၂ နီဖိုင်း ၃

အခန်းကြီး ၃

အဲဂုတ္တုပြည်၌ ယောသပ်သည် ရူပါရုံ၌ နီဖိုင်းအမျိုးသားတို့ကို မြင်၏—သူသည် နောက်ပိုင်းကာလ မြင်သောသူဖြစ်သည့် ဂျိုးဇက်စမစ်အကြောင်း၊ ဣသရေလအမျိုးတို့ကို ကယ်လွှတ်မည့် မောရှေအကြောင်းနှင့် မော်မုန်ကျမ်းဖြစ်ပေါ်လာခြင်းအကြောင်းတို့ကို ပရောဖက်ပြု၍ဟော၏။ ဘီစီ ၅၈၈–၅၇၀ ခန့်။

၁ ယခုမူကား၊ ငါ၏သားနှောင်းယောသပ်၊ သင့်ကို ငါဆို၏။ သင်သည် ငါဆင်းရဲဒုက္ခခံစားရာ တောရိုင်းထဲ၌ ဖွားမြင်ခံရ၏။ အမှန်စင်စစ်၊ ငါ၏ဝမ်းနည်းမှုအကြီးမားဆုံးသော ကာလ၌ သင်၏အမိသည် သင့်ကို ဖွားမြင်ခဲ့၏။

၂ သင်သည် ဣသရေလအမျိုး၏ သန့်ရှင်းတော်မူသောဘုရား၏ပညတ်တော်များကို စောင့်ထိန်းမည်ဆိုလျှင်၊ သင်၏လုံခြုံမှုအတွက် သင်၏ညီအစ်ကိုများနှင့်အတူ သင်၏အမွေခံရာနှင့် သင့်အမျိုးအနွယ်များ၏အမွေခံရာအဖြစ် အဖိုးအထိုက်ဆုံးပြည်ဖြစ်သည့် ဤပြည်ကိုလည်း သင့်အတွက် ကိုယ်တော်ရှင်ကာလအစဉ်အဆက် ရည်စူးတော်မူပါစေ။

၃ ယခုမူကား၊ ငါဆင်းရဲဒုက္ခခံစားရာတောရိုင်းထဲမှ ဆောင်ယူခဲ့လေသော ငါ၏သားနှောင်းယောသပ်၊ ကိုယ်တော်ရှင်သည် သင့်ကို ကာလအစဉ်အဆက် ကောင်းချီးပေးတော်မူပါစေ။ အကြောင်းမူကား၊ သင်၏အမျိုးအနွယ်သည် ရှင်းရှင်း ဖျက်ဆီးမခံရ။

၄ အကြောင်းမူကား၊ ရှုလော့၊ သင်သည် ငါ့ရင်သွေးဖြစ်၏။ ငါသည်လည်း အဲဂုတ္တုပြည်သို့ ဖမ်းဆီးချုပ်နှောင်၍ ဆောင်ယူခံရသည့် ယောသပ်၏ အမျိုးအနွယ်ဖြစ်၏။ ယောသပ်ထံ ပြုတော်မူခဲ့သည့် ကိုယ်တော်ရှင်၏ ပဋိညာဉ်တို့သည်လည်း ကြီးမြတ်တော်မူလေ၏။

၅ သို့ဖြစ်၍၊ ယောသပ်သည် ငါတို့၏နေ့ရက်များကို အမှန်ပင်မြင်၏။ ကွဲကွာသည့် လူတစ်စုဖြစ်သော်လည်း ထိုသူတို့ကို မှောင်မိုက်မှ အလင်းသို့၊ တန်ခိုးကို ပေးသောဝိညာဉ်တော်အားဖြင့်၊ နောက်ပိုင်းကာလများ၌ ထိုသူတို့ထံ မေရှိယထင်ရှားစွာပြတော်မူလိမ့်မည်ဟူသည့် ကိုယ်တော်ရှင်၏ပဋိညာဉ်များအတိုင်း၊ အောက်မေ့နိုင်ကြစေခြင်းငှာ၊ သူ၏ရင်သွေးမှ ဣသရေလအမျိုးသားများအတွက် မေရှိယကိုမဟုတ်သော်လည်း၊ ဖြောင့်မတ်သောသူတစ်စုကို ကိုယ်တော်ရှင်ဘုရားသခင်က ပေါ်ထွန်းစေလိမ့်မည်ဆိုသော ကိုယ်တော်ရှင်၏ကတိတော်ကို သူရရှိ၏—အမှန်စင်စစ်၊ ဖုံးကွယ်ထားသော မှောင်မိုက်နှင့် ဖမ်းဆီးချုပ်နှောင်ခြင်းမှ လွတ်လပ်ခွင့်သို့ ဆောင်ယူနိုင်သည့်တိုင်အောင်ပေတည်း။

