကြလျှင်၊ သူတို့ကို ငါကရုဏာကြီးတော်မူမည်ဟု ကိုယ်တော်ရှင်ဘုရားသခင်မိန့်တော်မူလေ၏။ အကြောင်းမူကား၊ ငါ၏လက်တော်သည် တစ်နေ့လုံးဆန့်တန်းလျက်ရှိ၏ဟု ကောင်းကင်ဗိုလ်ခြေကိုယ်တော်ရှင်ဘုရားသခင် မိန့်တော်မူလေသတည်း။