၆ အကြောင်းမူကား၊ မြင်သောသူတစ်ဦးကို ငါ၏ဘုရားသခင်ကိုယ်တော်ရှင် ပေါ်ထွန်းစေတော်မူ၍၊ ထိုသူသည် ရွေးကောက်တော်မူထိုက်သည့် ငါ၏ရင်သွေးအဖို့ ရွေးကောက်တော်မူထိုက်သည့် မြင်သောသူဖြစ်လိမ့်မည်ဟုဆို၍ ယောသပ်သည် အမှန်ပင်သက်သေခံ၏။

၇ ထိုမှတစ်ပါး၊ ယောသပ်ကအမှန်ပင်ဆိုသည်မှာ၊ ငါ့ကို ကိုယ်တော်ရှင်မိန့်တော်မူလေသည်ကား၊ ရွေးကောက်တော်မူထိုက်သည့် မြင်သောသူတစ်ဦးကို သင်၏ရင်သွေးမှ ငါပေါ်ထွန်းစေတော်မူမည်။ သူသည်လည်း သင်၏ရင်သွေး၌ အလွန်အလေးအမြတ်ထား ခံရပေလိမ့်မည်။ သူသည် မိမိ၏ညီအစ်ကိုများဖြစ်သည့် သင်၏ရင်သွေးအတွက်၊ သင်၏ဘိုးဘေးတို့နှင့် ငါပြုထားတော်မူလေသည့် ပဋိညာဉ်အကြောင်း အသိပညာသို့ ထိုသူတို့ကို ဆောင်ယူသည်အထိပင်၊ သူတို့အတွက် ကြီးစွာအဖိုးထိုက်သည့် အမှုကို ပြုစေမည့်အကြောင်း၊ ငါမိန့်မှာမည်။

၈ သူ့ကို ငါမိန့်တော်မူမည့် အမှုမှတစ်ပါး၊ အခြားအမှုကို မပြုစေမည့်အကြောင်းပညတ်တော်ကို သူ့အား ငါပေးမည်။ ငါသည် သူ့ကို ငါ၏အမြင်၌ ကြီးမြတ်စေမည်။ အကြောင်းမူကား၊ သူသည် ငါ၏အမှုတော်ကို လုပ်ဆောင်လိမ့်မည်။

၉ ငါ၏လူမျိုးတို့ကို ကယ်လွှတ်ရန်၊ သင်တို့အတွက် ပေါ်ထွန်းစေလိမ့်မည်ဟု ငါမိန့်တော်မူလေသည့် မောရှေကဲသို့ သူသည် ကြီးမြတ်လိမ့်မည်၊ အို ဣသရေလအမျိုးသားတို့။

၁၀ သင်၏လူမျိုးတို့ကို အဲဂုတ္တုပြည်မှ ကယ်လွှတ်ရန် မောရှေကို ငါပေါ်ထွန်းစေမည်။

၁၁ သို့ရာတွင်၊ မြင်သောသူတစ်ဦးကို သင်၏ ရင်သွေးမှ ငါပေါ်ထွန်းစေမည်၊ သင့်ရင်သွေး၏ အမျိုးအနွယ်များသို့ ငါ၏နှုတ်ကပတ်တော်ကို ဖော်ပြရန် သူ့အား တန်ခိုးကိုလည်း ငါပေးတော် မူမည်—ငါ၏နှုတ်ကပတ်တော်ကို ဖော်ပြစေခြင်းသို့ သာလျှင်မဟုတ်၊ ကိုယ်တော်ရှင်မိန့်တော်မူသည်မှာ၊ သူတို့၌ ထွက်သွားနှင့်လေပြီဖြစ်သော ငါ၏နှုတ်ကပတ်တော်ကို နားသွင်းစေသည့်တိုင်အောင်ပင်တည်း။

၁၂ သို့ဖြစ်၍၊ သင်၏ရင်သွေးက ရေးလိမ့်မည်။ ယုဒ၏ရင်သွေးကလည်း ရေးလိမ့်မည်။ သင့်ရင်သွေးရေးမည့်အရာနှင့် ယုဒ၏ရင်သွေးရေးမည့်အရာတို့သည်လည်း မှားယွင်းသောဩဝါဒတို့ကို ချေပစေခြင်းငှာလည်းကောင်း၊ ရန်တွေ့ခြင်းများကို ရပ်တန့်စေခြင်းငှာလည်းကောင်း၊ သင်၏ရင်သွေး၌ ငြိမ်းချမ်းခြင်းကို တည်ဆောက်စေခြင်းငှာလည်းကောင်း၊ နောက်ပိုင်းကာလများ၌ သူတို့ဘိုးဘေးတို့အကြောင်း အသိပညာသို့၊ ထို့အတူ ငါ၏ပဋိညာဉ်များအကြောင်း အသိပညာသို့လည်း သူတို့ကို ဆောင်ယူခြင်းငှာလည်းကောင်း အတူတကွပေါင်းစည်းလိမ့်မည်ဟု ကိုယ်တော်ရှင်မိန့်တော်မူ၏။

၁၃ အို ဣသရေလအမျိုးသားတို့၊ ခပ်သိမ်းသောငါ၏လူမျိုးတို့၌ ငါ၏အမှုတော်ကို အစပြုမည့် ထိုကာလ၌ သင်တို့ထံ ပြန်လည်ပေးအပ်သည့်တိုင်အောင်၊ အားနည်းချက်ရှိရာမှ ထိုသူကို အားကြီးစေလိမ့်မည်ဟု ကိုယ်တော်ရှင်မိန့်တော်မူ၏။

၁၄ ဤသို့အားဖြင့်၊ ယောသပ်က ပရောဖက်ပြုဟော၍ဆိုလေသည်ကား၊ ရှုလော့၊ ထိုမြင်သောသူကို ကိုယ်တော်ရှင်ကောင်းချီးပေးတော်မူလိမ့်မည်။ သူ့ကို ဖျက်ဆီးရန်ကြိုးစားသောသူတို့သည် ရှုံးနိမ့်ကြလိမ့်မည်။ အကြောင်းမူကား၊ ငါ့ရင်သွေးနှင့်စပ်လျဉ်း၍၊ ကိုယ်တော်ရှင်ထံမှ ငါရရှိထားလေသည့် ဤကတိတော်ကို ပြီးပြည့်စုံစေလိမ့်မည်။ ရှုလော့၊ ဤကတိတော်၏ ပြီးပြည့်စုံစေခြင်းအကြောင်းကို ငါစိတ်ချ၏။

၁၅ သူ့အမည်ကို ငါ့နည်းတူ ခေါ်ကြလိမ့်မည်။ ထိုအမည်သည် သူ့အဘ၏အမည်အတိုင်း ဖြစ်လိမ့်မည်။ ထို့အတူ၊ သူသည် ငါကဲ့သိုပင်ဖြစ်လိမ့်မည်။ အကြောင်းမူကား၊ ထိုသူ၏လက်ဖြင့် ကိုယ်တော်ရှင်ဖော်ပြတော်မူမည့်အရာသည်ကား၊ ကိုယ်တော်ရှင်၏တန်ခိုးတော်အားဖြင့် ငါ၏လူမျိုးတို့ကို ကယ်တင်ခြင်းသို့ ဆောင်ယူမည့်အရာပေတည်း။

၁၆ ထိုမှတစ်ပါး၊ ယောသပ်က ပရောဖက်ပြု၍ဟောလေသည်ကား၊ မောရှေ၏ကတိကို ငါစိတ်ချသကဲ့သို့ပင် ဤအရာကို ငါစိတ်ချ၏။ အကြောင်းမူကား၊ သင်၏အမျိုးအနွယ်များကို ကာလအစဉ်အဆက် ငါကာကွယ်စောင့်မမည်ဟု ကိုယ်တော်ရှင်သည် ငါ့ကို မိန့်တော်မူလေပြီ။

၁၇ ကိုယ်တော်ရှင်မိန့်တော်မူလေသည်ကား၊ မောရှေကို ငါပေါ်ထွန်းစေမည်။ လှံတံအားဖြင့် သူ့အား တန်ခိုးကို ငါပေး၍၊ စီရင်ရေးခြင်းကို သူ့အား ပေးမည်။ သို့ရာတွင်၊ ငါသည် သူ၏လျှာကို မလွတ်စေသဖြင့်၊ သူသည် စကားများစွာမပြောရ။ အကြောင်းမူကား၊ စကားပြောခြင်း၌ သူ့ကို အားကြီးစေမည်မဟုတ်။ သို့ရာတွင်၊ ငါ့ပညတ်ကို ငါ့လက်၏လက်ချောင်းဖြင့် သူ့အဖို့ရေး၍၊ သူ့အတွက် စကားပြောသူတစ်ယောက်ကို ငါခန့်ထားတော်မူမည်။

၁၈ ကိုယ်တော်ရှင်မိန့်တော်မူပြန်လေသည်ကား၊ သင့်ရင်သွေးအတွက် ငါပေါ်ထွန်းစေတော်မူမည်။ စကားပြောသူတစ်ယောက်ကိုလည်း သူ့အတွက် ငါခန့်ထားတော်မူမည်။ ထို့အတူ၊ ငါသည် ရှုလော့၊ သင့်ရင်သွေး၏စာကို ရေးစေမည့်အကြောင်း၊ သူနှင့် သင့်ရင်သွေးကို အခွင့်ပေးတော်မူမည်။ သင့်ရင်သွေး၏ စကားပြောသူသည်လည်း ထိုအရာကို ဟောပြောလိမ့်မည်။

၁၉ သူရေးမည့် စကားများသည်ကား၊ ငါ၏ဉာဏ်ပညာတော်အတိုင်း ကောင်းမွန်၍ သင့်ရင်သွေးသို့ ရောက်မည့် စကားများပေတည်း။ ထိုအရာသည်ကား၊ သင့်ရင်သွေးသည် သူတို့ထံ မြေမှုန့်ထဲမှနေ၍၊ တောင်းလျှောက်လေသကဲ့သို့ ဖြစ်လိမ့်မည်။ အကြောင်းမူကား၊ သူတို့၏ယုံကြည်ခြင်းကို ငါသိ၏။

၂၀ သူတို့သည်လည်း အထူးသဖြင့်၊ မိမိတို့နောက်၊ မျိုးဆက်ပေါင်းများစွာတို့ ကွယ်လွန်ကြလေပြီးသော်မှပင်၊ မြေမှုန့်ထဲမှဟစ်ကြွေး၍၊ နောင်တရခြင်းကိုပင် မိမိတို့ညီအစ်ကိုများထံ၊ တောင်းဆိုကြလိမ့်မည်။ ဤသို့အားဖြင့်အချိန်တန်လာလတ္တံ့သောအခါ၊ အကယ်စင်စစ်၊ သူတို့စကားများ၏ ရိုးရှင်းခြင်းအတိုင်း သူတို့၏တောင်းဆိုသံများ ထွက်ပေါ်လာလိမ့်မည်။

၂၁ သူတို့၏ယုံကြည်ခြင်းကြောင့် သူတို့စကားများသည် သင့်ရင်သွေးများဖြစ်သော သူတို့၏ညီအစ်ကိုများသို့ ငါ၏နှုတ်မှ ထွက်တော်မူလိမ့်မည်။ သူတို့၏စကားအရာ၌အားနည်းချက်ကို သူတို့၏ယုံကြည်ခြင်းအားဖြင့် အားကြီးစေအောင် ငါပြုတော်မူမည်ကား၊ သင့်ဘိုးဘေးတို့ထံ ငါပြုလေသည့် ငါ၏ပဋိညာဉ်ကို အောက်မေ့ခြင်းသို့တိုင်အောင်ပေတည်း။

၂၂ ယခုမူကား၊ ရှုလော့ ငါ့သားယောသပ်၊ ဤကဲ့သို့အားဖြင့် ငါ၏ရှေးဘိုးဘေးတို့က ပရောဖက်ပြု၍ဟောခဲ့ပေ၏။

၂၃ သို့ဖြစ်၍၊ ဤပဋိညာဉ်ကြောင့် သင်သည် ကောင်းချီးခံစားရ၏။ အကြောင်းမူကား၊ သင်၏အမျိုးအနွယ်တို့သည် ထိုစာအုပ်မှစကားများကို စေ့စေ့နားထောင်မည်ဖြစ်၍ ဖျက်ဆီးမခံရကြ။

၂၄ ဣသရေလအမျိုးသားများနှင့် သင့်ညီအစ်ကိုများ၏အမျိုးအနွယ်များသို့ များစွာသော ပြန်လည်အပ်နှင်းခြင်းကို ဖြစ်ပေါ်စေခြင်းအထိ၊ အလွန်ကြီးသောယုံကြည်ခြင်းနှင့် ကြီးစွာသောအံ့မခန်းချီးမွမ်းဖွယ်အမှုတို့ကို ပြုခြင်းငှာလည်းကောင်း၊ ဘုရားသခင်၏အမြင်၌ ကြီးစွာသောအရာတို့ကိုပြုခြင်းငှာလည်းကောင်း၊ ဘုရားသခင်၏လက်တော်၌ တန်ဆာတစ်ခုဖြစ်လျက်၊ စကားအရာနှင့် အကျင့်အရာ နှစ်ခုစလုံး၌၊ များစွာသောကောင်းမြတ်ခြင်းကို ပြုမည့် ပေါ်ထွက်လာသော အားကြီးသူသည် ထိုသူတို့၌ ရှိလိမ့်မည်။

၂၅ ယခုမူကား၊ ယောသပ်၊ သင်သည် မင်္ဂလာရှိ၏။ ရှုလော့၊ သင်သည် အသက်ငယ်၏။ သို့ဖြစ်၍၊ သင်၏အစ်ကိုနီဖိုင်း၏စကားများကို စေ့စေ့နားထောင်လော့။ ငါပြောလေသည့် စကားများအတိုင်းပင် သင့်အဖို့ ဖြစ်လိမ့်မည်။ သင်၏ သေအံ့ဆဲဆဲအဘ၏ စကားများကို သတိရလော့။ အာမင်။